ᐅᑭᐅᖅᑕᖅᑐᒥ ᐊᑐᐊᒐᖓᓄᑦ ᐋᖅᑭᒃᑕᐅᓯᒪᔪᑦ ᐊᕕᒃᑐᖅᓯᒪᔪᓂ ᑲᑎᒪᓂᖅ: ᕼᐊᐱ ᕙᓂ ᒎᔅ ᐲ (Happy Valley-Goose Bay) ᐅᒃᑐᐱᕆ 12, 2017

ᐅᐊᔭᒨᖅᑐᓄᑦ ᐱᔨᑦᑎᕋᐅᑏᑦ

• ᐃᓚᖏᑦ ᓄᓇᓖᑦ ᓚᐸᑐᐊᒥ ᐃᒪᖃᙱᑦᑐᑦ ᐃᓪᓗᖏᓐᓂᑦ ᐅᕝᕙᓘᓐᓃᑦ ᐊᓇᖅᑕᕐᕕᖃᙱᑦᑐᑎᒃ.
• ᐃᓚᖏᑦ ᓄᓇᓖᑦ ᐱᖃᕆᐊᖃᖅᑐᑦ ᐱᐅᓂᖅᓴᒥᒃ ᐅᖅᓱᖃᕈᓐᓇᕐᓂᕐᒧᑦ ᐃᓪᓗᒧᑦ. ᓇᒻᒥᓂᕆᔭᐅᔪᒥᒃ ᐅᖅᓱᓕᕆᔨᒥᒃ ᑎᑭᑦᑐᖃᖅᐸᑦ ᓄᓇᓕᒻᒧᑦ, ᐱᕙᓪᓕᐊᔾᔪᑎᒋᔭᐅᔪᖅ ᓱᓇᓗᒃᑖᓄᑦ ᐊᑕᐅᓯᒧᑦ ᓯᑭᑑᒧᑦ ᐊᑐᕐᓗᑎᒃ ᑲᑎᖅᓱᐃᕙᓪᓕᐊᓗᑎᒃ ᕿᔪᔅᓴᓂᒃ ᐊᒻᒪᓗ ᐱᔪᓐᓇᕐᓂᖅ ᐃᖏᕐᕋᐅᑎᔅᓴᒧᑦ ᐋᓐᓂᐊᕐᕕᒻᒦᔪᓐᓃᕐᓂᕐᒧᑦ ᐱᔾᔪᑎᒋᔭᐅᔪᓐᓇᖅᑐᑦ.
• ᐅᖅᓱᐊᓗᑐᐃᓐᓇᒧᑦ ᐊᐅᓚᔪᓐᓇᐅᑎᖃᕐᓗᓂ ᐊᑭᑐᔪᒻᒪᕆᐊᓗᒃ ᐊᒻᒪᓗ ᐊᑲᐅᙱᑦᑐᖅ ᑮᓇᐅᔭᓕᐅᕈᑕᐅᓂᒃᑯᑦ ᐅᕝᕙᓘᓐᓃᑦ ᐊᕙᑎᒧᑦ. ᑭᓯᐊᓂ, ᐅᖅᓱᐊᓗᒃ ᐊᑲᐅᔪᓐᓴᖅᑐᖅ ᐊᒻᒪᓗ ᐊᑭᑐᓗᐊᙱᑦᑐᖅ. ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᖃᓂᑦᑐᒥ ᒪᔅᑯᕋᑦ ᕚᔅ (Muskrat Falls) ᐱᓕᕆᐊᔅᓴᖓ ᐊᑐᐃᓐᓇᖅᑎᑦᑎᔪᖅ ᐅᐊᔭᒨᖅᑐᓂᒃ ᑭᓯᐊᓂ ᐊᑐᖅᑕᐅᓂᖅᓴᐅᔪᑦ ᓄᓇᒋᔭᐅᔪᒧᑦ ᓯᓚᑖᓄᑦ.
• ᐊᓯᖏᑦ ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᑐᕌᖓᙱᖔᕐᓗᑎᒃ ᐊᑭᓗᒃᑐᒥᒃ ᐅᐊᔭᒨᖅᑐᓂᒃ, ᐱᔭᕆᐊᖃᖅᑐᒍᑦ ᐊᑲᐅᓈᖅᓂᖅᓴᒥᒃ ᐅᐊᔭᒨᖅᑐᓂᒃ. ᓄᓇᒋᔭᐅᔪᑦ ᒫᓐᓇᐅᔪᖅ ᐅᖅᓱᐊᓗᑐᐃᓐᓇᒧᑦ ᐊᐅᓚᔪᑦ, ᑕᒪᓐᓇ ᓯᕗᓪᓕᐅᑎᑕᐅᔭᕆᐊᖃᖅᑐᖅ ᕿᒥᕐᕈᐊᕈᑕᐅᓗᓂ ᐅᐊᔭᒨᖅᑐᔅᓴᓂᒃ ᐃᓱᐊᓈᕈᑎᔅᓴᓂᒃ ᓄᓇᒋᔭᐅᔪᒥ.

ᐅᐊᔭᒨᖅᑐᑦ

• ᐅᐊᔭᒨᖅᑐᑦ ᐊᑲᐅᙱᑦᑐᑦ ᐱᔨᑦᑎᕋᐅᑎᔅᓴᖏᑦ ᓄᓇᒋᔭᐅᔪᒥ (ᐃᓚᒋᓗᒋᑦ ᓯᕿᓐᓂᐊᓃᑦᑐᑦ ᓯᒡᔭᖅᐸᓯᐊᓂ) ᐊᔪᕐᓇᑲᓴᒃᑐᖅ ᐊᐅᓪᓚᖅᑎᑦᑎᒋᐊᕐᓗᓂ ᖃᕋᓴᐅᔭᒃᑯᑦ ᑎᑎᖅᑲᓂᒃ ᓇᒻᒥᓂᖃᖅᑐᓄᑦ ᐊᒻᒪᓗ ᖃᕋᓴᐅᔭᖃᖅᑐᓄᑦ. ᐱᒻᒪᕆᐅᔪᑦ ᐱᕙᓪᓕᐊᓯᒪᔪᑦ ᐆᑦᑑᑎᒋᓗᒍ ᓯᒃᑭᓕᐅᕋᓱᐊᕐᓂᖅ ᐅᓪᓛᒃᑯᑦ ᐱᒋᐊᕐᓗᓂ ᐊᒻᒪᓗ ᖃᕋᓴᐅᔭᓕᕆᓂᕐᒧᑦ ᐱᐅᓂᖅᐹᖑᔪᖅ ᐱᓕᕆᐊᕆᓗᒋᑦ; ᐊᓯᖏᑦ ᓇᒻᒥᓂᖃᖅᑐᑦ ᐊᑐᓲᖑᔪᑦ ᓱᓕ ᓱᒃᑲᔪᒃᑯᑦ ᖃᕋᓴᐅᔭᒃᑯᑦ ᐊᑐᕈᓐᓇᕐᓂᖏᑦ ᐊᑲᐅᙱᓐᓂᖓᓄᑦ. ᐱᔪᓐᓇᕐᓗᓂ fibre-optic ᓴᕕᒐᔭᔅᓴᖏᓐᓂᒃ ᐱᐅᓂᖅᓴᐅᔪᒻᒪᕆᐅᓘᔪᓐᓇᖅᑐᑦ.
• ᐱᖃᙱᓗᐊᕐᓂᖓᓄᑦ ᓇᒻᒥᓂᖅ ᐅᖄᓚᐅᑎᖃᕈᓐᓇᕐᓂᕐᒧᑦ ᐱᔨᑦᑎᕋᐅᑎᔅᓴᓂᒃ ᓄᓇᒋᔭᐅᔪᒥ ᑐᓴᖅᑕᐅᔭᕆᐊᖃᖅᑐᖅᑕᐅᖅ.  

ᓴᖏᔪᒥᒃ ᐅᑭᐅᖅᑕᖅᑐᒥ ᐃᓄᖏᓐᓄᑦ ᐊᒻᒪᓗ ᓄᓇᖏᓐᓄᑦ

ᓂᕿᓄᑦ ᐊᑦᑕᕐᓇᖅᑕᐃᓕᒪᓂᖅ

"ᓴᙱᓂᖅᓴᖃᒃᑲᓐᓂᕆᐊᖃᖅᑐᖅ ᑐᓂᔭᐅᓯᒪᔪᓂᒃ ᒐᕙᒪᓕᒫᒃᑯᓐᓂᑦ ᖃᓄᖅ ᑖᒃᑯᓂᖓ ᑐᓴᖅᑎᑦᑎᒐᓱᐊᖅᑕᑦᑎᓐᓂᒃ ᐊᔾᔨᒌᙱᑦᑐᑦ ᓱᓇᑐᐃᓐᓇᐃᑦ ᓈᒻᒪᔅᓯᒋᐊᕈᓐᓇᖅᑐᒃᑯᑦ ᐊᒻᒪᓗ ᐱᒋᐊᕋᓱᐊᕐᓗᒋᑦ ᓂᕿᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ."

• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᑐᒃᑐᖃᕈᓐᓃᕐᓂᖓᓄᑦ, ᐊᖏᔪᒃᑯᑦ ᓂᕿᒋᔭᐅᔪᑦ ᓄᓇᒋᔭᐅᔪᒥ, ᐊᖏᔪᒃᑯᑦ ᐊᒃᓱᕈᕐᓇᖅᑐᑦ ᓄᓇᒋᔭᐅᔪᓄᑦ ᓂᕿᑦᑎᐊᕙᒋᔭᐅᔪᒃᑯᑦ ᐊᒻᒪᓗ ᐃᑉᐱᒋᔭᐅᓂᒃᑯᑦ ᐱᖃᕆᐊᖃᖅᑐᓂᒃ, ᐊᒻᒪᓗ ᐱᔾᔪᑕᐅᓪᓗᓂ ᖁᑦᑎᑦᑐᒃᑯᑦ ᓂᕿᓄᑦ ᐊᑦᑕᕐᓇᕈᑕᐅᓂᖓᓄᑦ. 
• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐊᑭᑐᓗᐊᕐᓂᖏᑦ ᓂᖀᑦ ᓚᐸᑐᐊᒥ
• ᓂᕿᑐᐃᓐᓇᐅᙱᑦᑐᑦ ᐊᑭᑐᔪᑦ, ᓇᓗᓇᐃᖅᓯᓚᐅᖅᑐᑦ ᐊᑲᐅᙱᓕᐅᕈᑕᐅᓂᖓ ᓂᕿᑦᑎᐊᕙᖕᓄᑦ ᓂᐅᕕᕐᕕᓐᓂ. ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᖃᓄᐃᓐᓂᖏᓐᓄᑦ ᓂᕿᑦᑎᐊᕙᐅᔪᑦ ᓂᐅᕕᕐᕕᓐᓂ.
• ᓂᕿᓄᑦ ᐊᑦᑕᕐᓇᕆᔭᐅᔪᑦ ᐃᓚᒋᔭᖃᖅᑐᑦ ᓴᓇᕝᕕᒋᔭᐅᔪᓄᑦ ᐊᑲᐅᙱᓕᐅᕈᑕᐅᓪᓗᑎᒃ, ᐆᑦᑑᑎᒋᓗᒍ ᐱᕕᔅᓴᖃᙱᓗᐊᕐᓂᖓᓄᑦ ᐃᓪᓗᔅᓴᒥᒃ ᐃᒐᔾᔪᑕᐅᔪᓐᓇᖅᑐᒥᒃ ᐅᓪᓗᕈᒥᑕᔅᓴᓄᑦ ᐱᓕᕆᐊᔅᓴᓂᒃ.
• ᐃᓚᒋᔭᐅᓚᐅᖅᑐᑦ ᐃᓱᒪᓚᐅᖅᑐᑦ ᓂᕿᑦᑎᐊᕙᐃᑦ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᔅᓴᖏᑦ, ᐅᖃᐅᓯᖃᖅᑐᑎᒃ ᑕᑯᓂᖏᓐᓄᑦ ᐊᖏᔪᒃᑯᑦ ᐊᑲᐅᙱᓕᐅᕈᑕᐅᔪᓂᒃ ᐊᒻᒪᓗ ᑭᒡᓕᖃᖅᑎᑕᐅᓂᖏᓐᓄᑦ ᐱᓕᕆᐊᔅᓴᒧᑦ. ᐱᓕᕆᐊᔅᓴᖅ, ᐅᖃᖅᑐᑦ, ᒫᓐᓇᐅᔪᖅ ᐋᖅᑭᒃᑕᐅᓯᒪᔪᑦ ᓂᐅᕕᕐᕕᖏᑦ ᑎᒍᓯᓂᐊᕐᓗᑎᒃ ᑮᓇᐅᔭᓂᒃ ᐃᑲᔫᓯᐊᖑᔪᓂᑦ ᒐᕙᒪᒃᑯᓐᓂᑦ, ᐱᔾᔪᑕᐅᔪᖅ ᓂᐅᕕᖃᑦᑕᖅᑐᓄᑦ ᑕᑯᓲᓂᖏᑦ ᑮᓇᐅᔭᑎᒍᑦ ᐃᑲᔫᓯᐊᓂᑦ ᐱᓕᕆᐊᔅᓴᒧᑦ ᐊᒻᒪᓗ ᓂᐅᕕᖅᑏᑦ ᑕᑯᑎᑦᑎᔪᓐᓇᙱᓪᓗᑎᒃ ᑮᓇᐅᔭᑎᒍᑦ ᐃᑲᔫᓯᐊᖑᔪᓂᑦ ᓂᐅᕕᖅᓯᒪᔭᖏᓐᓂᒃ ᐸᐃᑉᐹᒃᑯᑦ.
• ᓂᖀᑦ ᑮᓇᐅᔭᑎᒍᑦ ᐃᑲᔫᓯᐊᑦ ᐃᓚᖃᕋᔭᖅᑐᑦ ᓂᕿᓄᑦ ᐅᑭᐅᖅᑕᖅᑐᒥ ᓂᐅᕕᖅᑕᐅᓪᓗᐊᕋᔭᖅᑐᓂᒃ, ᐆᑦᑑᑎᒋᓗᒍ ᑏ, ᐸᓚᐅᒑᖅ, ᓯᐅᕋᐅᔮᖅᑐᖅ, ᐊᓛᓯ, ᐱᕈᖅᓯᐊᑦ ᒪᒪᖅᑐᑦ ᐊᒻᒪᓗ ᐊᓯᖏᑦ ᓂᕿᑦᑎᐊᕙᐃᑦ, ᐱᙱᓐᓂᖅᓴᓗᒋᑦ, ᐆᑦᑑᑎᒋᓗᒍ, ᖃᐅᔨᒪᔭᐅᙱᑦᑐᑦ ᓂᕿᑦᑎᐊᕙᐃᑦ ᒪᒪᖅᑐᑦ. 
• ᐃᓚᒋᔭᐅᓚᐅᖅᑐᑦ ᐅᑉᐱᕈᓱᒃᑐᑦ ᐃᓚᒋᔭᐅᙱᑦᑐᒃᑯᑦ ᐃᓄᐃᑦ ᓂᕿᖏᓐᓄᑦ ᐱᓕᕆᐊᔅᓴᒧᑦ ᐱᕙᓪᓕᐊᑎᑕᐅᓗᓂ, ᐊᑕᐅᓯᖅ ᓂᕿᑦᑎᐊᕙᐃᑦ ᐅᑭᐅᖅᑕᖅᑐᒥ ᓂᐅᕕᕐᕕᓂᖔᖅᑐᓂᒃ ᑮᓇᐅᔭᒃᑯᑦ ᐃᑲᔫᓯᐊᓂᒃ, ᐱᐊᓂᒋᐊᕈᓐᓇᕐᓗᒍ ᓄᓇᒋᔭᐅᔪᒥ ᐱᖃᕆᐊᖃᕐᓂᕐᒧᑦ.
• ᑕᒪᓐᓇ ᐱᓕᕆᐊᔅᓴᖅ ᐱᕕᔅᓴᖃᕈᓐᓇᖅᑐᑦ ᓄᓇᒋᔭᐅᔪᓄᑦ ᓂᕆᖃᑎᒌᓪᓗᑎᒃ ᐃᓄᐃᑦ ᓂᕿᖏᓐᓂᒃ. ᓄᓇᒋᔭᐅᔪᒥ ᕿᕿᐅᓯᕝᕕᑕᖃᕐᓗᓂ ᐃᑲᔫᑎᖃᕈᓐᓇᖅᑐᑦ ᓂᕿᖃᕐᓗᓂ ᐃᓄᖕᓄᑦ.
• ᐱᕕᔅᓴᖃᕆᐊᖃᖅᑐᖅ ᑕᑯᒋᐊᕐᓗᒍ ᒥᑭᓂᖅᓴᒥᑦ ᓄᓇᒋᔭᐅᔪᒥ ᓂᕿᓕᐅᖅᐸᒃᑐᓂᒃ ᐊᖏᓂᖅᓴᑰᙱᖔᕐᓗᑎᒃ ᓂᕿᓕᐅᖅᐸᒃᑐᓂᒃ ᓯᓚᑖᓂᙶᖅᑐᓂᒃ ᓄᓇᒥᑦ.
• ᐱᔾᔪᑎᒋᓪᓗᒋᑦ ᒐᕙᒪᒃᑯᑦ ᐋᓐᓂᐊᖅᑕᐃᓕᒪᓂᕐᒧᑦ ᐋᓐᓂᐊᖅᑕᐃᓕᒪᓂᕐᒧᑦ ᐊᒻᒪᓗ ᐊᑦᑕᕐᓇᖅᑕᐃᓕᒪᓂᕐᒧᑦ ᓇᓗᓇᐃᒃᑯᑕᐃᑦ ᓇᒻᒥᓂᖃᖅᑐᓄᑦ−ᑯᑦᑎᓐᓂᖓᒍᑦ ᐃᒐᕝᕕᔅᓴᖃᕈᓐᓇᕐᓂᖅ, ᐊᔪᕐᓇᖅᑐᑦ ᑐᓂᓯᒋᐊᕐᓗᓂ ᐃᓄᐃᑦ ᓂᕿᒋᔭᖏᓐᓂᒃ ᓄᑕᖅᑭᕆᕝᕕᓄᑦ ᐊᒻᒪᓗ ᐊᑯᓂᐅᔪᒃᑯᑦ ᒥᐊᓂᕆᔭᐅᕝᕕᓄᑦ ᓴᓇᕝᕕᐅᔪᓄᑦ.
• ᐊᓯᐊᑕ ᐊᒃᓱᕈᕐᓇᖅᑐᖅ ᑭᒡᓕᖃᕐᓂᖓᓄᑦ ᐱᔪᓐᓇᐅᑎᔅᓴᓂᒃ ᓄᑖᖑᔪᓂᒃ ᐱᕈᖅᓯᐊᓂᒃ ᒪᒪᖅᑐᓂᒃ ᐊᒻᒪᓗ ᐱᕈᖅᓯᐊᓂᒃ ᓂᕿᓂᒃ, ᑎᒻᒥᓲᒃᑯᑦ ᑎᑭᑎᑕᐅᔭᕆᐊᖃᖅᑐᑦ ᐱᕕᔅᓴᖃᙱᓗᐊᕐᓂᖓᓄᑦ ᐃᖏᕐᕋᐅᔾᔪᑎᒡᓴᓂᒃ, ᐊᑲᐅᙱᓕᐅᕈᑕᐅᔪᑦ ᓄᓇᒋᔭᐅᔪᓄᑦ ᑎᒻᒥᓲᖃᙱᓗᐊᕐᓂᖏᓐᓄᑦ ᓄᓇᒋᔭᒧᑦ ᑎᑭᖃᑦᑕᖅᑐᓂᒃ.
• ᐊᓯᐊᒍᑦ ᐱᔭᐅᔪᓐᓇᖅᑐᑦ ᓂᕿᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᓄᓇᒋᔭᐅᔪᒥ ᐃᓱᒪᒃᓴᖅᓯᐅᕐᓗᓂ ᐊᑲᐅᓈᖅᑐᒃᑯᑦ ᓂᕿᕐᓴᓄᑦ ᐱᕈᖅᓯᕙᓪᓕᐊᓂᕐᒧᑦ. ᐃᓚᒋᔭᐅᔪᑦ ᐅᑉᐱᕈᓱᓚᐅᖅᑐᑦ ᒥᑭᓂᖅᓴᐃᑦ ᓄᓇᒋᔭᐅᔪᒥ−ᐊᐅᓚᑕᐅᔪᑦ ᐱᓕᕆᐊᔅᓴᐃᑦ ᐃᑲᔫᑎᖃᕈᓐᓇᖅᑐᑦ ᑐᓂᓯᓗᑎᒃ ᓄᓇᒥ ᐱᕈᖅᑕᐅᓯᒪᔪᓂᒃ ᓂᕿᓄᑦ, ᓄᓇᒋᔭᐅᔪᑦ ᐅᑕᖅᑭᒋᐊᖃᙱᓪᓗᑎᒃ ᓂᕿᔅᓴᓂᒃ ᐃᖏᕐᕋᖅᑎᑕᐅᔪᑦ ᓄᓇᒥᓐᓄᑦ
• ᑕᑯᓗᒋᑦ ᐊᔾᔨᒌᙱᑦᑐᒃᑯᑦ ᑐᓴᖅᑕᐅᔭᕆᐊᖃᖅᑐᓂᒃ ᓂᕿᐅᑉ ᐊᑦᑕᕐᓇᖅᑐᖏᓐᓄᑦ, ᐱᒻᒪᕆᐅᔪᖅ ᐃᓱᒪᒋᓗᒍ ᐃᓄᑐᐃᓐᓇᐃᑦ ᐃᓪᓗᒥᓂ ᐃᒐᕝᕕᔅᓴᖃᙱᑐᐃᓐᓇᕆᐊᖃᖅᑐᑦ ᐊᖏᕐᕋᒥᓂ, ᐅᕝᕙᓘᓐᓃᑦ ᐱᔪᓐᓇᙱᓐᓂᖓᓄᑦ ᐅᕝᕙᓘᓐᓃᑦ ᑮᓇᐅᔭᓕᐅᕐᓂᕆᔭᖓᒍᑦ, ᐅᕝᕙᓘᓐᓃᑦ ᓂᕿᑦᑎᐊᕙᖕᓂᒃ ᖃᐅᒪᔾᔪᑎᔅᓴᖏᓐᓂᒃ ᐸᕐᓇᓪᓗᑎᒃ ᐋᓐᓂᐊᖅᑕᐃᓕᒪᓂᕐᒧᑦ ᓂᕿᑦᑎᐊᕙᖕᓂᒃ ᓂᐅᕕᑲᐅᑎᓯᒪᒋᐊᔅᓴᒧᑦ. ᐋᖅᑭᒃᓯᒪᔪᒃᑯᑦ ᑮᓇᐅᔭᓕᐅᕐᓂᕆᔭᐅᔪᑦ, ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐊᑭᑭᓐᓂᖅᓴᐅᒐᔭᖅᑐᑦ ᓄᑕᕋᐃᑦ ᓂᐅᕕᐅᑎᓗᒍ ᑯᑯᒥᑦ ᐱᕈᖅᓯᐊᓂᑦ ᒪᒪᖅᑐᓂᐅᙱᖔᕐᓗᓂ.
• ᓂᕿᑦᑎᐊᕙᒻᒧᑦ ᐃᓕᓐᓂᐊᕈᑎᔅᓴᐃᑦ ᐱᓕᕆᐊᔅᓴᖓ ᐋᓐᓂᐊᖅᑕᐃᓕᒪᓂᕐᒧᑦ ᑲᓇᑕᒃᑯᑦ ᑐᓂᓯᓲᑦ ᐃᓚᒋᓗᒍ ᓂᕿᑦᑎᐊ>ᐃᑦ ᐅᑭᐅᖅᑕᖅᑐᒥ ᐱᕚᓪᓕᕋᔭᖅᑐᑦ ᓇᓗᓇᐃᖅᓯᓗᑎᒃ ᐃᓚᒌᒃᑐᑦ ᐱᔪᓐᓇᐅᑎᖃᕐᓗᑎᒃ ᐱᐅᓂᖅᓴᒧᑦ ᓂᕿᑦᑎᐊᕙᖕᖕᓄᑦ ᐊᒻᒪᓗ ᓂᕿᑦᑎᐊᕙᖕᓄᑦ ᐸᕐᓇᐅᑎᔅᓴᓄᑦ ᐊᔪᙱᔾᔪᑎᔅᓴᖏᓐᓄᑦ, ᐊᒻᒪᓗ ᐊᑲᐅᓈᖅᑐᒃᑯᑦ ᓂᕿᓂᒃ ᑐᓂᓯᓗᑎᒃ ᓂᕆᔭᔅᓴᕆᓂᐊᖅᑕᖏᓐᓄᑦ.
• ᐅᖃᐅᓯᕆᔭᐅᖃᑕᐅᓚᐅᖅᑐᖅ ᐊᓯᖏᑦ ᑲᓇᑕᒥᐅᑕᐃᑦ ᑐᑭᓯᐊᙱᑦᑐᑦ ᐃᓅᓗᓂ ᑖᔅᓱᒪ ᓄᓇᒋᔭᐅᔪᒥ, ᐃᓕᓐᓂᐊᖅᑎᑕᐅᒃᑲᓐᓂᕆᐊᖃᖅᑐᑦ ᑲᓇᑕᓕᒫᒥᐅᑕᓄᑦ ᓂᕿᓄᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐊᒻᒪᓗ ᓄᓇᓖᑦ ᐊᑐᖅᐸᒃᑕᖏᓐᓄᑦ ᐊᐅᓚᔪᓐᓇᖁᓪᓗᒋᑦ ᓴᓇᕝᕖᑦ ᐱᖃᕆᐊᖃᖅᑕᖏᓐᓂᒃ ᐅᑭᐅᖅᑕᖅᑐᒥ.  

ᐋᓐᓂᐊᖅᑕᐃᓕᒪᓂᖅ

"ᑎᑎᕋᖅᓯᒪᔪᑦ ᑮᓇᐅᔭᑎᒎᖅᑐᑦ, ᑭᓯᐊᓂ ᐱᓂᖅ ᐊᔪᖅᑕᕗᑦ."

• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᑎᑎᕋᖅᓯᒪᔪᑦ ᑮᓇᐅᔭᑎᒍᑦ ᐃᑲᔫᓯᐊᑦ ᐊᒻᒪᓗ ᐱᓕᕆᐊᔅᓴᐃᑦ ᐊᖏᓂᖓᓄᑦ. ᐱᖃᙱᑉᐸᑕ, ᓄᓇᒋᔭᐅᔪᒥ ᐱᖃᕆᐊᖃᖅᑐᑦ ᐱᖃᙱᑐᐃᓐᓇᕆᐊᖃᖅᑐᑦ. ᐃᓚᒋᔭᐅᓚᐅᖅᑐᑦ ᓇᓗᓴᐃᖅᓯᔪᑦ ᐱᖃᕆᐊᖃᕐᓂᖓᓄᑦ ᐱᐅᓂᖅᓴᒥᒃ ᐋᖅᑭᒃᓯᒪᔪᓂᒃ ᓇᓗᓇᐃᒃᑯᑕᖃᕐᓗᑎᒃ ᐋᓐᓂᐊᖅᑕᐃᓕᒪᓂᕐᒧᑦ ᑎᑎᕋᖅᓯᒪᔪᓂᒃ ᑭᒃᑯᑦ ᐊᑐᖃᑦᑕᖅᑐᓂᒃ ᐋᓐᓂᐊᖅᑕᐃᓕᒪᓂᕐᒧᑦ ᐱᔨᑦᑎᕋᐅᑎᔅᓴᖏᓐᓂᒃ.
• ᒫᓐᓇᐅᔪᒃᑯᑦ, ᑐᑭᓯᐊᔾᔪᑎᔅᓴᐃᑦ ᑲᑎᖅᓱᖅᑕᐅᓯᒪᔪᑦ ᓈᓴᐃᔨᓕᕆᔩᑦ ᑲᓇᑕᒥ ᐊᕕᒃᑐᖅᑕᐅᑦᓯᐊᖅᓯᒪᙱᑦᑐᑦ ᓄᓇᒋᔭᐅᔪᒥ ᖁᑦᑎᓐᓂᕆᔭᐅᔪᒃᑯᑦ ᐃᓱᒪᒋᓗᒋᑦ ᑐᑭᖃᑦᑎᐊᕐᓂᒃᑯᑦ.
• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᔪᑦ ᐱᖃᕆᐊᖃᕐᓂᖓ ᐊᖏᓂᖅᓴᒃᑯᑦ ᑐᑭᓯᐊᔾᔪᑕᐅᔪᓐᓇᖅᑐᓂᒃ ᐋᓐᓂᐊᖅᑕᐃᓕᒪᓂᕐᒧᑦ ᑐᑭᖃᕆᐊᒃᑲᓐᓂᕐᓗᒋᑦ ᐅᖓᑖᓄᑦ ᐅᐊᓕᓂᕐᒥᐅᑕᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑐᑭᐊᒍᑦ. ᐆᑦᑑᑎᒋᓗᒍ, ᐃᓚᒋᔭᐅᓂᖓ ᓄᓇᒧᑦ ᐱᒻᒪᕆᐅᔪᖅ ᐃᓱᒪᒋᓗᒍ ᐋᓐᓂᐊᖅᑕᐃᓕᒪᓂᕐᒧᑦ ᐊᒻᒪᓗ ᐃᓅᑦᓯᐊᕋᓱᐊᕐᓄᕐᒧᑦ. ᐃᓚᒋᔭᐅᓚᐅᖅᑐᑦ ᑐᓂᓯᓚᐅᖅᑐᑦ ᐆᑦᑑᑎᔅᓴᒥᒃ ᐃᓐᓇᖅ−ᒪᒃᑯᒃᑐᖅ ᑕᒻᒫᕐᕕᖓᓂᒃ ᐊᐅᓚᑕᐅᔪᖅ ᓄᓇᒥ, ᒪᒃᑯᒃᑐᖅ (ᐊᒥᓱᑦ ᒥᐊᓂᕆᔭᐅᕝᕕᓐᓃᑦᑐᑦ) ᐅᖃᖃᑎᒌᔪᓐᓇᓚᐅᖅᑐᑦ ᐃᓐᓇᓄᑦ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᖃᐅᔨᒪᔩᑦ ᐊᒻᒪᓗ ᐃᓕᖅᑯᓯᒥᑎᒍᑦ ᐃᓅᓗᑎᒃ. ᓄᓇᒥ−ᐊᐅᓚᑕᐅᔪᑦ ᐱᓕᕆᐊᔅᓴᐃᑦ ᑐᒃᓯᕋᖅᑕᐅᓯᒪᔪᑦ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᐱᔾᔪᑎᒋᓪᓗᒋᑦ ᑭᓯᐊᓂ ᑮᓇᐅᔭᖃᙱᓗᐊᖅᑐᑦ ᐃᑲᔫᓯᐊᔅᓴᓄᑦ ᐊᐅᓚᑕᐅᔪᓐᓇᖁᓪᓗᒋᑦ.
• ᐳᕙᓪᓗᓐᓂᖅ ᓱᓕ ᐊᖏᔪᒃᑯᑦ ᐃᓱᒫᓘᑎᒋᔭᐅᔪᖅ ᓄᓇᒋᔭᐅᔪᒥ, ᐊᒥᓱᒃᑯᑦ ᐋᓐᓂᐊᖅᑐᖃᖅᑐᑎᒃ. ᐳᕙᓪᓗᓐᓂᖅ, ᑭᓯᐊᓂ, ᐊᓯᙳᖅᐸᓪᓕᐊᓯᒪᔪᖅ. ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᖃᓄᖅ ᐳᕙᓪᓗᓐᓂᖅ ᑭᓯᒥ ᐱᕙᓪᓕᐊᔾᔪᑕᐅᔪᖅ ᐃᓐᓇᐅᓂᖅᓴᓄᑦ ᓴᙱᓗᐊᕈᓐᓃᖅᑐᑎᒃ. ᒫᓐᓇ ᐳᕙᓪᓗᓐᓂᖅ ᐱᔾᔪᑕᐅᔪᖅ ᒪᒃᑯᒃᑐᕐᔪᐊᓄᑦ ᐊᒻᒪᓗ ᒪᒃᑯᒃᑐᓄᑦ, ᓇᓗᓇᐃᖅᓯᒪᔪᖅ ᐋᓐᓂᐊᕐᓇᖅᑐᖅ ᑐᓂᔭᐅᕙᓪᓕᐊᓂᖓ ᐊᓯᖏᓐᓄᑦ. ᓄᓇᓖᑦ ᐱᕕᔅᓴᖃᙱᓗᐊᖅᑐᑦ ᐋᓐᓂᐊᕐᕕᓐᓄᑦ ᐱᔨᑦᑎᕋᐅᑎᔅᓴᓂᒃ ᑐᓴᖅᑎᑕᐅᓗᓂ ᑕᒪᓐᓇ.
• ᐱᕕᔅᓴᖃᙱᓪᓗᓂ ᐋᓐᓂᐊᖅᑕᐃᓕᒪᓂᕐᒧᑦ ᐱᔨᑦᑎᕋᐅᑎᔅᓴᓄᑦ, ᑕᐃᒃᑯᓄᖓ ᐳᕙᓪᓗᒃᑐᓄᑦ ᐊᐅᓪᓚᖅᑎᑕᐅᔭᕆᐊᖃᖅᑐᑦ ᒎᔅ ᐲᒧᑦ ᐱᔨᑦᑎᕋᖅᑎᑕᐅᓗᑎᒃ ᐆᑦᑑᑎᒋᓗᒍ ᐊᔾᔨᓕᐅᖅᑕᐅᓂᖅ, ᐃᓄᒃᑎᑐᑐᐃᓐᓇᖅ ᐅᖃᐅᓯᖃᕋᓗᐊᕐᓗᑎᑦ ᐊᒻᒪᓗ ᐅᖃᖃᑎᒌᖕᓂᕐᒧᑦ ᐊᔪᖅᓴᕐᓗᑎᑦ. 
• ᐱᖃᕆᐊᖃᖅᑐᑦ ᓴᓇᕝᕕᒥᒃ ᐃᑲᔫᑕᐅᓗᓂ ᐊᖏᕐᕋᒥ ᒥᐊᓂᕆᔭᐅᔪᓐᓇᖅᑐᓂᒃ ᓄᓇᒋᔭᐅᔪᒥ ᓯᕗᓂᒧᑦ ᐋᓐᓂᐊᖅᑕᐃᓕᒪᓂᕐᒧᑦ ᐃᓱᒪᒋᓗᒋᑦ. ᑕᒪᓐᓇ ᖃᐅᔨᓴᖅᑕᐅᔭᕆᐊᖃᖅᑐᑦ ᑮᓇᐅᔭᓄᑦ ᐃᑲᔫᓯᐊᒃᑯᑦ ᑕᐃᒪᐅᓗᑎᒃ ᐊᖏᕐᕋᒥ ᒥᐊᓂᕆᔭᐅᕝᕕᖃᕐᓂᕐᒧᑦ.
• ᖁᑦᑎᑦᑐᒃᑯᑦ ᐃᒻᒥᓃᖅᑐᑦ ᐊᒻᒪᓗ ᐊᕐᕌᒍᒋᑕ ᖃᓂᒌᙱᓂᖏᑦ ᐱᔾᔪᑎᒋᓪᓗᒋᑦ ᐊᑲᐅᙱᓕᐅᕈᑕᐅᔪᑦ ᓄᓇᒋᔭᐅᔪᒥ. ᓄᓇᖃᖅᑐᑦ ᐱᔨᑦᑎᕋᐅᑎᖃᙱᓐᓂᖏᑦ ᐋᓐᓂᐊᖅᑕᐃᓕᒪᓂᕐᒧᑦ ᐱᔨᑦᑎᕋᐅᑎᔅᓴᓄᑦ, ᑕᐃᒫᒃ ᐃᑲᔪᖅᑕᐅᔭᕆᐊᖃᖅᑐᑦ ᐊᐅᓪᓚᖅᑎᑕᐅᓲᖑᔪᑦ ᒎᔅ ᐲᒧᑦ ᐃᑲᔪᖅᑕᐅᓗᑎᒃ. ᐋᓐᓂᐊᕐᕕᖓᑦ ᒎᔅ ᐲᒥ ᓴᓇᕝᕕᑕᖃᙱᑦᑐᖅ ᑐᕌᖓᓗᐊᖅᑐᒥᒃ ᐋᓐᓂᐊᖅᑕᐃᓕᒪᓂᕐᒧᑦ ᐃᓱᒪᒃᑯᑦ ᐊᑐᐃᓐᓇᐅᔪᓐᓇᖅᑐᓂᒃ.
• ᓇᓗᓇᐃᖅᑕᐅᖃᑕᐅᓚᐅᖅᑐᑦ ᐱᖃᒃᑲᓐᓂᕆᐊᖃᕐᓂᖓ ᓇᔾᔨᓕᕆᔨᐅᔪᓂᒃ ᓄᓇᒋᔭᐅᔪᒥ, ᓄᑕᕋᓛᖅᑖᖃᑦᑕᖅᑐᑦ ᐊᒥᓲᓂᖏᓐᓄᑦ. 
• ᓇᓗᓇᐃᖅᑕᐅᓚᐅᖅᑐᖅ ᐋᓐᓂᐊᖅᑕᐃᓕᒪᓂᕐᒧᑦ ᓄᓇᑦᓯᐊᕗᒻᒥ ᐱᖃᙱᓗᐊᖅᑐᑦ ᑲᓇᑕᒥ ᐱᔾᔪᓯᕆᔭᖏᑎᒍᑦ. ᐊᒥᓱᐃᑦ ᐊᔾᔨᒌᙱᑦᑐᒃᑯᑦ ᐋᓐᓂᐊᖅᑐᑦ ᓄᓇᒋᔭᐅᔪᒥ, ᐃᓚᒋᓗᒋᑦ ᖁᑦᑎᑦᑐᒃᑯᑦ ᓯᐅᕋᔮᖅᑐᕈᓐᓇᙱᑦᑐᓂᒃ ᐋᓐᓂᐊᓂᖃᖅᑐᓂᒃ.

ᐃᒡᓗᕐᔪᐊᑦ

• ᐃᓚᒋᔭᐅᓚᐅᖅᑐᑦ ᐱᖁᔨᔪᑦ ᒐᕙᒪᒃᑯᓄᑦ ᐱᕙᓪᓕᐊᓗᑎᒃ ᐃᒡᓗᕐᔪᐊᓄᑦ ᐸᕐᓇᐅᑎᓂᒃ ᐊᔾᔨᒌᙱᑦᑐᓂᒃ ᐃᓱᐊᓈᕐᕕᔅᓴᖃᕐᓗᑎᒃ ᐃᒡᓗᕐᔪᐊᔅᓴᓄᑦ ᐊᑲᐅᙱᓕᐅᕈᑕᐅᔪᓄᑦ ᓄᓇᒋᔭᐅᔪᒥ.
• ᐊᒥᓲᓂᖏᑦ ᐃᓄᐃᑦ ᓄᓇᒋᔭᐅᔪᒥ ᐱᕈᖅᐸᓪᓕᐊᔪᑦ, ᐊᒻᒪᓗ ᐃᒡᓗᕐᔪᐊᖃᕆᐊᔅᓴᖅ ᐊᒃᓱᕈᕐᓇᖅᓯᕙᓪᓕᐊᓂᐊᖅᑐᑦ
• ᐱᔾᔪᑎᒋᓪᓗᒍ ᐃᓂᖃᙱᓗᐊᕐᓂᖏᓐᓄᑦ ᐃᒡᓗᒥ, ᓄᑕᖅᑲᐃᑦ ᐊᓂᑕᐅᕙᒃᑐᑦ ᓄᑕᖅᑲᓕᕆᔨᓄᑦ ᐱᔨᑦᑎᕋᐅᑎᓕᕆᔨᒃᑯᓐᓂᑦ. ᐱᖃᒃᑲᓐᓂᕆᐊᖃᖅᑐᑦ ᐃᒡᓗᓂᒃ ᐱᓗᐊᖅᑐᒥᒃ ᐊᖓᔪᖅᑳᖑᔪᓄᑦ ᓄᑕᖅᑲᖏᓐᓂᒃ ᐅᑎᖅᑎᓇᓱᐊᖅᑐᓂᒃ. ᐃᓂᖃᙱᓗᐊᕐᓂᖓ ᐃᒡᓗᒧᑦ ᐱᔾᔪᑎᖃᖃᑕᐅᔪᖅ ᖃᓄᖅ ᓄᑕᕋᖅ ᐃᓕᓐᓂᐊᕐᓂᖓᓄᑦ, ᐱᓕᕆᐊᕆᔪᓐᓇᕐᓂᐊᕐᓗᒋᑦ ᐱᓕᕆᐊᔅᓴᖏᑦ ᐊᖏᕐᕋᒥ ᐊᒻᒪᓗ ᓯᓂᑦᑎᐊᕆᐊᖃᕐᓂᖏᓐᓄᑦ.
• ᐃᒡᓗᕐᔪᐊᖅᑕᖃᕆᖃᖅᑐᑦ ᐃᓐᓇᓄᑦ.
• ᒪᒃᑯᒃᑐᐃᑦ ᐃᓕᓐᓂᐊᕌᓂᒃᓯᒪᔪᑦ ᐅᑎᕈᒪᒐᓗᐊᖅᑐᑦ ᐊᖏᕐᕋᒥᓄᑦ, ᑭᓯᐊᓂ ᐊᖏᕐᕋᕈᓐᓇᙱᑦᑐᑦ ᐃᒡᓗᔅᓴᖃᙱᓐᓂᖓᓐᓄᑦ. 
• ᓄᓇᒧᑦ ᐊᑐᐃᓐᓇᐅᔪᔅᓴᖅ ᐊᒃᓱᕉᑎᒋᔭᐅᔪᖅᑕᐅᖅ ᐃᒡᓗᔅᓴᓕᐅᕐᓗᓂ ᓄᑖᒥᒃ, ᐊᒻᒪᓗ ᐊᑐᐃᓐᓇᐅᔪᓐᓇᖅᑐᓂᒃ ᐱᔨᑦᑎᕋᐅᑎᔅᓴᓄᑦ ᐃᒪᕐᒧᑦ ᐊᒻᒪᓗ ᐊᓇᖅᑕᒧᑦ. 
• ᐃᒡᓗᕐᔪᐊᖃᕐᓂᖅ ᐃᓚᖃᖅᑐᖅ ᐋᓐᓂᐊᖅᑕᐃᓕᒪᓂᕐᒧᑦ: ᐃᓂᖃᙱᓗᐊᖅᑎᓪᓗᒍ ᐃᒡᓗᒥ, ᐊᒃᓱᕈᕐᓇᖅᑐᖅ ᓇᓗᓇᙱᑦᑐᒃᑯᑦ ᐃᓄᐃᑦ ᐋᓐᓂᐊᙱᓐᓂᖏᓐᓄᑦ ᐊᒻᒪᓗ ᓂᕆᑦᓯᐊᖃᑦᑕᕐᓂᖏᓐᓄᑦ.
• ᐃᓱᒫᓘᑎᒋᔭᐅᔪᑦ ᐱᔾᔪᑎᖃᖅᑐᓂᒃ ᒐᕙᒪᓕᕆᔨᕐᔪᐊᒃᑯᑦ ᖃᓄᐃᓕᐅᖃᑦᑕᕐᓂᖏᓐᓄᑦ ᑐᓂᓯᓗᑎᒃ ᐃᒡᓗᕐᔪᐊᔅᓴᓂᒃ ᑮᓇᐅᔭᑎᒍᑦ ᐃᑲᔫᓯᐊᓂᒃ ᐊᕕᒃᑐᖅᓯᒪᔪᒃᑯᑦ ᓄᓇᓕᓐᓄᑦ ᒐᕙᒪᖏᓐᓄᑦ. ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᑮᓇᐅᔭᐃᑦ ᐃᑲᔫᓯᐊᖏᑦ ᐊᔾᔨᒋᙱᓐᓂᖓᓄᑦ ᐅᑭᐅᖅᑕᖅᑐᒥᐅᑕᓄᑦ ᑭᓯᐊᓂ ᖃᓪᓗᓈᑦ ᓄᓇᖓᓂᙶᖅᑐᑎᑐᑦ ᑮᓇᐅᔭᓕᐅᕈᑕᐅᕙᒃᑐᒃᑯᑦ.

ᐃᓕᓐᓂᐊᕐᓂᖅ

• ᐃᓕᓐᓂᐊᕐᓂᖅ ᐊᒻᒪᓗ ᐊᔪᙱᔾᔪᑎᓄᑦ ᐱᕙᓪᓕᐊᓂᖅ ᑭᒡᓕᒋᔭᐅᓇᔭᖅᑐᖅ ᑕᒪᒃᑭᓄᑦ ᑐᓴᒐᔅᓴᙳᖅᑎᑕᐅᓗᑎᒃ ᐃᓅᖃᑎᒌᒃᑐᓄᑦ ᐊᒃᓱᕈᕐᓇᖅᑐᓂᒃ.
• ᐃᓚᒋᔭᐅᓚᐅᖅᑐᑦ ᓇᓗᓇᐃᓚᐅᖅᑐᑦ ᐱᔪᒪᓗᑎᒃ ᖃᓄᐃᓐᓂᖓᓄᑦ ᐃᓕᓐᓂᐊᕈᑕᐅᔪᓂᒃ ᐊᔾᔨᖃᖅᑐᒃᑯᑦ ᐱᔾᔪᓯᐅᔪᒃᑯᑦ ᑲᓇᑕᓕᒫᑎᒍᑦ. ᒫᓐᓇᐅᔪᖅ, ᐃᓚᖏᑦ ᒪᒃᑯᒃᑐᑦ ᐃᓕᓐᓂᐊᕆᐊᖃᒃᑕᓐᓂᓲᖑᔪᑦ ᐱᖓᓱᓂᑦ ᐅᑭᐅᒃᑲᓐᓂᕐᓂᒃ ᐃᓕᑎᑕᐅᓗᑎᒃ ᓯᓚᑦᑐᖅᓴᕐᕕᒻᒧᐊᕈᓐᓇᖅᑎᑕᐅᓗᑎᒃ, ᐱᔾᔪᑎᒋᓪᓗᒍ ᐃᓕᓐᓂᐊᕌᓯᒃᓯᒪᒐᓗᐊᖅᑐᑎᒃ ᐊᔪᙱᔾᔪᑎᔅᓴᖏᓐᓄᑦ ᐱᖃᙱᓐᓂᖏᓐᓄᑦ.
• ᐃᓚᒋᔭᐅᓚᐅᖅᑐᑦ ᐃᓱᒫᓘᑎᑕᖃᓚᐅᖅᑐᑦ ᒫᓐᓇᐅᔪᖅ ᐃᓕᓐᓂᐊᕈᑕᐅᔪᑦ ᐋᖅᑭᒃᓯᒪᓂᖏᑦ ᐃᓕᓐᓂᐊᖅᑎᑎᓲᖑᙱᓐᓂᖏᑦ ᐃᓕᓐᓂᐊᖅᑎᑕᐅᓂᖏᓐᓄᑦ, ᐊᒻᒪᓗ ᐱᖃᕆᐊᖃᖅᑐᖅ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᖃᓄᖅ ᒪᒃᑯᒃᑐᐃᑦ ᐃᓕᓐᓂᐊᑦᑎᐊᕈᓐᓇᕐᓂᖏᑦ ᓄᓇᒋᔭᐅᔪᒥ.
• ᑕᐃᒫᒃᑲᓐᓂᖅ, ᐱᔪᓐᓇᕐᓂᖅ ᓄᓇᒋᔭᐅᔪᒥ ᓯᓚᑦᑐᖅᓴᕐᕕᖃᕐᓂᕐᒧᑦ ᐱᒻᒪᕆᐅᔪᖅ, ᐃᓄᐃᑦ ᑖᔅᓱᒪ ᓄᓇᒋᔭᖓᓂ ᐊᐅᓪᓚᕆᐊᖃᓲᖑᔪᑦ ᖁᑦᑎᓐᓂᖅᓴᒧᑦ ᐃᓕᓐᓂᐊᒃᑲᓐᓂᕆᐊᕐᓗᑎᒃ.
• ᒫᓐᓇᐅᔪᖅ, ᐃᓐᓇᕐᓄᑦ ᐃᓕᓐᓂᐊᕐᕕᒃ ᐊᑭᑐᔪᖅ ᐊᒻᒪᓗ ᐊᒥᓱᑦ ᐃᓕᓐᓂᐊᕌᓂᒍᓐᓇᙱᑦᑐᑎᒃ.
• ᐃᓕᓐᓂᐊᓕᓵᖅᑐᔅᓴᓄᑦ ᐃᓕᓐᓂᐊᕐᕕᒃ ᐊᒃᓱᕉᑎᑕᖃᖅᑐᑦ ᐊᔪᙱᑦᑐᓄᑦ ᐃᖅᑲᓇᐃᔮᕈᓐᓇᖅᑐᓂᒃ ᐊᒻᒪᓗ ᒥᐊᓂᕆᕕᒻᒧᑦ ᓚᐃᓴᖃᕆᐊᖃᕐᓂᕐᒧᑦ.  
• ᐃᓚᒋᔭᐅᓚᐅᖅᑐᑦ ᐃᑲᔪᖅᑐᑦ ᒥᐊᕆ ᓴᐃᒪᓐ ᑐᒃᓯᕋᐅᑎᖓᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᓯᓚᑦᑐᖅᓴᕐᕕᖃᕐᓗᓂ.  
• ᐃᓚᒋᔭᐅᓚᐅᖅᑐᑦ ᐊᒃᓱᕈᓚᐅᖅᑐᑦ ᐱᕕᔅᓴᖃᙱᓗᐊᕐᓂᖓᓄᑦ ᒐᕙᒪᓕᕆᔨᕐᔪᐊᒃᑯᑦ ᐃᑲᔪᖅᑕᐅᓂᕐᒧᑦ ᑲᓇᑕᒥ ᐃᓄᐃᑦ ᐃᓕᓐᓂᐊᕐᓂᕐᒧᑦ ᐸᕐᓇᐅᑎᔅᓴᖏᓐᓄᑦ, ᐊᒻᒪᓗ ᐊᐱᕆᓪᓗᑎᒃ ᒐᕙᒪᑦ ᑲᓇᑕᒃᑯᓐᓄᑦ ᐃᑲᔪᖅᑕᐅᔪᒪᓂᕋᖅᑐᑎᒃ ᐱᕙᓪᓕᐊᓗᑎᒃ ᐸᕐᓇᐅᑎᔅᓴᓄᑦ.

ᐅᖃᐅᓯᖅ ᐊᒻᒪᓗ ᐃᓕᖅᑯᓯᒧᑦ ᐅᑎᖅᑎᑦᑎᓂᖅ

• ᐅᖃᐅᓯᖅ, ᐃᓕᖅᑯᓯᖅ ᐊᒻᒪᓗ ᑭᓇᐅᓂᖓ ᐱᒻᒪᕆᐅᔪᖅ ᐊᒻᒪᓗ ᓴᙱᓕᖅᑎᑕᐅᒃᑲᓐᓂᕆᐊᖃᖅᑐᑦ.

ᐊᑲᐅᓈᖅᑐᒥᒃ ᐅᑭᐅᖅᑕᖅᑐᒥ ᑮᓇᐅᔭᓕᐅᕈᑕᐅᕙᒃᑐᑦ

• ᐃᓚᒋᔭᐅᓚᐅᖅᑐᑦ ᐃᑉᐱᒍᓱᓚᐅᖅᑐᑦ ᐱᒻᒪᕆᐅᔪᒥᒃ ᐃᓕᑕᕆᔭᐅᓗᑎᒃ ᐊᖏᔪᒃᑯᑦ ᐊᓯᙳᖅᓯᒪᓂᖓᓄᑦ ᓄᓇᒥᐅᑕᐅᓂᕐᒥᑦ ᐅᓪᓗᒥᐅᓕᖅᑐᒧᑦ ᐃᓅᓯᕆᔭᐅᓕᖅᑐᓄᑦ ᐃᑲᕐᕋᒧᑦ ᑮᓇᐅᔭᓕᐅᕐᓂᕆᔭᐅᔪᒧᑦ.
• ᓴᙱᓕᖅᑎᑦᑎᒃᑲᓐᓂᕐᓂᖅ ᖃᕋᓴᐅᔭᓕᕆᓂᕐᒧᑦ ᐊᐱᖅᓲᑎᖃᙱᑦᑐᒃᑯᑦ ᐱᕙᓪᓕᐊᓗᑎᒃ. ᑖᔅᓱᒥᖓ ᐱᖃᙱᓪᓗᑎᒃ, ᓄᓇᓖᑦ ᑐᓂᓯᓂᖅ ᐊᔪᖅᑐᑦ ᖁᑦᑎᓐᓂᖅᓴᒧᑦ ᐃᓕᓐᓂᐊᕈᓐᓇᕐᓂᕐᒧᑦ, ᐃᓐᓇᓄᑦ ᐃᓕᓐᓂᐊᕐᕕᓐᓄᑦ ᐃᓱᐊᓈᕈᑎᔅᓴᓂᒃ, ᐅᕝᕙᓘᓐᓃᑦ ᐊᑐᖅᑕᐅᔪᓐᓇᖅᑐᓂᒃ ᖃᕋᓴᐅᔭᓕᕆᓂᕐᒧᑦ. ᓇᒻᒥᓂᖃᖅᑐᑦ ᐱᕚᓪᓕᕈᓐᓇᖅᑐᑦ ᐱᐊᓂᑦᑎᐊᕐᓗᑎᒃ ᖃᕋᓴᐅᔭᓕᕆᓂᕐᒧᑦ ᐊᑐᐃᓐᓇᐅᔪᓐᓇᖅᑐᓂᒃ.
• ᑕᐃᒪᒃᑲᓐᓂᖅ, ᐃᖅᑲᓇᐃᔮᔅᓴᓂᒃ ᕿᓂᖅᑐᑦ ᐱᖃᕆᐊᖃᖅᑐᑦ ᖃᕋᓴᐅᔭᓂᒃ ᐃᖅᑲᓇᐃᔮᔅᓵᕋᓱᐊᖅᑐᓄᑦ.
• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᖅᑐᑦ ᐱᕚᓪᓕᕐᓗᒍ ᒥᑦᑕᕐᕕᒃ ᓇᐃᓐᒥ ᐱᒻᒪᕆᐅᔪᖅ ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐱᕙᓪᓕᐊᓗᑎᒃ.
• ᓴᓇᓗᓂ ᐊᖅᑯᑎᒥᒃ ᑐᓄᕕᐊ ᓚᐸᑐᐊᒥ ᐱᕚᓪᓕᕈᑕᐅᔪᓐᓇᖅᑐᑦ ᓇᒻᒥᓂᖃᖅᑐᓄᑦ ᐱᕙᓪᓕᐊᓗᑎᒃ, ᐊᑲᐅᓈᕐᓂᖅᓴᐅᓗᓂ ᐃᖅᑲᓇᐃᔭᖅᑎᓄᑦ ᓇᒻᒥᓂᖃᖅᑐᓄᑦ ᐊᐅᓚᑕᐅᔪᑦ ᑕᐃᑲᓂ ᓇᔪᕐᕕᐅᔪᒥ.
• ᐃᓚᖏᑦ ᐃᓚᒋᔭᐅᓚᐅᖅᑐᑦ ᐅᖃᐅᔾᔪᐃᓯᒪᔪᑦ ᐱᔪᓐᓇᐅᑎᖃᕈᓐᓇᕐᓂᖅ ᐊᑭᑭᑦᑐᒥᒃ ᐅᐊᔭᒨᖅᑐᓂᒃ ᐱᒻᒪᕆᐅᔪᖅ ᓇᒻᒥᓂᖃᖅᑐᓄᑦ ᐊᑭᓪᓕᕆᐊᕐᓗᒋᑦ ᐊᐅᓚᑕᐅᔪᑦ ᐊᒻᒪᓗ ᐃᑲᔪᕐᓗᑎᒃ ᐊᑲᐅᓈᖅᑐᒥᒃ ᑮᓇᐅᔭᓕᐅᕐᓂᕆᔭᐅᔪᒃᑯᑦ ᐱᕙᓪᓕᐊᔪᓂᒃ ᓄᓇᓕᖕᓂ.
• ᒥᑭᓐᓂᖅᓴᐃᑦ ᓇᒻᒥᓂᖃᖅᑐᑦ ᐃᑲᔫᑎᑖᕈᓐᓇᖅᑐᑦ ᐱᔪᓐᓇᐅᑎᖃᕐᓂᒃᑯᑦ ᐊᑭᑐᔫᑎᒃᑯᑦ ᐊᒻᒪᓗ ᓇᓪᓕᐅᒃᑯᒫᒃᑯᑦ ᐱᓕᕆᐊᔅᓴᓄᑦ, ᓇᓪᓕᐅᒃᑯᒫᑦ ᐊᑭᑐᔫᑎᐅᔪᓐᓇᕐᓂᖏᓐᓄᑦ ᓇᒻᒥᓂᖃᖅᑐᓄᑦ ᑖᔅᓱᒪ ᓄᓇᒋᔭᐅᔪᒥ.
• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐃᑳᔪᓯᐊᑦ ᐱᕙᓪᓕᐊᔪᓄᑦ ᐊᒻᒪᓗ ᐃᑲᔫᓯᐊᑦ ᐊᖏᕈᑎᓂ (IBAs), ᐊᖏᓂᖅᓴᓄᑦ ᑐᕌᖓᓂᖅᓴᐅᔪᑦ ᐱᓕᕆᐊᔅᓴᓄᑦ, ᐊᒻᒪᓗ ᐅᖃᐅᔾᔪᐃᓯᒪᔪᑦ ᑐᒃᓯᕋᕐᓗᑎᒃ ᒥᑭᓂᖅᓴᓄᑦ ᐱᓕᕆᐊᔅᓴᕆᔭᐅᔪᓐᓇᖅᑐᓂᒃ. ᐃᓚᒋᔭᐅᓚᐅᖅᑐᑦ ᐅᖃᐅᔾᔪᖅᓯᒪᔪᑦ IBAs-ᑯᑦ ᐊᑐᖅᑕᐅᔪᓐᓇᖅᑐᑦ ᓴᓇᓗᑎᒃ ᓄᓇᒋᔭᐅᔪᒥ ᑮᓇᐅᔭᓕᐅᕐᓂᕆᔭᐅᔪᒃᑯᑦ, ᐊᒻᒪᓗ ᐊᑐᖃᑦᑕᒃᑲᓐᓂᕐᓗᒋᑦ ᐊᖏᕈᑕᐅᔪᓂᒃ ᓇᒻᒥᓂᖃᖅᑐᓄᑦ ᐊᑲᐅᓈᖅᑐᒥᒃ ᐱᐊᓂᑦᑎᐊᕈᓐᓇᖅᑐᑦ ᓄᓇᒋᔭᐅᔪᒥ.
• ᐃᑉᐱᒋᑦᓯᐊᕐᓂᒃᑯᑦ ᐃᖃᓗᓕᕆᔨᒃᑯᓐᓄᑦ, ᐃᓚᒋᔭᐅᓚᐅᖅᑐᑦ ᐃᑉᐱᒍᓱᓚᐅᖅᑐᑦ ᑖᔅᓱᒪ ᓄᓇᒋᔭᐅᔪᖅ ᐃᓱᒪᒋᔭᐅᙱᓗᐊᕐᓂᖏᓐᓄᑦ ᑐᕌᖓᓗᐊᕐᒪᑕ ᓇᒦᓐᓂᖓᓄᑦ ᓂᐅᕙᓐᓛᓐᑯᑦ ᐃᖃᓗᓕᕆᔨᒃᑯᖏᓐᓄᑦ ᐊᒻᒪᓗ ᒐᕙᒪᓕᕆᔨᕐᔪᐊᒃᑯᓄᑦ ᐱᕚᓪᓕᖅᓯᒪᓂᖏᑦ ᓄᓇᕗᒻᒧᑦ. ᐃᓄᐃᑦ ᐃᖅᑲᓇᐃᔭᖅᑐᑦ ᐃᖃᓗᓂᕆᕝᕕᒥ ᑖᔅᓱᒪ ᓄᓇᖓᓂ ᐱᖃᕈᓐᓃᖅᓯᒪᔪᑦ ᐊᖏᔪᒃᑯᑦ ᒐᕙᒪᒃᑯᑦ ᐊᑐᐊᒐᙱᑦ ᐱᔾᔪᑎᒋᓪᓗᒋᑦ, ᐱᖃᙱᓗᐊᕐᓂᐊᖓᓄᑦ ᐊᑐᐃᓐᓇᐅᔪᓐᓇᖅᑐᓂᒃ, ᐊᒻᒪᓗ ᐱᖃᙱᓗᐊᕐᓂᖓᓄᑦ ᐃᓱᒪᒃᓴᖅᓯᐅᕐᓂᕆᔭᐅᓂᕐᒧᑦ ᓚᐸᑐᐊᑉ ᐃᖃᓗᓕᕆᔨᒃᑯᖏᓐᓄᑦ ᓄᓇᖓ ᓯᕿᓐᓂᐊᓃᓐᓂᖓᓄᑦ 60th ᑐᑭᓕᕇᓐᓂᖓᓂ (parallel). ᑭᓯᐊᓂ, ᐱᓕᕆᕝᕕᖃᖅᑐᓄᑦ ᐃᖃᓗᓕᕆᔨᒃᑯᑦ ᐊᒥᓲᙱᑦᑐᑦ ᐊᑐᐃᓐᓇᐅᔪᓐᓇᖅᑐᑦ ᐱᕚᓪᓕᕈᑕᐅᓗᑎᒃ ᐃᑲᔫᓯᐊᓂᒃ ᐃᓄᖕᓄᑦ ᓄᓇᖃᖅᑐᓂᒃ ᑕᒫᓂ.
• ᑮᓇᐅᔭᑎᒍᑦ ᐃᑲᔫᑕᐅᔪᓐᓇᖃᑕᐅᕗᖅ ᐅᑎᖅᑎᓗᒋᑦ ᐃᓕᖅᑯᓯᒃᑯᑦ ᑮᓇᐅᔭᓕᐅᕐᓂᕆᔭᐅᕙᒃᑐᓂᒃ, ᐆᑦᑑᑎᒋᓗᒍ ᓇᑦᑎᖅᓯᐅᕐᓂᖅ. 
• ᐃᓚᒋᔭᐅᓚᐅᖅᑐᑦ ᐃᑉᐱᒋᔭᖃᓚᐅᖅᑐᑦ ᐱᖃᒃᑲᓐᓂᕐᓗᓂ ᐃᖅᑲᓇᐃᔮᔅᓴᐅᔪᓐᓇᖅᑐᓂᒃ ᑭᒃᑯᑐᐃᓐᓇᓄᑦ ᑐᕌᖓᔪᒃᑯᑦ. ᐆᑦᑑᑎᒋᓗᒍ, ᐊᒥᓱᑲᓪᓇᐃᑦ ᐊᐅᔭᒃᑯᑦ ᐱᓕᕆᐊᔅᓴᐃᑦ ᓴᓇᕝᕕᓂ, ᑕᑯᔭᐅᔪᓐᓇᖅᑐᓂᒃ ᒪᒃᑯᒃᑐᓄᑦ. 
• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᐱᕕᔅᓴᖃᙱᓗᐊᕐᓂᖓᓄᑦ ᐃᖅᑲᓇᐃᔮᔅᓴᓂᒃ ᐊᒻᒪᓗ ᐃᓄᐃᑦ ᐊᒥᓲᓂᖏᑦ ᐊᑲᐅᙱᓕᐅᕈᑕᐅᓯᒪᓂᖓᓄᑦ. ᐃᖅᑲᓇᐃᔮᔅᓴᐅᔪᑦ ᓄᓇᒋᔭᐅᔪᓂ ᐱᕕᔅᓴᖃᖅᑎᑕᐅᙱᓐᓂᖓᓄᑦ, ᐊᒃᓱᕈᕐᓇᖅᑐᖅ ᐃᖅᑲᓇᐃᔮᔅᓴᖃᕆᐊᔅᓴᒧᑦ. ᐃᓚᖏᑦ ᐃᓚᒋᔭᐅᓚᐅᖅᑐᑦ ᐃᑉᐱᒍᓱᖃᑕᐅᓚᐅᖅᑐᑦ ᐊᒃᓱᕈᕐᓇᖅᑐᓂᒃ ᐃᓚᖃᖅᑐᓂᒃ ᐃᖅᑲᓇᐃᔮᒧᑦ ᐊᑲᐅᓈᖅᓯᒪᓂᕆᔭᖏᑎᒍᑦ, ᐃᓕᓐᓂᐊᕌᓂᒃᓯᒪᓗᐊᕐᓂᖓᓄᑦ ᐊᒻᒪᓗ ᐊᑲᐅᙱᓕᐅᕈᑕᐅᓯᒪᔪᓂᒃ ᐃᓕᓐᓂᐊᕐᒧᑦ ᐋᖅᑭᒃᓯᒪᔪᒃᑯᑦ. 
• ᐱᕚᓪᓕᕐᓂᖅ ᓱᓇᒃᑯᑖᓄᑦ ᖃᐅᔨᓴᕐᓂᕐᒧᑦ, ᐅᐊᔭᒨᖅᑐᓂᒃ, ᓴᓇᒍᓐᓇᕐᓂᕐᒧᑦ ᐊᒻᒪᓗ ᓈᓴᐅᑎᓕᕆᓂᕐᒧᑦ (STEM) ᐃᓕᓐᓂᐊᕐᓂᖅ ᐱᕚᓪᓕᕈᑕᐅᔪᓐᓇᖅᑐᑦ ᐃᖅᑲᓇᐃᔮᔅᓴᓄᑦ ᐱᐊᓂᑦᑎᐊᕈᓐᓇᕐᓂᕐᒧᑦ. ᑕᐃᒪᐅᔪᑦ ᐃᖅᑲᓇᐃᔮᔅᓴᐃᑦ ᐆᒪᔪᓕᕆᓂᕐᒧᑦ ᐊᒻᒪᓗ ᐅᐊᔭᒨᖅᑐᓕᕆᓂᕐᒧᑦ ᓄᓇᒋᔭᐅᔪᒥ, ᑭᓯᐊᓂ ᐊᒃᓱᕈᕐᓇᖅᑐᑦ ᐃᖅᑲᓇᐃᔮᖅᑖᕆᔭᐅᓗᑎᒃ ᐃᑉᐱᒋᔭᐅᔪᒃᑯᑦ.
• ᐃᓚᒋᔭᐅᓚᐅᖅᑐᑦ ᓇᓗᓴᐃᖅᓯᓚᐅᖅᑐᑦ ᒫᓐᓇᐅᔪᒃᑯᑦ ᐊᑐᐊᒐᓄᑦ ᐊᑐᖅᑕᐅᔪᓂᒃ, ᐃᓄᐃᑦ ᓂᖃᐃᑐᓲᖑᔪᑦ ᑭᓯᐊᓂ ᐱᔪᒪᙱᒃᑲᓗᐊᖅᑎᓪᓗᒋᑦ. ᑮᓇᐅᔭᓕᐅᕐᓂᕆᔭᖏᑦ ᖁᑦᑎᑎᑕᐅᔪᓐᓇᖅᐸᑕ (ᐃᖅᑲᓇᐃᔮᖅᑖᕈᓐᓇᕐᓂᒃᑯᑦ), ᐃᒡᓗᖃᕈᓐᓃᑐᐃᓐᓇᕆᐊᖃᖅᑐᑦ. ᑖᒃᑯᐊ ᐊᑐᐊᒐᐃᑦ ᓄᖅᑲᖅᑎᑦᑎᓲᑦ ᐃᓄᖕᓂᒃ ᑲᔪᓯᒋᐊᕐᓂᕐᒧᑦ.
• ᐃᓚᒋᔭᐅᓚᐅᖅᑐᑦ ᐃᑉᐱᒋᔭᖃᓚᐅᕐᒥᔪᑦ ᐱᒻᒪᕆᐅᓂᖓ ᐋᖅᑭᒋᐊᕐᓗᒍ ᑐᑭᖓ ᐃᓅᑦᓯᐊᕋᓱᐊᕐᓂᕐᒧᑦ ᓄᓇᒋᔭᐅᔪᒥ ᐱᒻᒪᕆᐅᔪᓂᒃ.

ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ

• ᐃᓚᒋᔭᐅᓚᐅᖅᑐᑦ ᖃᐅᔨᓴᖅᓯᒪᔪᑦ ᒐᕙᒪᓕᕆᔨᕐᔪᐊᒃᑯᑦ ᐊᔪᖅᓴᕐᓂᖏᑦ ᑐᒃᓯᕋᐅᑎᔅᓴᓄᑦ ᓄᓇᖃᖅᖄᖅᓯᒪᔪᓄᑦ ᖃᐅᔨᒪᓕᓂᖏᓐᓄᑦ, ᐊᒻᒪᓗ ᑐᑭᖃᙱᑦᑐᒃᑯᑦ ᐅᕝᕙᓘᓐᓃᑦ ᑐᑭᓯᐊᓇᖅᑐᒃᑯ ᑐᑭᓯᐊᔾᔪᑎᔅᓴᖃᑎᙱᑦᑐᑦ ᖃᓄᖅ ᐱᓕᕆᐊᕆᔭᐅᒻᒪᖔᑕ ᒪᓕᒐᓕᕆᓂᒃᑯᑦ.
• ᑕᐃᒫᒃ, ᐱᐅᓂᖅᓴᓂᒃ ᑐᑭᐊᓯᐊᔾᔪᑎᔅᓴᓂᒃ ᐱᖃᕆᐊᖃᖅᑐᑦ ᖃᓄᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᑐᑭᓯᐊᔭᐅᒻᒪᖔᑕ ᐊᒻᒪᓗ ᖃᓄᖅ ᐊᑐᖅᑕᐅᓂᖏᑦ ᒐᕙᒪᒃᑯᓐᓄᑦ ᑲᓇᑕᒥ.
• ᐊᒥᓱᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᐃᑉᐱᒋᔭᐅᑦᑎᐊᙱᑦᑐᑦ ᐊᔾᔨᒋᔭᔭᐅᔪᒃᑯᑦ ᐅᑭᐅᖅᑕᖅᑐᒥᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᐊᒻᒪᓗ ᐱᓕᕆᐊᕆᔭᐅᓪᓗᑎᒃ ᐃᓚᒋᐊᖅᑕᐅᑐᐃᓐᓇᔪᒃᑯᑦ ᐅᕝᕙᓘᓐᓃᖅ ᕿᔪᖁᑎᑐᑦ ᐱᐊᓂᒃᑕᐅᓂᕋᖅᑕᐅᔪᓂᒃ. ᐊᒥᓱᑦ ᐃᓄᐃᑦ ᑐᑭᓯᐊᙱᑦᑐᑦ ᖃᓄᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᑦ ᐃᓚᒋᔭᐊᖅᑕᐅᔪᓐᓇᖁᓪᓗᒋᑦ ᓱᓇᒃᑯᑖᓄᑦ ᖃᐅᔨᓴᕐᓂᕐᒧᑦ. 

ᐊᐅᓚᔪᒃᑯᑦ ᐃᓗᓪᓕᕈᓐᓇᕐᓂᖅ

• ᑲᓇᑕ ᓴᙱᓕᒃᑲᓐᓂᕆᐊᖃᖅᑐᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᔾᔪᑎᖃᖅᑐᓂᒃ, ᐃᓚᒋᔭᐅᓚᐅᖅᑐᑦ ᐃᓱᒪᖃᓚᐅᑐᑦ ᑲᓇᑕ ᒫᓐᓇᐅᔪᒃᑯᑦ ᐊᐅᓚᔪᓐᓇᖅᑐᑦ ᐱᕙᓪᓕᐊᓗᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᖃᐅᔨᓴᕈᓐᓇᕐᓗᑎᒃ ᐅᑭᐅᖅᑕᖅᑐᒥ
• ᑕᒪᓐᓇ ᓄᓇᒋᔭᐅᔪᖅ ᐋᖅᑭᒃᓯᒪᑦᑎᐊᖅᑐᑦ ᐊᑑᑎᒋᓗᒋᑦ ᐅᐊᔭᒨᖅᑐᓂᒃ ᓇᔪᕐᕕᐊᔪᓐᓇᖅᑐᓂᒃ ᐆᑦᑑᑎᒋᓗᒍ ᐃᒃᑮᓇᖅᑐᓂᒃ ᐃᒪᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᑭᓯᐊᓂ ᐃᑲᔪᖅᑕᐅᙱᓗᐊᕐᓂᖓᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᐱᕙᓪᓕᐊᓗᓂ ᐃᒻᒥᒃᑯᖅ.
• ᐃᓚᒋᔭᐅᓚᐅᖅᑐᑦ ᐅᖃᐅᓯᖃᓚᐅᖅᑐᑦ ᐱᖃᒃᑲᓐᓂᕆᐊᖁᓪᓗᒋᑦ ᑮᓇᐅᔭᐃᑦ ᐃᑲᔫᓯᐊᓂᒃ ᐃᑲᔪᑎᖃᖅᑐᔅᓴᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᐅᐊᔭᒨᖅᑐᓂᒃ, ᓴᓇᒍᓐᓇᓂᕐᒧᑦ ᐊᒻᒪᓗ ᓈᓴᐅᑎᓕᕆᓂᕐᒧᑦ (STEM).
• ᐱᒻᒪᕆᐅᔪᖅ ᓴᓇᕙᓪᓕᐊᓗᓂ ᓴᓇᕝᕕᓂᒃ ᓄᓇᒋᔭᐅᔪᓂ ᐱᕙᓪᓕᐊᖁᓪᓗᒋᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᐊᐅᓚᑕᐅᓗᑎᒃ−ᓄᓇᒋᔭᐅᔪᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᔪᓐᓇᐅᑎᑕᖃᕈᓐᓇᖅᑐᓂᒃ ᐃᒻᒥᒃᑯᑦ, ᐊᒻᒪᓗ ᓇᓗᓇᐃᖅᓯᒪᔪᒃᑯᑦ ᑎᑎᕋᖅᑕᐅᓯᒪᓗᑎᒃ ᐊᑯᓂᐅᔪᒃᑯᑦ. ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᑲᓇᑕ ᓇᒻᒥᓂᖅ ᓯᓚᑦᑐᖅᓴᕐᕕᖃᕈᓂ ᐅᑭᐅᖅᑕᖅᑐᒥ, ᐃᑲᔫᑎᖃᕋᔭᖅᑐᑦ ᐱᕙᓪᓕᐊᓗᑎᒃ ᐊᐅᓚᔪᓐᓇᖅᑐᓂᒃ ᓴᓇᕝᕕᓂᒃ ᐅᑭᐅᖅᑕᖅᑐᒥᐅᑕᓄᑦ. 

ᐋᖅᑭᒃᓱᐃᓂᖅ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑲᑎᒪᔾᔪᑎᔅᓴᐃᑦ: ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᓯᕗᓪᓕᐅᔭᕆᐊᖃᖅᑐᑦ

• ᐊᑕᔪᑦ ᐋᓐᓂᐊᖅᑕᐃᓕᒪᓂᕐᒧᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᑎᑎᕋᖅᓯᒪᔪᒃᑯᑦ ᑮᓇᐅᔭᒃᑯᑦ ᐃᑲᔫᓯᐊᓂᒃ ᐊᒻᒪᓗ ᐱᓕᕆᐊᔅᓴᐅᔪᓂᒃ ᐊᐅᓚᔪᓐᓇᐅᑏᑦ ᐱᔭᐅᔭᕆᐊᖃᖅᑐᓂᒃ ᓄᓇᒋᔭᐅᔪᒥ. ᓴᙱᓂᖃᖅᑐᒃᑯᑦ ᑎᑎᕋᖅᓯᒪᔪᓂᒃ ᐃᑲᔫᓯᐊᓂᒃ ᖃᓄᖅ ᐃᓄᐃᑦ ᐊᑐᓲᓂᖏᑦ ᐋᓐᓂᐊᖅᑕᐃᓕᒪᓂᕐᒧᑦ ᐱᔨᑦᑎᕋᐅᑎᖏᓐᓂᒃ ᐋᖅᑭᒃᓯᒋᐊᕈᓐᓇᖅᑐᑦ ᐱᓕᕆᐊᔅᓇᕆᔭᐅᔪᓂᒃ ᐊᒻᒪᓗ ᑐᓂᓯᓗᓂ ᖃᓄᐃᓕᐅᖅᑕᐅᓯᒪᔪᓂᒃ ᓄᓇᒋᔭᐅᔪᒥ. ᐊᒃᓱᕈᕐᓇᖅᑐᑦ ᐱᕚᓪᓕᕈᑕᐅᓂᕐᒧᑦ ᐱᔪᓐᓇᕐᓂᖅ ᑖᒃᑯᓇᓂ ᑎᑎᕋᖅᓯᒪᔪᓂᒃ, ᐊᒻᒪᓗ ᐊᑐᖅᑕᐅᔪᒃᑯᑦ ᐱᑕᖃᙱᑦᑐᑦ ᐱᕙᓪᓕᐊᖁᔨᓂᕐᒧᑦ.
• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᖅ ᐱᔪᒪᓪᓗᑎᒃ ᓄᓇᒋᔭᐅᔪᒥ−ᐊᐅᓚᑕᐅᔪᑦ ᑲᑎᒪᔨᓂᒃ ᐋᓐᓂᐊᖅᑕᐃᓕᒪᓂᕐᕐᒧᑦ ᐱᔾᔪᑎᖃᖅᑐᓂᒃ ᐃᓅᑦᓯᐊᕋᓱᐊᕐᓂᕐᒧᑦ ᓄᓇᒋᔭᐅᔪᒥ, ᓄᓇᒋᔭᐅᔪᑦ ᐱᔪᓐᓇᐅᑎᖃᙱᑎᑕᐅᓗᑎᒃ ᖃᐅᔨᓴᖅᑕᐅᑎᓪᓗᒋᑦ ᐊᒻᒪᓗ ᖃᐅᔨᒪᔭᐅᓯᒪᔪᓄᑦ ᐊᔾᔨᒋᔭᐅᔪᒃᑯᑦ ᐱᕚᓪᓕᖅᓯᒪᔪᓂᒃ ᐲᖅᑕᐅᓗᑎᒃ. ᓄᓇᒋᔭᐅᔪᒃᑰᕋᓗᐊᖅᐸᑦ ᐅᕝᕙᓘᓐᓃᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᓄᓇᖃᖅᑐᑦ ᐱᕚᓪᓕᕈᓐᓇᖅᑐᑦ ᐊᐅᓚᑕᐅᔪᓐᓇᖅᑐᓂᒃ ᐱᕙᓪᓕᐊᓗᑎᒃ ᑖᒃᑯᓂᖓ ᑎᑎᕋᖅᓯᒪᔪᓂᒃ ᐊᒻᒪᓗ ᐃᓱᒪᒃᓴᖅᓯᐅᕐᓗᑎᒃ ᖃᓄᖅ ᑐᓴᖅᑎᑦᑎᒋᐊᔅᓴᖅ ᐃᑲᔪᖅᑎᒌᖑᔪᓄᑦ ᕿᓂᖅᑐᓂᒃ ᑖᒃᑯᓂᖓ ᑐᑭᓯᐊᔾᔪᑎᖦᓴᓂᒃ.  
• ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᒫᓐᓇᐅᔪᖅ ᐊᐅᓚᑕᐅᔪᑦ ᖁᑦᑎᓐᓂᖅᓴᒃᑯᑦ ᓯᓚᑦᑐᖅᓴᕐᕕᖕᓂᑦ ᑐᓴᖅᑎᑦᑎᓱᐃᑦᑐᑦ ᐊᔾᔨᒌᒃᑐᓂᒃ ᓱᓇᒃᑯᑖᓂᒃ ᖃᐅᔨᓴᖅᑕᐅᔪᓂᒃ ᓯᕗᓪᓕᐅᔭᕆᐊᖃᖅᑐᓂᒃ ᑖᔅᓱᒪᑎᑐᑦ ᓄᓇᒋᔭᐅᔪᒥᑦ, ᐊᒻᒪᓗ ᓄᓇᒋᔭᐅᔪᒥ ᖃᐅᔨᒪᓂᖏᑦ ᐅᖃᐅᓯᐅᒐᓱᐃᑦᑐᑦ ᐅᕝᕙᓘᓐᓃᑦ ᐃᓱᒪᒋᔭᐅᙱᓪᓗᑎᒃ. ᐆᑦᑑᑎᒋᓗᒍ, ᐃᓄᐃᑦ ᑖᔅᓱᒪᓂ ᓄᓇᖃᖅᑐᑦ ᐃᓱᒪᒋᔭᐅᔪᑦ ᐊᑯᓂᐅᔪᒥᒃ ᐃᓄᐃᑦ ᐊᔾᔨᒋᙱᑕᒃᑯᑦ ᓂᕿᓕᐅᓲᓂᖏᑦ, ᑭᓯᐊᓂ ᑐᓴᖅᑎᑦᑎᔪᓐᓇᓚᐅᙱᑦᑐᑦ ᑭᒃᑯᑐᐃᓐᓇᓄᑦ. ᒫᓐᓇᐅᓕᓵᖅᑐᖅ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᔪᒪᔪᑦ ᑖᑦᓱᒥᑦᓴᐃᓐᓇᖅ ᐱᔾᔪᑎᒋᔭᐅᔪᑦ ᐃᑉᐱᒋᔭᐅᑦᓯᐊᕆᐊᖃᖅᑐᑦ ᐱᒻᒪᕆᐅᔪᒃᑯᑦ.
• ᐃᓄᐃᑦ ᓯᕿᓐᓂᕐᒥᐅᑕᐃᑦ ᐱᔪᒪᔪᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑐᕌᖅᓯᒪᔪᓂᒃ ᐃᖃᓗᓐᓄᑦ ᐆᒪᔪᓂᒃ ᓄᓇᒋᔭᖏᓐᓂ, ᐆᑦᑑᑎᒋᓗᒍ ᐃᖃᓗᑉᐲᑦ, ᐊᒻᒪᓗ ᐱᓂᓗᐃᓐᓇᖅᑐᑦ ᐃᒪᓕᕆᔨᒃᑯᓐᓂᑦ ᑲᓇᑕᒥ ᐱᔪᓐᓇᐅᑎᑕᖃᕈᓐᓇᕐᓗᑎᒃ ᑖᔅᓱᒧᖓ ᐊᐅᓚᑕᐅᔪᓂᒃ ᐸᕐᓇᐅᑎᔅᓴᓄᑦ. ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᒻᒪᕆᐅᔪᖅ ᐃᖃᓗᓕᕆᓂᕐᒧᑦ, ᐊᒻᒪᓗ ᐊᐅᓚᑕᐅᒐᔭᖅᑐᑦ ᓄᓇᓕᓂᙶᖅᑐᓂᒃ ᖃᐅᔨᒪᓂᖏᑎᒍᑦ.

ᑮᓇᐅᔭᑎᒍᑦ ᐃᑲᔫᓯᐊᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᖅ

• ᐃᓚᒋᔭᐅᓚᐅᖅᑐᑦ ᓇᓗᓇᐃᖅᓯᓚᐅᖅᑐᑦ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᖏᑦ ᐃᓚᒋᔭᐅᓯᒪᙱᓐᓂᖏᓐᓄᑦ ᐱᔪᓐᓇᐅᑎᔅᓴᓄᑦ ᐊᖏᓂᖅᓴᐅᔪᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑮᓇᐅᔭᑎᒍᑦ ᐃᑲᔫᓯᐊᓂᒃ ᑲᑐᔾᔨᖃᑎᒌᒃᑯᓐᓂᙶᖅᑐᓂᒃ ᐆᑦᑑᑎᒋᓗᒍ ᐃᓅᖃᑎᒌᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᐃᓄᓕᕆᔨᒃᑯᑦ ᓱᓇᒃᑯᑖᓂᒃ ᖃᐅᔨᓴᖅᑎᖏᑦ ᑲᑎᒪᔨᖏᓐᓄᑦ (SSHRC). ᓄᓇᖃᖅᑳᖅᓯᒪᔪᑦ ᐊᒻᒪᓗ ᐅᑭᐅᖅᑕᖅᑐᒥᐅᑕᐃᑦ ᑲᑐᔾᔨᖃᑎᒌᖏᑦ ᐃᓱᒪᒋᔭᔪᑦ ᐱᔪᓐᓇᙱᑦᑐᑦ ᑐᓂᔭᐅᓗᑎᒃ ᐃᑲᔫᓯᐊᓂᒃ ᒐᕙᒪᓕᕆᔨᕐᔪᐊᒃᑯᓐᓂᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐃᑲᔫᓯᐊᓂᒃ ᑲᑐᔾᔨᖃᑎᒌᖑᔪᓂᑦ, ᐊᒻᒪᓗ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᓕᕆᐊᔅᓴᐃᑦ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᐅᑭᐅᖅᑕᖅᑐᒥ ᑲᑐᔾᔨᖃᑎᒌᖑᔪᑦ ᐃᓚᒋᔭᐅᔭᕆᐊᖃᖅᑐᑦ ᓯᓚᑦᑐᖅᓴᕐᕕᓐᓄᑦ − ᑐᙵᕝᕕᒋᔭᐅᔪᑦ ᖃᓪᓗᓈᑦ ᓄᓇᖓᓂ − ᑮᓇᐅᔭᓂᒃ ᐃᑲᔫᓯᐊᓂᒃ ᐱᔪᒪᓐᓂᖅᐸᑕ.
• ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᑦ ᐱᔪᓐᓇᐅᑎᑕᖃᙱᑦᑐᑦ ᐃᓱᒪᒃᓴᖅᓯᐅᕐᓂᕐᒧᑦ ᑲᑎᒪᔨᓄᑦ ᐊᒥᓱᓄᑦ ᑮᓇᐅᔭᑎᒍᑦ ᐃᑲᔫᓯᐊᖑᔪᓄᑦ ᑲᑐᔾᔨᖃᑎᒌᖑᔪᓂᑦ SSHRC−ᑎᑐᑦ, ᑲᓇᑕᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᒻᒪᓗ ᐃᓕᓐᓂᐊᕐᓂᕐᒧᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑲᑎᒪᔨᖏᑦ ᐊᒻᒪᓗ ᑲᓇᑕᒥ ᓯᓚᑦᑐᖅᓴᕐᕖᑦ ᐋᓐᓂᐊᖅᑕᐃᓕᒪᓂᕐᒧᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ, ᐃᑉᐱᒋᔭᐅᑦᑎᐊᙱᑦᑐᑦ ᐃᓄᐃᑦ ᐱᓇᓱᐊᖅᑕᖏᑦ ᐊᑯᓂᐅᔪᒥᑦ.
• ᐱᑕᖃᕆᐊᖃᖅᑐᑦ ᑮᓇᐅᔭᓂᒃ ᐃᑲᔫᓯᐊᓂᒃ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᑎᒍᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ−ᐊᐅᓚᑕᐅᔪᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ.
• ᐊᑭᑐᔪᑦ ᐃᓄᖕᓄᑦ ᓄᓇᒋᔭᐅᔪᒥ ᐃᓚᒋᔭᐅᓗᑎᒃ ᑲᑎᒪᔪᓄᑦ ᐊᒻᒪᓗ ᐃᓕᓐᓂᐊᖅᑎᑕᐅᔪᓄᑦ.

ᐱᕙᓪᓕᐊᓂᖅ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ

• ᓄᓇᒋᔭᐅᔪᒥ ᑲᑐᔾᔨᖃᑎᒌᑦ ᓴᖅᑭᑎᑦᑎᓯᒪᔪᑦ ᐊᑐᖅᑕᐅᔭᕆᐊᖃᖅᑐᓂᒃ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᓕᕆᔪᒪᔪᑦ ᓇᔪᕐᕕᐅᔪᒥ, ᑭᓯᐊᓂ ᐊᔪᕐᓇᖅᑐᑦ ᒐᕙᒪᒃᑯᓄᑦ ᐱᔪᓐᓇᐅᑎᑕᖃᖁᓪᓗᒋᑦ ᑖᒃᑯᓄᐊ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᑐᖅᑕᐅᔭᕆᐊᖃᖅᑐᓂᒃ. ᐃᓚᖏᑦ ᖃᐅᔨᓴᖅᑏᑦ ᐃᑉᐱᒋᔪᑦ ᐅᐸᒍᓐᓇᕐᓂᖏᑦ ᓄᓇᓕᓐᓄᑦ ᓱᓇᒃᑯᑖᓂᒃ ᖃᐅᔨᓴᕐᓗᑎᒃ ᖃᐅᔨᒃᑲᐃᙱᓪᓗᑎᒃ ᓈᒻᒪᒃᑐᒃᑯᑦ ᑐᓴᖅᑎᑦᑎᓂᒃᑯᑦ.
• ᓄᓇᒋᔭᐅᔪᑦ ᐃᓚᒋᔭᐅᔭᕆᐊᖃᖅᑐᑦ ᐸᕐᓇᐅᑎᔅᓴᓄᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ.
• ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐃᓚᒋᔭᐅᔪᑦ ᐃᖅᑲᓇᐃᔮᖅᑎᑕᐅᓂᕐᒧᑦ ᓄᓇᒋᔭᐅᔪᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᑲᔪᓯᓗᑎᒃ ᐃᖅᑲᓇᐃᔮᔅᓴᒧᑦ. ᑕᒪᓐᓇ ᓄᓇᒋᔭᐅᔪᒥ ᐃᓚᒋᔭᐅᔾᔪᑎ ᓴᓇᔭᐅᓯᒫᓂᒃᑐᑦ ᓄᓇᒋᔭᐅᔪᒥ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐊᑐᖅᑕᐅᔭᕆᐊᖃᖅᑐᓂᒃ, ᑭᓯᐊᓂ ᖃᐅᔨᓴᖅᑏᑦ ᐊᑐᓲᙱᑦᑕᖏᑦ.
• ᖃᓄᐃᓕᐅᖅᑕᐅᓯᒪᔪᑦ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᔭᕆᐊᖃᖅᑐᑦ ᐊᔪᙱᔾᔪᑎᔅᓴᓂᒃ ᐊᒻᒪᓗ ᑐᓴᖅᑎᑦᑎᓂᕐᒧᑦ ᓄᓇᒋᔭᐅᔪᓄᑦ. 

ᐱᔪᓐᓇᕐᓂᖅ ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᖃᓄᐃᓕᐅᖅᑕᓯᒪᔪᒥᓃᑦ

• ᓱᓇᒃᑯᑖᓂᒃ ᖃᐅᔨᓴᕐᓂᕐᒧᑦ ᐱᔪᓐᓇᐅᓇᔭᕋᓗᐊᖅᑐᑦ ᓄᓇᒋᔭᐅᔪᓂ ᐊᒻᒪᓗ ᑐᓴᖅᑎᑕᐅᓗᑎᒃ.
• ᐱᑕᖃᕆᐊᖃᖅᑐᑦ ᐊᒥᓱᒃᑲᓐᓂᕐᓂᒃ ᑎᑎᕋᖅᓯᒪᔪᓂᒃ, ᑭᓯᐊᓂ ᐱᔪᓐᓇᐅᑏᑦ ᑕᐃᒪᐅᔪᑦ ᑎᑎᕋᖅᓯᒪᔪᑦ ᐊᔪᕐᓇᖅᑐᑦ ᐱᔭᕆᐊᔅᓴᖅ.