Uqqautait uma Pallakpaup Pope Francis, Iqaluit

Halu Nukatka Najakalu, unnukut!

Halluqaga una Kuin Kivraqtuqtia, tatvalu tamagaluffi, arhuut umattimnit. Kuviahukpiaktunga tahamaniqatigiraffinga. Quanaqpiaqtuhi tamaffi nipliutiffinik tungahuktittitiagaffinga, tatvalu ingiutiffingnik, nummiutiffingnik attuqtuyagaffilu, Kuviahukpiarhunga alliannakpiaktuhi tamaffi!

Qangahannuq, Nallarhimayunga iliffingnik, ilihagiaktittauhimayut taimani taimaninguliktuq. Quanakpiaquhi illirahuqhimaittumiq nipliutigihimagangni unipkarhuhi hapkuninga naklikharutigihimayaffingnik. Taimatuvalaaq uvamnik ikpiritiaqtaga hamna ningaumatjutigivlugu kangunaakpiakhunilu ihumaginnaliktaga kanganguktuq. Ublumi huli, tahamani uqqalagumayunga tuhaktitumavluhi tatva mamiaqpiaqtunga tatvalu turhiutiyunga illiffinik naklingnaugalluqtuq hapkua kuvianaitunik uittayaqnaqtunniq anniktigihimangmata ikkitungitut pallait ikkayuqtuihimayut maligaitnik hapkua illiitquhiuyunik alanguktirihimangmata innuhiitnik tahapkunani ilihakviuhimayuni. Itqaqtiitauhimayunga unipqaqtuqaqmat inniknimit, uqqalarhimangmat pinnikpiaktunik tungaknik hivuliktiqarhimagaluakmata hapkua nunaqaqaqtut taimani hapkua ilihariaqviuhimayut attuliktiitautinagit. Inmi umma unipkagihimayait taimani, hapkua qatangutigiit ataatatiangit anaanatiagit, angayuqangit nuttaraitlu kuviahurhutik innuqatigiikparhimayut, upingarhangukangattut, kupanuanuit nivyallukaktut kuvianaktut tuharhugit. Kihiani kilamiikalak – nutqaqallaktuttut uqqalaktuq – hapkua kupanguanuit nipairhutiyut: Hapkua qattangutigiit aviitauhimayut, nuttaranuit mikkiyunuit aullaktiitauhimayut ungahiktumut angilgaringitamingnut. Ukkiuktutut kuvianaikallarhimayuq.

Unipkarhiyauyut hapkua ulluriannakpiaktut; tatvalu ikpingnaktut kangunnarhutiklu. Taimaatuvalaaq, allangaakpiaktuq hapkuninga ukkauhiitnik Godip tatvalu maligakjuangitniit hapkuninga: "Pittiaklugik appait amamaitlu, taimavalaak ubluttit hiviituniaktut tahamani nunagiyakni tatva Godip ilingnut tunnihimayaitnun" (Ex 20:12). Taimaitungnangittuq iliitquhiq ammihunut katangutigiitnun, tamaihimayaat nuttaqatik arhaaktauhimangmata angayuqamingniit tatvalu inmi illiitquhiqtuttitik ihumagiyauhimayut uluriaqnaqturiyauvlutik allangakpiakturiyauvlutik. Hapkua arhuukhaktauhimayut alangukutauhimayut itqaumatjutauyut huli makpiraqpaqmi unipkariyauhumayuq, taffuminga angutimik Naboth-mik (cf. 1 Kings 21), piyumangitmat tunniyautquyauhimayumik haffuminga immiurutimik inmi aittutigihimayaminik qittungaminiit tahapkununga attaniuyunut, arhuukhakpiakhutjuk arhaagumahimayaat.tatva taimatutauq ihumagingmiyavut arhuukpiakhutik naruhuukhimayut uqqautigivlutjuk una Jesusi taimaihimangmata hapkua uiitayaknaktunik kuvianaitunik anniktirihimayut hapkuningalu mikkiyunuitnik nuttaqanik (cf. Mt 18:6, 10). Qanuralluq kapiananktunik uiitayaaknaktunik aviitihimayut angayuqanguyunik nuttaraitniklu, hikkumiitihimayut illagiiktunik katangutigiiktuniklu, anniktirihimayut narugivlugit hapkua mikkiyut nuttaranuit!

Hallu illannaka, tahamanitugut piyumavluta katikatigiyumavluhi hivumuukatigiyumavluhi mamihautirhanik ikkayuqatigiikluta taima. Ikkayuqtauluta Godimiit, turhiktugut ikkayutirhaptinik qauyiyaqpalirutikhaptinik qanuriliuktauhimayut ihumagilugit taima hivumuvaliatjutirhaptinik aplurahuakluta tahamanga taaktumiit kinguptingniit. Taimaitiitlugu piiktinahuaklug tahamna taaktuq, hadja ublumi, taimatutauq katimahimagapta Masimi, ikkitigaffi uminga qulliqmik. Taimanginaungituq una qulliq ikkataungmat qaumaqutauyuq ukkiugalluq taaktitlugu, qaayungnakpiaktitlugu hila uqququtaungmiyuqauq. Taimaititlugu, aktumatiaktuq innuhikmut. Ublumiluttauq taima, una qulliq aullatiaqtuq pinnikpiarhuni naunaipkutauyuq innuhikmut, qaumariqpiarhuni innuhiq nutqangangittuq unnuaq taraaluaqtitlugu. Taimatauq ilviit taimaittuttit, hamna uttiktirutta innuhikmut nungulaittuq, hamna qaumanik qaumariqtuq kinaugaluaqat qammitiyungnangittuq.

Quanaakpiaktuq tahamunga Nunavumut tikkittitauyungnagama, tahamani Inuit Nunangatni. Ihomarhutigiyatka, tatva katimatagapta tatvani Rome-mi, hapkua ungahiktut nunnat nayugariyaqhi qanga taimangaralluq tatva allaat inuit ihumagiyaat arhugungnaqtut. Iliffi quviagivluhiuq nayuragiyaqhi, pittiarhugu, piikpagiyarhi tatvalu annaumavigiyarhi, tigumiarhugu tunniqattaktarhi qattanguiffinnut kinguvarhaffingnutlu, atturhugit hapkua illiitquhiqtuttit pittiarhugit hapkua innikniit, pittiarhugu ikkayutigivlugu munagitiarhugu tahamna avatigiyarhi. Kuvianaktumik pittiaqatigitiaktuhi tahamnalu pinniktuq nunagiyarhi nayugarinakhugu, taimaitmat hakkugirhuni nungulaittuq tatvalu qaumariqtuq hila taaraluaqtitlgu ukkiugalluq. Kihianittaq hamna nuna, taimattutauq tamaita inuit, huli qayangaqtuq taimatut munariyautiagiaqaqtuq. Munaritiaqniq, ilihainniq tatvalu iliitinnik qanuq munaritjutikhanik: hamna havarhitautitlugu inulramiit ihumagivlugit, ikkayuqtauvlutik innikniutimingnit, turhiutauhimayuq! Munaritiaqlugu hamna hilajuak, munaritiaqlugit hapkua innukatittit, munaritiaklugulu hamna illiitquhituqarhi.

Tatvatauq uqqautigiyumangmiyaga hamna iliffingnut, Inuinait innulramiit, hapkua kinguvarhavut hivulikniakmata nunami tatvalu ublumi illiitquhiktutaitnik. Uqqalautiyumayaffi tamaffi, uqqauhigiyaitnik uma ayungitiaqtup tiitiraqtiuyup: "Tahamna tunniyauhimayuq appaffingnit, ilihatiarhimayagiaqaqtuq hivulikpamik ilviit nanminigiliktinagit" (GOETHE, Faust, I, Nacht). Taimainginagiaqaguiqmat attuinaklugu hivulivut innuhianik, piyagiaqalikmat ikkayugaluaklutik attuqlugit hapkua ilingnut aittutauhimayut. Irhiitaililuttit, taima, huli nallarhimaakluttit uqqautjiyunik innikninik, tigumiaklugit hapkua hivuliit attuqpagait taimatut tiitiaraqpaligiakni nuttanik makpiraqniq illiitkuhiitnik, naakliktagiaqaqtuttit, tungavigilugit hapkua ukpiknaktut tatvalu Inuitlu ihumagilugit, piqqatauvalialutik illauvaliayagiaqaqtuttit! Ikkayurumavluhi tamna qulliq qaumaakpaliquvlugu, uvangatauq, innikningukpiarhunga, hatkitiyumayunga qanuq pinagunik ihumagiyamnik uqqalautiyumavluhi.

Hivulikpaak una : Piihurhimaakluhi hivummut kulvakpalianahuaklutit. Innugaffi tahamani ungahikpiaktuni avikturhimayuni tahamani ukkiuktaktumi. Itqaumatjutigitquyatka hapkua illingnik turhiktuqtut qulvakpaliquvlutit, ihumagihimaitumik hapkua ihumagitquiyut ilingninaknik taimatut ihumarhuquvlutit ilviit aliagiyaknik piyumayakniklu. Illanatka, hannayauhimayutit "innarhimaitumik", huliyarhaqagainguvit tatvalu alliahutiqaruvit attuqataklugit, kihianiitauq qulvakpalikutiginahuaklugit, hivumuvaliatjutigilugit nakunirhamut, ukpingnaktumik pinniktumiklu piyumayaknik illipqayarhanik ummatingni, pikparilugu una Godikput tatvalu ikkayuqataklugu una hillatigiyat. Ihumagihimaitumik hapkua innuhiknun attayut piyumagaluarhugit innuqnaqtut qillaqtut kingikpalaqmata. Ilviit hannayauhimayutit tingmiqattaquvlutit, ikqimilugu hamna irhinaipkutigilugu ukpiknaktuq tatvalu pinnikutigilugu hamna maligauyuq, tatvalu "qimilguqataklugu hamna ilviit mamiagiqattaqtatit, nakliktaquvlutit, kivgaktuqattaqlugit inuit tatvalu illarhaqhiuqattaqlutit" (cf. Inunnguiniq Iq Principles 3-4). Nauttiqtuiqattaqlugit hapkua mammiahutigihimaitumik tatvalu nakliktaklutit kittunik namungauligainguvit; alliahuqattiginahuaklugit hapkua piqqatigiyatit; hivumuvalianahuaklutit tatvalu pittiaqattarahuaklutit.

Kihiani – uqqalagungnaktutit – taima innunahuakluni ayungnatqiyauyuq tingminahuamiuninganik! Naunaitpiaqtuq, ayungnarhivakaluarhuni, hapkua takkurhauqatangitmata "arhuuktut tungait" pinnahuakpakaluaktut qulvakpaliqungnata, pitailinahuarhutik piyumayaptingnik, tatvalu quviahuqunatta. Kihiani ihumagihimaaklugu hamna ukkiuktaktumi ikpiriyauvaktuq taivaktavut uqqauhiatut Spanish-tut taivaktavut immatut "charrán". Pitjutigingitat annurip uvalunin allangutaungittuq unnakninganik nutqautaungittuq tingmitjutirhanik akianiit nunnakjuap tatvunga akkianut. illaniitauq, ahiagut apkutiqaqmiyuq, nangaqatarhuni, qanuritagangat annuri attuqattarhugu…, kihianittauq naunaitiarhimayumi ihumarhutikhaqqaqmiyuq tatvalu tikkitparhuni uppautiyamingnut. Paaruttiqataqniaqtatit hapkua inuit piyumayaknik pittailinahuaktunik, hapkua uqqautjiqattaqniaqtut piyumayaknik takkiuniit pingitqaluaklugit, ilviit illiquaqutirhanik kihiani pinnahuaqattaqlutit. Tatva ilviit illingnik appiriyagiaqaqtutit: Huuq uvanga arhuukhunga pinnahuaqattaqtunga allaat inuit ukpiringitaitnik? Uvalunin taitai: Qanuq uvanga "tingmiyungnaqinga" tahamani hilakjuami hamna tamaat arhukhaktauqattaqtitlugu ihuinaakutauyunit, anguyaktunit, kukikataktunit, pittiangituniit, avatingnik ahiruqtigiyunik, hiuruyakataktunik ihuinaaktuqarahuaktitlugu, ihumagiyautiangitut hapkunanga hivuliktiugaluaniit? Taima appiqutirhaqagaluaktitlugit, qanuq kiutjutirhaqaqat?

Imaatut uqqautiniaqagit: ilviit kiuyungatiaktutit! ilviit, nukaak, tatvalu ilviit, najakuluq. Taimanginaungituq taimaaktigangavit, tatva akkimangitutit, kihianiitauq hamna hivurhikhak ilviit tigumialiktat. Hamna nunagiyat ilingnik irniukvigiyat, hamna nunagiyaat, tatvalu niriugiyatit nunaqatingnit, hapkunagalu kittuniit, turhikvigingitqaluakhugit, niriuqattaqtut ilingniit himiiktauyungnangitunik pinniktunik tigumiaktitlutit hivunirhamut: hapkua hunavaluit ilviit tigumiaktatit, taimaitmata "tamapa ajikutakangitugut" (cf. Principle 5). Hamna hilakjuak innuvigiyat pinniktuq aittugauhimayuq illingnut: pikpagilugu, taimatutauq Godtiptatut, uma innuhiknik aitturhimayatit, kuviannaktuniklu, pikpagiyaatit taimatut hannahimayuq pinniktunik pihimayarhaknik. Godip ippirayuitaatit, ihumaginarhutit. Ukpiriyaatit ayungittaknik tunnihimayatit. Turhiutirigangani, qauviginiaktat tatva hamna apkut attuquya ilingnut malikuvlugu kungmuinak ilingilyayuq. Qauyivaliutiginiaktat kiviaguvit kungmut qilangmut turhialigairuvit, taimavalaak ihumarigaikungni tatvani hanniraqmi. Qauyivaliutiginiaktat una Jesusi, tatvanga hanniraqmin, tikkuaktulaituq ilingnik, ikkihimayatit tatvalu akhurhaktatit nakuatut, taima ukpirigamitit taimaitkaluaktitlugo ilviit ilingnik ukpigihuigaluaktitlutit. Taimatut ilviit nikkaluqtailiqattagit, taimatut mamialaitutit. Hivumuvaliagalitpaklutik aullaakvigiyaknun, "aplukataklutit nakkunirhauyumut" (cf. Principle 6). Hamna ingilgatjutigiyat innuhiknun nakuatut ingilgaraliitpaklugu: hivumuut kunmugaliitpaklutit!

Una tuglia uqqalautigiyumayaga: Qaillutit qaumayumut. Quvirhimagaiguviit uvalunin naguriyaugainguvit, ihumagilugu una qulliq: turhiutiqaqtuq ilingnik. Hunamik turhiutiqaqqa? Tahamungaktitauhimayutit qaitquyauvlutik tatvunga qaumanikmut ubluk tammat. Tatvaninaungituq nalliutigaikpat innuvigiyat, taima nigiuriyaungitqaluakhutit, kihiani ubluk tammat. Ubluk tammat turhikviuyutit nutaakmik qulliqmik tigumiaquyauvlutit hilakjuamut, tahamna kipliktuq iriiyat, una kipliktuq qunguyuqangaviit, qaumaniqlu pitiakutigiyat nakkuatut ilviitnak tigumiaktat. Kihiani, uppautilutit tatvunga qaumaniqmut, innukaniriaqni, hallagiakaktat ubluk tammat hamna taaktuq. Taimaitmat ubluk tammat hallakutikataktuq avatingnut hamna qaumaniq taaktuqlu, taimatut attugaungittuq tatkani, kihiani illuptingni tamapta. Maligaluaklugu hamna qaumaniq piyagiaqaqtavut irhigihimaitumik tatvalu ummatiptingnit ihumarhutigitiagiaqaqtvut attuqtailinahuaklugu hamna taaktuq hakluyuq. Tukkiqaqtuq imatut "nakuatut attuqattaqlugit hapkua innutiaknaktut" (cf. Principle 1), malikahimaitumik hapkuninga qaumaqattaqtunik qilaminuaq tamahaktaktunik, qaraaqtautiniq punnuinaqtuniq qaraaqhimaituniq. Hapkua "tautuktauqavuqtut, kuviahuutauqaffuktut", taima una Pallakpak Saint John Paul II uqqalaqtuq tahamani Kanatami: "Tatva ahianik taakniqangituq taimatut taaktihimayup hapkua ihumaitihimayut inulramiitnik uqqautjaungangata hapkunanga tun'ngaliqiyuniit piiktinahuarhugu hamna qaumaniq ukpiriyaat tatvalu niriugiyauyuq pikpariyauyuqlu" (Uqqautjiyiuyuq Hilakjuami Inulramiit Ubluutani, Toronto, 28 July 2002). Halu nukkata, najakalu, Jesusi qannigihimayatit tatvalu qaumarhumayatit ummatingni. Uqqalarhimayuq inmi: "Uvanga qulliuyunga hilakjuami" (Jn 8:12), tatva huli uqqalautihimayait hapkua maliiktigiyai: "iliffi qaumaqutauyuhi hilakjuami" (Mt 5:14). Iliffitauq, taimaatauq, qaumaqutauyuhi hilakjuami taima qaumaqiyauniaqtuhi ayurhagaluakluhi piiktinahuaklugit hapkua taakutauyut uiitayaaknaktut umatingniit.

taimailiuriaqagumta, illitiariaqaqtavut hamna attutiarahuaklugu, hamna arhuuknagaluaktitlugu "ayuqnaraluaktitlugu ihuigiyauqatarahuakluni qinirhiahimagiaqaqtavut hapkua ihuarhautikhat" (see Principle 2). Hamna illiitiarhimayagiaqaqtavut ubluk tamaat atturahuaklugu tahamna qaumarahuaklugit hapkua taaktihimayut. Hannanahuakluni nakuatut hilakjuamik, Makpigakpakmi uqqarhimayut, Godip taimatut hannahimayuq, avikhurhugik hamna qaumaningit tatvalu taakningit (cf. Gen 1:4). Uvangutauq taima, nakuyumik pivaligumagupta, illiitagiaqaqtugut naliangungmangata qauyamyut tatvalu taaktut. Qanuq sullarutiniaqita? Hivulikpamik ilingnik apiriyungnaktutit: hunauvat hapkua qipliriiqtut tatvalu piyumayauningit kihiani huli inuilakmiutauyuttut innaktut? Tahamna ikpigiyat taakmiutauyuq! Tatvatauq, hunauva hamna uvamnut nakunirauva tatvalu ikpingnakninga hamna uqqiliyumikhimaliktuq ummatimni, taimaitqaluaktitlugu nalliaknik alliagiyamnik attuktailinahuaklugit tatvalu tahamna tuuhugiqataqtamnik kiplingugahuarhimaitumik? Tahamna qaummaninga! Tatvalu – appiriffaakniaktunga – hunaungmangat hamna hakkugingninga pitjutigivaktavut avikturahuakhutigu hamna qaumannit taakniklu illuptingni, tatva pitjutigiyavut uqqalaqangapta "kingilugit" hapkua huinikinikut kuvianaitunik tatvalu "angirhimalugit" tamaita hapkua nakugiyauyut? Tahamna ihumarhuqniq. Hamna ihumarhuqniq tukikangituq imatut huliyukakluni piyumayamnik tatvalu uirinahuakluni. Ihumarhuqniq hamna tukiqangituq imatut uvamnik niamgiyaagumanikmik, kihiani qanuq ikkayugungnaqtunga allanik. Ihumarhuqniq hamna piyumainarhimaitumik kihiani kiutiaqatarahuakluni pitquyauyuniq, hama Ihumarhuknik, pikatauluni innuhikmut, hamna aittutautiarhimayuq tatvanga kilangmitumiit Angutiptingnit qaitauhimayuq.   Una titiraqtiuyuq, ihumayuq hunauva hamna nakkunirhauyuq qaitauyungnaqa iqniriyauyumiit aakpangmiyut, hapkua pinnikpiaktut tairuqtauhimayut uvanga taigurumayatka:

"Appiriyauhimayuq una appariyauhimayuq imaqaaq nakunirhauva hapkua nutaragiyait pikpagiliqatjuk inniktinamik, inmilu angutingurami, ihumarhukluni […]. hadjauyuq, uvanga angutigiyaatga, uqqaqtuq Godiqput,qauyimayatka hapkua innuhiriyait. [...] Tamaita hapkua kiotjutauhimayut tahamani hilakjuami hapuniakutauyut uvamnut, tatvalu tunnihiyungnaktunga takkuyumavlugit pinniktumik ihumarhuktumik angutimik [...]. Hamna ihumarhutauyuq, hamna ikkayutaungituq taima uvanga tunnirhitjutigiyaga, uqqarhimayuq Godiqput… Hamna ihumarhutikhat hannavalianahuaklugu, hamna ikkayutauyurhaq Hamna hatqitpaliatjutirha ihumarhutikhap, haffuma ikkayutirhap" (C. PÉGUY, Hamna Nallurhautauninga Godip Piitiaqninga).

Hapkua quviahutigivagait uma Godipta: immatuinaungittuq hallagilugu, kihiani tunirhimaluta nuttaqatut pikpagilugu una Godikput, ihumarhutigitiaklugu. Tatva kuviagitqugungni una Godikput, taimaitagiaqaqtuq: tikkuarhimalugu hamna nakunirhaq! Hakkurigiaqaqtugut tamapta, nukkatka, najakalu! Tigumilugu hamna ihumarhutigiyat! Happiliktaililutit arhugungnaktunik ihumaliugiaqaguvit! Uppautiqataqlutit qaumaniqmut ubluk tammat!

Kingulikpaak, pingahuat uqqalautigiyumayaga: Pikataulutiit ikkayuqatigiiktunik. Inilramiit ikkayuqatigiiqanamik nakutumik pittiakatigirhutik piyunaktut, avalingarhimaitumik. Iliffi inulramiit ubluriattut kilakmi ittuhii, pinnirhutik qaumaqutauyut nunami. Hamna pinnikutaat qaihimayuq inmingniit illumiutariyamingniit, pikatimingnit katikatigiyamingniit, taima qaumayunik taarhigangat qauyamuqauvaktut tahamani hilakjuami. ilviitauq, Qaitquyauhimayutit qullikpanut qillangmut qaumaqutauniagavit tahamani hilakjuami, qaumaqatiriqluhi, tamaffi pikatigiikluhi. Inulramiit inmingnik kattirhuqattagiaqaqtut, ingilgaranginaklutik: ubluk tamaat innuilakmiitariaqangitut, hivayautirallattik amirinnaklugu! Hapkua mannilait hikkutuqait maniqami tauturhugit itqaumanaqtuq Kanatami alliagiyauqpaiqtuq ullapqitjutaat, hamna haaqiqniq. Qanuqli Kanatamiut akkiqataqat hapkuninga hilakjuami Olympic-nik akkitakutinik? Qanuq ukkua Sarah Nurse uvalunin Marie-Philip Poulin ittiqtitiqataqatjuk hapkua goal-nik? Haqqirangata hapkuninga illaliutiqatatait nallatiaknik tatvalu inmikut ayungitamingnik piqqatarhutik, parnaiyautimingnik attuqatarhutik tatvalu inmikut timingmigut hakkugingnikarhutik; Kihiani ikkayuqatigiiknik hamna ikkayutauluaktuq, taimaitariaqaqtut nallunaqatakmata tamaita ullapqiligangata qanuritungmangata. Hamna ikkayuqatigiiknik tukiqaqtuq ukpiriyagiaqaqtat, taima piyumagungni hapkua ihumagiyatit, ilvit avallitumik pilimaitatit; tammatkiumayagiaqaqtuhi, ayuiraqatigiiqattaqluhi qilamiurhimaitumik. Ikkayuqattigiiknik tukikakmiyuq imatut allanik arhuuktunik innirhaqaqtitilugit ilvinnaungituq unnaguirhikatigiiqattaqluhi haimarhaqqatigiikluhi tamaffi ikkayuqatigiikpakluhi. Taimatut hamna ikkayuqatigiiknik allianaktuq!

Illangatqa tamaffi, kuunmut pihurhimaakluhi, haffiqatakluhi qaumaniqmut ubluq tamaat, tatvalu piqqatauluhi ikkayuqatigiikpakluhi! Taima hivumurallitpakluhi atturhimaaklugit hapkua illiitquhiqtutirhi tatvalu atturhimaaklugu hamna tuharuminaktuq Inuktut uqqauhirhi. Uvanga niriuqtunga qingautigilugu, tatva nallakpaklugit hapkua innikniutirhi tatvalu atturhimaaklugit hapkua illiitquhiktutirhi tatvalu illikut ihumarhukpakluhi, ilviit iqqinminiaktatit hapkua ukpingniaktut illipqayait tatvalu tunniyauhimayut hivuliitnit, tatvalu qailuhi takkuniaraffiuk una Inuinak qaunga uma Jesus Christusiup. Nakuyumik umattimnit tunnivagit, iliffingnut tamaffi uqqautiyaffi imatut: qujannamiik! [Quanaqpiaqquhi tamaffi!]