Uqqautait uma Pallakpaup Pope Francis, Maskwacis

Aknauyuq Kuin Kivgaktuqtia,
Mr Kanatami Hivulikti,
Halu nunaqaqaqtut innutait hapkualu Maskwacis tatvalu haffuma nunautait hapkua Kanatamiutlu,
Hallu nukkatka najakalu!

Uttaqiraqpaqtunga qaiyumavlunga tahamaniqatigiyumavluhi! Tahamani, hamna nayuqtavut pitjutauhimangmat ullurianaqtuniq attuqtauhimayunik, hivulikpamik uqqalagumayunga ihumagiyamnik haffuminga mamiahaakutinik qingautjiyumavlunga. Tahamunga nunaqaqaqtut nunagiyaitnun uppautihimayunga uqqarumavlunga iliffingnut ikpigiyamnik quviagingitamnik, turhiaqvigiyumavlugu una Godikput mamianaakvigilugu, mamihautirhanik hatqiquvlugit, tatvalu ikkayuqatigiikutirhanik, qanniklihimayumavluhi tatvalu turhiaqatigiyumavluhi tatvalu iliffingnik qingautiyumavlunga.

Itqaumayunga katimaqatigiqatagaffi tavani Rome-mi hapkua tatqirhiutit qangiqtuni. Tatvuna, aittuqtauhimayunga ukuninga slippanik naunaipkutautquvlugik hapkuninga anniktiktauhimayunik hapkua nunaqaqaqtut nuttaranuit, ihumagiluarhugit hapkua, mamiana, uttingitut angilgamiknun nammut aullaktitauhimavlutik ilihagiaktitauhimayunnuit. Uqqautjauhimayunga uttiktiitquvlugik ukkua slippanuuk tahamunga uppautiguma Kanatamut, tatva uttiktiniaktatka uqqallaqaaqlunga, taimatuvalaak itqaumayumayunga tahaffuminga naunaipkutauyumik, taima hapkua tatqirhiutit qangirhimaliktitlugit uvanga ikpigihimaaktatka hapkua mamiahuqniq, quvianaittuniq tatvalu qangunaqpiaqtuniq atturhimangmata. Itqaumavlugit hapkua nutarannuit ullurianaaqpiaqtuq; arhuugungnarhuni pitjutigiyagiaqaqtavut tamapta ihumagitiagiaqaqtavut hapkua tamaita nuttaqat pitiaktauyagiaqaqtut pikpagilugit munaritiagiakaktavut. Kihianiitauq, ukkua slippannuuk hivumutjutigiyagiaqaqtavut apqutigilugiq, ingilgatjutigiyagiaqaqtavut piqqatigiikluta tamapta. Pihuqatigiikiaqaqtugut, turhiaqatigiikluta tatvalu havaqatigiikluta, taimatut hamna ikpigiyauhimayuq anniktiqutauhimayuq kinguani hivumutjutigilugit hivunirhami appirhuiyiuyut ukturiangatjuk ihuiunakutauhimayut, mamihautigilugit tatvalu ikkayutigilugit.

Tatva taimatut hamna hivulik mamianaakutinik turhiakutigiyatka iliffingnik tahamani turhiaktunga, taimanganiit ingilgakniitanik ilihimayauyut tahamaniitutuqauyut hapkua nunaqaqaqtut. Hapkua nunautait nipliktuqaqtut uvaptingnut tuhaquvluta; Taimatut Itqumatjutigiyavut.

Hamna itqaumanniq: nukkatka naajakalu, illiffi nunaqaqtutuqauyuhi taimangaraaluq, maliqavluhi innuhittuqauyumiq pittiarhugu hamna hilakjuak aittuqtauhimayuq ingilgannit kinguvariyauvluhi tatvalu pillipqayarhi hamna nuna kinguvarhaptingnut attuqtauyurhat. Tatva mannihimayuttut hamna aittutauhimayuq tatvanga Hannayiuyumiit avaariqtakhi kitunut ataugautquvlugu tatvalu pittiaqatigiikparhuhi nunaqqatigirhimayuhi taimangaraaluq, pitiarhugitlu hapkua ummayut tahamani nunagiyaffingni. Taimatut, iliiturihimayuhi ikkayuqatiriiqiaqaqtuhi qattangutihilu nunaqaqtigiikhuhi, tungaviliuqatigiitiarhugit hapkua qattangutigiit, pittiarhugit hapkua innikniutirhi hapkualu munaritiakhugit nuttaranguakhi. Illipqatiarhugit hapkua illiitquhiqtutirhi ilihautirhilu, ihumagitiarhugit hapkua nunaqqatirhi, ukpigitiarhugit, iirhiituvluhi pitiaqatigiikhuhi, innuqatigiitiakhuhi, haakluqitarhimaitumik attuganginaktarhi hamna ihumaatunik!

Kihiani hapkua hivuliuniaktut apluktarhauniaktut tahamani nunagiyaitni. Hamna itqaumaniq hivunirhitjutigiyavut, quvuanaitqaluarhuni, hapkununga kinguvangitnut. Tahamna hadja nayugariyavut katimavigivlugu ikpigiyara hamna illumni atturhimaliktara akturhimatiakhuni anniktauhimayut tatvalu mamianarhimayuq ihumalutigirhimayata hapkua tatqirhiutit atturhimayut qangiutiyut. Itqarutigivaktatqa hapkua qapianaktunik attuqtauhimayut iliffi amnihuvluhi, qattangutirhilu tatvalu nunnakatigiyarhi ilihimatiarhuhi atturhimayarhi; iliffi unipqarhimagaffi uvamnut hapkuninga anniktirutauhimayunik ilingnik atturhimayaffingnik ungahiktunut nunanut ilihagiaktitauhimatitluhi taimani. Hapkua uiitayaqnaqtunniq attuqtauhimayut itqaumannaqtut tahapkua uqqauhiriyauttitlugit; Qauyivaliutigiyaralu tatva katimatitluta tahamani ublumi itqaumatjutauniaktut attuqtauhimayunik taimani ulluriannaqtunnik, tatvalu amiyuhuniaktuhi quvuahuniangiturhauyuhi uqqamagaluaktitlunga. Kihianiuyagiaqaqmat piunautiqaqtugut tamapta innuvluta itqaumaluta, imaitmat hamna puiguqqattaqniq hivuniutaungmat aajikikatigingitunik ihumarhutinik tatvalu, uqqautauhimayuq hamna, "akkiragiyauluni hamna pikpagiiknik unaungittuq naaruhugnik kihiani unaungmat aajikikatigingitunik ihumarhutikaknik... tatvalu una akkiragiyauyuq innuhiqmik unaungittuq tukkunik, unaungmat aajikikatigingnitunik ihumarhutilgit" (E. WIESEL). Itqaumavugit hapkua uuittayaqnaqtut attuqtauhimayut kuvianaittut tahamani nuttaqqat ilihariaqtitauhimangmata taimani ullurianaqpiaqtut, mamianaqtut, anniaknaqtut, kihianiungmat piyariaqaqtut itqaumalugit.

Itqaumayariaqaqtut qanuq hapkua maligauyut ajikingitamingnik allangutiqutait innuknikmik tatvalu inmiknik atjikuhiurahuaqhugit illaliutivlugit hapkkua taimani ilihagiakviuhimayut aullatjutait, innutaitnik uuitayaqutauhimayut kuvianaitunik hapkua atturhimayut tahamani nunamingniitqaluarhuttik. Hapkua Qablunaat tahamunga Inuit nunaitnun tikkingarhimangmata, arhugaluuk uktutirhatiavauhimayuq kuvianaktumik apputiitjutirhait taimanik nakuatuqlutik avatiniit illiitquhiqtuqtuniit, pitquhiit hapkualu attugariyait tungaritait. Kihianiungmat taimattuvalaak attuqtauhimangitut. Taitai, huli itqaumangmiyatka hapkua unipkarihimayarhi uvamnut: qanuvalaak hapkua maligauyut inmiknik aajikuhiurahuaqhugit innuiriyait attanikturhugit innuhiit ikkilitjutauhimayut hapkuninga nunaqaqaqtut innutaitnik; qanuqlu hapkua nuttaqat ilihariaqtitauhimayut uqqauhiit illiitquhiktuqtaitlu irrutauhimavlutik ataniktutauvlutik attuquyaungitut; hapkua nutaganguarhi timikmigut anniktiktauhimayut, uqqautjauqatarhutiklu, ihumailgitarhugit tatvalu ukpikutait illumiutariyait anniktiktauvlutik; hapkualu nutaqqat anilgariyamingniit aullaktitauhimayut ilihariaqtitauhimayut innuhanuit, qanuqlu tahamna aullainaktumik ikpigiyauhimayuq innuhiitnik hapkua angayuqanguyut nutaraitniklu, annanatianguyunik ataatatianguyuniklu ingutariyaitlu anniktiktauhimayut.

Quanaakpiakuhi illiituripkaihimagaffinga, unipkakvigivlunga hapkuninga uqqumaitunik huli ikpigihimayarhi tigumiarhimaniaktaffingnik, unnirhiugaffi hapkuninga quvianaitunik itqaumayaqarhuhi. Ublumi tahamaniitunga, tahamani nunnani, hapkualu qangaraluuk itqaumayauyunik, takkurhautiaqtut hapkua ikkiit huli angmaumayut. Tahamaniitunga hivulikpamik ullurianaqtunik atturhimayut qingautiyumavlugit turhiaqtunga iliffinik huli turhiktunga mamianarhunga, uqqalaqtunga iliffingnut uvanga illumurhunga mamianaaktunga. Mamianaaktunga amihunik attuqtauhimayunik, Piyarhagingitamikniktauq hapkua amihuyut Ukpikniaktut ikkayurhiutihimangmata kablunaat ihumagiyaitnik attaniktutigivlugit illiitquhiitnik hapkua nunaqaqaqtut innutaitnik. Uvanga mamianaaktunga, turhiktuqtunga nakliknikmik. Uvanga turhiktuqtunga nakliknikmik ihumagiluarhugit hapkua amihuyut illauhimayut Angatjuviptingnut tatvalo hapkua ukpikniaktut nunaliitni, taimatungitugaluak ikkayuqtigirhimangmata, ajikingitamingnik attuqtitauhimangmata, havariyauyunik illiitquhiitnik arhiqquqtiriyunik tatvalu arhuqhaqhugit aajikuhiuktinahuarhugit ataniktuqtauvlutik kavamagiyauyuniit taimani, tahamna taimailiukutauhimayuq aullatjutauvluni nuttaqanik ungahiktumut ilihariaqtiitjutauhimayuq.

Kihianiugaluaq hamna Ukpiniaknik attutait takkunaraluakhutik, tatva amihuyut quvianaktunik atturhimayut ikkayutauvlutik munaritiaknik nuttaqanik, tamatqiqlugit ikpigiyauhimayut hapkua malikat attugauhimayut nunagingitamingnut ilihariaqtitauhimayut atturhimayait uuitayaqnarhutik quvianaittut.Qanuq hamna Ukpikniarhuta ukpirhimayatpa uqqautiyaatigut tatva hamna quvianaitunik atturauhimayunik arhuutaq ihuinarutauhimayuq, aajikutaringitpiakta haffuma Ukpikniakutait Uqqauhiit umma Jesus Christusiup. Ullurianaqtuq ihumagilugit qanuq hapkua atturagiyait illiitquhiqtutait, uqqauhiit pitquhiitlu illiitagitjuait naunaipkutarivlugit innuhiffingnut innutiptingnutlu huruuqtiqtauhimayut, tatvalu huli ublumi ikpiriyaqaqtuhi hapkuninga ullurianaqtunik. Tauturhugu tahamna qaunga haffuma narungnaqtuq kapianaktuq attuqtauhimayuq, una Angatjuvikput nikkuvittuq hivurangnut Godipta mippikvigiyavut turhiaqhuta mamianarhuta naklingnikmik turhiktugut ihuinarutigihimayaitnik hapkua nuttagaita (cf. John Paul II, Bull Incarnationis Mysterium (29 November 1998), 11: AAS 91 [1999], 140). Taimaatauq uvanga tuhaktauyumayunga tahamna angikatigiyaga tuhirhunga, kangunaktumik tatvalu narunnaktuq ihumagiyagatauq. Uvanga pitiarhunga turhiqtunga mamianarhunga turhiqtunga naklingnikmik ihuinarhimayut hapkua qapianaktunik attuqtiitihimayut amigaitpaiktut Ukpikniaktut anniktirivlutik hapkuninga nunaqaqaqtut innutaitnik.

Hallu nukkatka najakalu, amihuvluhi kivgaktuqtigiyarhilu uqqarhimaliktuhi tahamna turhiktuinik piiktilugit hapkua ihuinaqutauhimayuniq tahamna ihuringita huli. Angiqatigitiaktaffi tamaffi: tahamna hivulikpanguniaktuq aplugarhaq, aullakvirhak. Tatvalu huli qauyivaliutigiyatka, "itqaumavlugit taimani attuqtauhimayut, qanuq ihuarhagaluaklugit turhiktutigilugit tatvalu ihuarhitjutikhaitnik ihuarhitinahuagaluaklugit angumatingitpiaktut" taimatutlu, "niriuqluni hivunirhamik, qanuq ihuarhautiqhaqqagaluaqtitlugit hamna illiitquhirhaq nakuatut pitailitjutauyagiaqatut taimatutauq attuqtauhimayunik pitqiqtailitjutauyagiaqatut" (Titiraqvifiyait Innutaitnun Godipta, 20 August 2018). Una pipmariuyuq ilanga haffuma aullatjutauniaktup tatva havariyauvaliayagiaqatuq arhugutigilugu naunaiyaqtauluni hapkua attuqtauhimayut kinguani tatvalu ikkayurahuaklugit hapkua annarhimayut tahapkunani ungahiktumut ilihariaqtitauhimayut mamihariaqalikmata hapkunga uuitayaqnaqtunnit anniktiqtauhimattitlugit taimani.

Uvanga ukpiktunga tamaita hapkua Ukpiniaktut tatvalu hapkua kavamauyut innuqutimingnik tahamani nunami nautiktuquyatqa nakkugitquvlugit pittiaquvlugitlu illiitquhiqtutaitnik attuqpaktatuqainniklu tahapkua nunaqaqaqtut innutait. Tatva nirugiyaqaqtunga ihuaktunik nalvaaqatigirtuqhauyut tatva hapkua nunaqqaqluaqtut illiitariyauyagiaqaqtut tatvalu pittiaqtaulutik qulvariaqaqtugaluit taimatut tamaita katitlutik iliitpaliklutik avatingnut pihuqattigiikniakmata tamaita. Uvangatauq, piyariaqaqtunga huli arhuukhaklugit havagiyamingnik tamaita hapkua Pallaat Angatjuviit ikkayuqpaliriaqaqtut hapkuninga nunaqaqaqtut innutait. Taimaiqatarhimaliktunga amihuiqturhunga uqqaquyaugangama katimapkaiyuni, nallaktuqaqtitlugu appirhuiyut nallaktuni tatvalu tahamna atturhugu titirauhiittuqaq taiguarhuhu tahamna titiraqhimayuq Pallaqpait Ataniit Kivgaktuiyut Makpiraqpaqmi tiitiraqhimayait. Qaujitjutigingmiyara tatva hamna ihuarhauhirhaq hiviituniaqtuq uttaqiyariaqarhuni. Hapkua nipliutigiyatqa uqqautigivlugit nautikturutiqhat ikpriyauyagiaqaqtut umaataitnun. Tatva uppihimavlunga tahamungarhimavlunga tatvalu hapkua tunirhimatiaqtitlugit Kanatami Pallait naunaipkutautiaqtut hapkuninga ihumagiluaktaptingnik tunnirhimayugut maliqayumavlugu tahamna apkutirhat ingilravigilugu.

Hallu illangatka, hamna turhiaknik hiviituniaktuq kaffinik ublunik tatvalu nakingmaakmangata ungahiktumiitkaluarhuta; taimaitkaluaktutlugu, piyungnangitnama illangitnun qaitquhauhimagaluaktitlunga uppautilunga hapkununga Kamloops-mut, Winnipeg-mut tatvalu nunaliitnun Saskatchewan-mut,Yukon-mut Nunatiamutlu. kihianiungmat, qauyimaniaquhi tamaffi ihumagiyaffi tatvalu qingautiqattaqtaffi. Ilihimaniaquhi uvanga qauyimaliktunga hapkuninga anniktiqutauhimayunik tatvalu uiitayaknaktunik atturauhimayunik, hapkuninga ayurhautauqattaqtunik tatvalu arhugungnaqtunniq, attuqtauhimayunik hapkunanga nunaqaqaqatut innutaitniit tamaitni avikturhimayuni tahamani nunatlaatni. Hapkua uqqautiitka tatva quvianangitukut ingilgakjutiqaqtitlunga turaaqhimayut tamaitnun nunataqatauhimayunut nunaliitni tatvalu tamaitnun innutaitnun. Iqqihimatiaktaffi tamaffi nakligitiarhuni.

Una hivulikpangutitlugu aullaaktamut uppautigama, Uvanga hamna itqaumatquvlugu. Tahamani, ublumi, tahamaniqqatigiyaffi itqaumanahuaqhugit attuqtauhimayut kinguani, annuarhuqatigiyumavluhi tamaffi, niaqququt ukkungalugit nippaitumik qingautjilugit hapkua illuviktauhimayut. Uvagut atturiaqaqtavut hapkua nipaingarutigilugit ikkayutigilugit hapkuninga annikutauhimayunik. Hamna nipaingaaknik. Qingakniklu. hallagahuaklugu hamna qappianaktuq, turhiaqvigiyavut una Godikput nakkuatuquvlugu; Annikningiyaliktitlugit, qingakpaktugut Godimut innutquvlugit. Uvagut Atanikut Jesus Christusi illuviktauhimayuq, hamna ihumagiyauyuq illuvikvigihimaya niriuqutauvluni tatvalu hinnaktumik nakkuyumik, qimarhugit hapkua annuarhutauyut, ullurianaqtut tatvalu takkiunirhimayavut tatvalu pitjutigilugu hamna anniknik uttiffakluni tatvalu makkivigiffaklugu attuliklugit hapkua nuttaat innuhirhaptinik tatvalu hilakjuami ikkayuqatigikutirhavut. Uvagut illiikut piyungnangitavut hapkua mamiyautirhavut ikkayutirhavutlu: Ihariagiyavut Godipta naklingnia. Ihariagiyavut hamna nipaingaruta hakkugituqlu ihumattunia haffuma Tungauyup, hamna nakliktaknia haffuma Hannayiuyup. Inmi una Hannayiuyuq tigumiaquyavut qaitiluni hapkuninga niriugiyauluaqtunniq ummatiptingnut. Hivunirhitiatjavatigut aplutiptingnik tatvalu tunnihiluni nakkuatut attuqtarhaptingnik hivummuvaliaqatautitluta ingilravigiyaptingnut.