ᐅᑭᐅᖅᑕᖅᑐᕐᒧᑦ ᐊᑐᐊᒐᓕᕆᓂᕐᒧᑦ ᑐᙵᕕᖕᒧᑦ ᐊᕕᒃᓯᒪᔪᒥ ᑲᑎᒪᓂᖅ: ᓇᐃᓐ, ᐊᒃᑑᐸ 11, 2017

ᐃᖏᕐᕋᔪᓕᕆᓂᖅ

• ᑲᑎᒪᖃᑕᐅᔪᑦ ᐅᒃᐱᕈᓱᒃᑐᑦ ᓄᑖᖑᔪᖅ ᐅᑭᐅᖅᑕᖅᑐᕐᒧᑦ ᐊᑐᐊᒐᓕᕆᓂᕐᒧᑦ ᑐᙵᕕᒃ ᑐᕌᒐᖃᑐᐃᓐᓇᓪᓗᐊᙱᓐᓂᖓᓂᒃ ᓄᑖᓂᒃ ᐊᖏᔫᑎᓂᒃ ᑭᓯᐊᓂᑦᑕᐅᖅ ᒪᑭᒪᑎᑦᑎᓂᕐᒥᒃ ᓄᑖᙳᕆᐊᖅᑎᑦᑎᓂᕐᒥᒡᓗ ᐱᑕᖃᖅᐸᒌᖅᑐᓂᒃ ᐊᖏᔫᑎᓂᒃ.
• ᑐᓚᒃᑕᕐᕖᑦ ᐅᒥᐊᕐᓄᓪᓗ ᐱᔨᑦᑎᕋᐅᑏᑦ ᓄᓇᑦᓯᐊᕗᒻᒥ ᓄᑖᕈᕆᐊᖅᑎᑕᐅᔭᕆᐊᓖᑦ. ᑲᑎᒪᖃᑕᐅᔪᑦ ᐅᓂᒃᑳᓚᐅᖅᐳᑦ ᒫᓐᓇᐅᔪᖅ ᑐᓚᒃᑕᕐᕖᑦ ᒥᑭᓗᐊᕐᓂᖏᓐᓂᒃ, ᓱᕋᒃᐸᓪᓕᐊᓂᖏᓐᓂᒃ, ᐊᖑᒻᒪᑎᔪᓐᓇᙱᓗᐊᖅᖢᑎᒡᓗ ᐅᓯᑲᑦᑕᕐᓂᐅᕙᒃᑐᓂᒃ. ᐊᑲᐅᙱᓕᐅᕈᑎᑕᖃᕌᖓᑦ ᑕᕆᐅᒃᑯᑦ ᐃᖏᕐᕋᔪᓕᕆᓂᕐᒥ, ᐊᔾᔨᒌᙱᑦᑐᑦ ᐱᔾᔪᑕᐅᕙᒃᑐᑦ ᐊᒃᑐᖅᑕᐅᕈᓘᔭᓲᖑᕗᑦ.
• ᑲᑎᒪᖃᑕᐅᔪᑦ ᐅᖃᑦᑎᐊᓚᐅᖅᑐᑦ ᒥᑦᑕᕐᕕᒃ ᓇᐃᓐᒥ ᐅᓪᓗᒥᓕᓴᖅ ᑎᑭᐅᑎᔭᐅᔭᕆᐊᓕᖕᓂᒃ ᑎᑭᐅᑎᔪᓐᓇᖅᓯᑎᑕᐅᔭᕆᐊᓕᒃ. ᒫᓐᓇᐅᔪᖅ, ᐅᖃᓚᐅᖅᐳᑦ, ᐃᑯᒪᖃᙱᑦᑐᖅ ᒥᑭᓗᐊᖅᖢᓂᓗ, ᐊᑦᑕᕐᓇᕈᓐᓇᕈᑕᐅᓪᓗᓂ ᖃᖓᑕᓲᕐᓄᑦ ᖁᓕᒥᒎᓕᖕᓄᓪᓗ ᐅᓐᓄᐊᒃᑯᑦ ᖃᖓᑕᔭᕆᐊᒃᓴᖅ. ᓯᓚᑦᑎᐊᕙᐅᙱᑉᐸᑦ, ᖃᖓᑕᓲᑦ ᒥᑦᑐᓐᓇᙱᑦᑎᐊᖅᑐᑦ.
• ᓄᓇᑦᓯᐊᕗᒻᒥ ᓄᓇᓖᑦ ᑲᑎᙵᔪᓐᓇᕈᒪᔪᑦ ᐊᖅᑯᑎᑯᑖᒃᑎᒍᑦ ᐊᓯᖏᓐᓄᑦ ᓛᐸᑐᐊᕆᒥ.
• ᓯᑯ ᐱᒻᒪᕆᐅᓪᓗᓂ ᐊᖏᔫᑕᐅᕗᖅ ᐃᓄᖕᓄᑦ ᐊᖅᑯᑕᐅᕙᖕᒪᑦ ᐊᕕᒃᓯᒪᔪᒧᑦ. ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒃᑐᐊᓯᒪᔪᖅ ᓯᑰᑉ ᐃᖏᕐᕋᕝᕕᐅᔪᓐᓇᕐᓂᖓᓄᑦ ᓛᐸᑐᐊᕆᐅᑉ ᐅᐊᖕᓇᖅᐸᓯᐊᓂ. ᐊᕕᒃᓯᒪᔪᖅ ᓯᑯᖃᕈᓐᓃᕐᔪᐊᖅᓯᒪᔪᖅ, ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓ ᐊᒃᑐᖅᑕᐅᓯᒪᕐᔪᐊᕐᓇᑐᑦ ᓛᐸᑐᐊᕆᒧᑦ.  ᐃᓄᐃᑦ ᐃᓅᓯᖏᓐᓄᑦ ᐱᒻᒥᕆᐊᓘᓂᖓᓄᑦ, ᓯᑯ ᑲᒪᒋᔭᐅᔭᕆᐊᓕᒃ ᑐᙵᕕᖕᒥ.

ᑐᐊᕕᕐᓇᖅᑐᒧᑦ ᖃᓄᐃᓕᐅᕈᓐᓇᕐᓂᖅ

• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᑐᐊᕕᕐᓇᖅᑐᓄᑦ ᖃᓄᐃᓕᐅᕈᓐᓇᕐᓂᕐᒧᑦ ᐊᖏᔫᑎᑦ ᐱᐅᓯᕚᓪᓕᖅᑎᑕᐅᔭᕆᐊᖃᖅᑐᑦ.
• ᒥᑦᑕᕐᕖᑦ ᐃᑯᒪᖃᑦᑎᐊᙱᓐᓂᖏᓐᓄᑦ, ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᖃᖓᑕᓲᑦ ᐊᖃᑦᑕᕈᓐᓇᖅᑐᑦ ᒥᑦᑐᓐᓇᖅᖢᑎᒡᓗ ᐅᓪᓗᒃᑯᑐᐊᖅ, ᐋᓐᓂᐊᕐᓂᕐᒧᑦ ᐊᐅᓪᓚᖅᑎᑕᐅᑲᐅᑎᒋᔭᕆᐊᓖᑦ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᔪᓐᓇᙱᖦᖢᑎᒃ ᑖᖅᓯᕌᖓᑦ.
• ᓄᓇᓕᖕᒥ ᐱᑕᖃᙱᑦᑐᖅ ᐊᖏᔫᑎᓂᒃ ᖃᓄᐃᓕᐅᑲᐅᑎᒋᔪᓐᓇᕈᑕᐅᔪᓂᒃ ᐅᖅᓱᐊᓗᖕᒥᒃ ᑯᕕᔪᖃᕐᓂᖅᐸᑦ, ᐃᓱᒫᓘᑕᐅᕐᔪᐊᖅᖢᓂ ᐃᓄᐃᑦ ᐊᑐᕆᐊᖃᓲᖑᖕᒪᑕ ᓄᓇᐃᓐᓇᕐᒥᒃ ᐃᒪᕐᒥᒡᓗ ᓂᕿᒃᓴᖃᖅᑎᑦᑐᓐᓇᕐᓂᖏᓐᓄᑦ ᐃᓚᒥᓂᒃ. ᖃᓂᓛᕆᔭᐅᔪᖅ ᕿᓂᕐᓂᕐᒧᑦ ᐃᑲᔪᕐᓂᕐᒧᓪᓗ ᑐᐊᕕᕐᓇᖅᑐᒥᒃ ᖃᓄᐃᓕᐅᕐᕕᒃ ᓴᐃᓐᑦ ᔮᓐᔅᒦᑦᑐᖅ.
• ᑲᑎᒪᖃᑕᐅᔪᑦ ᓇᓗᓇᐃᖅᓯᑦᑎᐊᓚᐅᖅᐳᑦ ᐅᒥᐊᕐᔪᐊᓄᑦ ᖃᖓᑕᓲᓄᓪᓗ ᐊᑦᑕᕐᓇᖅᑐᖃᖅᑕᐃᓕᒪᓂᕐᒧᑦ ᐸᕐᓇᐅᑎᑕᖃᕆᐊᖃᕐᓂᖓᓂᒃ.
• ᑲᑎᒪᖃᑕᐅᔪᖅ ᐃᓱᒪᒃᓴᖅᓯᐅᕈᑕᐅᔪᓐᓇᕐᓂᖓᓂᒃ ᐊᑐᓕᖅᑎᑕᐅᓂᖓ ᓄᓇᓕᖕᒥᐅᓄᑦ, ᐃᓄᐃᓐᓇᕐᓄᑦ ᑐᐊᕕᕐᓇᖅᑐᒧᑦ ᖃᓄᐃᓕᐅᕐᓂᕐᒧᑦ ᐱᒋᐊᖅᑎᑕᐅᓂᖓ ᐊᔾᔨᒋᐸᓗᒡᓗᓂᐅᒃ ᐱᑕᖃᖅᐸᒌᖅᑑᖅ ᐃᖃᓗᒃᑑᑦᑎᐊᕐᒥ, ᓄᓇᕗᒻᒥ.

ᐃᒡᓗᒧᑦ ᐊᑐᖅᑕᐅᕙᒃᑐᓂᒃ ᐱᔨᑦᑎᕋᐅᑎᑦ

• ᐊᑦᑕᕐᓇᙱᑦᑐᓂᒃ ᐋᓐᓂᐊᖃᕐᓇᙱᑦᑐᓂᒃ ᐃᒪᕐᒧᑦ ᐊᖏᔫᑎᑕᖃᕐᓂᖓ ᐊᒃᑐᐊᔪᖅ ᓄᓇᓕᐅᑉ ᐊᖏᒡᓕᒋᐊᕈᓐᓇᕐᓂᖓᓄᑦ. ᐃᓚᖏᑦ ᓄᓇᓖᑦ ᐃᒥᖅᑕᕐᕕᖃᖅᑐᑦ ᐃᓄᒃᑕᖃᐅᙱᓐᓂᖅᓴᓄᑦ ᑐᕌᖓᓚᐅᕋᓗᐊᖅᑐᓂᒃ.
• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᒐᕙᒪᑐᖃᒃᑯᑦ ᐸᐅᕐᓗᖕᒧᑦ ᑖᒃᓰᔭᐃᔭᕈᑎ ᐊᒃᑐᐊᓛᖅᑐᖅ ᓄᓇᓕᖕᓂᒃ ᐊᑐᕆᐊᖃᖅᑐᓂᒃ ᐅᖅᓱᐊᓗᖕᒥᒃ, ᐆᒪᔪᓐᓇᕐᓂᐅᑉ ᐊᑭᖓᓂᒃ ᐊᑭᑦᑐᕆᐊᕈᑕᐅᓛᖅᖢᓂ. ᑕᐃᒪᐃᒻᒪᑦ, ᐅᖃᓚᐅᖅᐳᑦ ᐊᒃᑐᐊᕐᔪᐊᕐᓂᖓ ᐸᐅᕐᓗᖕᒧᑦ ᑖᒃᓰᔭᐃᔭᖃᑦᑕᕐᓂᖅ ᐅᖅᓱᐊᓗᖃᕆᐊᖃᖅᑐᓄᑦ ᓄᓇᓕᖕᓄᑦ ᐃᓱᒪᒃᓴᖅᓯᐅᕈᑕᐅᔭᕆᐊᖃᖅᑐᖅ ᑐᙵᕕᖕᒥ.
• ᑲᑎᒪᖃᑕᐅᔪᑦ ᐅᖃᓚᐅᖅᑐᑦ ᐊᑑᑎᖃᕋᔭᕐᓂᖓᓂᒃ ᐊᑐᕆᐊᖃᙱᓐᓂᖅᓴᐅᓕᕈᑎᒃ ᐅᖅᓱᐊᓗᖕᒥᒃ ᐆᒻᒪᖅᑯᑎᖃᕐᓂᕐᒧᑦ ᐊᑐᖔᓕᕐᓗᑎᒡᓗ ᐱᐅᓂᖅᓴᒥᒃ ᐆᖅᒪᖅᑯᓯᐅᕈᓐᓇᖅᑐᓂᒃ.
• ᐃᑭᐊᖅᑭᕕᒃᑰᕐᓂᕐᒧᑦ ᐱᔨᑦᑎᕋᐅᑏᑦ ᐱᐅᓯᕚᓪᓕᖅᑎᑕᐅᔭᕆᐊᖃᖅᑐᑦ, ᒫᓐᓇᐅᔪᖅ, ᑐᓗᖅᑕᕈᑕᐅᕐᔪᐊᕐᒪᑦ ᑮᓇᐅᔭᓕᐅᕈᓐᓇᕐᓂᕐᒧᑦ ᐱᕙᓪᓕᐊᑎᑦᑎᓂᕐᒥᒃ. ᑲᑎᒪᖃᑕᐅᔪᑦ ᓱᓕ ᐊᑐᕆᐊᖃᓲᖑᓂᕐᒥᓂᒃ ᓱᒃᑲᔪᒃᑰᖅᑐᓂᒃ ᐃᑭᐊᖅᑭᕕᒃᑰᕆᐊᒃᓴᖅ ᑲᔪᓯᑦᑎᐊᕐᓇᙱᓗᐊᕐᒪᑦ. ᑕᐃᒪᐃᒐᔪᒃᖢᓂ, ᐃᓄᐃᑦ ᐃᕐᖐᓈᖅᑕᐅᑎᒃᑯᑦ ᐊᐅᓪᓚᖅᑎᑦᑎᔭᕆᐊᖃᓲᖑᔪᑦ ᐅᓪᓛᓪᓛᓗᒃᑯᑦ ᐅᓪᓗᒃᑯᑦ ᐱᔨᑦᑎᖅᑕᐅᑦᑎᐊᙱᓗᐊᖃᑦᑕᕐᒪᑕ.  ᑕᐃᒪᐃᒐᔪᒃᐳᖅ ᐊᑯᓂᐅᖃᑦᑕᕐᓂᖓ ᐅᓐᓄᐊᖅ ᐅᓪᓗᕋᓴᐃᓪᓘᓐᓃᑦ ᐃᕐᖐᓈᖅᑕᐅᑎᒃᑯᑦ ᐊᐅᓪᓚᖅᑎᑕᐅᔪᑦ ᓄᓇᑦᓯᐊᕗᒻᒥᑦ ᑎᑭᑦᑕᕆᐊᒃᓴᖅ ᑎᑎᕋᕐᕕᒋᔭᐅᔪᓄᑦ. 

ᑎᑎᖅᑲᒃᑯᕕᒃᑯᑦ ᐊᐅᓪᓚᖅᑎᑦᑎᓂᖅ

• ᑲᓇᑕᒥ ᑎᑎᖅᑲᒃᑯᕕᒃᑯᑦ ᐊᑭᖏᑦ ᐊᑭᑦᑐᕆᐊᖅᑕᐅᓯᒪᕐᔪᐊᖅᑐᑦ ᐅᑭᐅᖅᑕᖅᑐᕐᒥ. ᐅᖃᖅᑐᖃᓚᐅᖅᑐᑦ ᐊᑭᖏᓐᓄᑦ ᐃᑲᔫᑎᑕᖃᓪᓗᐊᕐᓂᖓᓂᒃ.

ᓴᙱᔪᑦ ᐅᑭᐅᖅᑕᖅᑐᕐᒥᐅᑦ ᓄᓇᓖᓪᓗ

"ᓯᓚ ᐊᓯᔾᔨᖅᐸᓪᓕᐊᓛᙱᑦᑐᖅ ᓯᕗᓂᒃᓴᒥ. ᒫᓐᓇ ᐊᓯᔾᔨᖅᐸᓪᓕᐊᕙᒌᖅᑐᖅ."

• ᑲᑎᒪᖃᑕᐅᔪᑦ ᐅᖃᑦᑎᐊᓚᐅᖅᐳᑦ ᐊᒃᓱᓪᓘᓐᓃᑦ ᐱᔭᐅᔭᕆᐊᖃᖅᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᒡᓗᓕᕆᓂᕐᒧᓪᓗ ᐱᔭᐅᔪᓐᓇᙱᒃᑯᑎᒃ, ᐊᓯᖏᑦ ᐊᒃᑐᐊᔪᑦ ᐃᓅᖃᑎᒌᖕᓂᕐᒧᑦ-ᑮᓇᐅᔭᓕᐅᕈᓐᓇᕐᓂᕐᒧᑦ ᐱᕙᓪᓕᐊᑎᑕᐅᔪᑦ ᑲᔪᓯᑎᑕᐅᔪᓐᓇᙱᓐᓂᖏᓐᓂᒃ. ᑕᐃᒪᐃᒻᒪᑦ, ᐱᔾᔪᑕᐅᔪᑦ ᓲᕐᓗ ᓂᕿᒃᓴᖃᑦᑎᐊᕐᓂᖅ, ᐃᒡᓗᓕᕆᓂᖅ ᐊᒻᒪᓗ ᐃᓕᓐᓂᐊᕐᓂᖅ ᓯᕗᓪᓕᐅᑎᑕᐅᔭᕆᐊᓖᑦ, ᐊᒃᑐᐊᔪᐃᓐᓇᐅᓂᖏᑦ ᐃᓱᒪᒋᔭᐅᓗᑎᒃ.
• ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᑕᕝᕗᖓᑦᑎᐊᖅ ᐊᒃᑐᐊᖃᑦᑕᖅᓯᒪᔪᖅ ᐃᓄᖕᓄᑦ ᑕᒫᓂᕐᒥᐅᑕᐅᔪᓄᑦ. ᑲᑎᒪᖃᑕᐅᔪᑦ ᐅᓂᒃᑳᓚᐅᖅᑐᑦ ᐸᕐᓇᒋᐊᖃᓲᖑᓂᖏᓐᓂᒃ ᐅᓪᓗᓗᒃᑖᖅ ᐱᓇᓱᐊᕈᓯᓗᒃᑖᕐᓘᓐᓃᑦ ᓯᓚᐅᑉ ᖃᓄᐃᓕᖓᓂᒃ ᒪᓕᒃᓴᖅᖢᑎᒃ. ᑕᐃᒪᐃᒻᒪᑦ, ᐋᖅᑭᒋᐊᖅᑎᑦᑎᓂᖅ ᓱᖏᐅᑎᓂᕐᓗ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᑕᖃᕆᐊᖃᒻᒪᕆᒃᑑᒃ ᐅᑭᐅᖅᑕᖅᑐᕐᒥᐅᑦ ᓄᓇᓖᑦ ᓴᙱᑎᒋᓂᖏᓐᓄᑦ.
• ᑐᑭᓯᔭᐅᔭᕆᐊᖃᓪᓚᕆᒃᑐᖅ ᑕᒫᓂ ᑐᒃᖢᓂᕆᔭᐅᔪᓂᒃ, ᐸᕐᓇᐅᑎᓕᐅᖅᑐᖃᕆᐊᖃᕐᓂᖓᓂᒡᓗ ᐊᒃᖢᓂᕆᔭᑦ ᑲᑦᑐᖅᓯᒋᐊᖅᑎᑕᐅᓂᖏᓐᓄᑦ. ᑲᑎᒪᖃᑕᐅᔪᑦ ᑖᔅᓱᒧᖓ ᐃᓚᒋᔭᐅᓪᓗᐊᖅᑐᖅ ᓄᓇᓕᖕᓂ ᐊᓪᓚᒡᕕᖃᕐᓂᖅ ᐃᑲᔪᕈᓐᓇᖅᑐᓂᒃ ᐃᓄᖕᓄᒃ ᐃᑲᔫᓯᐊᖅᑖᕋᓱᒃᑐᓂᒃ ᐱᔨᑦᑎᖅᑕᐅᓇᓱᒃᑐᓂᒡᓗ ᐱᔪᓐᓇᖅᑕᕋᓗᐊᕐᒥᓂᒃ ᑭᓯᐊᓂ ᖃᐅᔨᒪᔭᐅᙱᑐᐃᓐᓇᕆᐊᓖᑦ.

ᓂᕿᒃᓴᖃᑦᑎᐊᕐᓂᖅ

• ᑲᑎᒪᖃᑕᐅᔪᑦ ᐅᓂᒃᑳᓚᐅᖅᐳᖅ ᑕᒫᓂ ᓄᓇᓕᓗᒃᑖᓂ ᐃᒡᓗᖃᖃᑎᒌᒃᑐᓂᑦ ᓂᕿᒃᓴᖃᑦᑎᐊᙱᓗᐊᖅᑐᖃᓲᖑᓂᖓᓂᒃ ᒪᕐᕈᐃᖅᓱᖅᖢᒍ ᓂᕿᒃᓴᖃᑦᑎᐊᙱᓗᐊᕐᓂᕆᔭᐅᕙᒃᑐᓂᑦ ᐊᓯᖏᓐᓂ ᑲᓇᑕᒥ.
• ᑲᑎᒪᖃᑕᐅᔪᑦ ᐅᖃᑦᑎᐊᓚᐅᖅᐳᑦ ᓂᕿᓪᓚᑦᑖᖅᑕᖃᙱᓗᐊᕐᓂᖓ ᐱᔾᔪᑕᐅᒻᒪᕆᖃᑦᑕᕐᓂᖓᓂᒃ ᓂᕿᒃᓴᖃᑦᑎᐊᙱᓗᐊᕐᓂᕐᒧᑦ. ᑕᒫᓂ ᓄᓇᓕᖕᒥᐅᑕᐃᑦ ᐊᖑᓇᓱᒃᑎᐅᓂᖅᓴᐅᖃᑦᑕᕐᓂᑰᕗᑦ, ᖁᐊᖃᐅᑎᒥᓂᒡᓗ ᓇᖕᒥᓂᖅ ᓂᕿᒃᓴᒥᓂᒃ ᑐᖅᑯᐃᖃᑦᑕᕐᓂᑰᓪᓗᑎᒃ.
• ᐅᓄᕆ ᑎᑭᐅᑎᒐᔪᖃᑦᑕᓚᐅᙱᑦᑑᒐᓗᐊᖅ 100kmᒧᑦ/ᐃᑲᕐᕋᑕᒫᑦ ᑭᓯᐊᓂ ᑕᐃᒪᓐᓇ ᐊᓄᕌᕐᔪᐊᖅᑎᒋᒐᔪᓕᖅᑐᖅ. ᑕᒪᒃᑯᐊ ᐊᓄᕌᕐᔪᐊᕐᓃᑦ ᐊᒃᑐᐊᔪᑦ ᐊᖑᓇᓱᒃᑏᑦ ᐊᖑᓇᓱᒍᓐᓇᕐᓂᖏᓐᓄᑦ.
• ᑲᑎᒪᖃᑕᐅᔪᑦ ᐅᓂᒃᑳᓚᐅᖅᐳᑦ, ᑐᒃᑐᑕᖃᙱᓐᓂᖅᓴᐅᓕᕐᓂᖓᓄᑦ, ᐃᓄᐃᑦ ᓂᕆᖃᑦᑕᖅᑕᑐᖃᕐᒥᓂᒃ ᐃᓇᖏᖅᓰᔭᕆᐊᖃᖃᑦᑕᕐᓂᖏᓐᓂᒃ ᓂᐅᕕᖅᑕᐅᔪᓂᒃ.
• ᐊᐃᑦᑖᖑᒐᓗᐊᖅᖢᓂ, ᑲᑎᒪᔪᖅ ᐅᖃᓚᐅᖅᐳᑦ, ᓂᐅᕕᕐᕕᖕᒥ ᓂᖀᑦ ᐊᑭᑐᓗᐊᖅᑐᑦ ᐊᑭᑦᑐᕆᐊᖅᑎᑕᐅᓂᑰᓪᓗᑎᒡᓗ.
• ᑲᑎᒪᖃᑕᐅᔪᑦ ᓈᒻᒪᒃᓴᓚᐅᙱᑦᑐᑦ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᒃᓴᕐᒥᒃ, ᐅᖃᖅᖢᑎᒃ ᐱᓕᕆᐊᒃᓴᖅ ᑐᙵᕕᖃᕐᒪᒡᒎᖅ ᓂᐅᕕᖅᑏᑦ ᓂᐅᕕᐊᒃᓴᖃᕐᓂᖅᓴᐅᓇᓱᖃᑦᑕᕐᓂᖏᓐᓂᒃ ᓄᓇᑦᓯᐊᕗᒻᒥᓗ ᑕᐃᒪᐃᓪᓚᕆᙱᖦᖢᓂ. ᑲᑎᒪᖃᑕᐅᔪᖅ ᐅᓂᒃᑳᓚᐅᖅᐳᖅ, ᓄᓇᑦᓯᐊᕗᒻᒥ, ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᕐᒥ ᑲᓇᑕᒥ ᓂᕿᓄᑦ ᐃᑲᔫᑎᑦ ᑐᓂᐅᔭᖃᑦᑕᕐᓂᖏᓐᓄᑦ ᓂᐅᕕᖅᑎᓄᑦ, ᓄᓇᓕᖕᒥᐅᑕᐃᑦ ᑕᑯᕙᙱᖦᖢᑎᒃ ᐃᑲᔫᑎᓂᒃ ᐊᑭᓕᕐᓂᑰᓂᖏᓐᓄᑦ ᑎᑎᕋᖅᓯᒪᔪᓂ.
• ᑲᑎᒪᖃᑕᐅᔪᖅ ᐅᖃᓚᐅᖅᐳᑦ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᕐᒥ ᑲᓇᑕᒥ ᐃᑲᔫᑎᑦ ᓄᓇᑦᓯᐊᕗᒻᒥ ᒥᑭᓐᓂᖅᓴᐅᕙᖕᓂᖓᓂᒃ ᐊᓯᖏᓐᓂᑦ ᑲᓇᑕᒥ.
• ᑲᑎᒪᖃᑕᐅᔪᑦ ᐃᒃᐱᒍᓱᓚᐅᖅᐳᑦ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᕐᒥ ᑲᓇᑕᒥ ᐃᑲᔪᖅᓱᖃᑦᑕᙱᓐᓂᖓᓂᒃ ᐊᖑᓇᓱᒃᑕᐅᔪᓂᒃ/ᓂᐅᕕᐊᒃᓴᕆᔭᐅᔪᓂᒃ ᓂᕿᓪᓚᑦᑖᓂᒃ ᐊᕕᒃᓯᒪᓂᕆᔭᒥᓂ. ᐃᑲᔫᑎᑖᕈᓐᓇᕆᐊᒃᓴᖅ, ᓂᕿᓪᓚᑦᑖᖅ ᑲᒪᒋᔭᐅᔭᕆᐊᖃᖅᑐᑦ ᒍᕙᒪᒃᑯᓐᓄᑦ ᐊᐅᓚᑕᐅᔪᓂ ᑎᑭᐅᑎᔭᕆᐊᖃᖅᖢᑎᒃ ᖃᐅᔨᓴᖅᑕᐅᓂᒃᑯᑦ ᑎᑭᐅᑎᔭᐅᔭᕆᐊᓕᖕᓂᒃ, ᓄᓇᕗᒻᒦᖦᖢᑎᒡᓗ ᒪᕐᕈᑐᐊᖑᓪᓗᑎᒃ ᓂᕿᓪᓚᑦᑖᕐᓂᒃ ᑲᒪᒋᔭᖃᕐᕖᒃ.
• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᑮᓇᐅᔭᓕᐅᕐᓂᖅᓴᖃᑦᑕᖅᑐᐃᑦ ᐊᑭᑐᒃᓴᖃᑦᑕᙱᓐᓂᖏᓐᓂᒃ ᓱᖏᐅᑎᔪᓐᓇᖃᑦᑕᖅᖢᑎᒡᓗ ᐊᓯᔾᔨᖅᐸᓪᓕᐊᔪᓄᑦ ᓂᕿᒃᓴᖅᑕᖃᖅᑎᒋᓂᖓᓂᒃ, ᑭᓯᐊᓂ ᑮᓇᐅᔭᓕᐅᖃᑦᑕᙱᓐᓂᖅᓴᐅᔪᑦ ᓂᕿᓪᓚᑦᑖᓂᒃ ᓂᕿᖃᕆᐊᖃᓲᖑᔪᑦ. ᐃᓐᓇᑐᖃᐃᑦ ᐅᒃᑐᖅᑕᐅᓛᖑᖃᑕᐅᓯᒪᔪᑦ ᓂᕿᒃᓴᖃᙱᓗᐊᕐᓂᕐᒧᑦ.
• ᐅᑭᐅᖅᑕᖅᑐᕐᒥ ᓄᓇᓖᑦ ᐊᓯᖏᓐᓂ ᐊᕕᒃᓯᒪᔪᓂ ᓂᕿᒃᓴᒥᓂᒃ ᖃᖓᑕᓲᒃᑯᑦ ᑎᑭᑎᑦᑎᔭᕆᐊᖃᓲᖑᒐᓗᐊᖅᖢᑎᒃ, ᐅᓯᑲᑦᑕᕐᓂᖅ ᐃᓱᒪᒃᓴᖅᓯᐅᕈᑕᐅᔪᓐᓇᖅᑐᖅ ᓄᓇᑦᓯᐊᕗᒻᒥ ᐊᑯᓂᐅᓂᖅᓴᖅ ᐅᒥᐊᕐᔪᐊᒃᑰᕐᓇᐅᖃᑦᑕᕐᓂᖓᓄᑦ. ᑕᐃᒪᐃᒻᒪᑦ, ᐱᐅᓯᒋᐊᖅᑎᑕᐅᓂᖏᑦ ᐅᒥᐊᕐᔪᐊᓄᑦ ᐊᖏᔫᑎᑦ ᐃᑲᔪᕈᓐᓇᖅᑐᖅ ᓂᑭᒃᓴᖃᙱᓗᐊᖃᑦᑕᕐᓂᕐᒧᑦ ᓂᖀᑦ ᑎᑭᑎᑕᐅᖃᑦᑕᕐᓂᖅᓴᐅᓂᖏᑎᒍᑦ.
• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᑐᒃᑐᑦ ᐊᒥᓲᙱᓐᓂᖅᓴᐅᓕᕐᓂᖏᓐᓄᑦ, ᐊᓯᖏᑦ ᐊᖑᓇᓱᒃᑕᐅᔪᓐᓇᖅᑐᑦ ᓲᕐᓗ ᑐᒃᑐᕙᐃᑦ, ᑭᓯᐊᓂ ᑐᒃᑐᕙᖕᓂᒃ ᐊᖑᓇᓱᖕᓂᐊᕈᓂ ᑭᓯᐊᓂ ᐱᔪᓐᓇᐅᑎᖃᕆᐊᖃᕐᓇᕐᒪᑦ,
• ᑐᒃᑐᖃᕈᓐᓃᕐᓂᖅᓴᐅᓂᖓ ᐊᖑᓇᓱᒃᐸᒍᓐᓃᕐᓂᖅᓴᐅᓂᖓᓗ ᐊᒃᑐᕐᔪᐊᖅᓯᒪᔪᖅ ᓄᓇᓕᖕᒥᐅᑦ ᐃᓱᒪᒃᑯᑦ ᖃᓄᐃᓐᓂᖏᓐᓄᑦ, ᐊᖑᓇᓱᖕᓂᒃᑯᑦ ᓂᕿᒃᓴᖃᕐᓂᖅᓴᐅᓚᐅᕐᓂᖏᓐᓄᑦ ᐃᓚᔮᕇᑦ/ᑲᑎᙵᐅᖅᑐᑦ ᖃᓄᐃᓕᐅᖃᑎᒌᖃᑦᑕᓚᐅᕐᓂᖏᓄᓪᓗ. ᐃᓄᐃᑦ ᐅᖃᖅᓯᒪᔪᑦ ᖃᓄᐃᔾᔫᒥᓯᒪᑐᐃᓐᓇᕐᓂᕐᒥᓂᒃ ᑕᐃᒪᙵᓂᑦ ᑐᒃᑐᖃᕈᓐᓃᓚᐅᖅᑎᓪᓗᒍ.
• ᑲᑎᒪᖃᑕᐅᔪᑦ ᑎᒃᑯᐊᖅᓯᓚᐅᖅᐳᑦ ᐊᓯᐊᒍᑦ ᑲᒪᒋᔭᐅᔪᓐᓇᕐᒥᔪᖅ ᓂᕿᒃᓴᖃᑦᑎᐊᖅᑎᑦᑐᓂᖅ ᐊᒃᑐᐊᓂᖓᓂᒃ ᐱᐅᓂᖅᓴᓂᒃ ᐊᖏᔫᑎᖃᕐᓂᕐᒧᑦ: ᓇᐃᓐ ᐃᓂᒃᓴᖃᕆᐊᖃᖅᑐᖅ ᐋᖅᑭᒃᓱᐃᓂᕐᒧᑦ ᐊᐃᑦᑐᐃᓂᕐᒧᓪᓗ ᓂᕿᒃᓴᖃᑦᑎᐊᖅᑎᑦᑎᓂᕐᒧᑦ ᐱᓕᕆᐊᒃᓴᓂᒃ.

ᐃᒡᓗᓕᕆᓂᖅ

• ᐃᒡᓗᒃᓴᖃᙱᓗᐊᕐᓂᖅ ᐃᓱᒫᓗᒍᑕᐅᕐᔪᐊᖅᐳᖅ ᓄᓇᑦᓯᐊᕗᒻᒧᑦ.
• ᐊᒥᓱᑦ ᓄᑖᕈᖅᐸᓪᓕᐊᔪᓂᑦ ᐊᑐᐃᓐᓇᐅᔪᑦ ᐃᒡᓗᓕᐅᕐᓂᕐᒧᑦ ᓄᑕᐅᔪᓐᓃᖅᑐᑦ ᐊᑑᑎᖃᙱᖦᖢᑎᒡᓗ ᓄᓇᑦᓯᐊᕘᑉ ᐱᔭᕆᐊᖃᖅᑕᖏᓐᓄᑦ. ᐊᑐᖅᑕᐅᕙᒃᑐᑦ ᐃᒡᓗᓕᐅᕐᓂᕐᒧᑦ ᑲᔪᓯᑦᑎᐊᙱᒻᒪᑕ, ᐱᓗᐊᖅᑐᒥᒃ ᓯᓚ ᐊᓯᔾᔨᖅᐸᓪᓕᐊᑎᓪᓗᒍ, ᐱᒻᒪᕆᐅᕗᖅ ᐋᖅᑭᒃᑕᐅᒃᑲᓐᓂᕐᓂᖓ ᐊᑐᖅᑕᐅᕙᒃᑐᑦ ᐃᒡᓗᓕᐅᕐᓂᕐᒧᑦ.
• ᓇᐃᓐ ᐃᓂᑭᒃᓴᖅᐸᓪᓕᐊᓕᖅᑐᖅᑕᐅᖅ ᐃᒡᓗᓕᐅᕐᕕᐅᔪᓐᓇᖅᑐᓂᒃ.
• ᓄᓇᑦᓯᐊᕗᒻᒥ ᐃᒡᓗᓕᐅᕐᓂᖅ ᐊᑭᑐᑐᐃᓐᓇᙱᖦᖢᓂ, ᐊᓯᖏᓐᓂᒃ ᐱᑕᖃᕐᒥᔪᖅ ᐊᑭᖃᖅᑐᓂᒃ ᐃᒡᓗᓕᐅᕐᓂᖅ ᐱᔾᔪᑎᒋᓪᓗᒍ ᐃᓱᒪᒃᓴᖅᓯᐅᕈᑕᐅᔭᕆᐊᖃᖅᖢᑎᒃ, ᐃᓚᒋᔭᐅᓪᓗᑎᒃ ᓄᓇᐅᑉ ᐋᖅᑭᒃᑕᐅᓂᖓ ᐱᔨᑦᑎᕐᕕᐅᔪᓐᓇᖃᑦᑕᕐᓂᐊᕐᒪᑦ ᐃᒡᓗᓕᐅᕐᕕᐅᔪᓐᓇᖅᓯᓗᑎᒃ.
• ᑲᑎᒪᖃᑕᐅᔪᑦ ᐅᖃᓚᐅᖅᑐᑦ ᑮᓇᐅᔭᖃᖅᑎᑦᑎᓂᕐᒧᑦ ᐋᖅᑭᒃᓯᒪᔪᑦ ᒐᕙᒪᒃᑯᓐᓂᑦ ᕿᒥᕐᕈᐊᖅᑕᐅᒃᑲᓐᓂᕆᐊᖃᕐᓂᖏᓐᓂᒃ ᐃᒡᓗᖃᕐᓂᐅᑉ ᐊᑭᓪᓚᑦᑖᖓ ᑎᑭᑕᐅᔪᓐᓇᕐᓂᐊᕐᒪᑦ. ᐱᓗᐊᖅᑐᒥᒃ, ᓄᓇᑦᓯᐊᕗᒻᒥ ᑐᙵᕕᓖᑦ ᖃᔅᓯᐅᓂᖏᑎᒍᑦ ᑲᔪᓯᑦᑎᐊᕈᓐᓇᙱᑦᑐᑦ.
• ᐃᓐᓇᒃᑯᕖᑦ ᓴᓇᔭᐅᓪᓗᐊᖅᑐᑦ ᐃᓐᓇᐃᑦ ᐱᔨᑦᑎᖅᑕᐅᔪᓐᓇᖃᑦᑕᕐᓂᐊᕐᒪᑕ. ᒫᓐᓇᐅᔪᖅ ᐊᒥᓲᕗᑦ ᐃᓐᓇᑐᖃᐃᑦ ᖃᓪᓗᓈᓄᙵᐅᑎᑕᐅᕙᒃᑐᑦ ᐱᔨᑦᑎᖅᑕᐅᓂᐊᕋᒥᒃ ᐃᓄᒃᑎᑑᖅᑐᖃᖅᑎᓐᓇᒍ ᐃᓄᐃᑦ ᓂᕿᖏᓐᓂᒡᓗ ᐱᔪᓐᓇᖃᑦᑕᙱᖦᖢᑎᒃ. ᐃᓐᓇᒃᑯᕕᒃᑕᖃᓕᕐᓂᖅ ᐃᒡᓗᒃᓴᖃᕐᓂᖅᓴᐅᑎᑦᑎᔪᓐᓇᕐᒥᔪᖅ ᒪᒃᑯᖕᓂᖅᓴᐅᔪᓄᑦ ᐃᓚᒌᒃᑐᓄᑦ ᐃᖅᑲᓇᐃᔮᖅᑕᖃᓕᖅᑎᑦᑎᓗᑎᒃ ᐱᕙᓪᓕᐊᑎᑦᑎᓂᒃᑯᓪᓗ ᐱᕈᖅᑎᑦᑎᓗᑎᒃ.
• ᐃᒡᓗᑭᒃᓴᓗᐊᕐᓂᖅ ᐊᒃᑐᐊᔪᖅ ᐃᖅᑲᓇᐃᔮᒃᓴᖅᑖᕆᔭᐅᔪᓐᓇᖅᑐᓂᒃ ᐊᒻᒪᓗ ᐱᕙᓪᓕᐊᔪᓕᕆᓂᕐᒥᒃ. ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᐊᔪᕐᓇᓈᕐᓂᖓᓂᒃ ᒪᒃᑯᒃᑐᓂᒃ ᐃᖅᑲᓇᐃᔭᖅᑎᑕᐃᓐᓇᕈᓐᓇᕆᐊᒃᓴᖅ ᐱᔪᓐᓇᖅᑐᓂᒡᓗ ᐱᖅᑲᓇᐃᔭᖅᑎᖃᐃᓐᓇᕆᐊᒃᓴᖅ ᓄᓇᑦᓯᐊᕗᑦ ᓄᓇᓕᖏᓐᓂ ᐃᒡᓗᒃᓴᖃᙱᒃᑯᑎᒃ, ᐅᕝᕙᓘᓐᓃᑦ ᐸᖕᒥᐅᖅᑐᓃᖏᓐᓇᖃᑦᑕᕆᐊᖃᖅᑎᑕᐅᒍᑎᒃ.
• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᐱᒋᐊᖅᑎᑕᐅᔪᑦ ᓈᒻᒪᖕᓂᖅᓴᐅᑎᑕᐅᓂᖓᓄᑦ ᐃᒡᓗᑭᒃᓴᓗᐊᕐᓂᖅ ᑕᕝᕗᖓᑦᑎᐊᖅ ᐱᕈᖅᑎᑦᑎᓇᓱᐊᕐᓂᕐᒥᒃ ᓄᓇᓕᖕᓂᒃ ᐊᒃᑐᐊᓪᓗᐊᖅᑐᖅ ᑲᒪᒋᔭᐅᔭᕆᐊᓕᖕᓂᒃ ᑲᒪᒋᔭᖃᕈᓐᓇᕐᓂᐊᕋᒥᒃ.

ᐃᓕᓐᓂᐊᖅᑐᓕᕆᓂᖅ

• ᐅᖃᖅᑕᐅᓯᒪᔪᒥᒃ ᒥᐊᓕ ᓴᐃᒪᓐ ᐅᓂᒃᑳᓕᐊᖓᓂ, ᐊᒥᓱᑦ ᑲᑎᒪᖃᑕᐅᔪᑦ ᐊᖏᖃᑎᖃᖅᐳᑦ ᐃᓕᓐᓂᐊᖅᑐᓕᕆᓂᖅ ᑐᙵᕕᒋᔭᐅᓂᖓᓂᒃ ᐅᑭᐅᖅᑕᖅᑐᕐᒥᐅᑦ ᓇᖕᒥᓂᖅ ᐸᖅᑭᔪᓐᓇᓕᖅᑎᑕᐅᓂᖏᓐᓄᑦ.
• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᒫᓐᓇᐅᔪᖅ ᓱᕈᓯᓛᕐᓂᑦ ᖁᑦᑎᖕᓂᖅᐹᒦᑦᑐᓄᑦ ᐃᓕᓐᓂᐊᖅᑎᑦᑎᔾᔪᓯᖅ ᐃᓕᓐᓂᐊᖅᑎᑦᑎᔾᔪᓯᑦᑎᐊᕙᐅᙱᓐᓂᖓᓂᒃ ᓄᓇᑦᓯᐊᕗᒻᒧᑦ, ᑭᓯᐊᓂ ᐅᖃᓚᐅᕆᓪᓗᑎᒃ ᐊᓯᔾᔨᖅᑐᖃᕋᔭᖅᐸᑦ ᐊᒃᓱᕉᑕᐅᔭᕆᐊᖃᕐᔪᐊᕋᔭᕐᓂᖓᓂᒃ.
• ᑲᑎᒪᖃᑕᐅᔪᑦ ᑲᓇᑕᒥᒃ ᐊᑐᓕᖅᑎᑦᑎᖁᔨᓂᕋᐃᓚᐅᖅᐳᑦ ᑲᓇᑕᒥ ᐃᓄᐃᑦ ᐃᓕᓐᓂᐊᖅᑐᓕᕆᓂᕐᒧᑦ ᐸᕐᓇᐅᑎᖓᓂᒃ.
• ᐃᓕᓐᓂᐊᕐᕕᒃᑕᖃᕐᓂᖅᓴᐅᔭᕆᐊᖃᖅᑐᖅ ᐱᓕᒻᒪᒃᓴᕐᕕᒃᑕᖃᕆᐊᖃᕐᓂᖅᓴᐅᓪᓗᓂᓗ, ᒥᑭᓛᓄᑦ, ᕿᑎᐊᓃᑦᑐᓄᑦ ᐊᒻᒪᓗ ᖁᑦᑎᓛᖑᔪᓄᑦ, ᐃᑲᔪᖅᓱᖅᑕᐅᔪᓐᓇᕐᓂᖏᓐᓄᑦ ᓄᓇᓕᖕᓂ ᑐᙵᕕᓖᑦ ᐃᓕᓐᓂᐊᖅᑐᓕᕆᓂᕐᒧᑦ ᐱᓕᕆᐊᒃᓴᑦ.
• ᑮᓇᐅᔭᖃᖅᑎᑕᐅᕐᓂᖅᓴᐅᔭᕆᐊᖃᖅᑐᑦ ᐸᐃᕆᕖᓪᓗ ᓄᓇᖅᑲᐃᓪᓗ ᐃᓕᓐᓂᐊᖅᓵᓕᑎᑕᐅᓂᖏᑦ.
• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᐸᐃᕆᕖᑦ ᒪᑐᐃᖓᓲᖑᓂᖏᓐᓂᒃ ᑭᓯᐊᓂ ᐃᓕᓐᓂᐊᕐᓇᐅᔭᕌᖓᑦ ᐊᐅᔭᒃᑯᓪᓗ ᒪᑐᓯᒪᕙᒃᖢᑎᒃ, ᐸᐃᕆᔨᒃᓴᖃᕆᐊᖃᖅᑐᖃᕐᔪᐊᖅᑎᓪᓗᒍ. ᐊᐅᔭᒃᑯᑦ ᐊᒥᓱᑦ ᐊᖓᔪᖅᑳᕆᔭᐅᔪᑦ ᐃᖅᑲᓇᐃᔭᓲᖑᕗᑦ ᐊᑐᖅᐸᒃᑕᑐᖃᕐᒥᓂᒡᓗ ᐊᑐᑉᐸᒃᖢᑎᒃ ᓲᕐᓗ ᐊᖑᓇᓱᖕᓂᖅ.
• ᑲᑎᒪᖃᑕᐅᔪᑦ ᓈᒻᒪᒃᓴᓚᐅᙱᒻᒥᔪᑦ ᐃᓄᐃᑦ ᓂᕿᖏᓐᓂᒃ ᓂᕆᔭᒃᓴᖃᖅᑎᑦᑎᔪᓐᓇᙱᓐᓂᖏᓐᓂᒃ ᐸᐃᕆᕕᖏᓂ ᐃᓕᖅᑯᓯᕐᒧᑦ ᐊᒃᑐᐊᓗᓂ, ᓂᖀᑦ ᖃᐅᔨᓴᖅᑕᐅᔭᕆᐊᖃᓲᖑᓂᖓᓄᑦ.

ᐅᖃᐅᓯᐅᓪᓗ ᐃᓕᖅᑯᓯᐅᓪᓗ ᐊᑐᖅᑕᐅᓕᒃᑲᓐᓂᖅᑎᑕᐅᓇᓱᖕᓂᖓ

• ᑲᑎᒪᖃᑕᐅᔪᑦ ᐃᓚᖓᑦ ᐃᒪᐃᓕᓚᐅᖅᑐᖅ "ᐅᐃᒻᒪᒃᓯᒪᓪᓗᐊᓕᖅᑐᒍᑦ" ᐱᔾᔪᑎᒋᓪᓗᒍ ᐅᖃᐅᓯᐅᑉ ᐊᑐᖅᑕᐅᙱᑉᐸᓪᓕᐊᓂᖓ.
• ᑲᑎᒪᖃᑕᐅᔪᑦ ᐅᓂᒃᑲᐅᓯᖃᓚᐅᖅᐳᑦ ᐅᖃᐅᓯᐅᑉ ᐱᕐᔪᐊᖑᓂᖓᓂᒃ ᓄᓇᓕᖕᒥᐅᑦ ᐃᓕᖅᑯᓯᖓᓐᓄ ᐊᑕᓂᑯᐊᓂᑦ ᑭᐊᓯᓂ ᓱᒃᑲᔪᕐᔪᐊᕌᓗᖕᒥ ᐊᑐᖅᑕᐅᓂᖃᕈᓐᓃᖅᐸᓪᓕᐊᖕᒪ, ᐅᔾᔨᕆᔭᖃᖅᐳᓪᓗ, ᐃᖕᒥᒨᖓᓪᓚᕆᖕᓂᖓᓂᒃ, ᐃᓕᖅᑯᓯᕆᔭᑉ ᐃᓚᒋᓪᓚᕆᒃᑕᖓ, ᐊᒻᒪ ᐊᑕᓪᓚᕆᒃᑐᖅ ᓄᓇᓕᒋᔭᑦ ᖃᓄᐃᙱᑦᑑᓂᖏᓐᓄᑦ. ᐅᖃᐅᓯᖅ ᐱᑕᖃᕈᓐᓃᕈᓂ ᐅᑎᖅᑎᑕᐅᒃᑲᓐᓂᔾᔮᙱᒻᒪᑦ. ᑲᑎᒪᖃᑕᐅᔪᑦ ᓇᓗᓇᐃᖅᓯᒋᐊᓪᓚᓚᐅᖅᐳᖅ ᑕᒪᑐᒥᖓ ᐱᔾᔪᑎᓕᒃ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥ ᓯᕗᓪᓕᐅᔾᔭᐅᓯᒪᔭᕆᐊᖃᕐᒪᑦ ᐊᑐᓕᖅᑎᑕᐅᓗᓂ.
• ᐊᒥᒐᕐᒪᑕ ᐃᓄᒃᑎᑐᑦ ᐃᓕᓴᐃᔪᒃᓴᑦ ᐃᓕᓐᓂᐊᕐᕕᖕᓂ. ᐊᒃᓱᕈᕐᓇᕈᑎᖃᓗᐊᖅᐳᖅ ᐅᖃᐅᓯᕐᒥᒃ ᐃᓕᓴᐃᔪᒃᓴᑦ ᑎᑎᖅᑲᖅᑖᖅᓯᒪᔭᕆᐊᖃᕐᒪ ᐃᓕᓴᐃᔨᐅᓂᕐᒧᑦ.
• ᑕᐃᒫᒃᑕᐅᖅ, ᓄᓇᑦᓯᐊᕗᑦ ᒐᕙᒪᖓᑦ ᐊᔪᕐᓇᖅᑐᖅᓯᐅᖅᐸᒃᐳᑦ ᐃᓐᓄᒃᓯᔭᕆᐊᒃᓴᖅ ᑐᑭᓕᐅᕆᔨᒃᓴᓂᒃ ᑐᓵᔨᒃᓴᓂᒡᓗ.
• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ, ᐊᕕᒃᓯᒪᔪᑦ ᒐᕙᒪᖓᑦ ᐱᓕᕆᐊᖃᕈᓐᓇᕋᓗᐊᖅᑎᓪᓗᒋᑦ ᐃᓕᓐᓂᐊᕐᓂᖅ ᐱᐅᓯᕚᓪᓕᒃᑲᓐᓂᖅᑎᓐᓇᓱᒡᓗᒍ, ᑲᓇᑕᐅᑉ ᒐᕙᒪᖓᑦ ᐃᓱᒪᒃᓴᖅᓯᐅᕈᑎᖃᓪᓗᐊᖅᐳᑦ ᖃᓄᖅ ᐃᓚᐅᓂᖃᕈᓐᓇᕋᔭᕐᒪᖔᕐᒥᓂᑦ ᐅᖃᐅᓯᐅᑉ ᐊᑐᖅᑕᐅᓕᒃᑲᓐᓂᖅᑎᑕᐅᓇᓱᖕᓂᖓᓄᑦ. ᑲᓇᐅᑉ ᑎᒥᖁᑎᒋᔭᖏᑦ ᐅᑭᐅᖅᑕᖅᑐᕐᒦᑦᑐᑦ ᐱᕐᔪᐊᖑᔪᒥᒃ ᐱᖃᑕᐅᓂᖃᕈᓐᓇᕐᒪᑕ ᐃᓄᐃᑦ ᐅᖃᐅᓯᖓᑦᑕ ᐊᑐᖅᑕᐅᓕᒃᑲᓐᓂᖅᑎᑕᐅᓇᓱᖕᓂᖓᓄᑦ.
• ᐆᒃᑑᑎᒋᓗᒐ, ᒐᕙᒪᒃᑯᑦ ᐃᑲᔪᖅᓱᐃᓪᓗᐊᕐᒪᑕ ᐃᓐᓇᐃᑦ ᒪᒃᑯᒃᑐᓪᓗ ᐊᐅᓪᓚᖅᓯᒪᕕᒃᓴᖃᖅᑎᑕᐅᓗᑎᒃ ᓄᓇᒥ, ᖃᐅᔨᒪᓂᕆᔭᕐᒥᒃ ᐅᖃᐅᓯᕐᒥᒃ ᐃᓕᖅᑯᓯᕐᒥᒡᓗ ᖃᐅᔨᔭᐅᑎᑦᑎᓂᖅᑕᖃᖁᓪᓗᒍ ᐊᔾᔨᒋᔭᐅᐸᓗᒃᑐᒥᒃ ᐱᓕᕆᐊᒃᓴᓕᐊᕆᓯᒪᔭᕐᒥᒃ ᑲᓇᑕᐅᑉ ᒥᕐᖑᐃᖅᓯᕐᕕᓕᕆᔨᒃᑯᖏᓐᓂᑦ ᑑᕐᖓᑦ ᖃᖅᑲᐃᑦ ᑲᓇᑕᒥ ᒥᕐᖑᐃᖅᓯᕐᕕᐊᓂ.
• ᑮᓇᐅᔭᖅᑕᖃᖅᑎᑕᐅᓂᖅᓴᐅᓪᓗᐊᖅᐳᖅ "ᐅᖃᐅᓯᕐᒥᒃ ᐱᕈᖅᑎᑦᑎᓇᓱᖕᓂᖅ" ᐸᐃᕆᕕᖕᓂ, ᒪᐅᕆᑦ ᐃᓕᐅᕈᓯᕆᔭᖓᑐᑦ ᐅᖃᐅᓯᕐᒥᖕᓂᒃ ᐊᑐᖅᑕᐅᓕᖅᑎᑕᐅᒃᑲᓐᓂᕋᓱᒃᖢᒍ.
• ᑲᑎᒪᖃᑕᐅᔪᑦ ᐅᔾᔨᕆᔭᖃᓚᐅᖅᐳᑦ ᑮᓇᐅᔭᑎᒍᑦ ᐱᔪᒥᓵᕆᔾᔪᑎᑕᖃᕆᐊᖃᕐᓂᖓᓂᒃ ᐃᖅᑲᓇᐃᔭᖅᑎᑦ ᐃᓄᒃᑎᑐᓄᑦ ᐅᖃᒡᒐᙱᑦᑎᐊᖅᑐᓄᑦ, ᐊᔾᔨᒋᔭᐅᐸᓗᒡᓗᓂ ᑲᓇᑕᐅᑉ ᒐᕙᒪᒃᑯᖏᑕ ᐱᓕᕆᐊᒃᓴᕆᓯᒪᔭᖓᑐ ᒪᕐᕈᐃᓂᒃ ᐅᖃᐅᓯᖃᓕᖅᑎᑦᑎᓇᓱᒃᖢᑎᒃ ᐅᐃᕖᑐᑦ ᖃᓪᓗᓈᑐᓪᓗ.
• ᐅᖃᕆᐅᖅᓴᐅᑎᒃᓴᒥᒃ ᐱᓕᕆᐊᒃᓴᖅᑕᖃᓪᓗᐊᖅᐳᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᓐᓄᑦ ᖃᑯᒍᙳᖅᓯᒪᓕᖅᐸᑦ ᐅᖃᒡᒐᙱᑦᑎᐊᓕᕐᓂᐊᕐᒪᑕ.

ᐃᖅᑲᖅᑐᐃᓂᓕᕆᔾᔪᓯᖅ

• ᒪᓕᒐᓕᕆᓂᕐᒧᑦ ᐱᔨᑦᑎᖅᑐᒃᓴᖅᑕᖃᕐᓂᕆᔭᖅ ᐊᒻᒪ ᐱᐅᓯᕚᓪᓕᖅᑎᑕᐅᓂᖏᓂᑦ ᐊᖏᔫᑎᑦ ᐊᑐᖅᑕᐅᕙᒃᑐᑦ ᐃᖅᑲᖅᑐᐃᓂᓕᕆᓂᕐᒧᑦ ᐱᐅᓯᕚᓪᓕᖅᑎᑕᐅᓂᖏᑦ ᐱᕐᔪᐊᖑᕗᑦ.
• ᑲᑎᒪᖃᑕᐅᔪᑦ ᐅᓂᒃᑲᐅᓯᖃᓚᐅᖅᐳᑦ ᖃᓄᖅ ᓄᓇᓖᑦ ᐃᓚᖏᓐᓄᑦ ᐃᖅᑲᖅᑐᐃᔭᖅᑐᖃᑦᑕᕐᓂᕆᔭᖏᓐᓂᒃ ᐱᓇᓱᐊᕈᓯᑦ ᐱᖓᓲᔪᖅᑐᑦ ᐊᓂᒍᕌᖓ ᐊᒻᒪ ᐃᓛᓐᓂᑦ ᐃᖅᑲᖅᑐᐃᓂᖅᑕᖃᖅᐸᒃᖢᓂ ᓯᓇᒃᑕᕐᕕᐅᑉ ᐃᒥᕐᒥᐊᓂ.
• ᐃᓱᒫᓘᑎᒋᔭᐅᒋᕗᖅ ᐃᖅᑲᖅᑐᐃᕕᒃᑰᖅᑎᑕᑦ ᓱᖅᑯᐃᒪᒃᖠᕋᓗᐊᕐᒪᖔᑕ ᐊᑐᖅᑕᒥ ᐃᓕᐅᕐᕕᐅᕙᒍᓯᐊᓂᒃ ᐱᔾᔪᑎᒋᓪᓗᒍ ᑐᓵᔨᑕᖃᑦᑎᐊᙱᓗᐊᕐᓂᖓᓄᑦ.
• ᖃᓄᐃᓕᐅᕐᓂᖅᓴᐅᓂᖅᑕᖃᕆᐊᖃᖅᐳᖅ ᐱᓂᕐᓗᒃᑕᐅᓯᒪᔪᑦ ᐱᔨᑦᑎᖅᑕᐅᖁᓪᓗᒋᑦ ᐃᖅᑲᖅᑐᐃᕕᑎᒎᕐᓂᖅᑕᖃᖅᑎᓪᓗᒍ ᐊᒻᒪ ᑐᕌᖓᓂᖅᓴᖅᑕᖃᓗᐊᖅᐳᖅ ᐱᓂᕐᓗᒃᑕᐅᓯᒪᔪᓄᑦ ᐊᑐᐊᒐᓕᐅᖅᑎᓪᓗᒋᑦ ᐸᕐᓇᐅᓯᐅᖅᑎᓪᓗᒋᓪᓗ. ᓲᕐᓗ, ᓄᓇᓖᑦ ᐃᓚᖓᓐᓂ, ᐃᖅᑲᖅᑐᐃᕕᒃᑰᕐᓂᑰᕌᓂᒃᓯᒪᔪᓄᑦ ᐅᐸᑲᖅᑕᕆᔭᐅᔭᕆᐊᓕᒃ ᓴᓂᓕᖅᖠᑦᑎᐊᕆᔭᐅᕗᖅ ᐱᓂᕐᓗᒃᑕᐅᓯᒪᔪᓄᑦ ᐱᓕᑦᑎᕐᕕᐅᑉ ᐊᓪᓚᒡᕕᖓᓄᑦ, ᑕᐃᒪᐃᓐᓂᑯᐊᓄᓪᓗ ᐱᓂᕐᓗᐃᓂᑯ ᐱᓂᕐᓗᒃᑕᐅᓂᑯᓗ ᐊᖅᑯᓵᖃᑦᑕᐅᑎᑦᑕᑐᐃᓐᓇᕆᐊᖃᖅᐳᑦ. ᐃᖅᑲᖅᑐᐃᕕᒃᑰᕈᓯᐅᑉ ᐊᑯᓂᐅᓂᕆᔭᖓ ᐃᓱᒫᓘᑎᒃᓴᐅᔪᓐᓇᕆᕗᖅ, ᐃᖅᑲᖅᑐᐃᕕᒃᑰᕈᑎᒃᓴᑦ ᐅᖓᕙᕆᐊᖅᑕᐅᔭᕆᐊᖃᖅᐸᖕᓂᖏᓐᓄᑦ ᒪᓕᒐᓕᕆᔨᒃᓴᖅᑕᖃᙱᓐᓂᑯᐊᓄᑦ. ᐊᑯᓂᐅᒃᑲᓐᓂᖅᑎᑦᑎᖃᑦᑕᕐᓂᖅ ᐊᒃᓱᕈᕐᓇᖅᑐᐊᓘᔪᓐᓇᖅᐳᖅ ᐃᖅᑲᖅᑐᖅᑕᐅᔭᕆᐊᓕᖕᒧᑦ, ᐊᒻᒪᑦᑕᐅᖅ ᐱᓂᕐᓗᒃᑕᐅᓯᒪᔪᒧᑦ.

ᓄᓇᓕᖕᓂ ᐱᓕᕆᐊᑦ ᑮᓇᐅᔭᖃᖅᑎᑕᐅᓂᖏᑦ

• ᑮᓇᐅᔭᖅᑕᖃᕐᓂᖅᓴᐅᔭᕆᐊᖃᖅᐳᖅ ᐅᑭᐅᖅᑕᖅᑐᒧᓪᓚᕆᒃ ᑐᕌᖓᔪᓂᒃ. ᓄᓇᓕᖕᒥᐅᑕᐅᔪᑦ ᐋᖅᑭᒍᑎᓇᓱᒋᐊᖃᓲᖑᖕᒪᑕ ᑲᓇᑕᐅᑉ ᒐᕙᒪᒃᑯᖏᑕ ᐊᑐᖅᑕᒃᓴᓕᐊᕆᑎᑉᐸᒃᑕᖏᓐᓄᑦ ᐃᓄᐃᑦ ᑕᐅᑐᒃᑕᖃᕈᓯᐊᓂᒃ ᐊᑐᖅᓯᓯᒪᙱᑦᑎᐊᖅᑐᓂᒃ ᐊᒻᒪ ᐅᑭᐅᖅᑕᖅᑐᕐᒥᐅᓄᑦ ᑭᙴᒪᔭᕆᔭᕐᓄᑦ ᑐᕌᖓᙱᑦᑐᓄᑦ.
• ᑲᑎᒪᖃᑕᐅᔪᑦ ᐅᖃᐅᓯᖃᓚᐅᖅᐳᑦ ᐊᑲᐅᑦᑎᐊᕐᓂᖓᓂᒃ ᓇᓕᒧᓲᑎᑦᑎᓂᖅᑕᖃᕐᓂᐅᑉ ᐊᒻᒪ and equity models ᑮᓇᐅᔭᖃᖅᑎᑦᑎᓂᕐᒧᑦ ᓄᓇᖃᖅᑳᖅᑑᔪᓄᑦ ᑎᒥᓄᑦ. ᐅᔾᔨᕆᔭᖃᖅᓯᒪᓂᕋᓚᐅᖅᐳᑦ ᖃᔅᓯᐅᓂᕆᔭᕐᓅᖓᔪᖅ ᑮᓇᐅᔭᖅᑖᖅᑎᑦᑎᔾᔪᓯᖅ ᐅᑭᐅᖅᑕᖅᑐᕐᒥᐅᓂᒃ ᓱᖁᑕᐅᒃᓴᙱᖅᑰᔨᓗᐊᕐᒪᑦ ᐱᔾᔪᑎᒋᓪᓗᒍ ᐅᑭᐅᖅᑕᖅᑐᕐᒥᐅᑦ ᐊᑭᑐᒃᓴᕐᓂᖅᓴᐅᓂᖏᓐᓄᑦ ᐃᓄᐃᓴᖕᓂᖅᓴᐅᓪᓗᑎᒡᓗ ᖃᓪᓗᓈᓃᑦᑐᓂᐅᖓᓂᑦ. ᑕᐃᒪᐃᓕᐅᕆᑦᑕᕐᓂᖅ ᓇᓕᒧᒃᓲᑎᓯᒪᔪᓂᒃ ᑎᑭᐅᑎᓐᓇᖅᐸᙱᓚᑦ.
• ᑮᓇᐅᔭᓂᒃ ᑐᒃᓯᕋᐅᓯᐅᕈᑎᓕᐊᖑᕙᒃᑐᑦ ᐊᑯᓂᐊᓗᒃ ᑲᒪᒋᔭᕆᐊᖃᕐᓇᖅᐸᒃᐳᑦ ᐱᔭᕆᑐᕙᒃᖢᑎᒡᓗ ᐅᑭᐅᖅᑕᖅᑐᕐᒥ ᑎᒥᐅᔪᓄᑦ ᐃᓄᐃᓪᓕᐅᕌᓂᒌᒡᒍᔪᓄᑦ ᐊᒻᒪ ᐱᕕᑭᑦᑑᒡᒍᓪᓗᑎᒃ ᐊᑐᕆᐊᖃᖅᑕᑕᖃᑦᑎᐊᕋᓂᓗ. ᐃᓛᓐᓂᑦ ᓱᖅᑯᐃᔭᐃᔪᓐᓇᙱᓗᐊᕐᓂᖅᑕᖃᖅᐸᒃᐳᖅ ᐊᒻᒪ ᐅᓂᒃᑳᓕᐅᕆᐊᖃᕐᕕᒋᔭᖃᖅᑎᑕᐅᓂᖅ ᒐᕙᒪᒃᑯᑦ ᐱᓕᕆᐊᒃᓴᖁᑎᒋᔭᖏᓐᓄ ᐊᒃᓱᕈᕐᓇᓗᐊᕐᓂᖏᓐᓄᑦ ᑮᓇᐅᔭᖅᑖᕆᑕᐃᓐᓇᖅᑕ ᓱᕙᓕᑭᐊᖑᖅᑰᔨᓕᖅᑎᑦᑎᕙᖕᒪᑕ ᑐᒃᓯᕋᕋᓱᒋᐊᒃᓴᖅ. ᖃᓄᐃᓕᐅᖔᕈᓐᓇᓕᐊᕆᔭᑦ ᐃᓚᖃᖅᐳᑦ ᑐᒃᓯᕋᕈᓯᕐᓂᒃ ᐱᔭᕆᐊᒃᖠᓕᖅᓯᖁᔨᓂ ᐊᒻᒪ ᐅᑭᐅᖅᑕᖅᑐᕐᒥᐅᓄᓪᓚᕆᒃ ᑮᓇᐅᔭᖅᑖᕐᕋᓱᒡᕕᒋᔭᐅᔪᓐᓇᖅᑐᒥᒃ ᐱᑕᖃᖅᑎᑕᐅᓕᕐᓗᓂ.
• ᐱᕐᔪᐊᖑᕗᖅ ᕿᒥᕐᕈᔭᕆᐊᒃᓴᖅ ᖃᓄᓪᓚᕆᒃ ᐊᑭᖃᕐᒪᖔᑕ ᖃᓄᑎᒋ ᑮᓇᐅᔭᑎᒍᑦ ᐃᑲᔪᐃᓂᖅᑕᖃᕐᓂᐊᕐᒪᖔᑦ ᐊᑑᑎᖃᑦᑎᐊᖅᑐᒃᓴᓂᒃ ᐱᓕᕆᐊᒃᓴᖅᑕᖃᓕᖁᓪᓗᒍ. ᐃᒪᐃᖔᕈᐊᖕᒪᑦ, ᐱᓕᕆᐊᒃᓴᕆᔭᐅᔪᑦ ᐊᑮᑦᑐᖃᖔᓕᖅᐸᖕᒪᑕ.
• ᑲᑎᒪᖃᑕᐅᔪᑦ ᓈᒻᒪᖕᓂᕋᐃᓚᐅᖅᐳᑦ ᐃᓕᐅᕈᓯᕆᔭᕐᓂᒃ ᐱᓕᕆᐊᒃᓴᐅᑎᑕᑦ ᐃᓚᖏᓐᓂᑦ INAC ᐊᑐᖅᓯᔪᓐᓃᖅᐸᓪᓕᐊᓕᕐᓂᖏᓐᓂᒃ ᐱᖁᔨᕗᒑᕈᑎᓂᒃ ᐃᓱᒪᒋᔭᖃᖔᕐᓂᖅᓴᐅᓕᖅᖢᑎᒃ ᑮᓇᐅᔭᖃᖅᑎᑦᑎᓂᕐᒥᒃ ᑐᒃᓯᕋᐅᑎᓄᑦ ᐊᓂᒍᐃᕙᓪᓕᐊᓂᒃᑰᖓᔪᓂᒃ, ᑭᓯᐊᓂ ᐅᒃᐱᕆᔭᖃᕆᓪᓗᑎᒃ ᖃᓄᐃᓕᐅᒃᑲᓐᓂᕐᕕᒃᑕᖃᕐᓂᖓᓂᒃ.

ᓄᓇᖃᖅᑳᖅᑐᑦ ᖃᐅᔨᒪᔭᖏᑦ

• ᑲᑎᒪᖃᑕᐅᔪᑦ ᐱᒻᒪᕆᐅᓂᕋᐃᓚᐅᖅᐳᑦ ᓄᓇᖃᖅᑳᖅᑐᑦ ᖃᐅᔨᒪᔭᖏᓐᓂᒃ ᖃᐅᔨᒪᔨᐅᔪᓪᓗ ᖃᓄᐃᓕᐅᕐᓂᕆᖃᑦᑕᖅᑕᖏᓐᓂᒃ. ᐅᓂᒃᑳᓚᐅᖅᐳᑦ ᖃᐅᔨᓴᖅᑎᓂᒃ ᓯᓚᑖᓂᙶᖅᑐᓂᒃ ᓄᓇᓕᖕᓄᑦ ᑎᑭᑦᑐᖃᖃᑦᑕᖅᓯᒪᑎᓪᓗᒍ ᐃᓕᓴᖅᓯᕙᙱᑦᑐᓂᒃ ᐃᑲᔪᓚᐅᕐᓂᖏᓐᓂᒃ ᓄᓇᓕᖕᒥᐅᑕᐃᑦ ᖃᐅᔨᒪᓂᓖᑦ. ᑕᐃᒪᐃᓐᓂᑯᐊᓄᑦ, ᐊᒥᓱᑦ ᐃᑲᔪᖃᑦᑕᕈᓐᓃᖅᓯᒪᔪᑦ ᖃᐅᔨᓴᖅᑎᓂᒃ, ᑕᒪᓐᓇ ᐊᓯᔾᔨᖅᐸᓪᓕᐊᓕᕋᓗᐊᖅᖢᓂ.
• ᑕᓪᓕᒪᓂᑦ ᐊᕐᕕᓂᓕᖕᓄᑦ ᐊᑕᐅᓯᕐᒧᓪᓗ ᐊᕐᕌᒍᑦ ᐱᕈᖅᑎᑦᑎᓇᓱᖃᑦᑕᖅᓯᒪᓕᖅᑐᖅ ᖃᐅᔨᓴᕐᓂᕐᒥᒃ ᑲᓇᑕᒥ ᖁᑦᑎᒃᑐᒥ ᖃᐅᔨᓴᕐᕕᖕᒧᑦ, ᑭᓯᐊᓂᑦᑕᐅᖅ ᓈᒻᒪᒃᑐᒥᒃ ᐅᐸᓗᖓᖅᑕᐅᔭᕆᐊᖃᕐᒥᔪᖅ ᓄᓇᖃᖅᑳᖅᑐᑦ ᖃᐅᔨᒪᔭᖏᑦ.
• ᐱᒻᒪᕆᐅᖕᒥᔪᖅ ᐃᓕᓴᕆᔭᐅᓂᖓ ᐅᑭᐅᖅᑕᖅᑐᕐᒥᒃ ᖃᐅᔨᓴᕐᓂᖅ ᐊᒻᒪᓗ ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐊᔾᔨᒌᙱᖦᖢᑎᒃ ᐱᓕᕆᔾᔪᓯᐅᓂᖏᓐᓂᒃ, ᐱᓕᕆᔾᔪᓰᓪᓗ ᐊᔾᔨᒌᓕᖅᑎᑕᐅᓇᓱᓪᓗᐊᙱᖦᖢᑎᒃ.
• ᑲᑎᒪᖃᑕᐅᔪᑦ ᐃᒃᐱᒍᓱᓚᐅᖅᐳᑦ ᐊᓯᔾᔨᕐᓂᕐᒧᑦ ᐱᒋᐊᕈᑕᐅᓇᔭᖅᑐᖅ ᑲᓇᑕᒥ ᐱᓕᕆᕝᕖᑦ ᐅᒃᐱᕈᓱᒃᑎᑕᐅᒃᐸᑕ ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᓇᓕᒧᖃᖅᑐᖅ ᖃᐅᔨᓴᕐᓂᕐᒥᒃ, ᓄᓇᖃᖅᑳᖅᑐᑦ ᖃᐅᔨᒪᔭᖏᑦ ᐅᖃᐅᓯᕆᔭᐅᕌᕐᔪᑯᓗᑐᐃᓐᓇᙱᓪᓗᓂ.

ᐋᖅᑭᒃᓯᓂᖅ ᖃᐅᔨᓴᕐᓂᕆᔭᐅᓇᔭᖅᑐᓂᒃ: ᖃᐅᔨᓴᕐᓂᕐᒧᑦ ᓯᕗᓪᓕᐅᔾᔭᐅᔪᑦ

• ᐃᓄᐃᑦ ᓇᖕᒥᓂᖅ ᐋᖅᑭᒃᓯᔨᐅᓂᖓ ᑭᓱᑦ ᖃᐅᔨᓴᖅᑕᐅᓪᓗᐊᕐᒪᖔᑕ ᑐᑭᖃᖅᐳᖅ ᖃᐅᔨᓴᖅᑕᖃᕐᓂᖅ ᐃᓄᖕᓄᑦ ᐊᒃᓱᕈᕆᔭᐅᔪᓂᒃ. ᐃᓚᒋᓪᓗᒍ ᐋᖅᑭᖃᑎᒌᖕᓂᕐᒧᑦ, ᖃᓄᐃᓕᐅᕈᓯᖅᑕᖃᓪᓗᐊᖅᐳᖅ ᐅᑭᐅᖅᑕᖅᑐᕐᒥᐅᑦ ᐃᓄᐃᓪᓗ ᐃᓚᓯᒋᐊᕈᓐᓇᐅᑎᒃᓴᖓᓐᓂᒃ ᖃᐅᔨᓴᕐᓂᕐᒧᑦ ᓯᕗᓪᓕᐅᔾᔭᐅᓪᓗᐊᖅᑐᓂᒃ.
• ᒐᕙᒪᒃᑯᑦ ᐱᔭᒃᓴᖃᖅᐳᑦ ᓇᐅᑦᑎᖅᓱᖅᑎᐅᓂᕐᒥᒃ ᐅᑭᐅᖅᑕᖅᑑᑉ ᐊᕙᑎᖓᓂᒃ, ᐱᓗᐊᖅᑐᒥᒃ ᐅᑭᐅᖅᑕᖅᑐᕐᒥᒃ ᐊᑕᖐᓯᒪᓂᓕᖕᒥᒃ ᐅᔾᔨᕆᔭᖃᕋᓱᖕᓂᒃ ᖃᐅᔨᓴᕐᓂᖅᑕᖃᕐᓂᐊᖅᑎᓪᓗᒍ ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓᓂᒃ, ᐃᓚᓕᐅᔾᔨᓯᒪᓂᖅᑕᖃᕐᓗᓂ ᓄᓇᖃᖅᑳᖅᑐᑦ ᖃᐅᔨᒪᓂᕆᔭᖏᓐᓂᒃ ᐊᒻᒪ ᐱᕕᖃᓕᖅᐹᓪᓕᕈᓐᓇᖅᑎᑦᑎᓂᕐᒥᒃ.
• ᒫᓐᓇᐅᔪᖅ ᖃᓄᐃᑦᑑᓂᕆᔭᕐᓂᒃ ᑐᖅᑯᖅᑕᐅᓯᒪᔪᖅᑕᖃᓪᓗᐊᖅᐳᑦ ᐊᑐᖅᑕᐅᔭᕆᐊᖃᕐᒪᑦ ᑕᒪᐃᓐᓄᓕᒫᑲᓴᑦᑎᐊᖅ ᐊᕙᑎᓕᕆᓂᕐᔭᕐᓄᑦ ᑕᒪᑐᒪᓂ ᐊᕕᒃᑐᖅᓯᒪᓂᐅᔪᒥ. ᑲᑎᒪᖃᑕᐅᔪᑦ ᐅᔾᔨᕆᔭᖃᓚᐅᖅᐳᑦ ᒫᓐᓇᐅᔪᖅ ᖃᐅᔨᒪᔭᖃᕐᓂᕆᔭᖅ ᐊᔾᔨᖃᑐᐃᓐᓇᕐᓂᖓᓂᒃ "ᑕᒡᒐᑑᖅᑐᐊᓗᒃ ᐃᑎᖅᓴᖅ."
• ᑲᑎᒪᖃᑕᐅᔪᑦ ᐅᔾᔨᕆᔭᖃᓚᐅᖅᐳᑦ ᐃᓄᐃᑦ ᐅᖃᐅᓯᖃᕌᖓᒥᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᕆᔭᖓᓂᒃ ᐅᑭᐅᖅᑕᖅᑐᕐᒥ, ᐃᓱᒪᒋᔭᖃᕋᔪᒃᐳᑦ ᖁᑦᑎᒃᑑᑉ ᐊᕙᑎᒋᔭᖓᓂᒃ ᑭᓯᐊᓂ ᐃᓱᒪᒋᔭᖃᖅᐸᒐᑎᒃ ᖃᓄᖅ ᐃᓄᐃᑦ ᐊᒃᑐᖅᑕᐅᓂᖃᕋᔭᕐᒪᖔᑕ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᑐᙵᕕᒃ ᐃᓚᖃᖃᓯᐅᔾᔨᓪᓗᐊᖅᐳ ᐃᓄᖕᓄᑦ ᖃᐅᔨᒪᓂᕆᔭᐅᔪᒥᒃ ᐊᑐᖅᓯᔪᓂᑦ ᑕᒪᑕᒥᖓ ᐊᓯᔾᔨᖅᐸᓪᓕᐊᓂᐅᔪᒥᑦ ᑕᒫᓂ ᐊᕕᒃᑐᖅᓯᒪᓂᕆᔭᕐᒥ, ᑐᓴᖅᑕᐅᑎᑦᑎᔪᓐᓇᕈᒪᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᖕᒪᖔᑦ ᓱᓕᓪᓚᕆᒃᐳᖅ.
• ᑲᑎᒪᖃᑕᐅᔪᑦ ᐅᖃᓯᖃᓚᐅᖅᐳᑦ ᐃᓕᓐᓂᐊᖅᓯᒪᓂᓖᑦ ᓯᓚᑦᑐᖅᓴᕐᕕᖕᒥᙶᖅᑐᑦ ᐊᑐᖅᑕᐅᒡᒍᓂᖏᓐᓂᒃ ᖃᐅᔨᓴᕐᓂᖅᑕᖃᕐᓂᐊᖅᑎᓪᓗᒍ, ᑕᐃᒪᐃᓕᐅᕆᖃᑦᑕᕐᓂᖅ ᐊᑐᖅᓯᙱᒻᒪ ᐅᑭᐅᖅᑕᖅᑐᕐᒥᐅᑦ ᓯᕗᓪᓕᐅᑎᓯᒪᔭᖏᓐᓂᒃ. ᐆᒃᑑᑎᒋᓗᒍ, ᖃᐅᔨᓴᕐᓂᖅᑕᖃᖅᐳᖅ ᑐᕙᕐᒥᒃ, ᑭᓯᐊᓂ ᖃᐅᔨᓴᕐᓂᖅᑕᖃᙱᓗᐊᖅᐳᖅ ᖃᓄᖅ ᑐᕙᖅ ᐊᒃᑐᐃᓯᒪᓂᖃᕐᒪᖔᑦ ᐃᓄᖕᓂᒃ.
• ᑲᑎᒪᖃᑕᐅᔪᑦ ᓂᓪᓕᐅᑎᖃᓚᐅᖅᐳᑦ ᖃᐅᔨᔪᒥᒋᔭᖃᕐᓂᕐᒥᖕᓂᒃ ᑕᕆᐅᕐᒥᐅᑦᑕᓂᒃ ᐊᒻᒪ ᑎᖕᒥᐊᑦ ᑎᑭᑦᑕᖅᐸᒃᑐᑦ ᓄᒃᑕᐅᓯᕆᕙᒃᑕᖏᓐᓂᒃ.
• ᖃᐅᔨᓴᕐᓂᖅ ᐊᑑᕐᓂᖃᕐᔪᐊᖅᐳᖅ ᐊᒃᑐᐊᔭᒃᓴᐅᔪᓂᒃ ᓴᖅᑭᑎᑦᑎᓂᖅᑕᖃᕌᖓᑦ ᐋᖅᑭᒃᓯᔾᔪᑎᒋᔭᐅᔪᒥᒃ ᐊᑲᐃᓪᓕᐅᕈᑎᒋᔭᕐᒥᒃ ᓄᓇᖃᖅᑎᐅᔪᓄᑦ ᐱᕚᓪᓕᕈᑎᖃᖅᑐᒥᒃ.
• ᐃᒪᐃᓪᓗᐊᖅᑐᖁᑎᒋᔭᐅᓚᐅᖅᐳᖅ ᐃᓄᐃᑦ ᐱᔪᓐᓇᖅᑐᑑᑎᑕᐅᔪᓐᓇᓪᓗᐊᖅᑐᑦ ᐅᑭᐅᖅᑕᖅᑐᕐᒧᑦ ᑕᕆᐅᕐᒥ ᓄᓇᙳᐊᕐᓄᑦ ᖃᐅᔨᒃᑲᐃᔾᔪᑎᓂᒃ, ᐊᐅᓚᑦᑎᓂᖃᖅᑎᐅᔪᓐᓇᕐᓂᐊᕐᒪᑕ ᐅᒥᐊᕐᔪᐊᓂᒃ ᐊᕕᒃᑐᖅᓯᒪᓂᕆᔭᒃᑰᖅᑐᓂᒃ ᐊᒻᒪ ᐃᒻᒪᖄ "shipping tycoons"ᖑᓕᕐᓗᑎᒃ ᐅᑭᐅᖅᑕᖅᑐᕐᒥ.
• ᐱᔪᒥᒋᔭᐅᓂᖅᑕᖃᓚᐅᖅᐳᖅ ᖃᐅᔨᓴᕐᓂᖅᑕᖃᕋᔭᕆᐊᒃᓴᖓ ᐊᔾᔨᒋᔭᐅᐸᓗᒃᑐᓂᒃ ᐊᓪᓚᓄᑦ ᖃᐅᔨᓴᕐᓂᕆᔭᐅᔪᒥᒃ ᐊᒻᒪ ᑕᑭᔫᓂᖅᓴᒃᑰᖓᔪᒥᒃ ᓇᐃᓴᖅᑕᐅᔾᔪᑎᒥᒃ, ᖃᖓᙳᖅᓯᒪᓕᕐᓗᒍ ᑐᖅᑯᖅᑕᐅᓯᒪᔪᖅᑕᖃᕈᓐᓇᖅᓯᓂᐊᕐᒪᑦ ᓇᓗᓇᐃᖅᓯᓯᒪᔪᓂᒃ ᖃᐅᔨᒪᔭᐅᔭᕆᐊᓕᖕᓂᒃ.

ᖃᐅᔨᓴᕐᓂᖅ

• ᑲᑎᒪᖃᑕᐅᔪᑦ ᐅᖃᕆᐊᓪᓚᒍᑎᖃᓚᐅᖅᐳᑦ ᖃᐅᔨᓴᕐᓂᖅᑕᖃᓪᓗᐊᕐᓂᖓᓂᒃ ᐃᓄᖕᓄᑦ ᐃᑲᔪᖅᓱᖅᑕᐅᔪᓂᒃ ᖃᐅᔨᓴᕐᓂᖅᑕᖃᙱᖔᕐᓗᓂ ᐃᓄᖕᓂᒃ.
• ᑲᑎᒪᖃᑕᐅᔪᑦ ᐅᖃᓚᐅᖅᐳᑦ ᖃᐅᔨᓴᕐᓂᐅᔪᖅ ᐊᑐᕐᓂᖃᓪᓗᐊᐳᖅ ᐊᑐᐊᒐᓕᐅᕈᑕᐅᓗᓂ, ᑭᓯᐊᓂᓗ ᐊᐃᕙᐅᑕᐅᓚᐅᖅᖢᓂ ᑕᒪᓐᓇ ᖃᐅᔨᓴᕐᓂᒃ ᐃᓚᐅᑎᑦᑎᓂᖃᓪᓗᐊᕐᓂᖓᓂᒃ ᐃᓄᖕᓂᒃ ᐅᑭᐅᖅᑕᖅᑐᕐᒥᐅᓂᒡᓗ, ᓯᓚᑦᑐᖅᓴᕐᕕᒡᔪᐊᕐᓂᙶᖅᑐᓂᑐᐃᓐᓇᐅᙱᑦᑐᖅ.
• ᑲᑎᒪᖃᑕᐅᔪᑦ ᐅᔾᔨᕆᔭᖃᓚᐅᖅᐳᑦ ᐅᓄᖅᑐᑦ ᖃᐅᔨᒪᓂᖃᕐᔪᐊᖅᑑᑎᒋᔭᑦ ᐅᑭᐅᖅᑕᖅᑐᕐᒥᒃ ᑐᓴᐅᑎᒃᑰᕈᑎᒋᔭᐅᔪᓂᒃ ᖃᓪᓗᓈᖑᖔᕐᒪᑕ ᐃᓅᓇᑎᒃ, ᑭᓯᐊᓂᓗ ᐊᐃᕙᐅᑎᖃᕆᓪᓗᑎᒃ "ᐃᓄᐃᑦ ᖃᐅᔨᓴᖅᑎᐅᖅᑳᖅᓯᒪᔪᑦ ᖃᐅᔨᒪᓂᕆᔭᕐᒥᒃ ᐸᐸᑦᑎᔨᐅᔪᑦ, ᐃᓚᒋᔭᐅᖃᑕᐅᖃᑦᑕᓪᓗᐊᖅᖢᑎᒃ ᖃᐅᔨᓴᕐᓂᖅᑕᖃᕐᓂᐊᖅᑐᓪᓗᒍ ᐱᒋᐊᓕᓵᕐᓂᖓᓂᑦ."
• ᑲᓇᑕᐅᑉ ᒥᕐᖑᐃᖅᓯᕐᕕᓕᕆᔨᒃᑯᖏᑦ ᐅᓂᒃᑲᐅᓯᖃᓚᐅᖅᐳᑦ ᐱᓕᕆᓂᕆᕙᒃᑕᒥᖕᓂᒃ ᑑᕐᖓᑦ ᖃᖅᑲᖏᓐᓂ ᑲᓇᑕᒥ ᒥᕐᖑᐃᖅᓯᕐᕕᖕᒥ, ᐊᐅᓚᑕᐅᖃᑎᒌᒍᑕᐅᓪᓗᓂ ᑲᑎᒪᔨᓄᑦ ᐃᓄᐃᓐᓇᐅᓪᓗᑎᒃ ᖃᐅᔨᓴᖅᑕᐅᔪᓂᒃ ᓯᕗᓪᓕᐅᑎᑦᑎᖃᖅᑕᖅᖢᑎᒃ ᒥᕐᖑᐃᖅᓯᕐᕕᖕᒥ. ᑕᐃᒪᐃᓐᓂᑯᐊᓄᑦ, ᖃᐅᔨᓴᕐᓂᖅ ᒥᕐᖑᐃᖅᓯᕐᕕᖕᒥ ᐃᓄᖕᓄᑦ ᑐᕌᖓᕙᒃᑐᖅ ᐱᓕᕆᖃᑎᒋᔭᐅᕙᒃᖢᑎᒡᓗ ᓄᓇᑦᓯᐊᕗᑦ ᒐᕙᒪᖓᑦ ᐊᒻᒪ ᒪᑭᕕᒃᑯᑦ. ᐃᓚᐅᑎᑦᑎᕙᒃᑐᑦ ᐃᓐᓇᑐᖃᕐᓂᒃ, ᒪᒃᑯᒃᑐᓄᑦ ᐱᓕᕆᐊᒃᓴᖅᑎᒍᑦ ᐱᔪᓐᓇᕐᓂᕐᓂᒃ ᐱᕚᓪᓕᖅᑎᑦᑎᕙᒃᖢᑎᒃ, ᐊᐃᑦᑐᐃᕙᒃᖢᑎᒡᓗ ᖃᐅᔨᓴᖅᑕᐅᓚᐅᖅᑐᓂᒃ ᑐᑭᓯᓇᑦᑎᐊᖅᑎᑕᐅᓪᓗᑎᒃ. ᐅᖃᖅᑐᖃᓚᐅᖅᑐᖅ ᑖᓐᓇ ᐊᑐᖅᑕᐅᕙᒃᑐᖅ ᐊᖏᒡᓕᒋᐊᖅᑎᑕᐅᔪᓐᓇᕋᔭᖅᑐᖅ.
• ᑲᑎᒪᖃᑕᐅᔪᑦ ᐅᖃᑦᑎᐊᓚᐅᖅᐳᑦ ᐱᒻᒪᕆᐅᔪᒥᒃ ᐱᓕᕆᖃᑎᒌᖕᓂᖅᑕᖃᓪᓗᐊᕐᓂᖓᓂᒃ ᖃᐅᔨᓴᕐᓂᕐᒥ, ᐱᓗᐊᖅᑐᒥᒃ ᐱᔪᓐᓇᕐᓂᕐᓂᒃ ᐱᕚᓪᓕᖅᑎᑦᑎᔾᔪᑕᐅᓗᓂ ᐊᑯᓂᐅᙱᑦᑐᒧᑦ.
• ᐊᒻᒪᒃᑲᓐᓂᖅ, ᐃᓕᓐᓂᐊᖅᑐᓕᕆᕝᕖᑦ ᒐᕙᒪᐃᓪᓗ ᐱᓕᕈᕝᕕᖏᑦ ᐆᒃᑐᕈᑎᓂᒃ ᐊᑐᕈᒪᓲᖑᔪᑦ ᓲᕐᓗ ᐱᔾᔪᑎᖃᖃᑎᒌᒃᐸᒃᑐᑦ ᖃᐅᔨᓴᖅᑕᓂᒃ ᕿᒥᕐᕈᐊᖃᑦᑕᐅᑎᕙᖕᓂᖏᓐᓄᑦ ᑎᑎᕋᖅᑕᐅᓯᒪᔪᓂᒃ ᐆᒃᑐᖅᑕᐅᓂᖓᓄᑦ ᖃᐅᔨᓴᖅᑕᐅᑦᑎᐊᖅᓯᒪᑎᒋᓂᖏᑦ, ᑭᓯᐊᓂ ᑕᒪᓐᓇ ᓄᓇᓕᖕᓄᑦ ᐱᕐᔪᐊᕌᓘᙱᓐᓂᖅᓴᐅᔪᖅ.
• ᐱᔪᓐᓇᕐᓂᕐᓂᒃ ᐱᕚᓪᓕᖅᑎᑦᑎᓇᓱᖕᓂᖅ ᖃᐅᔨᓴᕐᓂᕐᒥ ᐆᒃᑐᔭᑦᑐᖅ, ᐆᒃᑑᑎᒋᓪᓗᒍ, ᖃᔅᓯᑦ ᓯᓚᑦᑐᖅᓴᕐᕕᒡᔪᐊᕐᒥᑦ ᐃᓕᓐᓂᐊᕌᓂᒃᓯᒪᔪᑦ ᐱᓕᒻᒪᒃᓴᖅᑎᑕᐅᖕᒪᖔᑕ, ᑭᓯᐊᓂ ᕿᒥᕐᕈᐊᕆᐊᖃᕐᒥᒐᑦᑕᑦᑕᐅᖅ ᐆᒃᑐᕈᑎᓂᒃ ᓲᕐᓗ ᑭᓲᕙᑦ ᐃᑲᔪᕐᓂᖃᖅᑐᑦ ᓄᓇᓕᖕᒧᑦ, ᖃᔅᓯᓪᓗ ᐃᓄᐃᑦ ᐱᓕᒻᒪᒃᓴᖅᑎᑕᐅᕙᑦ?
• ᖃᐅᔨᓴᕐᓂᐅᑉ ᐊᑐᓕᖅᑎᑕᐅᓂᖓ ᐃᓚᒋᔭᖃᓪᓗᐊᕐᒥᔪᖅ ᐃᓄᖕᓂᒃ.
• ᑲᑎᒪᖃᑕᐅᔪᑦ ᖃᐅᔨᒪᖁᔨᓚᐅᖅᐳᑦ ᐅᑭᐅᖅᑕᖅᑐᕐᒥᙶᖅᑐᑦ ᐱᓕᕆᐊᒃᓴᕆᔭᐅᔪᑦ ᓄᓇᖃᖅᑳᖅᑐᓄᑦ ᐱᒋᐊᖅᑎᑕᐅᓂᑰᙱᑐᐃᓐᓇᕆᐊᖃᕐᓂᑰᖕᒪᑕ, ᐱᒻᒪᕆᐅᕗᖅ ᑕᒪᓐᓇ ᓇᓗᓕᕈᑕᐅᑦᑕᐃᓕᓂᖓ.
• ᐃᓄᖕᓄᑦ ᖃᐅᔨᒪᔪᓄᑦ ᖃᐅᔨᓴᕐᓂᖅ ᐊᑭᓕᖅᑕᐅᔭᕆᐊᓕᖕᓂᒃ ᑲᑦᑐᕆᐊᖅᑎᑦᑎᓇᔭᕐᒥᔪᖅ, ᓯᓚᑖᓂᙶᖅᑐᓂᒃ ᓄᓇᑦᓯᐊᕗᒻᒧᑦ ᑎᑭᑎᑦᑎᖃᑦᑕᙱᖔᕐᓗᑎᒃ, ᓄᓇᓕᖕᒥᐅᑦ ᓄᓇᑦᓯᐊᕗᒻᒥᒃ ᖃᐅᔨᒪᑦᑎᐊᖅᑐᓂᒃ ᐊᑐᖔᖃᑦᑕᕈᓐᓇᕐᒪᑕ.
• ᓄᓇᑦᓯᐊᕗᑦ ᖃᐅᔨᓴᕐᓂᕐᒧᑦ ᐅᖃᐅᔾᔨᔨᐅᓪᓗᑎᒃ ᑲᑎᒪᔨᕋᓛᖃᖅᑐᑦ ᖃᐅᔨᓴᖅᑎᓄᑦ ᐊᖏᖅᑕᐅᔭᕆᐊᖃᓲᖑᔪᓂᒃ ᖃᐅᔨᓴᕈᓐᓇᕆᐊᒃᓴᖅ; ᑖᓐᓇ ᒐᕙᒪᒃᑯᓐᓄᑦ ᐱᓕᕆᐊᒃᓴᕐᓂᒃ ᑐᓴᐅᒪᑎᑦᑎᓐᔪᓐᓇᖅᑎᑦᑎᕗᖅ ᑐᓴᐅᒪᑎᑕᐅᔭᕆᐊᖃᖅᑐᓂᒃ.
• ᐃᓕᓐᓂᐊᕐᓂᖅ ᐱᕐᔪᐊᖑᓂᖃᖅᐳᖅ ᑭᓇᐅᓂᕐᒥᒃ ᖃᐅᔨᕚᓪᓕᐅᑕᐅᓪᓗᓂ ᐊᒻᒪ ᐱᔭᖃᕈᓐᓇᖅᓯᕚᓪᓕᐅᑕᐅᔪᓐᓇᕆᓪᓗᓂ ᐃᓄᖕᓄᑦ ᖃᐅᔨᓴᖅᑎᐅᓗᑎᒃ. ᑲᑎᒪᖃᑕᐅᔪᑦ ᐅᔾᔨᕆᔭᖃᓚᐅᖅᐳᑦ ᓯᓚᑦᑐᖅᓴᕐᕕᒡᔪᐊᕐᒥᑦ ᐃᓕᓐᓂᐊᖅᑎᑦ ᑎᑭᑉᐸᖕᒪᑕ ᖃᐅᔨᓴᖅᑕᖃᕆᐊᖅᑐᖅᖢᑎᒃ ᐱᓇᓱᐊᕈᓯᕐᓄᑦ ᖃᔅᓰᓐᓈᕐᔪᖕᓄᑦ ᐅᑎᖅᐸᒃᖢᑎᒡᓗ ᐃᓕᓐᓂᐊᕐᕕᖕᒥᑦ ᑎᑎᖅᑖᕆᐊᖅᑐᖅᖢᑎᒃ ᐃᓕᓐᓂᐊᕐᓂᖃᕐᓂᕋᐃᔪᒥᒃ ᐊᕐᕌᒍᓄᑦ ᐱᖓᓱᓄᑦ ᑎᓴᒪᓄᓪᓘᓐᓃᑦ ᐃᓱᓕᑦᑎᓯᒪᓂᕋᐃᔾᔪᑎᒃ ᐊᒻᒪ ᑎᑎᕋᖅᓯᒪᔭᒥᒃ ᓴᖅᑭᑦᑎᕙᒃᖢᑎᒃ ᖃᐅᔨᓴᕐᓂᕆᓚᐅᖅᑕᒥᓂᒃ, ᓄᓇᖃᖅᑎᐅᔪᑦ ᑖᒃᑯᓂᖓ ᐃᑲᔪᖅᓯᕙᒃᑲᓗᐊᖅᑎᓪᓗᒋᑦ ᐊᑐᖅᑕᐅᔭᕆᐊᖃᕌᖓᒥᒃ ᐃᓛᓐᓂᑦ ᐊᕐᕌᒍᒐᓴᖕᓄᑦ ᖃᓄᑐᐃᓐᓇᕐᓕ ᑎᑎᖅᑲᖅᑖᓚᐅᖅᓯᒪᓇᑎᒃ ᐃᖅᑲᓇᐃᔮᖃᕐᓂᕐᒧᓪᓗ ᐊᑑᑎᒃᓴᖅᑖᓚᐅᖅᓯᒪᓇᑎᒃ.
• ᑐᓴᖅᑕᐅᑎᑦᑎᓂᖅᑕᖃᕐᓂᖅ ᖃᐅᔨᓴᕐᓂᕆᔭᐅᔪᓂᒃ ᐱᕐᔪᐊᒻᒪᕆᐅᒋᕗᖅ: ᑲᓇᑕ ᓯᓚᒻᒧᑦ ᓄᓇᕐᔪᐊᕐᒥᐅᓂᒃ ᖃᐅᔨᔭᐅᕙᓪᓕᐊᔪᓂᒃ ᑐᓴᖅᑕᐅᑎᑦᑎᒡᒐᙱᑦᑎᐊᖅᐸᒃᑐᖅ, ᑭᓯᐊᓂ ᐊᔪᕆᔭᖃᖅᑐᖅ ᐃᓗᒻᒧᖔᖅ ᑐᓴᖅᑎᑦᑎᔭᕆᐊᒃᓴᖅ. ᐱᕐᔪᐊᖑᕗᖅ ᑕᒪᓐᓇᑦᑕᐃᓐᓇᖅ ᑐᓴᖅᑕᐅᑎᑕᐅᓪᓗᐊᕐᓂᖓ ᓄᓇᓕᐅᔪᓄᑦ ᐊᑐᕈᓐᓇᕐᓂᐊᕐᒪᔾᔪᒃ.