ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐊᑐᐊᒐᕐᒧᑦ ᐋᖅᑭᑦᓱᖅᓯᒪᔾᔪᑎ ᓄᓇᕐᔪᐊᓕᒫᒥ ᑎᑎᕋᖅᓯᒪᔪᖅ

ᑖᕙᑎ ᒪᒃᐃᒐᕐᒥᑦ

ᐱᓪᓚᑦᑖᕐᓂᕆᔭᕗᑦ

ᐊᑕᐃᓐᓇᕐᓂᐊᖅᑐᑦ ᐱᖃᑕᐅᔪᑦ

ᐱᖓᓲᔪᖅᑐᑦ ᓄᓇᖃᖅᑳᖅᓯᒪᔪᓄᑦ ᑲᑐᔾᔨᖃᑎᒌᖑᔪᑦ ᐊᑕᐃᓐᓇᕐᓂᐊᖅᑐᑦ ᐱᖃᑕᐅᔪᑦ ᑕᐃᑲᓂ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ. ᐊᕕᑦᑐᖅᓯᒪᓂᖓ ᑖᑦᓱᒪ "ᐊᑕᐃᓐᓇᕐᓂᐊᖅᑐᖅ ᐱᖃᑕᐅᔪᖅ" ᓴᖅᑭᑎᑕᐅᓚᐅᖅᑐᖅ ᐊᑐᐃᓐᓇᐅᑎᑦᓯᓂᕐᒧᑦ ᐃᓚᐅᑎᑦᓯᑦᑎᐊᕈᒪᒧᑦ ᐊᒻᒪᓗ ᐃᓗᐃᑦᑐᒥᑦ ᐅᖃᖃᑎᖃᑦᓯᐊᕐᓂᕐᒥᑦ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓂᑦ ᑭᒡᒐᖅᑐᐃᔨᖃᕈᒪᓪᓗᑎ ᑕᐃᑲᙵᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓂ.

ᓄᓇᖃᖅᑳᖅᓯᒪᔪᑦ ᑲᓇᑕᒥᐅᑕᔪᑦ ᑭᒡᒐᖅᑐᖅᑕᐅᔪᑦ ᑖᒃᑯᓄᖓ ᑲᑐᔾᔨᖃᑎᒌᖑᔪᓄᑦ:

  • ᐅᑭᐅᖅᑕᖅᑐᒥ ᐋᑕᐹᔅᑲ ᑲᑎᒪᔨᖏᑦ (AAC) ᑭᒡᒐᖅᑐᐃᔪᑦ 45,000-ᖏᓐᓃᐸᓗᑦᑐᓂᑦ ᐃᓄᓐᓂ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᐊᓛᔅᑲᒥ.
  • ᒍᐃᑦᓯᓐ ᑲᑎᒪᔨᖏᑦ ᓄᓇᕐᔪᐊᓕᒫᒥ (GCI) ᑭᒡᒐᖅᑐᐃᔪᑦ 9,000-ᖏᓐᓃᐸᓗᑦᑐᓂᑦ ᒍᐃᑦᓯᓐᓂᒃ ᓄᓇᑦᓯᐊᕐᒥ, ᔫᑳᓐᒥ ᐊᒻᒪᓗ ᐊᓛᔅᑲᒥ
  • ᐃᓄᐃᑦ ᓄᓇᕐᔪᐊᕐᒥ ᑲᑎᒪᔨᖏᑦ (ICC) ᑭᒡᒐᖅᑐᐃᔪᑦ 160,000-ᖏᓐᓃᐸᓗᑦᑐᓂᑦ ᐃᓄᓐᓂᒃ ᑲᓇᑕᒥ, ᐊᓛᔅᑲᒥ, ᓱᑯᑦᑲ (ᕋᓴᒥ) ᐊᒻᒪᓗ ᑲᓛᖦᖡᑦ ᓄᓈᓐᓂ.

ᑲᓇᑕ ᐊᑕᐅᓯᐅᕗᖅ 8-ᓂᒃ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ; ᐊᓯᖏᑦ ᑖᒃᑯᐊᖑᔪᑦ ᑕᓐᒫᒃ ᑭᖕᑕᒻᖓ (ᐃᓚᒋᓪᓗᓂᒋᑦ ᑲᓛᖦᖡᑦ ᓄᓈᑦ ᐊᒻᒪᓗ ᕕᐊᕈ ᕿᑭᖅᑕᖏᑦ), ᕕᓐᓛᓐ, ᐊᐃᔅᓛᓐ, ᓄᐊᕙᐃ, ᕋᓴ, ᓱᐃᑖᓐ ᐊᒻᒪᓗ ᐊᒥᐊᓕᒐ. 4 ᒥᓕᐊᓐᓂᒃ ᐃᓄᖁᑎᓕᒃ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ, ᐃᓚᒋᔭᐅᓪᓗᑎᒃ ᐊᕝᕙᓪᓕᐊᐸᓗᖏᑦ ᒥᓕᐊᓐ−ᖏᓐᓃᑦᑐᓂᒃ ᓄᓇᖃᖅᑳᖅᓯᒪᓪᓗᑎ.

ᓄᓇᕐᔪᐊᑉ ᐅᑭᐅᖅᑕᖅᑐᖓ ᖃᐅᔨᒪᔭᐅᑦᓯᐊᖅᑐᖅ ᖁᑦᓯᓂᖅᐹᒥ ᓄᓇᕐᔪᐊᓕᒫᒥ ᐱᓕᕆᐊᖃᖃᑦᑕᕐᓂᖏᓐᓂᒃ ᐊᔾᔨᒌᙱᑦᑐᓄᑦ ᐃᓱᒫᓘᑕᐅᔪᓄᑦ, ᓴᖅᑮᓯᒪᓪᓗᑎ ᒪᓕᒐᕐᓄᑦ ᑐᙵᕕᐅᔪᓂᒃ ᓄᓇᕐᔪᐊᓕᒫᒥ ᑎᓕᐅᕆᔾᔪᑎᒥᒃ ᑕᐃᑲᙶᖅᑐᖅ ᓄᓇᕐᔪᐊᓕᒫᒥ ᒪᓕᒐᕐᓂᒃ, ᐊᑐᖅᑕᐅᖃᑦᑕᖅᑐᓂ ᐊᒻᒪᓗ ᐱᓕᕆᕝᕕᐅᔪᓂ ᐊᐅᓚᑦᓯᖃᑦᑕᖅᑐᓂ ᓄᓇᕐᔪᐊᓕᒫᒨᖓᔪᓂᒃ ᐅᑭᐅᖅᑕᖅᑐᒥ. ᐃᓄᒋᐊᕐᓂᖅᓴᑦ ᐱᓕᕆᒍᒪᓐᓂᖅᓴᐅᓕᖅᑎᓪᓗᒋᑦ ᓄᓇᒋᔭᐅᔪᒥᑦ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ ᐊᒻᒪᓗ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᙱᑦᑐᓂᑦ, ᑲᓇᑕ ᐱᓕᕆᐊᖃᑎᖃᑦᓯᐊᖏᓐᓇᖅᑐᖅ ᓄᓇᕐᔪᐊᓕᒫᒥ ᐊᒻᒪᓗ ᑲᓇᑕᒥ ᐱᓕᕆᖃᑎᒋᔭᐅᔪᓂᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᐅᑭᐅᖅᑕᖅᑐᖅ ᓄᓇᖁᑎᒋᔭᐅᖏᓐᓇᕐᓗᓂ ᓴᐃᓕᔪᒥ ᐊᒻᒪᓗ ᓈᒻᒪᑦᑐᒥ.

ᑲᓇᑕᒧᑦ, ᐅᑭᐅᖅᑕᖅᑐᒥ ᑲᑎᒪᔨᑦ ᓯᕗᒧᐊᕈᑕᐅᔪᑦ ᑲᑎᖃᑦᑕᖅᑐᑦ ᐅᑭᐅᖅᑕᖅᑐᒥ ᐃᑲᔪᖅᑎᒌᓐᓂᕐᒧᑦ. ᓴᖅᑭᑕᐅᓚᐅᖅᑐᑦ 1996-ᒥ ᐋᑐᐋᒥ, ᑲᑎᒪᔨᑦ ᑲᑎᑎᑦᓯᓲᑦ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ, ᓄᓇᖃᖅᑳᖅᓯᒪᔪᓂᑦ ᐊᒻᒪᓗ ᑕᐅᑐᕋᓐᓈᖅᑎᐅᔪᑦ ᑲᒪᒋᔭᖃᓂᕐᒧᑦ ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᐊᒻᒪᓗ ᐊᕙᑎᓕᕆᓂᕐᒥᑦ ᓴᐳᔾᔨᓯᒪᓂᕐᒥᑦ ᐅᑭᐅᖅᑕᖅᑐᒥ, ᐃᓱᒫᓘᑕᐅᔪᑦ ᐱᒻᒪᕆᐅᒋᔭᐅᔪᓂᒃ ᐅᐊᓐᓇᖓᓂᕐᒥᐅᑕᓄᑦ. ᑲᑎᒪᔨᑦ ᖃᐅᔨᒪᔭᐅᓂᖅᓴᐅᔪᑦ ᐃᓚᐅᑎᑦᓯᖃᑦᑕᕐᓂᖏᓐᓂᒃ ᓄᓇᖃᖅᑳᖅᓯᒪᔪᓂᑦ ᑲᑐᔾᔨᖃᑎᒌᖑᔪᓂ ᓵᒥᖃᑕᐅᕙᑦᑐᓂᑦ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ ᓴᓂᐊᓂ ᐃᓚᐅᑎᑕᐅᓪᓗᑎ ᐅᖃᖃᑎᒌᓐᓂᐅᔪᓂ. ᑕᒪᓐᓇ ᐋᖅᑭᑦᓱᖅᓯᒪᓂᖓ ᐱᒻᒪᕆᐅᔪᖅ ᐅᑭᐅᖅᑕᖅᑐᒥ ᑲᑎᒪᔨᑦ ᑲᔪᓯᓂᖃᖅᓯᒪᓂᖓᓄᑦ, ᖃᐅᔨᒪᑦᓯᐊᕆᐊᕐᓂᕐᒥᑦ ᓄᓇᖃᖅᑳᖅᑐᑦ ᓂᐱᖏᑦ ᑐᓴᖅᑕᐅᒐᓗᐊᕐᒪᖔᑦᑕ ᐊᒻᒪᓗ ᐃᓚᓕᐅᑎᓯᒪᓗᑎ ᐅᑭᐅᖅᑕᖅᑐᒥ ᑲᑎᒪᔨᑦ ᐅᖃᖃᑎᒌᓐᓂᖏᓐᓂᒃ ᐊᒻᒪᓗ ᐃᓱᒪᓕᐅᖅᑕᖏᓐᓂᒃ.

ᐅᑭᐅᖅᑕᖅᑐᒥ ᑲᑎᒪᔨᑦ ᐱᓕᕆᐊᖏᑦ ᓯᕗᒧᐊᕈᑕᐅᓯᒪᔪᖅ ᐱᕙᓪᓕᐊᑎᑦᓯᓂᕐᒥᑦ ᐊᓯᖏᓐᓂᒃ ᑲᑎᖃᑦᑕᕐᓂᐅᔪᓂᒃ ᖃᐅᔨᓴᖃᑦᑕᖅᑐᓂᒃ ᐃᓱᒫᓘᑕᐅᔪᓂᒃ ᓲᕐᓗ ᐋᖅᑭᑦᓱᖅᓯᒪᖃᑎᒌᑦᑐᓂᑦ ᑲᒪᒋᔭᖃᓂᕐᒥᑦ ᑐᐊᕕᕐᓇᖅᑐᓂ ᑕᕆᐅᕐᒥᑦ ᐊᑐᖅᑐᑎᒃ ᐅᑭᐅᖅᑕᖅᑐᒥ ᓯᑯᓯᐅᑎᓕᕆᔨᒃᑯᑦ ᑲᑎᖃᑦᑕᖅᑐᑦ; ᑮᓇᐅᔾᔭᓴᓐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᑕᐃᑰᓇ ᐅᑭᐅᖅᑕᖅᑐᒥ ᑮᓇᐅᔾᔭᓴᕐᓂᕐᒧᑦ ᑲᑎᒪᔨᖏᑎᒍᑦ; ᐊᒻᒪᓗ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ ᐃᓕᓐᓂᐊᕐᓂᓕᕆᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᑕᐃᑰᓇ ᓯᓚᑦᑐᖅᓴᕐᕕᔾᔪᐊᖅ ᐅᑭᐅᖅᑕᖅᑐᒥ (UArctic). ᐊᓯᖏᑦ ᐊᔾᔨᒌᙱᑦᑐᓂᑦ ᐱᓕᕆᐊᖃᖃᑦᑕᖅᑐᑦ ᐱᓕᕆᕝᕕᐅᔪᑦ ᐱᒻᒪᕆᐅᒋᔭᐅᔪᑦ ᑲᓇᑕᒧᑦ ᐃᓚᖃᖅᑐᑦ ᐊᔾᔨᒌᙱᑦᑐᓂᑦ ᔫᓇᐃᑕᑦ ᓇᐃᓴᓐ ᑲᑐᔾᔨᖃᑎᒌᖏᑦ ᐃᓱᒪᓕᐅᕆᖃᑦᑕᖅᑐᑦ ᐊᑦᑐᐃᓂᖃᖅᑐᓂᑦ ᐅᑭᐅᖅᑕᖅᑐᒥ ᐊᔾᔨᒌᙱᑦᑐᓄᑦ ᐃᓱᒫᓘᑕᐅᔪᓄᑦ ᐃᓚᒋᓪᓗᓂᒋᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ, ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᕐᒥᑦ ᐊᒻᒪᓗ ᓱᕈᕐᓇᖅᑐᓂᑦ.

ᐃᓗᓕᖃᑦᓯᐊᖅᑐᖅ ᓄᓇᕐᔪᐊᓕᒫᒥ ᒪᓕᒐᖅᑎᒍᑦ ᐋᖅᑭᑦᓱᖅᓯᒪᔾᔪᑎ ᑐᕌᖓᔪᖅ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᓄᑦ. ᑕᕆᐅᑉ ᒪᓕᒐᖓ, ᐃᓚᒋᓪᓗᓂᐅᒃ ᔫᓇᐃᑕᑦ ᓇᐃᓴᓐ ᐱᓕᕆᔾᔪᓯᖓ ᑕᕆᐅᑉ ᒪᓕᒐᖓᓄᑦ (UNCLOS), ᐋᖅᑭᑦᓱᐃᔪᖅ ᓄᓇᖁᑎᒋᔭᐅᔪᑦ ᐱᔪᓐᓇᐅᑎᖏᓐᓂᒃ, ᐊᐅᓚᑦᓯᓂᖏᓐᓂᒃ ᐊᒻᒪᓗ ᒪᓕᒋᐊᖃᖅᑕᖏᓐᓂᒃ ᐊᔾᔨᒌᙱᑦᑐᓂᑦ ᐃᒫᓂ ᐊᕕᑦᑐᖅᓯᒪᓂᐅᔪᓂᑦ, ᐱᓕᕆᔾᔪᓯᖓ ᑐᑭᑖᖅᑎᑦᓯᓂᕐᒥᑦ ᓯᓚᑖᓂᑦᑐᓂᑦ ᑭᓪᓕᒋᔭᐅᔪᓂᑦ ᓄᓇᕐᔪᐊᑉ ᐃᑭᐊᖓᓂ, ᐃᖏᕐᕋᓂᕐᒧᑦ, ᐊᐅᓚᑦᓯᓂᕐᒥᑦ ᓄᓇᒥᙶᖅᑐᓂᑦ ᐃᑲᔫᑎᑦᓴᓂᑦ, ᓴᐳᔾᔨᓯᒪᓂᕐᒥᑦ ᐃᒪᐅᑉ ᐊᕙᑎᖓᓂ ᐊᒻᒪᓗ ᐊᓯᖏᓐᓂ ᑕᕆᐅᑉ ᐊᑐᖅᑕᐅᖃᑦᑕᕐᓂᖓᓂ.

ᑲᓇᑕ ᐊᑕᐅᓯᐅᕗᖅ ᑕᓪᓕᒪᓂᒃ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᑕ ᓯᔾᔭᖓᓂ ᓄᓇᖃᑎᒋᔭᐅᔪᓂᑦ (A5); ᐊᓯᖏᑦ ᑖᒃᑯᐊᖑᔪᑦ ᑕᓐᒫᒃ ᑭᖕᑕᒻᖓ, ᓄᐊᕙᐃ, ᕋᓴ ᐊᒻᒪᓗ ᐊᒥᐊᓕᒐ. ᑖᒃᑯᐊ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᑕ ᓯᔾᔭᖓᓂ ᓄᓇᖃᑎᒋᔭᐅᔪᓂᑦ (A5) ᐱᓕᕆᐊᖃᕈᒪᑦᓯᐊᖅᑐᑦ ᐃᓱᒪᓕᐅᕆᓂᕐᒥᑦ ᑐᕌᖓᔪᓂᑦ ᐊᐅᓚᑦᓯᓂᕐᒥᑦ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᓂ.

ᐊᒥᓱᕈᖅᐸᓪᓕᐊᔪᓂᑦ ᐱᑕᖃᖅᑐᖅ ᒪᓕᒐᖅᑎᒍᑦ ᒪᓕᒋᐊᓕᓐᓂᒃ ᐊᖏᕈᑎᓂ ᐊᔾᔨᒌᙱᑦᑐᓄᑦ ᐅᑭᐅᖅᑕᖅᑐᒧᑦ ᑐᕌᖓᔪᓂᑦ ᐃᓱᒫᓘᑕᐅᔪᓄᑦ. ᐅᑭᐅᖅᑕᖅᑐᒥ ᑲᑎᒪᔨᑦ ᐊᑐᐃᓐᓇᐅᑎᑦᓯᓯᒪᔪᑦ ᑲᑎᖃᑦᑕᕐᓂᐅᔪᒥᑦ ᐋᔩᖃᑎᖃᕐᓂᕐᒧᑦ ᐱᖓᓱᓄᑦ ᐱᒻᒪᕆᐅᒋᔭᐅᔪᓂᒃ ᒪᓕᒐᖅᑎᒍᑦ ᐊᖏᕈᑎᓂᑦ ᖃᐅᔨᓴᖅᑐᓕᕆᓂᕐᒧᑦ ᐃᑲᔪᖅᑎᒌᓐᓂᕐᒧᑦ, ᐅᖅᓱᐊᓗᒻᒥ ᑯᕕᔪᖃᖅᑲᑦ ᐱᕙᒌᔭᖅᓯᒪᓂᕐᒧᑦ ᐊᒻᒪᓗ ᐱᓕᕆᐊᖃᕐᓂᕐᒧᑦ, ᐊᒻᒪᓗ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ. ᐊᖏᕈᑏᑦ ᐋᔩᕈᑕᐅᓯᒪᒻᒥᔪᑦ ᐋᖅᑭᑦᓱᖅᓯᒪᔪᑦ ᓯᓚᑖᓂ ᐅᑭᐅᖅᑕᖅᑐᒥ ᑲᑎᒪᔨᓂᑦ ᐃᓱᒫᓘᑕᐅᔪᓄᑦ ᓲᕐᓗ ᐃᖃᓗᓕᕆᓂᕐᒥᑦ, ᓇᓄᕐᓂᒃ ᐊᒻᒪᓗ ᑐᒃᑐᓂᑦ ᐊᐅᓚᑦᓯᓂᕐᒥᑦ, ᑖᒃᑯᐊ ᐅᓄᖏᑦᑐᑦ ᐅᖃᐅᓯᐅᕗᑦ.

ᑲᓇᑕ ᐊᑯᓂᐊᓗᒃ ᒪᕐᕈᐃᓕᖅᑲᖓᔪᒥ ᐃᑲᔪᖅᑎᒌᓐᓂᖃᖅᓯᒪᑎᓪᓗᒋᑦ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ ᑲᒪᒋᔭᖃᓂᕐᒧᑦ ᐅᑭᐅᖅᑕᖅᑐᒧᑦ ᑐᕌᖓᔪᓂᑦ ᐃᓱᒫᓘᑕᐅᔪᓄᑦ, ᐃᑲᔪᖅᑎᒌᓐᓂᕐᒥᑦ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᙱᑦᑐᓂᑦ ᓄᑖᖓᔪᖅ ᑭᓯᐊᓂ ᐱᕈᖅᐸᓪᓕᐊᔪᖅ ᐃᑲᔪᖅᑎᒌᓐᓂᖏᑦ. 13-ᖑᔪᑦ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᙱᑦᑐᑦ ᔫᕋᑉᒥ ᐊᒻᒪᓗ ᐊᐃᓴᒥ ᐃᓕᓴᕆᔭᐅᒻᒥᔪᑦ ᑕᐅᑐᕋᓐᓈᖅᑎᐅᓪᓗᑎᒃ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ. ᐊᒥᓱᑦ ᑖᒃᑯᓇᙵᑦ ᓄᓇᖁᑎᒋᔭᐅᔪᓂ ᐋᖅᑭᑦᓱᐃᓯᒪᔪᑦ ᓇᒻᒥᓂᖅ ᐅᑭᐅᖅᑕᖅᑐᒥ ᐊᑐᐊᒐᖏᓐᓂᒃ ᐊᒻᒪᓗ ᐸᕐᓇᐅᑎᖏᓐᓂᒃ ᐊᒻᒪᓗ ᕿᓂᖅᑐᖅ ᐃᓚᐅᓂᖃᕐᓂᖅᓴᐅᒍᒪᓪᓗᑎᒃ ᓄᓇᒋᔭᐅᔪᓂ.

ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᐅᔪᖅ ᐅᑭᐅᖅᑕᖅᑐᒥ, ᐊᓯᖏᓐᓂᓪᓗ ᓄᓇᒋᔭᐅᔪᓂ ᓄᓇᕐᔪᐊᕐᒥ, ᑐᑭᒧᐊᕈᑕᐅᔪᖅ ᔫᓇᐃᑕᑦ ᓇᐃᓴᓐᑯᑦ 2030-ᒥ ᑲᑎᒪᔾᔪᑎᑦᓴᖏᓐᓄᑦ ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ. 2030-ᒥ ᑲᑎᒪᔾᔪᑎᑦᓴᑦ ᐃᓄᓐᓄᑦ ᑐᕌᖓᔪᖅ ᓄᓇᕐᔪᐊᕐᒥ ᐋᖅᑭᑦᓱᖅᓯᒪᔾᔪᑎ ᑐᕌᖓᓪᓗᓂ 17-ᓄᑦ ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᑐᕌᒐᑦᓴᐅᔪᓂᑦ (SDG) ᓇᓕᒧᒌᓕᖅᑎᑦᓯᔪᓂᒃ ᐃᓅᓯᕐᒧᑦ, ᑮᓇᐅᔾᔭᓴᕐᓂᕐᒧᑦ ᐊᒻᒪᓗ ᐊᕙᑎᓕᕆᓂᕐᒧᑦ ᖃᓄᐃᓕᖓᓂᐅᔪᓂᑦ ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᐊᒻᒪᓗ ᓴᐃᓕᖃᑎᒌᓐᓂᕐᒧᑦ, ᐊᐅᓚᑦᓯᓂᕐᒧᑦ ᐊᒻᒪᓗ ᒪᓕᒐᓕᕆᓂᕐᒧᑦ ᐃᓗᓕᖃᖅᓱᑎᑦ. ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᑐᕌᒐᑦᓴᐅᔪᑦ ᑕᒪᐃᓐᓅᓕᖓᔪᑦ ᐋᖅᑭᑦᓱᖅᓯᒪᓂᖏᑦ, ᑐᑭᖃᖅᑐᖅ ᑲᓇᑕ ᐊᖏᖅᓯᒪᔪᖅ ᐊᑐᓕᖅᑎᑦᓯᓂᕐᒥᑦ ᓄᓇᖁᑎᖓᓂ ᓯᓚᑖᓂᓗ.

ᐊᑦᓱᕋᕐᓇᖅᑐᑦ ᐊᒻᒪᓗ ᐱᕕᑦᓴᖃᕐᓂᐅᔪᑦ

ᐅᑭᐅᖅᑕᖅᑐᖅ ᓄᓇᖁᑎᓕᒫᖓ ᐱᒻᒪᕆᐅᔪᖅ ᓄᓇᒋᔭᐅᔪᓂ. ᓄᓇᕐᔪᐊᓕᒫᒥ ᐱᓕᕆᐊᖃᕈᒪᓂᖏᑦ ᓄᓇᒋᔭᐅᔪᓂ ᐊᖏᓪᓕᕙᓪᓕᐊᔪᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐊᒻᒪᓗ ᐃᒻᒥᓂ ᓴᖅᑭᖃᑦᑕᖅᑐᑦ ᐅᓗᕆᐊᓇᕈᑕᐅᔪᑦ ᐊᑦᑐᐃᓂᖃᓪᓚᕆᑦᑎᓪᓗᒋᑦ ᐅᑭᐅᖅᑕᖅᑐᒥ. ᓯᓚ ᐱᔾᔪᑎᒋᓗᒍ ᐊᓯᔾᔨᖅᐸᓪᓕᐊᓂᐅᔪᑦ ᐅᑭᐅᖅᑕᖅᑑᑉ ᐃᒪᖁᑎᖏᓐᓂᒃ ᐊᑐᐃᓐᓇᐅᓂᖅᓴᐅᓕᖅᑎᑦᓯᔪᑦ, ᐊᒥᓲᓂᖅᓴᓂᑦ ᓄᓇᕐᔪᐊᓕᒫᒥ ᐱᓕᕆᐊᖃᕈᒪᓕᖅᑐᑦ ᐅᑭᐅᖅᑕᖅᑐᒥ ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᕐᒥᑦ, ᐃᖃᓗᓕᕆᓂᕐᒥᑦ ᐊᒻᒪᓗ ᓄᓇᒥᙶᖅᑐᓂᑦ ᐃᑲᔫᑎᑦᓴᓂᑦ ᐱᕙᓪᓕᐊᑎᑦᓯᓂᕐᒥᑦ. ᐊᑕᐅᑦᓯᒃᑯᑦ, ᐊᒥᓱᕈᖅᐸᓪᓕᐊᔪᑦ ᓄᓇᕐᔪᐊᓕᒫᒥ ᐱᓕᕆᐊᖃᕈᒪᔪᑦ ᓴᐳᔾᔨᓂᕐᒥᑦ ᐊᑦᑕᕐᓇᖅᑐᒥᑦ ᐅᑭᐅᖅᑕᖅᑐᒥ ᐆᒪᔪᓄᑦ ᓇᔪᒐᕆᔭᐅᔪᓂᒃ ᐊᑦᑐᐃᓂᐅᔪᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.

ᑲᓇᑕᐅᑉ ᒐᕙᒪᒃᑯᖏᑦ ᐊᑦᓱᐊᓗᒃ ᓴᖅᑭᔮᓕᖅᑐᑦ ᐅᐊᓐᓇᖓᓂ. ᑲᓇᑕᐅᑉ ᐅᑭᐅᖅᑕᖅᑐᒥ ᓴᐳᔾᔨᓯᒪᓂᖓ ᐊᑯᓂᐅᓯᒪᓕᖅᑐᖅ ᐊᒻᒪᓗ ᐋᖅᑭᑦᓱᖅᓯᒪᑦᓯᐊᖅᑐᖅ. ᖃᐅᑕᒫᑦ, ᐊᔾᔨᒌᙱᑦᑐᓂᑦ ᖃᓄᐃᓕᐅᕐᓂᒃᑯᑦ, ᒐᕙᒪᒃᑯᑦ, ᓄᓇᖃᖅᑳᖅᓯᒪᔪᑦ, ᐊᒻᒪᓗ ᓄᓇᓕᖁᑎᒋᔭᐅᔪᑦ ᓴᖅᑭᔮᖅᑎᑦᓯᓱᑦ ᑲᓇᑕᐅᑉ ᓴᐳᔾᔨᓯᒪᓂᖓᓂ ᐅᑭᐅᖅᑕᖅᑑᑉ ᓄᓇᖁᑎᖏᓐᓂᒃ ᐊᒻᒪᓗ ᐃᒪᖁᑎᖏᓐᓂᒃ. ᑲᓇᑕ ᑲᔪᓯᓂᐊᖅᑐᖅ ᐱᓕᕆᐊᖃᕐᓂᕐᒥᑦ ᐃᓗᐃᑦᑑᓕᖓᑦᓯᐊᖅᑐᒥᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᓴᐳᔾᔨᓯᒪᓂᕐᒥᑦ ᓄᓇᖁᑎᒥᓄᑦ ᐊᒻᒪᓗ ᐅᑭᐅᖅᑕᖅᑑᑉ ᐃᒪᖁᑎᖏᓐᓄᑦ, ᐃᓚᒋᓪᓗᓂᐅᒃ ᑕᓪᓕᕈᑎᐅᑉ ᐊᖅᑯᑎᖓ.

ᓯᕗᓂᑦᓴᒧᑦ ᑕᐅᑐᓪᓗᓂ, ᑲᓇᑕ ᑕᐅᑐᑦᑐᖅ ᐱᖓᓱᓂᑦ ᐱᓪᓗᐊᑕᕐᓂᒃ ᐱᕕᑦᓴᖃᕐᓂᐅᔪᓂᒃ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ:

  1. ᓴᙱᓂᖅᓴᐅᓕᖅᑎᓪᓗᒋᑦ ᒪᓕᒐᕐᓄᑦ ᑐᙵᕕᐅᔪᑦ ᓄᓇᕐᔪᐊᓕᒫᒥ ᑎᓕᐅᕆᔾᔪᑎᒃ ᐅᑭᐅᖅᑕᖅᑐᒥ, ᐃᑲᔪᕐᓂᖃᕇᖅᓯᒪᔪᖅ ᖃᐅᔨᒪᑦᓯᐊᕆᐊᕐᓂᕐᒥᑦ ᓄᓇᒋᔭᐅᔪᖅ ᑕᐃᒪᐃᖁᔭᐅᖏᓐᓇᖅᑐᖅ ᓴᐃᓕᓗᓂ ᐊᒻᒪᓗ ᓈᒻᒪᓪᓗᓂ. ᑖᓐᓇ ᓄᓇᕐᔪᐊᓕᒫᒥ ᑎᓕᐅᕆᔾᔪᑎᒃ ᐅᑭᐅᖅᑕᖅᑐᒥ ᑕᐃᒪᐃᓕᖓᐃᓐᓇᔾᔮᙱᑦᑐᖅ; ᒪᓕᒐᐃᑦ ᐊᒻᒪᓗ ᐱᓕᕆᔾᔪᓰᑦ ᐊᓯᔾᔨᖅᐸᓪᓕᐊᓲᑦ ᑲᒪᒋᔭᖃᕐᓂᕐᒧᑦ ᓄᑖᓂᒃ ᐱᕕᑦᓴᖃᕐᓂᐅᔪᓂᒃ ᐊᒻᒪᓗ ᐊᑦᓱᕈᕐᓇᖅᑐᓂᒃ. ᑲᓇᑕ ᐱᕕᑦᓴᖃᖅᑐᖅ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓄᓇᕐᔪᐊᓕᒫᒥ ᓯᕗᓕᖅᑎᐅᓂᕐᒥᓂ ᖃᐅᔨᒪᑦᓯᐊᕆᐊᕐᓂᕐᒥᑦ ᐊᓯᔾᔨᖅᐸᓪᓕᐊᓂᖓ ᓄᓇᕐᔪᐊᓕᒫᒥ ᑎᓕᐅᕆᔾᔪᑎᒃ ᐅᑭᐅᖅᑕᖅᑐᒥ ᐋᖅᑭᑦᓱᖅᑕᐅᓲᖅ ᓴᐳᔾᔨᓂᕐᒧᑦ ᐊᒻᒪᓗ ᑕᑯᑦᓴᐅᑎᑦᓯᓂᕐᒥᑦ ᑲᓇᑕᐅᑉ ᐱᒍᒪᔭᖏᓐᓂᒃ ᐊᒻᒪᓗ ᐱᒻᒪᕆᐅᒋᔭᖏᓐᓂᒃ, ᓲᕐᓗ ᐃᓄᓐᓄᑦ ᐊᒻᒪᓗ ᐊᕙᑎᓕᕆᓂᕐᒧᑦ ᓴᐳᔾᔭᐅᓯᒪᓂᕐᒥᑦ, ᐊᖑᑕᐅᓂᕐᒧᑦ ᐊᕐᓇᐅᓂᕐᒧᓘᓐᓃᑦ ᓇᓕᒧᒌᓕᖅᑎᑕᐅᓗᑎ ᐊᒻᒪᓗ ᐊᑑᑎᖃᑦᓯᐊᖅᑐᒥᒃ ᐃᓚᐅᑎᑦᓯᓂᕐᒥᑦ ᐅᐊᓐᓇᖓᓂᕐᒥᐅᑕᓂᒃ, ᐱᓗᐊᙳᐊᖅᑐᒥ ᓄᓇᖃᖅᑳᖅᓯᒪᔪᓂᑦ.
  2. ᑐᑭᑖᖅᑎᑕᐅᒃᑲᓐᓂᕐᓗᑎ ᑲᓇᑕᐅᑉ ᐅᑭᐅᖅᑕᖅᑐᖓᑕ ᑭᓪᓕᒋᔭᖏᓐᓂᒃ, ᐃᓚᖃᕐᓗᓂ ᑲᔪᓰᑎᑦᓯᓂᕐᒥᑦ ᐱᓕᕆᔾᔪᓯᐅᔪᒥ ᓄᓇᕐᔪᐊᓕᒫᒥ ᐃᓕᓴᕆᔭᐅᓕᖅᑎᑦᓯᓂᕐᒧᑦ ᓯᓚᑖᓂ ᑭᓪᓕᐅᔪᓄᑦ ᑲᓇᑕᐅᑉ ᓄᓇᕐᔪᐊᑉ ᐃᑭᐊᖓᓂ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᓂ ᐊᒻᒪᓗ ᐱᕕᑦᓴᖃᕐᓂᐅᔪᓂᒃ ᕿᓂᑦᓯᐊᕐᓂᕐᒥᑦ ᐊᓂᒍᐃᑎᑦᓯᓂᕐᒥᑦ ᑭᓪᓕᒋᔭᐅᔪᓄᑦ ᐊᑲᐅᙱᓕᐅᕈᑕᐅᔪᓄᑦ. ᓄᓇᕐᔪᐊᓕᒫᒥ ᒪᓕᒐᐅᔪᑦ ᐊᒻᒪᓗ ᐱᓕᕆᕝᕕᑦ ᐱᒻᒪᕆᐅᔪᒥᒃ ᐱᔭᑦᓴᖃᕐᓂᐊᖅᑐᑦ ᐃᑲᔪᕐᓂᕐᒥᑦ ᑲᓇᑕᒥ ᑲᒪᒋᔭᖃᖅᑎᓪᓗᒋᑦ ᑖᒃᑯᓂᖓ ᐃᓱᒫᓘᑕᐅᔪᓂᒃ.
  3. ᐊᖏᓂᖅᓴᐅᓕᖅᑎᓪᓗᒍ ᑲᓇᑕᐅᑉ ᓄᓇᕐᔪᐊᓕᒫᒥ ᐃᓚᐅᓂᕆᔭᖓᓂ ᑐᓂᓯᖃᓯᐅᑎᓂᕐᒧᑦ ᓯᕗᓪᓕᐅᔾᔭᐅᖁᔭᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ, ᐃᓚᖃᕐᓗᓂ ᐃᓅᓯᕐᒧᑦ ᑮᓇᐅᔾᔭᓴᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ, ᖃᐅᔨᒪᓂᖅᓴᐅᓕᕐᓂᕐᒥᑦ, ᐊᕙᑎᓕᕆᓂᕐᒧᑦ ᓴᐳᔾᔨᓯᒪᓂᕐᒥᑦ ᐊᒻᒪᓗ ᓴᐃᒻᒪᖃᑎᒌᓐᓂᕐᒥᑦ ᓄᓇᖃᖅᑳᖅᓯᒪᔪᓂᑦ. ᓄᓇᕐᔪᐊᕌᓗᒻᒥ, ᑲᒪᒋᔭᖃᕐᓂᕐᒥᑦ ᐊᒥᓱᓂᑦ ᐃᓱᒫᓘᑕᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᖁᑦᓯᓐᓂᐅᔪᓕᒫᓂᒃ ᒐᕙᒪᐅᔪᓂᑦ ᐊᑐᕆᐊᓖᑦ ᑕᒪᒃᑮᓐᓂ ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥ ᐊᑐᐊᒐᕐᓂᒃ ᐊᑐᕆᐊᓕᓐᓂᒃ. ᑕᒪᓐᓇ ᐱᓕᕆᐊᖑᔪᖅ ᓯᕗᒧᐊᕈᑕᐅᓂᐊᖅᑐᖅ ᑲᓇᑕᐅᑉ ᐊᖏᖅᓯᒪᓂᖓᓂ ᐊᑐᓕᖅᑎᑦᓯᓂᕐᒥᑦ 2030-ᒥ ᑲᑎᒪᔾᔪᑎᑦᓴᑦ ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᐊᒻᒪᓗ ᔫᓇᐃᑕᑦ ᓇᐃᓴᓐ ᓱᓕᓂᕋᐃᕈᑎᖓ ᐱᔪᓐᓇᐅᑎᒋᔭᐅᔪᓄᑦ ᓄᓇᖃᖅᑳᖅᓯᒪᔪᓄᑦ, ᐊᒻᒪᓗ ᓯᕗᒧᐊᖅᑎᑦᓯᓂᕐᒥᑦ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᖏᓐᓂᒃ ᓄᓇᕐᔪᐊᕐᒥ.

ᑕᐃᑲᓂᓕᒫᖅ ᑐᑦᓯᕋᐅᑕᐅᓯᒪᔪᓄᑦ ᐃᓂᒋᔭᐅᔪᓂᒃ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ ᐃᑲᔪᖅᑎᒌᓐᓂᕐᒧᑦ, ᑲᓇᑕ ᑲᔪᓯᔪᖅ ᐃᓚᓕᐅᑎᓂᕐᒥᑦ ᐊᔾᔨᐅᙱᓐᓂᕆᔭᖏᓐᓂᒃ ᐊᒻᒪᓗ ᐊᖑᑕᐅᓂᕐᒧᑦ ᐊᕐᓇᐅᓂᕐᒧᓘᓐᓃᑦ ᐃᓱᒪᒋᔭᐅᖃᓯᐅᑎᒋᐊᓕᓐᓂᒃ ᐱᓕᕆᐊᑦᓴᓄᑦ ᐊᒻᒪᓗ ᐱᒋᐊᕈᑎᑦᓴᐅᔪᓄᑦ, ᓯᕗᒧᐊᕈᑕᐅᔪᑦ ᑲᓇᑕᐅᑉ ᐊᕐᓇᓄᑦ ᐅᖓᓯᑦᑐᒦᑦᑐᓄᑦ ᐊᑐᐊᒐᖓᒍᑦ. ᓲᕐᓗ ᑲᓇᑕᒥᐅᑦ ᐊᓯᖏᑎᑐᑦ, ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐃᓄᖁᑎᖏᑦ ᐊᔾᔨᐅᙱᑦᑐᑦ, ᐊᒻᒪᓗ ᐊᑐᐊᒐᕐᒧᑦ ᐋᖅᑭᒋᐊᕈᑕᐅᔪᑦ ᑐᕌᖓᑦᓯᐊᕆᐊᓕᑦ ᐊᔾᔨᐅᙱᑦᑐᒥ ᐱᔭᕆᐊᖃᖅᑕᖏᓐᓄᑦ ᐃᑉᐱᒋᑦᓯᐊᕐᓗᒋᑦ ᐊᖑᑕᐅᓂᕐᒧᑦ ᐊᕐᓇᐅᓂᕐᒧᓘᓐᓃᑦ, ᓄᓕᐊᕐᓂᒃᑯᑦ ᖃᓄᐃᑦᑑᓂᖓᓂ, ᑭᓲᒋᐊᑦᓴᖓᓂ ᐊᒻᒪᓗ ᐃᓅᓯᕐᒧᑦ ᑮᓇᐅᔾᔭᓴᕐᓂᕐᒧᑦ ᖃᓄᐃᓕᖓᓂᖏᑦ. ᖃᐅᔨᒪᔪᒍᑦ ᐱᓕᕆᓂᒃᑯᑦ ᐃᑉᐱᒍᓱᑦᓯᐊᕐᓂᕐᒥᑦ ᐊᔾᔨᐅᙱᓐᓂᐅᔪᓂᒃ ᐊᒻᒪᓗ ᐊᖑᑕᐅᓂᕐᒧᑦ ᐊᕐᓇᐅᓂᕐᒧᓘᓐᓃᑦ ᓇᓕᒧᒌᒋᐊᖃᕐᓂᖅ ᓴᙱᓂᐅᕗᖅ ᐊᒻᒪᓗ ᐃᖏᕐᕋᑎᑦᓯᒍᓐᓇᖅᑐᖅ ᐃᓅᓯᕐᒧᑦ ᑮᓇᐅᔾᔭᕋᓱᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ.

ᓯᕗᓪᓕᐅᔾᔭᐅᔭᕆᐊᓖᑦ ᐊᒻᒪᓗ ᑐᑦᓯᕌᖑᓯᒪᔪᑦ ᖃᓄᐃᓕᐅᕈᑎᑦᓴᑦ

ᓯᕗᒧᐊᖅᐸᓪᓕᐊᓂᕐᒧᑦ, ᑲᓇᑕ ᐱᓇᓱᐊᓚᖓᔪᖅ ᐃᓗᓕᖃᑦᓯᐊᖅᑐᒥ ᐊᒻᒪᓗ ᑐᙵᕕᖃᑦᓯᐊᖅᑐᒥ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᐊᑐᐊᒐᕐᒥ ᐋᖅᑭᑦᓯᒪᓂᐊᕋᑦᑕ ᑲᒪᒋᔭᖃᕐᓂᕐᒧᑦ ᑖᒃᑯᓂᖓ ᐱᖓᓱᓂᑦ ᐱᓪᓗᐊᑕᕐᓂᒃ ᐱᕕᑦᓴᖃᕐᓂᐅᔪᓂᒃ ᐊᑐᖅᑕᐅᔪᓂᒃ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ. ᑎᑭᐅᑎᓂᕐᒧᑦ ᑖᒃᑯᓂᖓ ᐱᕕᑦᓴᖃᕐᓂᐅᔪᓂᒃ, ᑲᓇᑕᐅᑉ ᓄᓇᕐᔪᐊᓕᒫᒥ ᖃᓄᐃᓕᐅᖅᑕᖏᑦ ᑐᑭᒧᐊᕈᑕᐅᓂᐊᖅᑐᑦ ᑖᒃᑯᓄᖓ ᐱᖓᓲᔪᖅᑐᓄᑦ ᑐᕌᒐᑦᓴᓄᑦ.

ᑐᕌᒐᑦᓴᖅ: ᒪᓕᒐᕐᓄᑦ ᑐᙵᕕᐅᔪᑦ ᓄᓇᕐᔪᐊᓕᒫᒥ ᑎᓕᐅᕆᔾᔪᑎᒃ ᐅᑭᐅᖅᑕᖅᑐᒥ ᐱᓕᕆᐊᖃᑦᓯᐊᖅᑐᖅ ᐊᑑᑎᖃᑦᓯᐊᖅᑐᒥ ᓄᑖᓄᑦ ᐊᑦᓱᕋᕐᓇᖅᑐᓄᑦ ᐊᒻᒪᓗ ᐱᕕᑦᓴᖃᕐᓂᐅᔪᓄᑦ

ᑲᓇᑕᐅᑉ ᓄᓇᕐᔪᐊᓕᒫᒥ ᐃᓚᐅᓂᕆᔭᖓ ᐃᑲᔫᑎᖃᕐᓂᐊᖅᑐᖅ ᑖᒃᑯᓄᖓ ᑐᕌᖅᑕᐅᒐᓱᐊᖅᑐᓄᑦ:

  • ᖁᕝᕙᕆᐊᖅᑕᐅᓗᓂ ᑲᓇᑕᐅᑉ ᓯᕗᓕᖅᑎᐅᓂᖓ ᐊᔾᔨᒌᙱᑦᑐᓂᒃ ᑲᑎᖃᑦᑕᕐᓂᐅᔪᓂᒃ ᐅᑭᐅᖅᑕᖅᑐᒥ ᐃᓱᒫᓘᑕᐅᔪᑦ ᐅᖃᐅᓯᕆᔭᐅᑎᓪᓗᒋᑦ ᐊᒻᒪᓗ ᐃᓱᒪᓕᐅᕈᑕᐅᑎᓪᓗᒋᑦ
  • ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑭᒡᒐᖅᑐᐃᓂᖏᑦ ᐊᒻᒪᓗ ᐱᖃᑕᐅᓂᖏᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᑲᓇᑕᒥᐅᑕᐅᔪᓂᒃ ᑐᕌᖓᖃᓯᐅᑎᔪᓂᒃ ᓄᓇᕐᔪᐊᓕᒫᒥ ᑲᑎᖃᑦᑕᕐᓂᐅᔪᓂᒃ ᐊᒻᒪᓗ ᐋᔩᖃᑎᒋᔭᐅᔪᓂᒃ
  • ᓴᙱᓂᖅᓴᐅᓕᖅᑎᓪᓗᒋᑦ ᒪᕐᕈᐃᓕᖅᑲᖓᔪᒥ ᐃᑲᔪᖅᑎᒌᓐᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐱᓪᓗᐊᑕᕐᓂᒃ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᙱᑦᑐᓂᑦ ᐊᒻᒪᓗ ᐆᑦᑐᕋᖅᑎᐅᔪᓂᑦ
  • ᑐᑭᑖᖅᑎᑕᐅᒋᐊᓪᓚᓗᓂ ᑲᓇᑕᐅᑉ ᐃᒫᓂ ᐃᓂᒋᔭᖏᓐᓂᒃ ᐊᒻᒪᓗ ᑭᓪᓕᒋᔭᖏᓐᓂᒃ ᐅᑭᐅᖅᑕᖅᑐᒥ

ᐊᑑᑎᖃᑦᓯᐊᖅᑐᖅ ᒪᓕᒐᕐᓄᑦ ᑐᙵᕕᐅᔪᑦ ᓄᓇᕐᔪᐊᓕᒫᒥ ᑎᓕᐅᕆᔾᔪᑎᒃ ᐅᑭᐅᖅᑕᖅᑐᒥ ᐱᒻᒪᕆᐅᕗᖅ ᑲᔪᓯᑎᑦᓯᓂᕐᒥᑦ ᓴᐃᓕᓂᕐᒥᒃ ᐊᒻᒪᓗ ᓈᒻᒪᓪᓗᑎᒃ ᓄᓇᒋᔭᐅᔪᓂ ᐊᒻᒪᓗ ᐃᑲᔪᕐᓂᕐᒧᑦ ᐅᑭᐅᖅᑕᖅᑐᒥ ᐊᒻᒪᓗ ᐅᑭᐅᖅᑕᖅᑐᕐᒥᐅᑕᓂᒃ ᐱᕙᓪᓕᐊᖁᓪᓗᒋᑦ ᐃᓅᓯᕐᒧᑦ, ᑮᓇᐅᔾᔭᓴᕐᓂᒃᑯᑦ ᐊᒻᒪᓗ ᐊᕙᑎᓕᕆᓂᒃᑯᑦ. ᑲᓇᑕ ᐊᑐᑦᓯᐊᓚᖓᔪᖅ ᐊᒻᒪᓗ ᐃᑲᔪᖅᓱᓚᖓᔪᖅ ᓄᓇᕐᔪᐊᓕᒫᒥ ᑎᓕᐅᕆᔾᔪᑎᒻᒥ ᑎᓴᒪᓂᒃ ᐱᓪᓗᐊᑕᕐᓂᒃ ᐊᑐᕐᓗᑎᒃ.

ᓯᕗᓪᓕᕐᒥ, ᓴᙱᓂᖅᓴᐅᓕᖅᑎᓂᐊᖅᑕᕗᑦ ᓯᕗᓕᖅᑎᐅᓂᕗᑦ ᐊᒻᒪᓗ ᐃᓚᐅᓂᕆᔭᕗᑦ ᐱᓪᓗᐊᑕᕐᓂᒃ ᐊᔾᔨᒌᙱᑦᑐᓂᒃ ᑲᑎᖃᑦᑕᕐᓂᐅᔪᓂᒃ ᐃᓱᒪᓕᐅᕆᕙᑦᑐᓂᑦ ᐊᑦᑐᐃᓂᐅᔪᓄᑦ ᐅᑭᐅᖅᑕᖅᑐᒧᑦ. ᑐᕌᕐᓂᖅᓴᐅᓂᐊᖅᑐᒍᑦ ᐃᓚᓂᕆᔭᑦᑎᓐᓂᒃ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ, ᐱᓕᕆᐊᖃᕐᓗᑕ ᐊᑦᑐᐃᓂᖃᕐᓂᖅᓴᐅᓕᖁᓪᓗᒋᑦ ᐱᓕᕆᐊᕆᖃᑦᑕᖅᑕᖏᓐᓂᒃ ᐅᐊᓐᓇᖓᓂᕐᒥᐅᑕᓄᑦ. ᓯᕗᓪᓕᐅᑎᑦᓯᓚᖓᔪᒍᑦ ᐊᑑᑎᖃᑦᓯᐊᖅᑐᒥᑦ ᑲᓇᑕᐅᑉ ᐱᖃᑕᐅᓂᖏᓐᓄᑦ ᐊᒻᒪᓗ ᑐᓂᓯᔭᖏᓐᓄᑦ ᐱᓕᕆᐊᖃᕈᓐᓇᕐᓂᖏᓐᓂᒃ ᐅᑭᐅᖅᑕᖅᑐᒥ ᑲᑎᒪᔨᑦ ᐱᓕᕆᔨᐅᖃᑎᒌᖏᓐᓂᒃ ᐊᒻᒪᓗ ᑎᓕᔭᐅᓯᒪᔪᖁᑎᖏᓐᓂ, ᑐᕌᒐᖃᕐᓗᑎᒃ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑲᑎᒪᔩᑦ ᐱᓕᕆᐊᖏᓐᓂᒃ ᐃᓄᓐᓅᓕᖓᔪᓂᒃ, ᐃᓚᒋᓗᓂᒋᑦ ᐃᓅᓯᕐᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᑮᓇᐅᔾᔭᓴᕐᓂᕐᒧᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐃᓱᒫᓘᑕᐅᔪᓄᑦ. ᑲᔪᓯᓂᖃᕐᓂᐊᕐᒥᔪᒍᑦ ᓂᐱᖁᑎᒋᔭᐅᓗᑕ ᐅᓪᓗᒥᒨᖓᓕᖅᑎᑕᐅᓂᖓᓄᑦ ᐅᑭᐅᖅᑕᖅᑐᒥ ᑲᑎᒪᔨᑦ, ᐱᓗᐊᙳᐊᖅᑐᒥ ᑲᔪᓰᓐᓇᖅᑐᒥ ᐊᓯᔾᔨᖅᐸᓪᓕᐊᓂᖓ ᐊᑐᐊᒐᕐᒥᑦ ᐋᖅᑭᑦᓯᔨᐅᓂᕐᒥᑦ ᐊᑐᐊᒐᕐᒥᑦ ᓴᓇᔨᐅᓂᕐᒥᑦ ᑎᒥᖁᑎᒋᔭᐅᓗᓂ, ᐋᖅᑭᒋᐊᖅᑕᐅᓗᑎᒃ ᓇᐅᑦᑎᖅᓱᕐᓂᕐᒥᑦ ᐊᒻᒪ ᐅᓂᒃᑳᓕᐅᕐᓂᕐᒥᑦ ᑲᓇᑕᒥ ᐊᑐᓕᖅᑎᑦᓯᓂᕐᒥᑦ ᐅᑭᐅᖅᑕᖅᑐᒥ ᑲᑎᒪᔨᑦ ᐊᑐᓕᖁᔭᖏᓐᓂᒃ ᐊᒻᒪᓗ ᐃᓱᒪᓕᐅᖅᑕᖏᓐᓂᒃ, ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐅᐸᓗᖓᐃᔭᕐᓂᒃᑯᑦ ᑐᓴᐅᒪᔪᓕᕆᓂᕐᒥᑦ ᐅᑭᐅᖅᑕᖅᑐᒥ ᑲᑎᒪᔨᑦ ᐱᓕᕆᐊᕆᔭᖏᓐᓂᒃ ᓄᓇᖁᑎᖓᓂ ᓯᓚᑖᓂᓗ.

ᓯᔾᔭᖅᐸᓯᒻᒥ ᓄᓇᖁᑎᒋᔭᐅᓪᓗᓂ, ᑲᓇᑕ ᐱᓕᕆᐊᖃᑎᖃᕐᓂᐅᖅᑐᖅ ᐱᓕᕆᖃᑎᒌᖑᔪᓂᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐊᐅᓚᑦᓯᓂᕐᒥᑦ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᓂ ᑕᕝᕘᓇ, ᐊᓯᐊᒍᓪᓗ, ᐊᑐᓕᖅᑎᑦᓯᓂᕐᒥᑦ ᐊᖏᕈᑎᒥ ᒪᓕᒐᖅᑎᒎᙱᑦᑐᓂᑦ ᐃᖃᓗᒐᓱᐊᕐᓂᐅᔪᒥᑦ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᑕ ᕿᑎᑉᐸᓯᖓᓂ. ᐊᑐᓕᖅᑎᑕᐅᓕᕈᓂ, ᑲᓇᑕ ᒪᓕᒐᖅᑎᒍᑦ ᐱᔭᑦᓴᖃᓚᖓᔪᖅ ᓯᕗᒧᐊᖅᑎᑦᓯᓂᕐᒥᑦ ᐊᖏᕈᑎᐅᑉ ᑐᕌᒐᑦᓴᖏᓐᓂᒃ, ᐱᓗᐊᙳᐊᖅᑐᒥ ᐃᑲᔪᖅᓱᓂᕐᒧᑦ ᑲᑐᔾᔨᖃᑎᒌᓐᓂᒃᑯᑦ ᐱᓕᕆᐊᒃᓴᒥᑦ ᖃᐅᔨᓴᖅᑐᓕᕆᓂᕐᒧᑦ ᖃᐅᔨᓴᕐᓂᕐᒥᑦ ᐊᒻᒪᓗ ᓇᐅᑦᑎᖅᓱᕐᓂᕐᒥᑦ. ᐃᓚᐅᖃᑕᐅᓂᐊᕐᒥᔪᒍᑦ ᐊᓯᖏᓐᓂᒃ ᐱᓪᓗᐊᑕᕐᓂᒃ ᐊᔾᔨᒌᙱᑦᑐᓂᒃ ᑲᑎᖃᑦᑕᕐᓂᐅᔪᓂᒃ ᐃᓚᒋᓪᓗᓂᐅᒃ ᐅᑭᐅᖅᑕᖅᑐᒥ ᑮᓇᐅᔾᔭᓴᕐᓂᕐᒧᑦ ᑲᑎᒪᔨᖏᓐᓂᒃ, ᐅᑭᐅᖅᑕᖅᑐᒥ ᓯᑯᓯᐅᑎᒃᑯᑦ ᑲᑎᖃᑦᑕᖅᑐᓂᒃ, ᓄᐊᔅ ᐊᑦᓛᓐᑎᒃ ᐊᖏᕈᑎᒧᑦ ᑲᑐᔾᔨᖃᑎᒌᖑᔪᓂᒃ ᐊᒻᒪᓗ ᐱᓪᓗᐊᑕᕐᓂᒃ ᔫᓇᐃᑕᑦ ᓇᐃᓴᓐ ᑲᑐᔾᔨᖃᑎᒌᖑᔪᓂᒃ ᐃᓱᒪᓕᐅᕆᖃᑦᑕᖅᑐᓄᑦ ᐊᑦᑐᐃᓂᐅᔪᓄᑦ ᐅᑭᐅᖅᑕᖅᑐᒥ, ᓲᕐᓗ ᑖᒃᑯᐊ ᓄᓇᕐᔪᐊᓕᒫᒥ ᐃᒫᓂ ᑲᑐᔾᔨᖃᑎᒌᖑᔪᑦ ᐊᒻᒪᓗ ᓄᓇᕐᔪᐊᕐᒥ ᓯᓚᓐᓂᐊᖅᑎᒃᑯᑦ ᑲᑐᔾᔨᖃᑎᒌᖑᔪᓂ.

ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑲᓇᑕᐅᑉ ᓄᓇᕐᔪᐊᕐᒥ ᐅᑭᐅᖅᑕᖅᑐᒥ ᓯᕗᓕᖅᑎᐅᓂᖓ

ᑲᓇᑕ ᓴᙱᔪᒥᒃ ᐊᖏᖅᓯᒪᔪᖅ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓯᕗᓕᖅᑎᐅᓂᕆᔭᑦᑎᓐᓂᒃ ᐅᑭᐅᖅᑕᖅᑐᒥ ᑲᑎᒪᔨᓄᑦ ᐃᑲᔪᖅᓱᕐᓗᒋᑦ ᒪᓕᒐᕐᓄᑦ ᑐᙵᕕᐅᔪᑦ ᓄᓇᕐᔪᐊᓕᒫᒥ ᑎᓕᐅᕆᔾᔪᑎᒃ ᐅᑭᐅᖅᑕᖅᑐᒥ.

ᐃᑲᔪᖅᓱᓂᕐᒥᑦ ᑖᑦᓱᒥᖓ ᑐᕌᖅᑕᐅᒐᓱᐊᖅᑐᒥᑦ, ᑲᓇᑕ ᐊᖏᖅᓯᒪᔪᑦ ᑖᒃᑯᓄᖓ ᖃᓄᐃᓕᐅᕆᐊᕐᓂᕐᒧᑦ:

  • ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑲᓇᑕᐅᑉ ᒐᕙᒪᒃᑯᖏᑦ ᐱᓕᕆᐊᖃᕈᓐᓇᕐᓂᖏᓐᓂᒃ ᐅᑭᐅᖅᑕᖅᑐᒥ ᑲᑎᒪᔨᑦ ᐱᓕᕆᔨᐅᖃᑎᒌᖏᓐᓂᒃ ᐊᒻᒪᓗ ᑎᓕᔭᐅᓯᒪᔪᖁᑎᖏᓐᓂᒃ;
  • ᐋᖅᑭᑦᓱᐃᓂᕐᒥᑦ ᑲᓇᑕᒥ ᑐᙵᕕᖃᖅᑐᒥ ᐃᓕᓯᒪᐃᓐᓇᕐᓂᐊᖅᑐᒥ ᐱᓕᕆᔨᒻᒪᕆᓐᓂᒃ ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᐱᓕᕆᖃᑎᒌᓂᐊᖅᑐᓂᒃ ᓴᙱᓂᖅᓴᐅᓕᖅᑎᑦᓯᓂᐊᖅᑐᓂᒃ ᐅᑭᐅᖅᑕᖅᑐᒥ ᑲᑎᒪᔨᖏᑕ ᐱᓕᕆᐊᕆᖃᑦᑕᖅᑕᖏᓐᓂᒃ ᐃᓄᓐᓄᑦ ᑐᕌᖓᔪᓂᒃ; ᐊᒻᒪᓗ,
  • ᐊᑐᐃᓐᓇᐅᑎᑦᓯᓂᕐᒥᑦ ᐊᖏᓂᖅᓴᓂ, ᐋᖅᑭᑦᓱᖅᓯᒪᔪᓂ ᐊᒻᒪᓗ ᑐᙵᔪᓂᒃ ᑮᓇᐅᔭᕐᓂᒃ ᓴᙱᓂᖅᓴᐅᓕᖅᑎᑦᓯᓂᕐᒧᑦ ᐱᑕᖃᐅᕐᓂᖓᓂ ᑲᓇᑕᒥ ᑐᙵᕕᖃᕐᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᐊᑕᐃᓐᓇᕐᓂᐊᖅᑐᑦ ᐱᖃᑕᐅᔪᑦ ᐃᓚᐅᖃᑕᐅᓗᑎᒃ ᐅᑭᐅᖅᑕᖅᑐᒥ ᑲᑎᒪᔨᑦ ᐱᓕᕆᐊᖏᓐᓂᒃ.

ᑭᖑᓂᖓᓂ, ᑲᓇᑕ ᓴᙱᓂᖅᓴᐅᓕᖅᑎᑦᓯᓚᖓᔪᖅ ᑭᒡᒐᖅᑐᐃᓂᖏᑦ ᐊᒻᒪᓗ ᐱᖃᑕᐅᓂᖏᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᑲᓇᑕᒥᐅᑕᐅᔪᓂᒃ, ᐱᓗᐊᙳᐊᖅᑐᒥ ᓄᓇᖃᖅᑳᖅᓯᒪᔪᓂᑦ, ᑐᕌᖓᖃᓯᐅᑎᔪᓂᒃ ᓄᓇᕐᔪᐊᓕᒫᒥ ᑲᑎᖃᑦᑕᕐᓂᐅᔪᓂᒃ ᐊᒻᒪᓗ ᐋᔩᖃᑎᒌᓐᓂᐅᔪᓂᒃ. ᐅᑭᐅᖅᑕᖅᑐᒥ ᑲᑎᒪᔨᖏᓐᓂ, ᑲᓇᑕ ᑕᑯᖅᑳᖅᓯᒪᔪᑦ ᐊᑑᑎᖃᑦᓯᐊᖅᑐᓂᒃ ᑐᓂᓯᖃᑦᑕᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐅᐊᓐᓇᖓᓂᕐᒥᐅᑕᐃᑦ ᑐᓂᖃᑦᑕᖅᑕᖏᓐᓂᒃ ᐊᔾᔨᐅᙱᑦᑐᓂᒃ ᐃᓱᒫᓘᑎᒋᔭᒥᓂᒃ ᐊᒻᒪᓗ ᐃᓱᒪᒋᔭᒥᓂᒃ ᓵᓕᐊᕈᔾᔨᖃᑦᑕᖅᑐᑦ ᐊᒻᒪᓗ ᖃᓄᖅ ᑕᒪᓐᓇ ᑐᕌᖓᓕᖃᑦᑕᕐᒪᖔᖅ ᐃᓱᒪᓕᐅᕆᑦᓯᐊᓂᖅᓴᐅᓂᕐᒧᑦ. ᑭᓯᐊᓂ, ᓄᓇᖃᖅᑳᖅᓯᒪᔪᑦ ᐊᑕᐃᓐᓇᕐᓂᐊᖅᑐᑦ ᐱᖃᑕᐅᔪᑦ ᐃᓄᖃᖅᑎᑦᓯᓂᕐᒧᑦ ᐊᑦᓱᕈᖃᑦᑕᖅᑐᑦ ᐊᙳᒻᒪᑎᒐᓱᐊᖅᑐᑎᒃ ᐱᔭᑦᓴᕆᕐᔪᐊᖃᑦᑕᖅᑕᖏᓐᓂᒃ ᐅᑭᐅᖅᑕᖅᑐᒥ ᑲᑎᒪᔨᑦ ᐊᒻᒪᓗ ᐊᓯᖏᑦ ᐊᔾᔨᒌᙱᑦᑐᓂᒃ ᑲᑎᖃᑦᑕᕐᓂᐅᔪᓂᒃ ᐃᓱᒪᓕᐅᕆᕙᑦᑐᓂᑦ ᐊᑦᑐᐃᓂᐅᔪᓄᑦ ᐅᑭᐅᖅᑕᖅᑐᒧᑦ. ᑲᓇᑕ ᑕᐃᒪᐃᓐᓂᐊᖅᑯᖅ, ᑕᐃᒪᐃᒻᒪᑦ, ᕿᓂᕐᓂᐊᖅᑐᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐃᓄᒋᐊᕈᓐᓇᕐᓂᖓᓂ ᑲᓇᑕᒥ ᑐᙵᕕᐅᔪᓂᒃ ᓄᓇᖃᖅᑳᖅᓯᒪᔪᓂᑦ ᐊᑕᐃᓐᓇᕐᓂᐊᖅᑐᑦ ᐱᖃᑕᐅᔪᑦ ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑭᒡᒐᖅᑐᐃᓂᖏᓐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᖃᖅᑳᖅᓯᒪᔪᓂᑦ ᓈᒻᒪᑦᑐᓂᑦ ᓄᓇᕐᔪᐊᓕᒫᒥ ᑲᑎᖃᑦᑕᕐᓂᐅᔪᓂᑦ, ᐱᓪᓗᐊᑕᕐᓂᒃ ᐊᒥᓱᓂᑦ ᓇᒻᒥᓂᖃᖃᑕᐅᔪᓄᑦ ᖃᓄᐃᓕᐅᕐᓂᐅᔪᓂᒃ, ᐊᒻᒪᓗ ᐊᖏᕈᑎᓂ ᐋᔩᖃᑎᖃᕐᓂᕐᒧᑦ.

ᑲᓇᑕ ᐱᓕᕆᐊᖃᕐᓂᖅᓴᐅᓂᐊᕐᒥᔪᖅ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᐊᑐᐊᒐᓕᕆᓂᕐᒥᑦ ᐃᓚᐅᓴᕋᐃᓐᓂᒃᑯᑦ ᐊᒻᒪᓗ ᑲᔪᓯᓂᖃᑦᓯᐊᖅᑐᒥᒃ ᐃᓚᐅᖃᑕᐅᓂᕐᒥᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓂᒃ ᐊᒻᒪᓗ ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᓂᐅᔪᓂᑦ ᒐᕙᒪᐅᔪᓂᒃ, ᓄᓇᖃᖅᑳᖅᓯᒪᔪᑦ ᑲᑐᔾᔨᖃᑎᒌᖏᑦ ᐊᒻᒪᓗ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐃᓄᖁᑎᒋᔭᐅᔪᓂᑦ ᑕᐃᒪᐃᑦᑑᕗᖅ.

ᓴᙱᓂᖅᓴᐅᓕᖅᑎᑦᓯᓚᖓᔪᒍᑦ ᓴᖅᑭᔮᖅᑐᓂᒃ ᑲᓇᑕᒥ ᐃᓚᐅᖃᑕᐅᓂᕐᒨᖓᔪᓂᒃ ᑲᓇᑕᐅᑉ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᐊᑐᐊᒐᖓᓂ ᑲᑎᖃᑎᒌᓕᖅᑎᑦᓯᓲᖅ ᒐᕙᒪᑐᖃᒃᑯᓐᓂ, ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓂᒃ, ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᓂᐅᔪᓂᑦ ᐊᒻᒪᓗ ᓄᓇᖃᖅᑳᖅᓯᒪᔪᓂᑦ ᐱᓕᕆᔨᓂ. ᓴᖅᑭᔮᖅᑎᑦᓯᓚᖓᔪᒍᑦ ᐱᕕᑦᓴᖃᕐᓂᐅᔪᓂᒃ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓂᒃ, ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᓂᐅᔪᓂᑦ ᐊᒻᒪᓗ ᓄᓇᖃᖅᑳᖅᓯᒪᔪᓄᑦ ᐱᓕᕆᖃᑎᒌᖑᔪᓄᑦ ᐃᑲᔪᖅᓱᓂᕐᒧᑦ ᐅᕝᕙᓘᓐᓃᑦ ᐃᓚᐅᖃᑕᐅᓗᑎᒃ ᑲᓇᑕᒥᐅᑦ ᑭᒡᒐᖅᑐᐃᓂᖏᓐᓂᒃ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᑲᑎᒪᓂᐅᔪᓂᑦ, ᐱᓪᓗᐊᑕᕐᓂᒃ ᐊᒥᓱᓄᑦ ᓇᒻᒥᓂᖃᖃᑕᐅᔪᓄᑦ ᖃᓄᐃᓕᐅᕐᓂᐅᔪᓂᒃ ᓲᕐᓗ ᐅᑭᐅᖅᑕᖅᑐᒥ ᑲᑎᙵᔪᑦ ᐊᒻᒪᓗ ᐊᖏᕈᑎᓂ ᐋᔩᖃᑎᖃᕐᓂᕐᒧᑦ. ᓴᙱᓂᖅᓴᐅᓕᖅᑎᑦᓯᓚᖓᔪᒍᑦ ᑲᓇᑕᒥ ᑐᓴᐅᒪᖃᑎᒌᓐᓂᐅᔪᒥᑦ ᐊᑦᓱᕈᕈᑕᐅᔪᓂᒃ ᑐᓴᐅᒪᑎᑦᓯᓂᕐᒧᑦ ᐊᒻᒪᓗ ᑕᐃᒪᐃᓕᖓᐃᓐᓇᖁᓪᓗᒋᑦ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐃᓄᖁᑎᒋᔭᐅᔪᑦ ᑐᓴᐅᒪᑦᓯᐊᕐᓗᑎᒃ ᑕᒪᐃᓐᓂᒃ ᑲᓇᑕᐅᑉ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᐃᓚᐅᓂᕆᔭᖓᓂ. ᐃᓚᐅᑎᑦᓯᒋᐊᓪᓚᓚᖓᒻᒥᔪᒍᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐃᓅᓱᑦᑐᓂᒃ ᐊᒻᒪᓗ ᐃᓄᖁᑎᖏᓐᓂᒃ ᓴᖅᑮᓂᕐᒧᑦ ᓄᑖᓂᒃ ᐱᓕᕆᖃᑎᒌᓐᓂᕐᒧᑦ ᐃᑲᔪᖅᓱᕐᓗᒋᑦ ᑖᒃᑯᓂᖓᑦᓴᐃᓐᓇᖅ ᑐᕌᒐᑦᓴᖃᖅᑎᓪᓗᒋᑦ ᓄᓇᒋᔭᐅᔪᓂ.

ᐱᖓᔪᖓᓂ, ᑲᓇᑕ ᓴᙱᓂᖅᓴᐅᓕᖅᑎᑦᓯᓂᐊᖅᑐᖅ ᒪᕐᕈᐃᓕᖅᑲᖓᔪᒥ ᐃᑲᔪᖅᑎᒌᓐᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐱᓪᓗᐊᑕᕐᓂᒃ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᙱᑦᑐᓂᑦ ᐊᒻᒪᓗ ᐆᑦᑐᕋᖅᑎᐅᔪᓂᑦ ᓈᒻᒪᑦᓯᓕᖅᑎᑦᓯᓂᒃᑯᑦ ᓄᓇᕐᔪᐊᕐᒥ ᑲᓲᒪᓂᕆᔭᖓ ᒐᕙᒪᓕᕆᓂᕐᒨᖓᔪᓂᒃ ᐱᓕᕆᐊᕆᔭᖏᓐᓂᒃ. ᐱᓗᐊᙳᐊᖅᑐᒥ, ᑐᕌᕐᓂᐊᖅᑐᒍᑦ ᐃᑲᔪᖅᑎᒌᓐᓂᕐᒥᑦ ᓄᐊᔅ ᐊᒥᐊᓕᒐᒥ ᐅᑭᐅᖅᑕᖅᑐᒥ ᐱᓕᕆᖃᑎᒋᔭᑦᑎᓐᓂᒃ: ᐊᒥᐊᓕᒐ−ᐊᓛᔅᑲ ᐊᒻᒪᓗ ᑕᓐᒫᒃ ᑭᖕᑕᒻᖓ-ᑲᓛᖦᖡᑦ ᓄᓈᑦ. ᖃᓄᐃᑦᑑᓂᖏᑦ, ᓄᓇᒥ ᓇᒦᓐᓂᖏᑦ ᐊᒻᒪᓗ ᐃᓅᓯᕐᒧᑦ ᑮᓇᐅᔾᔭᕋᓱᐊᕈᑏᑦ ᐊᔾᔨᒌᓐᓂᖏᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ, ᐊᓛᔅᑲᒥ ᐊᒻᒪᓗ ᑲᓛᖦᖡᑦ ᓄᓈᓐᓂ ᐊᑐᐃᓐᓇᐅᑎᑦᓯᔪᖅ ᓴᙱᔪᒥᒃ ᑐᙵᕕᑦᓴᒥᒃ ᐃᑲᔪᖅᑎᒌᓐᓂᕐᒧᑦ. ᐱᓕᕆᖃᑎᖃᑦᓯᐊᓚᖓᒻᒥᔪᒍᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓂᒃ, ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᓂᐅᔪᓂᑦ ᐊᒻᒪᓗ ᓄᓇᖃᖅᑳᖅᓯᒪᔪᓂᒃ ᐱᓕᕆᖃᑎᒌᖑᔪᓂᑦ ᓇᓗᓇᐃᖅᓯᓂᕐᒧᑦ ᐱᕕᑦᓴᖃᕐᓂᐅᔪᓂᒃ ᓄᑖᓄᑦ ᐅᕝᕙᓘᓐᓃᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐊᕕᑦᑐᖅᓯᒪᔪᓂ ᑲᓇᑕᒥ ᐱᓕᕆᖃᑎᖃᕐᓂᕐᒥᑦ ᐊᓛᔅᑲᒥᑦ ᐊᒻᒪᓗ ᑲᓛᖦᖡᑦ ᓄᓈᓐᓂ. ᐊᖏᓪᓕᒋᐊᖅᑎᓐᓂᐊᕐᒥᔭᕗᑦ ᐃᓚᐅᓂᕆᔭᑦᑎᓐᓂᒃ ᓴᖅᑭᔮᖅᑐᓂᒃ ᒪᕐᕈᐃᓕᖅᑲᖓᔪᒥ ᑲᑐᔾᔨᖃᑎᒌᓐᓂᐅᔪᓂᒃ, ᓲᕐᓗ ᓄᐊᔅ ᐊᒥᐊᓕᒐ ᕿᓚᒻᒥ ᓴᐳᔾᔨᓂᕐᒧᑦ ᐊᖏᔪᖅᑳᖃᕐᕕᖓ.

ᖄᒃᑲᓐᓂᐊᒍᑦ, ᑕᐃᒪᐃᑎᑦᓯᒐᔪᓚᖓᔪᒍᑦ ᒪᕐᕈᐃᓕᖅᑲᖓᔪᒥ ᐅᖃᖃᑎᖃᕐᓂᕐᒥᑦ ᐊᒥᐊᓕᒐᒥ ᐅᑭᐅᖅᑕᖅᑐᒥ ᐃᓱᒫᓘᑕᐅᔪᓄᑦ ᑕᒪᓐᓇ ᓴᙱᓂᖅᓴᐅᓕᖅᑎᑦᓯᓚᖓᔪᖅ ᓯᕗᓕᖅᑎᐅᓂᕐᒧᑦ ᐱᓕᕆᐊᕆᔭᐅᔪᒥᒃ ᑕᒪᒃᑮᓐᓂᒃ ᓄᓇᓕᕐᔪᐊᖑᔪᓂᒃ ᐱᓕᕆᐊᖃᖅᑐᐃᓐᓇᐅᓗᑎᒃ ᐅᑭᐅᖅᑕᖅᑐᒥ ᐃᓱᒫᓘᑕᐅᔪᓂᒃ ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑲᓇᑕᒥ ᐊᒥᐊᓕᒐᒥᓗ ᒪᕐᕈᐃᓕᖅᑲᖓᔪᒥ ᐃᓅᖃᑎᒌᓐᓂᖏᓐᓄᑦ ᒐᕙᒪᒃᑯᑎᒍᑦ ᐊᒻᒪᓗ ᐅᐊᓐᓇᖓᓂᕐᒥᐅᑕᓄᑦ.

ᐃᑲᔪᖅᑎᒌᓐᓂᖅᓴᐅᓚᖓᔪᒍᑦ ᑕᓪᓕᒪᓂᒃ ᓄᐊᑏᒃ ᓄᓇᖁᑎᒋᔭᐅᔪᓂ (ᑕᓐᒫᒃ, ᕕᓐᓛᓐ, ᐊᐃᔅᓛᓐ, ᓄᐊᕙᐃ ᐊᒻᒪᓗ ᓱᐃᑖᓐ) ᑕᐃᒫᑦᓴᐃᓐᓇᖅ ᐃᓱᒪᖃᖅᑐᑦ ᐱᓕᕆᖃᑎᒌᖑᔪᑦ ᐅᑭᐅᖅᑕᖅᑐᒥ ᐊᑐᐃᓐᓇᐅᑎᑦᓯᓲᑦ ᐱᒻᒪᕆᐅᔪᓂᑦ ᐊᕕᑦᑐᖅᓯᒪᔪᓂᑦ ᐃᓱᒪᒋᔭᐅᔪᓂᑦ. ᑖᓐᓇ ᑐᕌᒐᑦᓴᖅ ᑎᑭᐅᑎᓚᖓᔭᕗᑦ ᕿᓂᕐᓗᑕ ᐋᖅᑭᑦᓱᐃᓂᕐᒥᑦ ᒪᕐᕈᐃᓕᖅᑲᖓᔪᒥ ᐅᑭᐅᖅᑕᖅᑐᒥ ᐅᖃᖃᑎᖃᕐᓂᕐᒥᑦ ᓄᐊᑏᒃ ᓄᓇᖁᑎᒋᔭᐅᔪᓂ ᐊᒻᒪᓗ ᕿᓂᕐᓂᕐᒥᑦ ᓄᓇᒋᔭᐅᔪᓂ ᐃᑲᔪᖅᑎᒌᓐᓂᕐᒥᑦ ᐱᓕᕆᐊᓂᑦ ᑐᙵᕕᖃᕐᓗᑕ ᐱᖃᑕᐅᒍᒪᔪᓂᒃ ᓄᐊᑏᒃ ᑎᒥᖁᑎᖏᓐᓂᒃ ᓲᕐᓗ ᓄᐊᑏᒃ ᑲᑎᒪᔨᖏᑦ ᒥᓂᔅᑕᐅᑎᓄᑦ.

ᐱᕙᓪᓕᐊᓚᖓᔪᒍᑦ ᐱᒋᐊᖅᑎᑦᓯᒃᑲᓐᓂᓂᕐᒧᑦ ᒪᕐᕈᐃᓕᖅᑲᖓᔪᒥ ᐅᖃᖃᑎᖃᕐᓂᕐᒥᒃ ᐅᑭᐅᖅᑕᖅᑐᒥ ᐃᓱᒫᓘᑕᐅᔪᓂᒃ ᕋᓴᒥ ᐱᓪᓗᐊᑕᕐᓂᒃ ᖃᓄᐃᓐᓂᐅᔪᓂᒃ ᑐᕌᖓᔪᓄᑦ ᓄᓇᖃᖅᑳᖅᓯᒪᔪᓄᑦ ᐃᓱᒫᓘᑕᐅᔪᓄᑦ, ᖃᐅᔨᓴᖅᑐᓕᕆᓂᕐᒧᑦ ᐃᑲᔪᖅᑎᒌᓐᓂᕐᒥᑦ, ᐊᕙᑎᓕᕆᓂᕐᒧᑦ ᓴᐳᔾᔨᓯᒪᓂᕐᒥᑦ, ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᕐᒥᑦ ᐊᒻᒪᓗ ᕿᓂᕐᓂᕐᒧᑦ ᐊᓐᓇᐅᒪᑦᓯᓂᕐᒧᓪᓗ. ᑕᐃᒫᒃ ᐅᖃᖃᑎᒌᓐᓂᐅᔪᑦ ᐃᓕᓴᖅᓯᕗᑦ ᑖᒃᑯᓂᖓᑦᓴᐃᓐᓇᖅ ᐱᔭᐅᒍᒪᔪᓂᑦ, ᓯᕗᓪᓕᐅᔾᔭᐅᖁᔭᐅᔪᓂᒃ ᐊᒻᒪᓗ ᐊᑦᑐᕈᕈᑕᐅᔪᓂᒃ ᑲᓇᑕᒧᑦ, ᕋᓴᒧᑦ ᐊᒻᒪᓗ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂᒃ ᐊᑦᓱᕈᖅᑎᓪᓗᒋᑦ ᓱᖏᐅᑎᓂᕐᒧᑦ ᐊᒻᒪᓗ ᐱᕙᓪᓕᐊᓂᕐᒧᑦ ᓱᒃᑲᓕᔪᒥᑦ ᐊᓯᔾᔨᕐᓂᐅᔪᓂᑦ, ᓲᕐᓗ ᑕᕆᐅᑉ ᓯᑯᖃᙱᓐᓂᖅᓴᐅᓕᕐᓂᖓ, ᓄᓇᐅᑉ ᖁᐊᖑᐃᓐᓇᖅᑐᖅ ᒪᕐᖑᖅᐸᓪᓕᐊᓂᖓᓂ ᐊᒻᒪᓗ ᓄᓇ ᓱᕋᑦᑎᖅᐸᓪᓕᐊᓂᖓᓂ.

ᓄᓇᕐᔪᐊᑉ ᐃᑭᐊᖓᓂ

ᒪᐃ 23, 2019-ᒥ ᑲᓇᑕ ᑎᑎᕋᓚᐅᖅᑐᖅ 2100-ᓂᒃ ᒪᑉᐱᖅᑐᒐᕐᓂᒃ ᑐᓂᓯᓪᓗᑎᒃ ᓯᓚᑖᓂ ᑭᓪᓕᒋᔭᐅᔪᓄᑦ ᑖᑦᓱᒧᖓ ᓄᓇᕐᔪᐊᑉ ᐃᑭᐊᖓᓂ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᓂ. ᑐᓂᔭᐅᔪᖅ ᐱᕙᒌᔭᖅᑕᐅᓚᐅᖅᑐᖅ ᒪᓕᑦᓱᑎᒃ ᖃᐅᔨᓴᖅᑐᓕᕆᓂᕐᒧᑦ ᐊᒻᒪᓗ ᒪᓕᒐᕐᓄᑦ ᐊᑐᖅᑕᐅᒋᐊᖃᖅᑐᓂᒃ ᐋᖅᑭᑦᓱᖅᓯᒪᔪᓂ ᑕᐃᑲᓂ ᔫᓇᐃᑕᑦ ᓇᐃᓴᓐ ᐱᓕᕆᔾᔪᓯᖓ ᑕᕆᐅᑉ ᒪᓕᒐᖓᓂ. ᐃᓚᖃᖅᑐᖅ 1.2 ᒥᓕᐊᓐᓂᒃ ᑭᑉᐹᕆᑦᑐᓂᑦ ᑭᓛᒥᑕᓂᒃ ᐃᖅᑲᕐᒥᑦ ᐊᒻᒪᓗ ᐃᔾᔪᖕᒥ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᓂ ᐊᒻᒪᓗ ᐃᓚᖃᖅᑐᖅ ᐅᑭᐅᖅᑕᖅᑑᑉ ᑲᔾᔨᙳᐊᖓᓂ.

ᐃᓱᒪᒋᖃᓯᐅᑎᓂᐊᕐᒥᔭᕗᑦ ᓴᖅᑮᓂᕐᒥᑦ ᐅᑭᐅᖅᑕᖅᑐᒥ ᐅᖃᖃᑎᒌᓐᓂᐅᔪᓂᒃ ᐱᓪᓗᐊᑕᕐᓂᒃ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᙱᑦᑐᓂᒃ ᐊᒻᒪᓗ ᐆᑦᑐᕋᖅᑎᓂᒃ, ᑕᐃᒪᐃᒋᐊᖃᖅᑎᓪᓗᒍ, ᐅᖃᖃᑎᖃᕐᓂᕐᒧᑦ ᐃᓱᒫᓘᑕᐅᔪᓂᒃ ᑕᒪᐃᓐᓄᒃ ᑲᒪᒋᔭᐅᒍᒪᔪᓄᑦ. ᓯᕗᓪᓕᐅᔾᔨᓚᖓᔭᕗᑦ ᐃᑲᔪᖅᑎᒌᓐᓂᐅᔪᖅ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᙱᑦᑐᓂᒃ ᐊᒻᒪᓗ ᐆᑦᑐᕋᖅᑎᓂᒃ ᐱᒻᒪᕆᐅᒋᔭᖏᑦ ᐊᒻᒪᓗ ᖃᐅᔨᓴᖅᑐᓕᕆᓂᕐᒧᑦ, ᐊᕙᑎᓕᕆᓂᕐᒧᑦ ᐊᒻᒪᓗ/ᐅᕝᕙᓘᓐᓃᑦ ᑮᓇᐅᔾᔭᓴᕐᓂᕐᒧᑦ ᐱᒍᒪᔭᖏᑦ ᑐᑭᒧᐊᖃᑎᖃᑐᓂᑦ ᓯᕗᓪᓕᐊᔾᔭᐅᖁᔭᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐃᓄᖁᑎᖏᓐᓄᑦ ᑲᓇᑕᒥᓗ ᓴᐳᔾᔨᓯᒪᓂᕐᒧᑦ ᐱᔭᐅᒍᒪᔪᓂᑦ. ᐊᓯᖔᖓ ᐊᑐᖅᑕᐅᔭᕆᐊᓕᒃ ᐃᑲᔪᖅᑎᒌᓐᓂᕐᒧᑦ ᑐᕌᒐᖃᓚᖓᔪᖅ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᙱᑦᑐᓄᑦ ᐊᑐᖅᑐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐱᒻᒪᕆᐅᒋᔭᐅᔪᓂᒃ ᐊᒻᒪᓗ ᐊᑐᖅᑕᐅᖃᑦᑕᖅᑐᓂᒃ, ᓲᕐᓗ ᒪᑭᒪᑎᑕᐅᑦᓯᐊᕐᓂᕐᒧᑦ ᐊᖑᓇᓱᐊᕐᓂᕐᒥᑦ ᐅᑭᐅᖅᑕᑑᑉ ᐆᒪᔪᖃᑎᖏᓐᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐱᔪᓐᓇᐅᑎᒋᔭᖓᓂ ᓇᒻᒥᓂᖅ ᐱᓕᕆᐊᖃᕈᒪᓂᕐᒥᑦ.

ᑎᓴᒪᖓᓂ, ᑲᓇᑕ ᐱᓕᕆᐊᖃᕐᓂᐊᖅᑐᖅ ᑐᑭᑖᖅᑎᑕᐅᑦᓯᐊᕐᓗᓂ ᐃᒫᓂ ᐃᓂᒋᔭᖏᓐᓂᒃ ᐊᒻᒪᓗ ᑭᓪᓕᒋᔭᖏᓐᓂᒃ ᐅᑭᐅᖅᑕᖅᑐᒥ. ᑲᓇᑕ ᑐᓂᓯᓯᒪᔪᖅ ᓯᓚᑖᓂ ᓄᓇᕐᔪᐊᑉ ᐃᑭᐊᖓᓂ ᐅᑭᐅᖅᑕᖅᑑᑉ ᑕᕆᐅᕐᔪᐊᖓ ᑲᒥᓴᒃᑯᓐᓄᑦ ᑭᓪᒋᕙᐅᔪᓄᑦ ᑖᑦᓱᒧᖓ ᓄᓇᕐᔪᐊᑉ ᐃᑭᐊᖓᓂ ᐊᒻᒪᓗ ᐱᓕᕆᐊᖃᓚᖓᔪᖅ ᑎᑎᖅᑲᓕᐅᕙᒌᕆᐊᖃᕐᓂᕐᒥᑦ ᓄᓇᕐᔪᐊᓕᒫᒥ ᐃᓕᓴᕆᔭᐅᓂᕐᒧᑦ ᑖᒃᑯᓄᖓ ᓯᓚᑖᓂ ᑭᓪᓕᒋᔭᐅᔪᓄᑦ. ᐱᕕᑦᓴᖃᕐᓂᐅᔪᓂᒃ ᕿᓂᑦᓯᐊᓚᖓᒻᒥᔪᒍᑦ ᐊᓂᒍᐃᑎᑦᓯᓂᕐᒥᑦ, ᓴᐃᓕᖓᓗᑎ ᐊᒻᒪᓗ ᒪᓕᑦᓯᐊᕐᓗᑎᒃ ᑖᑦᓱᒥᖓ ᓄᓇᕐᔪᐊᓕᒫᒥ ᒪᓕᒐᕐᒧᑦ, ᑲᓇᑕᐅᑉ ᐱᖓᓲᓕᖅᑲᖑᔪᑦ ᑭᓪᓕᒋᔭᐅᔪᓄᑦ ᐊᑦᓱᕈᕈᑕᐅᔪᓄᑦ, ᐊᑕᐅᓯᖅ ᐊᒥᐊᓕᒐᒥ ᐅᐊᓕᓂᕐᒥᐅᑦ ᑕᕆᐅᖓᓄᑦ ᐊᒻᒪᓗ ᒪᕐᕉᒃ ᑖᒃᑯᓄᖓ ᑕᓐᒫᒃ ᑭᖕᑕᒻᖓ ᐱᔾᔪᑎᒋᓗᒍ ᓕᓐᑲᓐ ᑕᕆᐅᖓ ᐊᒻᒪᓗ ᕼᐋᓐᔅ ᕿᑭᖅᑕᖓ, ᑖᒃᑯᐊᓗ ᓄᓇᕐᔪᐊᑉ ᐃᑭᐊᖓᓂ ᖃᓕᕇᑦᑐᖃᕐᓂᕈᓂ. ᖄᒃᑲᓐᓂᐊᒍᑦ, ᓄᑖᙳᖅᑎᑦᓯᓚᖓᔪᒍᑦ ᑐᖅᑯᖅᓯᒪᔪᓂᒃ ᐊᑐᖅᑕᐅᔪᓂᒃ ᓴᖅᑮᓂᕐᒧᑦ ᐆᑦᑐᕋᕈᑕᐅᒍᓐᓇᖅᑐᓂᒃ ᑲᓇᑕᐅᑉ ᐃᒪᖁᑎᖏᑕ ᑭᓪᓕᖏᑦ ᐅᑭᐅᖅᑕᖅᑐᒥ ᐆᑦᑐᖅᑕᐅᓂᐊᖅᑎᓪᓗᒋᑦ.

ᑐᕌᒐᑦᓴᖅ: ᑲᓇᑕᐅᑉ ᐅᑭᐅᖅᑕᖅᑐᖓ ᐊᒻᒪᓗ ᐅᐊᓐᓇᖓᓂ ᓄᓇᖃᖅᑳᖅᓯᒪᔪᑦ ᐊᓂᒍᐃᔪᓐᓇᖅᑐᑦ ᐊᒻᒪᓗ ᐆᒪᑦᓯᐊᕆᑦᑐᑦ

ᑲᓇᑕᐅᑉ ᓄᓇᕐᔪᐊᓕᒫᒥ ᐃᓚᐅᓂᕆᔭᖓ ᐃᑲᔫᑎᖃᕐᓂᐊᖅᑐᖅ ᑖᒃᑯᓄᖓ ᑐᕌᖅᑕᐅᒐᓱᐊᖅᑐᓄᑦ:

  • ᑳᑦᑐᖃᕈᓐᓃᕐᓗᓂ
  • ᐃᒻᒥᓃᖅᑐᖃᙱᓐᓂᖅᓴᐅᓗᓂ
  • ᓴᙱᓂᖅᓴᐅᓕᖅᑎᓪᓗᒋᑦ ᐃᓱᒪᒃᑯᑦ ᐊᒻᒪᓗ ᑎᒥᒃᑯᑦ ᖃᓄᐃᙱᑦᓯᐊᕐᓂᖅ
  • ᓴᖅᑮᓗᑎᒃ ᐊᕙᑎᒥ ᓱᕈᓰᑦ ᐱᕙᓪᓕᐊᑦᓯᐊᕐᓗᑎ, ᑐᕌᒐᖃᕐᓗᑎᒃ ᐃᓕᓐᓂᐊᕐᓂᓕᕆᓂᕐᒥᑦ, ᐃᓕᖅᑯᓯᓕᕆᓂᕐᒥᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒥᑦ ᐊᒻᒪᓗ ᖃᓄᐃᙱᑦᓯᐊᕐᓂᕐᒥᑦ
  • ᐅᖓᓯᓗᐊᕈᓐᓃᕐᔪᒥᑎᒋᐊᕐᓗᒋᑦ ᐃᓕᓐᓂᐊᕐᓂᓕᕆᓂᕐᒧᑦ ᐊᓂᒍᖅᑕᐅᔪᑦ
  • ᐊᑐᐃᓐᓇᐅᑎᑦᓯᓂᕐᒥᑦ ᑲᔪᓰᓐᓇᖅᑐᒥ ᐃᓕᓐᓂᐊᕐᓂᕐᒧᑦ ᐊᒻᒪᓗ ᐊᔪᕈᓐᓃᖅᓴᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᐱᕕᑦᓴᖃᕐᓂᐅᔪᓂᒃ, ᐃᓚᒋᓪᓗᓂᒋᑦ ᓄᓇᖃᖅᑳᖅᑐᓄᑦ ᑐᙵᕕᖃᕐᓗᑎᒃ ᖃᐅᔨᒪᓂᐅᔪᓂᒃ ᐊᒻᒪᓗ ᐊᔪᙱᓐᓂᐅᔪᓂᒃ
  • ᓴᙱᓂᖅᓴᐅᓕᖅᑎᓪᓗᒋᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᕐᒥᓄᑦ ᐊᒻᒪᓗ ᐃᓚᒌᖑᔪᓄᑦ ᑲᓲᒪᓂᖏᑦ ᓄᓇᕐᔪᐊᓕᒫᒥ ᑭᓪᓕᒋᔭᐅᔪᓂᑦ

ᐃᓄᐃᑦ ᐊᒻᒪᓗ ᓄᓇᓖᑦ ᑲᔪᓯᓂᐊᖅᑐᖅ ᑐᙵᕕᒋᔭᐅᖏᓐᓇᕐᓗᑎᒃ ᑲᓇᑕᐅᑉ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᐃᓚᐅᑎᑦᓯᓂᕐᒥᑦ. ᑲᓇᑕ ᑐᕌᖅᑎᑦᓯᓂᐊᖅᑐᖅ ᓄᓇᕐᔪᐊᓕᒫᒥ ᐃᓚᐅᓂᕆᔭᖓᓂ ᓯᕗᒧᐊᖅᑎᑦᓯᓂᒥᑦ ᑐᕌᒐᑦᓴᐅᔪᒥᒃ ᐆᒪᑦᓯᐊᕆᑦᑐᓂᒃ ᐊᒻᒪᓗ ᐊᓂᒍᐃᔪᓐᓇᖅᑐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐃᓄᖁᑎᖏᓐᓄᑦ, ᑕᒪᒃᑮᓐᓂᒃ ᓄᓇᖁᑎᖓᓂ ᓯᓚᑖᓂᓗ. ᑲᓇᑕᐅᑉ ᓄᓇᕐᔪᐊᓕᒫᒥ ᐃᓚᐅᖃᑕᐅᓂᖓ ᐃᓱᒪᒋᔭᐅᓂᐊᖅᑐᖅ ᐃᓚᓕᐅᑎᓯᒪᓂᒃᑯᑦ ᐊᒻᒪᓗ ᐃᓗᐃᑦᑑᓕᖓᔪᒃᑯᑦ, ᐃᓕᓴᖅᓯᓂᕐᒥᑦ ᑎᒥᒃᑯᑦ ᐊᒻᒪᓗ ᐃᓱᒪᒃᑯᑦ ᐋᓐᓂᐊᖃᖅᑕᐃᓕᒪᓂᖅ, ᐃᓕᓐᓂᐊᕐᓂᓕᕆᓂᖅ, ᓂᕿᑦᓴᖃᑦᓯᐊᕆᐊᖃᕐᓂᕐᒥᑦ ᐊᒻᒪᓗ ᑮᓇᐅᔾᔭᓴᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᑲᓲᒪᖃᑎᒌᑦᑐᐃᓐᓇᐅᓗᑎᒃ.

ᐃᓅᓱᑦᑐᑦ ᐃᓚᐅᖃᑕᐅᓂᖏᑦ

ᐱᕐᔪᐊᖑᓪᓗᑎᒃ ᐊᔾᔨᒌᙱᓐᓂᖏᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ, ᐃᓅᓱᑦᑐᑦ ᐊᑑᑎᖃᖅᑐᑦ ᐱᕙᓪᓕᐊᑎᑦᓯᓂᕐᒥᑦ ᐊᓂᒍᐃᔪᓐᓇᖅᑐᓂᒃ ᐊᒻᒪᓗ ᐆᒪᑦᓯᐊᕆᑦᑐᓂᒃ ᓄᓇᓕᐅᔪᓂᑦ. ᑲᓇᑕ ᐊᖏᖅᓯᒪᔪᖅ ᐊᑐᐃᓐᓇᐅᑎᑦᓯᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐃᓅᓱᑦᑑᔪᓂᒃ ᐱᕕᑦᓴᖃᕐᓂᖅᓴᐅᓕᕐᓗᑎᒃ ᐱᖃᑕᐅᓂᕐᒧᑦ, ᐊᒻᒪᓗ ᐱᕚᓪᓕᕈᑎᖃᕐᓗᑎᒃ ᑕᐃᑲᙵᑦ, ᑲᓇᑕᐅᑉ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᑲᑎᒪᔾᔪᑎᑦᓴᖓᓂ.

ᐃᑲᔪᖅᓱᓂᕐᒥᑦ ᑖᑦᓱᒥᖓ ᑐᕌᖅᑕᐅᒐᓱᐊᖅᑐᒥᑦ, ᑲᓇᑕ ᐊᖏᖅᓯᒪᔪᑦ ᑖᒃᑯᓄᖓ ᖃᓄᐃᓕᐅᕆᐊᕐᓂᕐᒧᑦ:

  • ᐅᐸᓗᖓᐃᔭᖅᓯᒪᓂᒃᑯᑦ ᖁᕝᕙᕆᐊᖅᑕᐅᓗᑎᒃ ᓯᓚᑦᑐᖅᓴᕐᕕᔾᔪᐊᖅ ᐅᑭᐅᖅᑕᖅᑑᑉ (ᓄᓇᕐᔪᐊᓕᒫᒥ ᑲᓲᒪᓂᐅᔪᖅ ᓯᓚᑦᑐᖅᓴᕐᕕᔾᔪᐊᓂ, ᓯᓚᑦᑐᖅᓴᕐᕕᓐᓂ, ᖃᐅᔨᓴᕐᕕᓐᓂ ᐊᒻᒪᓗ ᐊᓯᖏᓐᓂᒃ ᑲᑐᔾᔨᖃᑎᒌᖑᔪᓂ ᐃᓱᒫᓘᑎᖃᖅᑐᓂᑦ ᐃᓕᓐᓂᐊᕐᓂᓕᕆᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᑕᐃᑲᓂ ᖃᓂᒋᔭᖓᓂᓗ ᐅᑭᐅᖅᑕᖅᑐᒥ) ᖃᓄᐃᓕᐅᕈᑕᐅᔪᑦ ᐊᒻᒪᓗ ᐱᓕᕆᐊᑦᓴᐅᔪᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ; ᐊᒻᒪᓗ,
  • ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐱᕕᑦᓴᖃᕐᓂᐅᔪᓂᒃ ᐃᓅᓱᑦᑐᑦ ᐃᓚᐅᖃᑕᐅᓂᖏᓐᓄᑦ ᐱᕙᓪᓕᐊᑎᑦᓯᓂᕐᒥᑦ ᐊᒻᒪᓗ ᐊᑐᓕᖅᑎᑦᓯᓂᕐᒥᑦ ᑲᓇᑕᐅᑉ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᐊᑐᐊᒐᖓᓂ ᐊᒻᒪᓗ ᐱᓕᕆᐊᑦᓴᖏᓐᓂᒃ.

ᑲᓇᑕᐅᑉ ᓄᓇᕐᔪᐊᓕᒫᒥ ᐊᑐᐊᒐᖓ ᐃᑲᔪᕐᓂᖃᕐᓂᐊᖅᑐᖅ ᐃᓕᓐᓂᐊᕐᓂᕐᒧᑦ ᐊᒻᒪᓗ ᐊᔪᕈᓐᓃᖅᓴᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᐱᕕᑦᓴᖃᕐᓂᐅᔪᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐃᓄᖁᑎᖏᓐᓄᑦ. ᐃᑲᔪᖅᓱᓚᖓᔪᒍᑦ ᓄᓇᕐᔪᐊᑉ ᐅᑭᐅᖅᑕᖅᑐᖓ ᑕᐅᖅᓰᓂᕐᒥᑦ ᑐᑭᓯᒋᐊᕈᑎᑦᓴᓂᒃ ᐊᒻᒪᓗ ᐱᓕᕆᔾᔪᓯᑦᓯᐊᕙᐅᓛᖑᔪᓂᒃ ᐃᓕᓐᓂᐊᓵᓕᓂᕐᒧᑦ ᓯᓚᑦᑐᖅᓴᕐᕕᔾᔪᐊᓄᓪᓗ ᐊᒻᒪᓗ ᐃᖅᑲᓇᐃᔭᓕᕋᑖᖅᑐᓄᑦ ᐊᔪᕈᓐᓃᖅᓴᐅᑎᓂᒃ ᐱᕙᓪᓕᐊᑎᑦᓯᓂᕐᒥᑦ ᐅᖓᓯᑦᑐᒦᑦᑐᓄᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂᒃ. ᑲᔪᓯᓚᖓᒻᒥᔪᒍᑦ ᐆᑦᑐᕋᕐᓂᕐᒥᑦ ᐊᑐᐃᓐᓇᐅᑎᑦᓯᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐃᓅᓱᑦᑐᓂᒃ ᓄᓇᕐᔪᐊᓕᒫᒥ ᐃᓕᓐᓂᐊᕐᓂᕐᒧᑦ ᐱᕕᑦᓴᖃᕐᓂᐅᔪᓂᒃ.

ᓂᕿᑦᓴᖃᑦᓯᐊᕆᐊᖃᕐᓂᖅ ᐃᓱᒫᓘᑕᐅᓂᖅᐹᖑᓲᖅ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐃᓄᖁᑎᖏᓐᓄᑦ. ᑲᓇᑕ ᐱᓕᕆᖃᑎᖃᓚᖓᔪᖅ ᐊᓯᖏᓐᓂᒃ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ ᓇᓗᓇᐃᖅᓯᓂᕐᒥ ᐱᓕᕆᔾᔪᓯᑦᓯᐊᕙᐅᓛᖑᔪᓂᒃ ᐱᑕᖃᕐᓂᖅᓴᐅᓕᖅᑎᑦᓯᓂᕐᒥᑦ ᓄᓇᒋᔭᐅᔪᓂ ᓂᕿᑦᓴᓕᐅᕐᓂᖏᓐᓂᒃ ᐃᑲᔪᖅᓱᓂᕐᒥᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓂᕿᑦᓴᖃᑦᓯᐊᕆᐊᖃᕐᓂᕐᒧᑦ. ᖃᐅᔨᒪᔪᒍᑦ ᓄᓇᖃᖅᑳᖅᓯᒪᔪᑦ ᐊᒻᒪᓗ ᐊᕐᓇᐃᑦ ᐊᑦᓱᐊᓗᒃ ᐊᑦᑐᖅᑕᐅᓯᒪᔪᑦ ᓂᕿᑦᓴᖃᑦᓯᐊᕆᐊᖃᕐᓂᕐᒧᑦ, ᑕᒪᓐᓇ ᐱᓕᕆᐊᕆᖃᓯᐅᑎᓂᐊᖅᑕᕗᑦ ᑖᑦᓱᒥᖓ ᐱᓕᕆᐊᖃᖅᑎᓪᓗᑕ.

ᑲᔪᓯᑎᑦᓯᓂᕐᒥᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐸᖅᑭᔭᐅᓂᕐᒧᑦ ᐱᔨᑦᓯᕋᐅᑎᓂᒃ ᐊᑦᓱᕈᓐᓇᕈᓐᓇᖅᑐᖅ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐱᔾᔪᑎᒋᓪᓗᒍ ᐊᒥᒐᓗᐊᕐᓂᖏᓐᓂᒃ ᑖᒃᑯᓂᖓ ᓄᓇᓖᑦ ᐊᑐᖃᑦᑕᖅᑕᖏᓐᓂᒃ ᐊᒻᒪᓗ ᐃᓕᓐᓂᐊᖅᓯᒪᔪᓂᒃ ᐱᓕᕆᔨᒻᒪᕆᓐᓂᒃ, ᐃᓄᑭᓐᓂᖏᓐᓄᑦ ᓯᐊᒻᒪᑦᓯᒪᓂᕆᔭᖏᓐᓂᒃ ᐅᖓᓯᓐᐅᔪᓂᒃ ᐊᒻᒪᓗ ᑲᔪᓯᑎᑦᓯᒋᐊᖃᕐᓂᕐᒥᑦ ᐱᔨᑦᓯᕋᐅᑎᓂᒃ ᐃᓚᐃᓐᓈᖏᑦᑐᒃᑯᑦ, ᐃᓕᖅᑯᓯᕐᒧᑦ ᓈᒻᒪᒋᔭᐅᔪᒃᑯᑦ ᐊᒻᒪᓗ ᐱᓕᕆᐊᖃᑦᓯᐊᕆᐊᖃᕐᓂᒃᑯᑦ. ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᑦ ᐊᔾᔨᒌᙱᑦᑐᓂᑦ ᐆᑦᑐᕋᐅᑎᓂᒃ ᕿᓂᖅᓯᒪᔪᑦ ᐱᑕᖃᓗᐊᖅᑕᐃᓕᒪᑎᑦᓯᓂᕐᒥᑦ ᑖᒃᑯᓂᖓ ᐊᑦᓱᕈᕐᓇᕈᑕᐅᔪᓂᒃ, ᐊᒻᒪᓗ ᑕᒪᓐᓇ ᓴᖅᑮᕗᖅ ᐱᕕᑦᓴᖃᕐᓂᐅᔪᓂᒃ ᐃᓕᓐᓂᐊᕐᓂᕐᒥᑦ ᐊᓯᖏᑕ ᐊᑐᖅᓯᒪᔭᖏᓐᓂᒃ. ᑲᓇᑕ ᓯᕗᓪᓕᐅᔾᔨᓚᖓᔪᖅ ᓄᓇᕐᔪᐊᑉ ᐅᑭᐅᖅᑕᖅᑐᖓ ᑕᐅᖅᓰᓂᕐᒥᑦ ᑐᑭᓯᒋᐊᕈᑎᑦᓴᓂᒃ ᐊᒻᒪᓗ ᐱᓕᕆᔾᔪᓯᑦᓯᐊᕙᐅᓛᖑᔪᓂᒃ ᐊᒻᒪᓗ ᐱᕙᓪᓕᐊᑎᑦᓯᓗᑎᒃ ᐃᓕᖅᑯᓯᕐᒧᑦ ᓈᒻᒪᒋᔭᐅᔪᓂᒃ ᐊᒻᒪᓗ ᐊᖑᑕᐅᓂᕐᒧᑦ ᐊᕐᓇᐅᓂᕐᒧᓘᓐᓃᑦ ᐃᑉᐱᒋᔭᐅᓴᕋᐃᑦᑐᓂᒃ ᐱᒋᐊᕈᑎᑦᓴᓂᒃ ᑐᕌᖓᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪᓗ ᐃᓱᒪᒃᑯᑦ ᖃᓄᐃᙱᑦᓯᐊᕐᓂᕐᒧᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂ, ᑐᕌᒐᖃᕐᓗᑎᒃ ᐃᒻᒥᓃᖅᑕᐃᓕᒪᑎᑦᓯᓂᕐᒥᑦ.

ᑲᓇᑕ ᐃᓕᓴᖅᓯᔪᖅ ᐱᑕᖃᕆᐊᖃᕐᓂᖓᓂ ᖃᓄᐃᓕᐅᕆᐊᕐᓂᕐᒧᑦ ᐃᑲᔪᕐᓂᕐᒧᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑕᐃᒪᐃᓕᖓᑯᑖᑦᑐᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᕐᒥᓄᑦ ᐊᒻᒪᓗ ᐃᓚᒌᖑᔪᓄᑦ ᑲᓲᒪᓂᖏᑦ ᓄᓇᕐᔪᐊᓕᒫᒥ ᑭᓪᓕᒋᔭᐅᔪᓂᑦ. ᑎᑎᕋᐅᔭᖅᑕᐅᓂᖏᑦ ᑭᓪᓕᒋᔭᐅᔪᑦ ᓄᓇᖁᑎᒋᔭᐅᔪᑦ ᐊᑯᓐᓂᖏᓐᓂ ᐊᕕᑦᑐᐃᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᐃᓚᒌᖏᓐᓂᒃ ᐊᒻᒪᓗ ᐃᓕᖅᑯᓯᖏᓐᓂᒃ ᐊᒻᒪᓗ ᑭᓪᓕᖃᖅᑎᑦᓯᓪᓗᓂ ᐃᓱᒪᖅᓱᕐᓂᕆᔭᖏᓐᓂᒃ ᐊᐅᓚᒍᓐᓇᕐᓂᕐᒧᑦ ᐊᒻᒪᓗ ᑕᐅᖅᓰᓂᕐᒧᑦ, ᐱᐅᙱᑦᑐᒥᑦ ᐊᑦᑐᐃᓂᖃᖅᓯᒪᔪᖅ ᐊᒥᓱᓂᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ. ᐱᓕᕆᐊᖃᓚᖓᔪᒍᑦ ᐊᕝᕕᐊᕈᑎᑕᖃᙱᓐᓂᖅᓴᐅᓗᓂ ᐊᓪᓚᓄᑦ ᐊᒻᒪᓗ ᐃᓄᓐᓄᑦ ᑲᓇᑕᐅᑉ ᐊᓛᔅᑲᐅᓪᓗ ᑭᓪᓕᖓᒍᑦ, ᐊᒻᒪᓗ ᐃᓄᐃᑦ ᓅᖃᑦᑕᕐᓂᖏᓐᓄᑦ ᑲᓇᑕᐅᑉ ᑲᓛᖦᖡᑦ ᓄᓈᑦ ᑭᓪᓕᖓᒍᑦ.

ᑐᕌᒐᑦᓴᖅ: ᓴᙱᔪᑦ, ᒪᑭᒪᑎᑕᐅᑦᓯᐊᕐᓂᕐᒧᑦ, ᐊᔾᔨᒌᙱᑦᑐᑦ ᐊᒻᒪᓗ ᐃᓚᐃᓐᓈᙱᑦᑐᑦ ᓄᓇᓕᓐᓂ ᐊᒻᒪᓗ ᐊᕕᑦᑐᖅᓯᒪᔪᓂᒃ ᑮᓇᐅᔾᔭᕈᑏᑦ

ᑲᓇᑕᐅᑉ ᓄᓇᕐᔪᐊᓕᒫᒥ ᐃᓚᐅᓂᕆᔭᖓ ᐃᑲᔫᑎᖃᕐᓂᐊᖅᑐᖅ ᑖᑦᓱᒧᖓ ᑐᕌᖅᑕᐅᒐᓱᐊᖅᑐᒧᑦ:

  • ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐱᕕᑦᓴᖃᕐᓂᐅᔪᓂᒃ ᑕᐅᖅᓰᖃᑎᖃᕐᓂᕐᒧᑦ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒥᑦ

ᐱᕙᓪᓕᐊᑎᑦᓯᓂᒃᑯᑦ ᓄᓇᕐᔪᐊᕐᒥ ᖁᑦᓯᓐᓂᐅᔪᓂᒃ ᐅᔭᕋᕐᓂᐊᕐᕕᓐᓂᒃ ᑕᐃᑯᖓ ᓄᓇᕐᔪᐊᕐᒥ ᐃᓕᓴᕆᔭᐅᔪᓄᑦ ᓴᓇᙳᐊᖅᑎᓄᑦ ᐊᒻᒪᓗ ᐃᓕᖅᑯᓯᕐᒧᑦ ᐆᒪᑦᓯᐊᕆᑦᑐᒧᑦ ᐳᓚᕋᖅᑐᓕᕆᓂᕐᒧᑦ ᑎᑭᑎᑦᓯᓲᒥᒃ ᐳᓚᕋᖅᑎᓂᒃ ᓇᑭᑐᐃᓐᓇᖅ ᓄᓇᕐᔪᐊᕐᒥᑦ, ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᐊᖏᔪᕐᔪᐊᖑᓪᓗᓂ ᐊᐅᓪᓚᖅᑎᑦᓯᖃᑦᑕᕈᓐᓇᖅᑐᖅ ᓄᓇᒋᔭᐅᓗᓂ ᐊᒻᒪᓗ ᓯᕗᓕᖅᑎᐅᓗᓂ ᑎᑭᕝᕕᐅᖃᑦᑕᕐᓂᕐᒥᑦ ᓯᓚᑖᓂᙶᖅᑐᓂᒃ ᑮᓇᐅᔭᓕᐅᕐᓂᕐᒧᑦ. ᑲᓇᑕ ᐃᑲᔪᓚᖃᔪᖅ ᓄᓇᒋᔭᐅᔪᓂ ᑮᓇᐅᔾᔭᓴᕐᓂᕐᒧᑦ ᐱᒍᓐᓇᖅᑕᖓᓂ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓄᓇᕐᔪᐊᓕᒫᒥ ᑕᐅᖅᓰᖃᑎᖃᕐᓂᐅᔪᒥᑦ ᐊᒻᒪᓗ ᓯᓚᑖᓂᙶᖅᑐᓂᒃ ᑮᓇᐅᔭᓕᐅᕐᓂᕐᒧᑦ ᐱᕕᑦᓴᖃᕐᓂᐅᔪᓂᒃ, ᐱᕈᐃᒃᑲᓐᓂᕋᔭᖅᑐᖅ ᓄᓇᒋᔭᐅᔪᓂ ᓴᙱᕙᒌᖅᑐᒥᒃ $2.2 ᐱᓕᐊᓐᓂᒃ ᐊᕐᕌᒍᑕᒫᑦ ᐊᐅᓪᓚᖅᑎᑦᓯᖃᑦᑕᖅᑎᓪᓗᒋᑦ.Footnote 1 ᐱᓕᕆᔾᔪᓯᕗᑦ ᓄᓇᕐᔪᐊᓕᒫᒥ ᑕᐅᖅᓰᖃᑎᖃᕐᓂᕐᒧᑦ ᐊᒻᒪᓗ ᓯᓚᑖᓂᙶᖅᑐᓂᒃ ᑮᓇᐅᔭᓕᐅᕐᓂᕐᒧᑦ ᓯᕗᒧᐊᕈᑕᐅᓂᐊᖅᑐᖅ ᐅᑭᐅᖅᑕᖅᑐᓕᒫᒥ ᐊᕕᑦᑐᖅᓯᒪᔪᓂ ᑕᐅᑐᙳᐊᖅᑕᐅᔪᒥᒃ ᒪᑭᒪᑎᑕᐅᑦᓯᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ, ᓴᖅᑭᔮᒋᐊᓪᓚᑦᑎᑦᓯᔪᖅ ᐃᑲᔪᕈᑎᑦᓴᓂᒃ ᐱᕙᓪᓕᐊᑎᑦᓯᓂᕐᒥᑦ, ᑮᓇᐅᔾᔭᓴᕐᓂᕐᒧᑦ ᐊᔾᔨᐅᙱᓐᓂᖏᓐᓂᒃ, ᓄᓇᓖᑦ ᐊᑐᖃᑦᑕᖅᑕᖏᓐᓂᒃ ᐊᒻᒪᓗ ᐅᓪᓗᒥᓯᐅᑎᓕᕆᓂᕐᒥᑦ.

ᐅᓪᓗᒥᒧᑦ, ᑲᓇᑕ ᐋᔩᖃᑎᖃᖅᓯᒪᔪᖅ 14-ᓂᒃ ᓄᓇᕐᔪᐊᓕᒫᒥ ᑕᐅᖅᓰᓂᕐᒧᑦ ᐊᖏᕈᑎᓂᒃ ᐊᑐᐃᓐᓇᐅᑎᑦᓯᓲᓂᒃ ᐊᑐᐃᓐᓇᖃᕐᕕᐅᓂᕐᒥᑦ ᑲᓇᑕᒥᐅᑦ ᐊᐅᓪᓚᖅᑎᑦᓯᖃᑦᑕᖅᑐᓂᒃ 1.5 ᐱᓕᐊᓐ ᓂᐅᕕᖅᑎᓂᒃ ᐊᒻᒪᓗ $9.3 ᑐᕆᓕᐊᓐᓂᒃ ᑲᑎᓪᓗᒋᑦ ᐲᔭᐃᕝᕕᐅᓯᒪᙱᑦᑐᑦ ᑲᓇᑕᒥ ᐱᖁᑎᒋᔭᐅᔪᓂᒃ. ᐊᑐᐃᓐᓇᖃᕐᕕᐅᓂᕐᒥᑦ ᓄᓇᕐᔪᐊᓕᒫᒥ ᓂᐅᕕᐊᑦᓴᖃᕐᓂᕐᒧᑦ ᐱᒻᒪᕆᐅᑎᓪᓗᒍ, ᓈᒻᒪᙱᓗᐊᖅᑐᖅ ᓴᖅᑮᓂᕐᒥᒃ ᐃᖅᑲᓇᐃᔮᑦᓴᓂᒃ ᐊᒻᒪᓗ ᒪᑭᒪᑦᓯᐊᕐᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐃᓄᖁᑎᖏᓐᓄᑦ. ᑲᓇᑕ ᐱᓕᕆᐊᖃᑦᓯᐊᒃᑲᓐᓂᕆᐊᓕᒃ ᐃᑲᔪᕐᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓇᒻᒥᓂᕆᔭᐅᔪᓂᒃ (ᐊᔾᔨᐅᙱᑦᑐᓂᒃ ᐱᔭᕆᐊᖃᖅᑐᑦ ᑕᐅᑐᖃᓯᐅᑎᓗᒋᑦ ᓂᒋᐊᓃᑦᑐᑦ ᓇᒻᒥᓂᕆᔭᐅᔪᑦ) ᐱᓇᓱᐊᕐᓗᑎᒃ ᓄᓇᕐᔪᐊᓕᒫᒥ ᑮᓇᐅᔭᓴᕐᓂᕐᒧᑦ ᐱᕕᑦᓴᖃᕐᓂᐅᔪᓂᒃ ᑐᑭᓕᕇᖃᓯᐅᑎᔪᓂᒃ ᓄᓇᓕᓐᓂ ᐱᔭᐅᒍᒪᔪᓂᒃ ᐊᒻᒪᓗ ᐅᑉᐱᕆᔭᐅᔪᓂᒃ.

ᑲᒪᒋᔭᖃᕐᓂᕐᒥᑦ ᑖᑦᓱᒥᖓ ᐊᒥᒐᕆᔭᐅᔪᒥᑦ, ᑲᓇᑕ ᐊᑐᓚᖓᔪᖅ ᑕᐅᖅᓰᓂᕐᒧᑦ ᑲᒥᓴᓇᐅᑉ ᐱᔨᑦᓯᕋᐅᑎᖓᓂ ᑲᓲᒪᑎᑦᓯᒃᑲᓐᓂᓂᕐᒧᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓇᒻᒥᓂᕆᔭᐅᔪᓂᒃ — ᐃᓚᒋᓪᓗᓂᒋᑦ ᓄᓇᖃᖅᑳᖅᓯᒪᔪᓄᑦ ᓯᕗᒧᐊᕈᑕᐅᔪᑦ ᓇᒻᒥᓂᕆᔭᐅᔪᓂᑦ ᐊᒻᒪᓗ ᐊᕐᓇᐃᑦ ᓇᒻᒥᓂᖃᖅᑎᐅᔪᑦ — ᐊᐅᓚᖅᑎᑦᓯᓂᕐᒧᑦ ᐱᕕᑦᓴᖃᕐᓂᐅᔪᓂᒃ ᐊᑐᐃᓐᓇᐅᑎᑕᐅᓗᑎᒃ ᐊᑭᖃᙱᑦᑐᓄᑦ ᑕᐅᖅᓰᖃᑎᖃᕐᓂᕐᒧᑦ ᐊᖏᕈᑎᒃᑯᑦ, ᖃᐅᔨᒪᓂᖅᓴᐅᓕᖅᑎᓪᓗᒋᑦ ᑲᓇᑕᒥ ᑕᐅᖅᓰᓂᕐᒧᑦ ᑲᒥᓴᓇᐅᑉ ᐱᔨᑦᓯᕋᕐᓂᕐᒧᑦ ᐃᑲᔫᑎᑦᓴᖏᓐᓂᒃ, ᐊᒻᒪᓗ ᐃᑲᔪᕐᓗᒋᑦ ᐱᑖᖁᓪᓗᒋᑦ ᐊᒻᒪᓗ ᐱᓯᒪᑦᓰᓐᓇᕐᓗᑎᒃ ᑲᓇᑕᐅᑉ ᓯᓚᑖᓂ ᑐᕌᓪᓚᕆᑦᑐᒥᒃ ᑮᓇᐅᔭᓕᐅᓂᕐᒥᑦ ᖁᕝᕙᑦᓴᐃᔪᒥᒃ ᑲᓇᑕᐅᑉ ᓵᓚᖃᕋᓱᐊᕐᓂᖓᓂ ᐊᒻᒪᓗ ᐊᑦᑕᓇᕐᔭᐃᖅᓯᓗᓂ ᑲᓇᑕᐅᑉ ᓴᐳᔾᔭᐅᓯᒪᓂᖓᓂ. ᖄᒃᑲᓐᓂᐊᒍᑦ, ᐱᓕᕆᐊᑦᓴᑎᒍᑦ ᓲᕐᓗ ᑲᓇᑕᒥ ᑕᐅᖅᓰᓂᕐᒧᑦ ᐊᖅᑯᑎᐅᔪᓄᑦ ᑮᓇᐅᔭᕐᓄᑦ, ᑲᓇᑕ ᓯᕗᓪᓕᐅᔾᔨᓚᖓᒻᒥᔪᖅ ᑮᓇᐅᔭᖅᑖᕋᓱᐊᕈᑎᓂ ᓴᙱᓂᖅᓴᐅᓕᖅᑎᑦᓯᔪᓂᒃ ᐊᑑᑎᖃᕐᓂᖓᓂ, ᐊᓂᒍᐃᕈᓐᓇᕐᓂᖓᓂ ᐊᒻᒪᓗ ᐊᑦᑕᕐᓇᔾᔭᐃᖅᓯᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐃᖏᕐᕋᔪᓕᕆᓂᕐᒧᑦ ᓄᓇᓖᑦ ᐊᑐᖃᑦᑕᖅᑕᖏᓐᓂᒃ ᐊᒻᒪᓗ ᐃᑲᔪᖅᓱᓂᕐᒥᑦ ᓄᓇᕐᔪᐊᓕᒫᒥ ᑕᐅᖅᓰᓐᓂᐅᔪᒥᑦ ᑕᐃᑯᖓ ᑕᐃᑲᙵᓗ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ.

ᑐᑭᒧᐊᖃᑎᒋᓪᓗᒍ ᑕᐅᖅᓯᓂᕐᒧᑦ ᐊᔾᔨᐅᙱᓐᓂᕆᔭᖓᓄᑦ ᐸᕐᓇᐅᑎᖓᓄᑦ, ᑲᓇᑕ ᓯᕗᒧᐊᕈᑎᖃᖅᑐᖅ ᐃᓗᐃᑦᑑᓕᖓᔪᒥᒃ ᐱᓕᕆᔾᔪᓯᕐᒥᑦ ᑕᐅᖅᓰᓂᕐᒧᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᑭᓱᓕᒫᑦ ᐃᓅᓯᕐᒥᑦ, ᐃᓚᒋᓗᓂᒋᑦ ᑭᒡᒐᖅᑐᖅᑕᐅᙱᓗᐊᖅᑐᑦ ᑲᑎᙵᔪᑦ, ᐊᑐᕈᓐᓇᕐᓂᖏᓐᓂᒃ ᐱᕕᑦᓴᖃᕐᓂᐅᔪᓂᒃ ᓴᖅᑭᐸᓪᓕᐊᔪᓂᒃ ᑕᐅᖅᓰᓂᕐᒧᑦ ᐊᒻᒪᓗ ᑮᓇᐅᔭᖅᑖᕋᓱᐊᕐᓂᕐᒧᑦ. ᐱᓕᕆᔾᔪᓯᐅᔪᖅ ᐃᓚᖃᖅᑐᖅ ᐃᓚᐅᑎᑦᓯᓂᕐᒥᑦ ᑲᔪᓰᓐᓇᖅᑐᒥ ᐅᖃᖃᑎᖃᕐᓂᕐᒥᑦ ᐊᔾᔨᒌᙱᑦᑐᓂ ᓄᓇᖃᖅᑳᖅᓯᒪᔪᓂᑦ ᑲᑐᔾᔨᖃᑎᒋᔭᐅᔪᓂᒃ, ᐅᑭᐅᖅᑕᖅᑑᑉ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᖏᑦ ᑕᐃᑲᓃᖃᑕᐅᓗᑎᒃ ᑲᓇᑕᐅᑉ ᑕᐅᖅᓰᓂᕐᒧᑦ ᐊᖏᕈᑎᖏᓐᓂᒃ. ᓲᕐᓗ, ᑕᐃᑲᓂ ᑲᓇᑕ — ᐊᒥᐊᓕᒐ — ᒪᒃᓯᑰ ᐊᖏᕈᑎᖓᓂ, ᑲᓇᑕ ᑲᔪᓯᓂᖃᑦᓯᐊᓚᐅᖅᑐᖅ ᐃᓚᓕᐅᔾᔨᓯᒪᓂᕐᒥᑦ ᑭᑭᑦᓯᓂᕐᒥᑦ ᐊᖏᕈᑕᐅᔪᒥᒃ ᑲᓇᑕ ᐊᑐᓕᕈᓐᓇᕐᓂᖓᓂ ᐅᕝᕙᓘᓐᓃᑦ ᑲᔪᓯᑎᑦᓯᒍᓐᓇᖅᑐᖅ ᐆᑦᑐᕋᕈᑕᐅᔪᓂᒃ ᐱᔭᕆᐊᖃᒐᓱᒋᔭᒥᓂᒃ ᐊᑐᑦᓯᐊᕐᓂᕐᒥᑦ ᒪᓕᒐᖅᑎᒍᑦ ᐊᑐᕆᐊᖃᖅᑕᖏᓐᓂᒃ ᓄᓇᖃᖅᑳᖅᓯᒪᔪᓄᑦ. ᐊᓯᖏᑦ ᒪᓕᑦᑕᐅᔭᕆᐊᓖᑦ ᐃᓕᓴᖅᓯᔪᑦ ᐱᔭᑦᓴᕆᔭᒥᓂᒃ ᐊᒻᒪᓗ ᓯᕗᓪᓕᐅᔾᔭᐅᖁᔭᐅᔪᓂᒃ ᓄᓇᖃᖅᑳᖅᓯᒪᔪᓄᑦ ᑎᑎᕋᖅᓯᒪᔪᓂᑦ ᐃᓚᒋᓪᓗᓂᒋᑦ ᐊᕙᑎᓕᕆᓂᖅ, ᑮᓇᐅᔭᓕᐅᕋᓱᐊᕐᓂᖅ, ᑎᑎᖅᑲᖏᑦ ᐊᒻᒪᓗ ᐊᓐᓄᕌᑦ ᓱᓇᒃᑯᑖᑦ, ᑐᕌᕐᓂᖅᓴᐅᒍᒪᓪᓗᑎ ᑮᓇᐅᔭᓕᐅᕈᑕᐅᓂᖅᓴᐅᒍᓐᓇᖅᑐᒧᑦ ᐱᓕᕆᔾᔪᓯᐅᔪᒥᑦ ᓄᓇᖃᖅᑳᖅᓯᒪᔪᓄᑦ ᐊᑐᐃᓐᓇᖃᕐᕕᐅᓂᖏᓐᓄᑦ, ᐊᒻᒪᓗ ᐊᔪᙱᓐᓂᐅᔪᒥᑦ ᐱᕚᓪᓕᕈᓐᓇᖁᓪᓗᒋᑦ ᑕᐅᖅᓰᓂᕐᒧᑦ ᐊᒻᒪᓗ ᑮᓇᐅᔭᓕᐅᕋᓱᐊᕐᓂᕐᒧᑦ.

ᑲᓇᑕ ᐱᓕᕆᖃᑎᖃᓚᖓᔪᖅ ᓄᓇᖃᖅᑳᖅᓯᒪᔪᓂᑦ ᐃᓚᐅᖃᑕᐅᓂᕐᒧᑦ ᓄᓇᕐᔪᐊᓕᒫᒥ ᐃᑲᔪᖅᓱᓂᕐᒧᑦ ᐱᖅᑯᓯᑐᖃᒃᑯᑦ ᐃᓅᓯᕆᔭᐅᔪᓂᒃ ᓲᕐᓗ ᐊᖑᓇᓱᐊᕐᓂᕐᒥᑦ, ᐃᖃᓗᒐᓱᐊᕐᓂᕐᒥᑦ ᐊᒻᒪᓗ ᓴᓇᙳᐊᕐᓂᕐᒥᑦ. ᐱᓗᐊᙳᐊᖅᑐᒥ, ᐃᑲᔪᖅᓱᓚᖓᔪᒍᑦ ᐊᒻᒪᓗ ᓴᖅᑭᔮᖅᑎᑦᓯᓗᑕ ᓄᓇᕐᔪᐊᓕᒫᒥ ᑕᐅᖅᓰᓂᕐᒧᑦ ᐊᒻᒪᓗ ᓂᐅᕕᐊᑦᓴᖃᕐᓂᕐᒧᑦ ᐊᑐᐃᓐᓇᐃᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᐊᖑᓇᓱᐊᖅᑕᐅᓯᒪᔪᓄᑦ ᐊᒻᒪᓗ ᓴᓇᔭᐅᔪᓄᑦ ᓱᓇᒃᑯᑖᓄᑦ, ᑐᕌᒐᕆᔭᐅᒐᔪᓲᑦ ᓈᒻᒪᖏᑦᑐᒃᑯᑦ ᑕᐅᖅᓰᖃᑎᖃᕐᓂᕐᒧᑦ ᐊᕝᕕᐊᕈᑕᐅᔪᓄᑦ ᐊᒻᒪᓗ ᐆᒪᔪᓄᑦ ᐱᔪᓐᓇᐅᑎᒋᔭᐅᔪᓄᑦ ᐱᓕᕆᐊᖑᔪᓄᑦ. ᐱᓕᕆᖃᑎᒋᑦᓯᐊᖏᓐᓇᓚᖓᔭᕗᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᓄᓇᖃᖅᑳᖅᓯᒪᔪᑦ ᐊᒻᒪᓗ ᓂᐅᕕᐊᑦᓴᖃᕐᓂᕐᒧᑦ ᐊᖑᓇᓱᐊᕐᓂᖅ ᐅᑭᐅᖅᑕᖅᑐᒥ ᐆᒪᔪᖁᑎᖏᓐᓂᒃ ᑲᓇᑕᒥ ᒪᑭᒪᑎᑕᐅᑦᓯᐊᕐᓂᕐᒧᑦ ᐊᒻᒪᓗ ᐊᐅᓚᑕᐅᑦᓯᐊᕐᓗᓂ, ᐊᒻᒪᓗ ᐃᑲᔫᑎᑦᓴᑦ ᐱᐅᖅᓱᐊᖅᑕᐅᓗᑎᒃ ᓯᕗᓂᑦᓴᒥᑦ ᑭᖑᕚᕆᓛᖅᑕᑦᑎᓐᓄᑦ.

ᑲᓇᑕ ᐃᑲᔪᖅᓱᕐᓂᐊᖅᑐᑦ ᓄᓇᕐᔪᐊᑉ ᐅᑭᐅᖅᑕᖅᑐᖓ ᓇᒻᒥᓂᕆᔭᐅᔪᓂᒃ ᓇᒻᒥᓂᕆᔭᐅᔪᓄᑦ ᖃᓄᐃᓕᐅᕈᑕᐅᔪᓂᒃ ᑕᐃᑰᓇ ᐅᑭᐅᖅᑕᖅᑐᒥ ᑮᓇᐅᔾᔭᓴᕐᓂᕐᒧᑦ ᑲᑎᒪᔨᖏᑎᒍᑦ (AEC), ᓴᖅᑭᑕᐅᓯᒪᔪᖅ ᑲᓇᑕᒥ ᓯᕗᓕᖅᑎᐅᓂᕐᒥᑦ ᐊᒻᒪᓗ ᒐᕙᒪᓕᕆᓂᕐᒥᑦ. ᑖᒃᑯᐊ ᐅᑭᐅᖅᑕᖅᑐᒥ ᑮᓇᐅᔾᔭᓴᕐᓂᕐᒧᑦ ᑲᑎᒪᔨᖏᑦ ᑐᕌᖃᑦᑕᖅᑐᑦ ᐊᐅᓚᑦᓯᓂᕐᒥᑦ ᑲᒪᑦᓯᐊᖅᑐᓂᒃ ᓇᒻᒥᓂᖃᕐᓂᕐᒧᑦ ᐊᒻᒪᓗ ᑮᓇᐅᔾᔭᓴᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᓄᓇᓕᖏᓐᓂᒃ ᑐᓴᐅᒪᖃᑎᒌᓐᓂᒃᑯᑦ ᐊᒻᒪᓗ ᓂᐱᖁᑎᒋᔭᐅᓂᕐᒧᑦ ᐱᓕᕆᔾᔪᓯᑦᓯᐊᕙᐅᓛᓄᑦ, ᐃᓗᓕᖏᓐᓄᑦ ᐋᖅᑭᒋᐊᕈᑎᑦᓴᓂᒃ ᐊᒻᒪᓗ ᒪᓕᑦᑕᐅᔭᕆᐊᓕᓐᓂᒃ. ᓴᙱᓂᖅᓴᐅᓕᖅᑎᑦᓯᓚᖓᔪᒍᑦ ᑲᓇᑕᐅᑉ ᑭᒡᒐᖅᑐᐃᓂᕆᔭᖓ ᐊᒻᒪᓗ ᐃᑲᔪᕐᓂᕆᔭᖓ ᐱᓕᕆᐊᖑᔪᓂᒃ ᑖᒃᑯᓄᖓ ᐅᑭᐅᖅᑕᖅᑐᒥ ᑮᓇᐅᔾᔭᓴᕐᓂᕐᒧᑦ ᑲᑎᒪᔨᖏᓐᓄᑦ ᖃᐅᔨᒪᑦᓯᐊᕆᐊᕐᓂᕐᒥᑦ ᑲᓇᑕᒥᐅᑦ ᐱᒍᒪᓂᖏᑦ ᑭᒡᒐᖅᑐᖅᑕᐅᑦᓯᐊᕋᓗᐊᕐᒪᖔᑦᑕ ᐱᓕᕆᐊᕆᔭᖏᓐᓂᒃ.

ᑐᕌᒐᑦᓴᖅ: ᖃᐅᔨᒪᓂᕐᒥᑦ ᐊᒻᒪᓗ ᑐᑭᒥᐅᒪᓂᕐᒥᑦ ᑐᑭᒧᐊᕈᑏᑦ ᐃᓱᒪᓕᐅᕆᓂᕐᒧᑦ

ᑲᓇᑕᐅᑉ ᓄᓇᕐᔪᐊᓕᒫᒥ ᐃᓚᐅᓂᕆᔭᖓ ᐃᑲᔫᑎᖃᕐᓂᐊᖅᑐᖅ ᑖᑦᓱᒧᖓ ᑐᕌᖅᑕᐅᒐᓱᐊᖅᑐᒧᑦ:

  • ᖁᕝᕙᕆᐊᖅᑕᐅᓗᓂ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᖃᐅᔨᓴᖅᑐᓕᕆᓂᕐᒧᑦ ᐊᒻᒪᓗ ᖃᐅᔨᕐᓂᕐᒧᑦ ᑲᑐᔾᔨᖃᑎᖃᕐᓗᑎᒃ ᐃᓚᐅᑎᑦᓯᑦᑎᐊᕐᓗᑎᒃ ᓄᓇᖃᖅᑳᖅᑐᑦ ᖃᐅᔨᒪᓂᕆᔭᖏᓐᓂᒃ

ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᖅ ᐅᕙᑦᑎᓂ ᐃᑲᔪᕈᓐᓇᖅᑐᖅ ᐱᑕᖃᕈᓐᓃᖅᑎᑦᓯᓂᕐᒥᑦ ᐊᒥᒐᕆᔭᐅᔪᓂᑦ ᖃᐅᔨᒪᓂᕆᔭᑦᑎᓐᓂᒃ ᐅᑭᐅᖅᑕᖅᑐᒥ, ᐱᓗᐊᙳᐊᖅᑐᒥ ᐱᔭᕆᐊᑐᓂᖏᑦ, ᑲᓲᒪᖃᑎᒌᓐᓂᐅᔪᓂᒃ ᐊᒻᒪᓗ ᐊᑭᖏᓐᓂᒃ ᑐᕌᖓᔪᓂᒃ ᐅᑭᐅᖅᑕᖅᑐᒥ ᖃᐅᔨᓴᖅᑐᓕᕆᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ. ᑲᓇᑕ ᐃᓂᓪᓚᖓᑦᓯᐊᖅᑐᖅ ᑐᑦᑕᕐᕕᐅᓗᑎᒃ, ᓄᓇᕐᔪᐊᓕᒫᒥ ᐃᓕᓴᕆᔭᐅᓯᒪᓂᑦᑎᓐᓄᑦ ᓇᐅᑦᑎᖅᓱᕐᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᓄᓇᓖᑦ ᐊᑐᖃᑦᑕᖅᑕᖏᓐᓂᒃ ᐱᖁᑎᓄᑦ ᐊᒻᒪᓗ ᓄᓇᕐᔪᐊᓕᒫᒥ ᐃᓕᓴᕆᔭᐅᑦᓯᐊᕐᓂᕆᔭᑦᑎᓐᓂᒃ ᐱᐅᓂᖅᐹᓂᒃ ᐅᑭᐅᖅᑕᖅᑐᒥ ᖃᐅᔨᒪᓂᖃᕐᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ.

ᑐᕌᒐᕆᔭᕗᑦ ᑎᑭᐅᒪᓚᖓᔭᕗᑦ ᖁᕝᕙᑦᓴᐃᓂᕐᒥᑦ ᐅᑭᐅᖅᑕᖅᑐᒥ ᖃᐅᔨᓴᖅᑐᓕᕆᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᑲᑐᔾᔨᖃᑎᖃᕐᓂᕐᒥᑦ ᐊᑐᐃᓐᓇᐅᑎᑦᓯᓂᕐᒥᑦ ᐃᑲᔪᖅᓱᓂᕐᒥᑦ ᑲᓇᑕᐅᑕᐅᔪᓄᑦ ᖃᐅᔨᓴᖅᑎᓄᑦ, ᐃᓚᒋᓪᓗᓂᒋᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖃᖅᑎᖏᑦ ᑲᔪᓯᑎᑦᓯᓂᕐᒧᑦ ᓄᓇᕐᔪᐊᓕᒫᒥ ᖃᐅᔨᓴᖅᑐᓕᕆᓂᕐᒧᑦ ᐊᒻᒪᓗ ᖃᐅᔨᓴᕐᓂᕐᒧᑦ ᑲᑐᔾᔨᖃᑎᖃᕐᓂᕐᒥᑦ ᐱᓕᕆᐊᓂᑦ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ. ᐱᔭᕇᖅᓯᓛᖅᑐᒍᑦ ᕿᒥᕐᕈᓂᐊᔪᒥᒃ ᑲᓇᑕᐅᑉ ᓄᓇᕐᔪᐊᓕᒫᒥ ᖃᐅᔨᓴᖅᑐᓕᕆᓂᕐᒧᑦ, ᖃᕋᓴᐅᔭᓕᕆᔾᔪᑎᓄᑦ ᐊᒻᒪᓗ ᓄᑖᓄᑦ ᓴᖅᑭᑕᐅᕙᓪᓕᐊᔪᓄᑦ ᐊᖏᕈᑎᓂᒃ ᓇᓗᓇᐃᖅᓯᓂᕐᒧᑦ ᐱᕕᑦᓴᖃᕐᓂᐅᔪᓂᒃ ᐃᓚᓕᐅᑎᓂᕐᒥᑦ ᐅᑭᐅᖅᑕᖅᑑᑉ ᐃᓚᑦᓴᖏᓐᓂᒃ. ᓴᙱᓂᖅᓴᐅᓕᖅᑎᓐᓂᐊᕐᒥᔭᕗᑦ ᐱᖃᑕᐅᓂᕆᔭᕗᑦ ᑐᕌᖓᖃᓯᐅᑎᔪᓂᒃ ᓄᓇᕐᔪᐊᓕᒫᒥ ᐊᒻᒪᓗ ᐃᓗᓕᖏᓐᓄᑦ ᑎᒥᖁᑎᓂ, ᐃᓚᒋᓪᓗᓂᒋᑦ ᐱᓕᕆᖃᑎᒌᑦᑐᑦ ᐅᑭᐅᖅᑕᖅᑐᒥ ᑲᑎᒪᔨᖏᓐᓄᑦ, ᑎᑭᐅᒪᓂᕐᒧᑦ ᐅᑭᐅᖅᑕᖅᑐᒥ ᓇᐅᑦᑎᖅᓱᕐᓂᕐᒧᑦ ᑲᓲᒪᓂᐅᔪᓂᒃ, ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᖃᐅᔨᓴᖅᑐᓕᕆᓂᕐᒧᑦ ᑲᑎᒪᔨᕋᓛᖏᓐᓂᒃ, ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂᒃ ᑐᖅᑯᖅᓯᒪᔪᑦ ᓄᓇᓖᑦ ᐊᑐᖃᑦᑕᖅᑕᖏᓐᓂᒃ ᐊᒻᒪᓗ ᒪᑐᐃᖓᔪᒥᒃ ᓄᓇᓕᕆᓂᕐᒧᑦ ᑲᑐᔾᔨᖃᑎᒌᓂᒃ.

ᑲᓇᑕ ᓯᕗᓪᓕᐅᔾᔨᓚᖓᔪᖅ ᐊᑐᓕᖅᑎᑦᓯᓂᕐᒥᑦ ᐊᖏᕈᑎᒥᒃ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓄᓇᕐᔪᐊᓕᒫᒥ ᐅᑭᐅᖅᑕᖅᑐᒥ ᖃᐅᔨᓴᖅᑐᓕᕆᓂᕐᒧᑦ ᐃᑲᔪᖅᑎᒌᓐᓂᕐᒥᑦ, ᓴᙱᓂᖅᓴᐅᓕᖅᑎᑦᓯᕋᓱᐊᖅᑐᖅ ᓄᓇᕐᔪᐊᑉ ᐅᑭᐅᖅᑕᖅᑐᖓ ᐃᑲᔪᖅᑎᒌᓐᓂᕐᒥᑦ ᓯᕗᒧᐊᕈᑕᐅᔪᖅ ᖃᐅᔨᒪᓂᕆᔭᑦᑎᓐᓂᒃ ᐅᑭᐅᖅᑕᖅᑐᒥ. ᓴᖅᑭᔮᖅᑎᑦᓯᓚᖓᔪᒍᑦ ᖃᐅᔨᓴᕐᓂᐅᔪᒥᑦ ᐱᒻᒪᕆᐅᑎᑦᓯᔪᒥᒃ ᑕᐃᒪᐃᓴᕋᐃᓗᑎᒃ ᐊᒻᒪᓗ ᑲᔪᓯᑦᓯᐊᖅᑎᑦᓯᓗᑎᒃ ᑲᑐᔾᔨᖃᑎᖃᕐᓗᑎᒃ ᐅᑭᐅᖅᑕᖅᑐᒥ ᐃᓄᖁᑎᖏᓐᓂᒃ ᐊᒻᒪᓗ ᐅᐊᓐᓇᖓᓂᕐᒥᐅᑕᓂᒃ, ᐊᒻᒪᓗ ᐊᑐᖃᓯᐅᑎᔪᒥᒃ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓂᒃ ᓴᓂᐊᓂ ᖃᐅᔨᓴᖅᑐᓕᕆᓂᕐᒧᑦ ᖃᐅᔨᓴᕐᓂᐅᔪᓄᑦ. ᐋᖅᑭᒋᐊᖅᓯᓚᖓᒻᒥᔪᒍᑦ ᓄᓇᕐᔪᐊᓕᒫᒥ ᑐᓴᐅᒪᖃᑎᒌᓐᓂᕐᒥᑦ ᖃᐅᔨᓴᖅᑐᓕᕆᓂᕐᒧᑦ ᑐᖅᑯᖅᓯᒪᔪᓂᒃ ᐊᒻᒪᓗ ᐋᖅᑭᑦᓱᐃᓂᕐᒥᑦ ᐊᐅᓚᔾᔭᐃᓂᕐᒥᑦ ᐃᓕᓴᕆᔭᐅᓯᒪᔪᓂᒃ ᓄᓇᕐᔪᐊᓕᒫᒥ ᖃᐅᔨᓴᖅᑎᓂᒃ ᐊᒻᒪᓗ ᓱᓇᒃᑯᑖᓂᒃ ᑭᓪᓕᖁᑎᒋᔭᑦᑎᓐᓂ. ᐱᓗᐊᙳᐊᖅᑐᒥ, ᓄᓇᕐᔪᐊᓕᒫᒥ ᖃᐅᔨᓴᖅᑎᒻᒪᕆᑦ ᑐᙵᓱᑦᑎᑕᐅᓂᐊᖅᑐᑦ ᓄᑖᖑᔪᓂᒃ ᖃᐅᔨᓴᕐᕕᐅᔪᓂᒃ ᐊᒻᒪᓗ ᐃᓪᓗᕐᔪᐊᓂᑦ, ᐃᓚᒋᓪᓗᓂᐅᒃ ᓄᑖᖑᔪᖅ ᑲᓇᑕᒥ ᖁᑦᓯᑦᑐᒥᒃ ᖃᐅᔨᓴᕐᕕᖓᑕ ᐃᓕᓐᓂᐊᕐᕕᖓ ᐃᖃᓗᒃᑑᑦᓯᐊᖅ, ᓄᓇᕗᒻᒥ. ᖃᐅᔨᒪᑦᓯᐊᕆᐊᕐᓂᐊᕐᒥᔪᒍᑦ ᓄᓇᕐᔪᐊᓕᒫᒥ ᖃᐅᔨᓴᖅᑏᑦ ᑐᓴᐅᒪᑎᑕᐅᑦᓯᐊᕋᓗᐊᕐᒪᖔᑦᑕ ᐊᒻᒪᓗ ᐃᑉᐱᒍᓱᑦᓯᐊᕐᓗᑎᒃ ᓴᖅᑭᔮᖅᑐᓂᒃ ᒪᓕᒐᕐᓂᒃ, ᒪᓕᒋᐊᓕᓐᓂᒃ, ᐱᔪᓐᓇᐅᑎᑖᕐᓂᕐᒥᑦ ᐊᒻᒪᓗ ᓂᕆᐅᒋᔭᐅᔪᓂᒃ ᐊᕕᑦᑐᖅᓯᒪᔪᓂᒃ/ᓄᓇᓕᐅᔪᒥ ᐱᓕᕆᕝᕕᒋᓂᐊᖅᑕᖓᓂ.

ᐱᕈᖅᐸᓪᓕᐊᑎᓪᓗᒍ ᐅᐱᒍᓱᓐᓂᖏᓐᓂᒃ ᖃᓄᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᑦ ᐱᐅᓯᕚᓪᓕᖅᑎᑦᓯᓲᖑᒻᒪᖔᑦ ᑐᑭᓯᐅᒪᓂᕆᔭᑦᑎᓐᓂᒃ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ, ᐊᕝᕕᐊᕈᑕᐅᔪᓂᑦ ᐱᑕᖃᐃᓐᓇᖅᑐᖅ ᓇᓕᒧᑦᓱᓂᕐᒧᑦ ᐊᒻᒪᓗ ᐃᑉᐱᒍᓱᑦᓯᐊᕐᓂᕐᒧᑦ ᐃᓚᐅᑎᑦᓯᓂᕐᒥᑦ ᓄᓇᕐᔪᐊᓕᒫᒥ ᑲᑎᖃᑦᑕᕐᓂᐅᔪᓂᒃ. ᐱᓕᕆᓯᒪᓂᑦᑎᓐᓂᒃ ᐊᑐᖃᓯᐅᑎᓂᕐᒥᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓂᒃ ᑲᓇᑕᒥ ᐃᓱᒪᓕᐅᕆᓂᕐᒥᑦ, ᑲᓇᑕ ᐊᑦᓱᕈᓚᖓᔪᖅ ᐊᑑᑎᖃᑦᓯᐊᕐᓂᖓᓂ ᐃᓚᐅᑎᑦᓯᓂᕐᒥᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓂᒃ ᓄᓇᕐᔪᐊᓕᒫᒥ ᑲᑎᖃᑦᑕᕐᓂᐅᔪᓂᒃ ᐃᓱᒪᓕᐅᕆᖃᑦᑕᖅᑐᓄᑦ ᐊᑦᑐᐊᔪᓄᑦ ᐅᑭᐅᖅᑕᖅᑐᒥ. ᓵᖏᓐᓂᒃ ᓄᓇᖃᖅᑳᖅᓯᒪᔪᑦ ᑭᒡᒐᖅᑐᐃᔨᖏᓐᓂᒃ ᑲᓇᑕᒥ, ᕿᓂᕐᓂᐊᖅᑐᒍᑦ ᓄᓇᕐᔪᐊᓕᒫᒥ ᐃᑲᔪᖅᑕᐅᒍᒪᓪᓗᑕ ᑕᐃᒎᓯᖏᓐᓄᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓄᑦ ᐊᒻᒪᓗ ᓂᐱᖁᑎᒋᔭᐅᓂᐊᖅᑐᒍᑦ ᐊᑑᑎᖃᑦᓯᐊᖅᑐᒧᑦ ᐊᒻᒪᓗ ᐃᑉᐱᒍᓱᑦᓯᐊᕐᓂᕐᒧᑦ ᑲᑐᔾᔨᖃᑎᖃᕐᓂᕐᒥᑦ ᐅᑭᐅᖅᑕᖅᑐᒥ ᖃᐅᔨᓴᖅᑎᐅᔪᓂᑦ ᐊᒻᒪᓗ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓂᒃ ᑎᒍᒥᐊᖅᑎᐅᔪᓂᒃ ᓴᖅᑮᓂᕐᒥᑦ ᓄᑖᓂᑦ ᖃᐅᔨᒪᓂᐅᔪᓂᒃ.

ᑐᕌᒐᑦᓴᖅ: ᑲᓇᑕᐅᑉ ᐅᑭᐅᖅᑕᖅᑐᖓ ᐊᒻᒪᓗ ᐅᐊᓐᓇᖓᓂ ᐆᒪᔪᓄᑦ ᓇᔪᒐᕆᔭᐅᔪᑦ ᐆᒪᑦᓯᐊᕆᑦᑐᑦ ᐊᒻᒪᓗ ᐊᓂᒍᐃᔪᓐᓇᖅᑐᑦ

ᑲᓇᑕᐅᑉ ᓄᓇᕐᔪᐊᓕᒫᒥ ᐃᓚᐅᓂᕆᔭᖓ ᐃᑲᔫᑎᖃᕐᓂᐊᖅᑐᖅ ᑖᒃᑯᓄᖓ ᑐᕌᖅᑕᐅᒐᓱᐊᖅᑐᓄᑦ:

  • ᓱᒃᑲᓕᒋᐊᖅᑎᑦᓯᓂᕐᒥᑦ ᐊᒻᒪᓗ ᓴᙱᓂᖅᓴᐅᓕᕐᓗᓂ ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥ ᐱᑕᖃᕈᓐᓃᕐᔫᒥᑎᑦᓯᓂᕐᒥᑦ ᐳᓪᓚᓂᒃ ᐊᓂᕐᓂᖃᕐᓇᖏᑦᑐᓕᐊᖅᐸᑦᑐᓂᒃ (GHG) ᐊᓂᐊᑎᑦᓯᓂᕐᒥᑦ ᐊᒻᒪᓗ ᐊᑯᓂᐅᖏᑦᑐᖅ ᓯᓚᒧᑦ ᓱᕈᕐᓇᖅᑐᓂᒃ
  • ᖃᐅᔨᒪᑦᓯᐊᕆᐊᕐᓂᕐᒥᑦ ᐊᑐᓗᐊᖅᑕᐃᓕᒪᓂᕐᒥᑦ, ᐅᑎᖅᑏᓂᕐᒥᑦ ᐊᒻᒪᓗ ᒪᑭᒪᑎᑕᐅᑦᓯᐊᕐᓂᕐᒧᑦ ᐊᑐᑦᓯᐊᖃᑦᑕᕐᓂᕐᒥᑦ ᐆᒪᔪᓄᑦ ᓇᔪᒐᕆᔭᐅᔪᓂᒃ ᐊᒻᒪᓗ ᐆᒪᔪᓂᑦ
  • ᐃᑲᔪᖅᓱᓂᕐᒥᑦ ᒪᑭᒪᑎᑕᐅᑦᓯᐊᕐᓂᕐᒧᑦ ᐊᑐᑦᓯᐊᖃᑦᑕᓂᕐᒥᑦ ᐆᒪᔪᓂᒃ ᓄᓇᖃᖅᑳᖅᓯᒪᔪᓄᑦ
  • ᑲᑐᔾᔨᖃᑎᖃᕐᓗᑎᒃ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᓂᐅᔪᓂᒃ, ᑲᓇᑕᐅᑉ ᓂᒋᐊᓂ ᐊᕕᑦᑐᖅᓯᒪᓂᐅᔪᓂᒃ ᐊᒻᒪᓗ ᓄᓇᖃᖅᑳᖅᓯᒪᔪᓂᑦ ᐃᓕᓴᖅᓯᓂᕐᒧᑦ, ᐊᐅᓚᑦᓯᓂᕐᒧᑦ ᐊᒻᒪᓗ ᐱᐅᖅᓱᐊᕐᓂᕐᒧᑦ ᐃᓕᖅᑯᓯᕐᒧᑦ ᐊᒻᒪᓗ ᐊᕙᑎᒧᑦ ᐱᒻᒪᕆᐅᒋᔭᐅᔪᓂᒃ ᐃᓂᒋᔭᐅᔪᓂᒃ
  • ᐊᐅᓚᑦᓯᓂᕐᒥᑦ ᑐᑭᓯᐅᒪᓂᖅᓴᐅᓂᕐᒥᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᑦᑐᐃᓂᐅᔪᓂᒃ ᐊᒻᒪᓗ ᓱᖏᐅᑎᓂᕐᒧᑦ ᓇᓖᕌᕈᑎᑦᓴᓂᑦ ᓇᐅᑦᑎᖅᓱᕐᓂᒃᑯᑦ ᐊᒻᒪᓗ ᖃᐅᔨᓴᕐᓂᒃᑯᑦ, ᐃᓚᒋᔭᐅᓪᓗᓂ ᓄᓇᖃᖅᑳᖅᓯᒪᔪᓂᒃ ᓯᕗᓕᖅᑎᖃᕐᓗᑎᒃ ᐊᒻᒪᓗ ᓄᓇᓕᓐᓂ ᑐᙵᕕᖃᕐᓗᑎᒃ ᐱᓕᕆᔾᔪᓯᐅᔪᓂᒃ
  • ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐃᑲᔪᖅᓱᕐᓂᐅᔪᖅ ᓯᓚ ᓱᖏᐅᑎᔭᐅᒐᓱᐊᖅᑎᓪᓗᒍ ᐊᒻᒪᓗ ᐊᓂᒍᐃᔪᓐᓇᕐᓂᕐᒥᑦ ᐊᑦᓱᕈᕈᑕᐅᔪᓂᒃ
  • ᓴᙱᓂᖅᓴᐅᓕᖅᑎᑦᓯᓂᕐᒥᑦ ᑐᑭᓯᐅᒪᓂᐅᔪᒥᑦ ᐊᑐᖅᑕᐅᓴᕋᐃᒍᓐᓇᕐᓂᖏᓐᓄᑦ ᐆᒪᔪᓄᑦ ᓇᔪᒐᕆᔭᐅᔪᑦ ᐊᒻᒪᓗ ᐊᔾᔨᒌᙱᓐᓂᕈᓘᔭᖏᑦ ᐊᒻᒪᓗ ᐊᑦᑐᐃᓂᖃᕐᓂᖓ ᐊᕙᑎᐅᑉ ᐊᓯᔾᔨᕐᓂᖓ
  • ᖃᐅᔨᒪᑦᓯᐊᕆᐊᕐᓂᕐᒥᑦ ᐊᑦᑕᕐᓇᙱᑦᑐᓂᒃ ᐊᒻᒪᓗ ᐊᕙᑎᒥᒃ ᑲᒪᑦᓯᐊᖅᑐᓂᒃ ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᕐᒥᑦ
  • ᓴᙱᓂᖅᓴᐅᓕᖅᑎᓪᓗᒋᑦ ᓱᕈᕐᓇᖅᑐᖃᖅᑕᐃᓕᒪᑎᑦᓯᓂᕐᒥᑦ ᐊᒻᒪᓗ ᐱᑕᖃᓗᐊᖅᑕᐃᓕᒪᑎᑦᓯᓂᕐᒥᑦ ᐊᕕᑦᑐᖅᓯᒪᔪᓂ, ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥ

ᓄᓇᕐᔪᐊᑉ ᐅᑭᐅᖅᑕᖅᑐᖓ ᐅᖅᑰᓯᕙᓪᓕᐊᔪᖅ ᒪᕐᕈᐃᖅᓱᖅᑐᓂ ᐱᖓᓱᐊᖅᑎᑦᑐᒧᑦ ᓱᒃᑲᓕᓂᖅᓴᒥᑦ ᓄᓇᕐᔪᐊᕐᒥ ᐊᑯᓐᓂᖅᓱᖅᑕᐅᔪᒥᒃ, ᓄᓇᒋᔭᐅᔪᖅ ᓯᕗᓕᖅᑎᐅᙱᒃᑲᓗᐊᖅᓱᓂ ᐃᓄᓐᓂᙶᖅᑐᓂᒃ ᓱᕈᐃᑎᑦᓯᓂᕐᒥᑦ ᐳᓪᓚᓂᒃ ᐊᓂᕐᓂᖃᕐᓇᖏᑦᑐᓕᐊᖅᐸᑦᑐᓂᒃ (GHG) ᐊᓂᐊᑎᑦᓯᓂᕐᒥᑦ. ᑲᓇᑕ ᐱᓕᕆᐊᖃᖅᓯᒪᓪᓚᕆᑦᑐᖅ ᖃᓄᐃᓕᐅᕆᐊᕐᓂᒃᑯᑦ ᓄᓇᒋᔭᖓᓂ ᐱᑕᖃᕈᓐᓃᕐᔫᒥᑎᑦᓯᓂᕐᒥᑦ ᐳᓪᓚᓂᒃ ᐊᓂᕐᓂᖃᕐᓇᖏᑦᑐᓕᐊᖅᐸᑦᑐᓂᒃ (GHG) ᐊᓂᐊᑎᑦᓯᓂᕐᒥᑦ ᐊᒻᒪᓗ ᓴᓗᒪᑎᑦᓯᓂᕐᒧᑦ, ᑭᓯᐊᓂ ᑖᒃᑯᐊ ᖃᓄᐃᓕᐅᕈᑕᐅᔪᑐᐊᑦ ᓈᒻᒪᙱᓗᐊᕐᓂᐊᖅᑐᑦ ᐊᓯᔾᔩᓂᕐᒥᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᑦᑐᐃᓂᐅᔪᓂᒃ ᐊᑐᖅᑕᐅᓕᕇᖅᑐᓂᒃ ᓄᓇᒋᔭᐅᔪᓂ. ᓱᒃᑲᐃᓪᓕᒋᐊᖅᑎᓐᓂᐊᕐᓗᒍ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ, ᑲᓇᑕ ᐱᓕᕆᖃᑎᖃᕆᐊᓕᒃ ᓄᓇᓕᕐᔪᐊᓂᑦ ᓄᓇᕐᔪᐊᓕᒫᒥ, ᐱᓗᐊᙳᐊᖅᑐᒥᑦ ᐊᓂᐊᑎᑦᓯᖃᑦᑕᖅᑐᓂᒃ, ᓱᒃᑲᓕᒋᐊᖅᑎᑦᓯᓂᕐᒥᑦ ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓄᓇᕐᔪᐊᓕᒫᒥ ᐱᑕᖃᕈᓐᓃᕐᔫᒥᑎᑦᓯᓂᕐᒥᑦ ᐳᓪᓚᓂᒃ ᐊᓂᕐᓂᖃᕐᓇᖏᑦᑐᓕᐊᖅᐸᑦᑐᓂᒃ (GHG) ᐊᓂᐊᑎᑦᓯᓂᕐᒥᑦ ᐊᒻᒪᓗ ᐊᑯᓂᐅᖏᑦᑐᖅ ᓯᓚᒧᑦ ᓱᕈᕐᓇᖅᑐᓂᒃ.

ᑎᑭᐅᑎᓂᕐᒧᑦ ᑖᑦᓱᒥᖓ ᑐᕌᒐᑦᓴᐅᔪᒥᒃ, ᑲᓇᑕ ᐃᑲᔪᖅᓱᖅᑐᖅ ᐊᑐᖅᑕᐅᓴᕋᐃᓗᓂ, ᐱᓕᕆᒍᒪᓪᓚᕆᑦᓱᓂ ᐊᒻᒪᓗ ᑕᒪᐃᓐᓂᒃ ᑲᓇᑕᒥ ᐊᒻᒪᓗ ᓄᓇᕐᔪᐊᓕᒫᒥ ᐊᑐᓕᖅᑎᑦᓯᓂᕐᒥᑦ ᐱᐊᕋᔅ ᐊᖏᕈᑎᖓᓂ, ᐃᓚᒋᓗᒍ ᑐᕌᒐᑦᓴᐅᔪᖅ ᓄᓇᕐᔪᐊᕐᒥ ᐊᑯᓐᓂᖅᓱᖅᑐᒥ ᐆᓇᕐᓂᖅᓯᐅᑎᖓ ᑐᖔᓄᑦ 2° ᓯᐊᓪᓯᐊᔅᒧᑦ ᐊᒻᒪᓗ ᐊᑦᓱᕈᕐᓗᑎᒃ ᐆᓇᕐᓂᖅᓯᐅᑎ ᑎᑭᐅᑎᖁᓇᒍ 1.5° ᓯᐊᓪᓯᐊᔅᒧᑦ. ᒫᓐᓇᒫᖑᓚᐅᖅᑐᖅ ᖃᐅᔨᓴᕐᓂᐅᔪᑦ ᓇᓗᓇᐃᖅᓯᓚᐅᖅᑐᑦ ᓴᙱᔪᒥᒃ ᐊᒻᒪᓗ ᒫᓐᓇᑦᓴᐅᑎᒋ ᓄᓇᕐᔪᐊᕐᒥ ᖃᓄᐃᓕᐅᕆᐊᕐᓗᑎᒃ ᐊᓂᕐᓂᒥ ᐊᓂᐊᕙᓪᓕᐊᔪᓂᒃ ᐊᒻᒪᓗ ᐊᑯᓂᐅᖏᑦᑐᖅ ᓯᓚᒧᑦ ᓱᕈᕐᓇᖅᑐᑦ ᐱᔭᐅᔭᕆᐊᓖᑦ ᑎᑭᐅᒪᓂᐊᕐᓗᒋᑦ ᑖᒃᑯᐊ ᐆᓇᕐᓂᖅᓯᐅᑎᓄᑦ ᑐᕌᒐᑦᓴᐅᔪᓂᒃ. ᐃᑲᔪᖅᓱᓚᖓᔭᕗᑦ ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓗᑕ ᓄᓇᕐᔪᐊᓕᒫᒥ ᐊᑦᓱᕉᑕᐅᔪᓂᒃ ᑕᐃᑰᓇ ᐅᑭᐅᖅᑕᖅᑐᒥ ᑲᑎᒪᔨᖏᑎᒍᑦ, ᔫᓇᐃᑕᑦ ᓇᐃᓴᓐ ᑎᒥᖁᑎᖏᑎᒍᑦ ᐊᒻᒪᓗ ᐊᓯᖏᑦ ᑲᑎᖃᑦᑕᕐᓂᐅᔪᑦ ᐱᑕᖃᕈᓐᓃᕐᔫᒥᑎᑦᓯᓂᕐᒥᑦ ᐊᓂᐊᑎᑦᓯᓂᕐᒥᑦ ᐊᑯᓂᐅᖏᑦᑐᖅ ᓯᓚᒧᑦ ᓱᕈᕐᓇᖅᑐᓂᒃ, ᐱᓗᐊᙳᐊᖅᑐᒥ ᕿᕐᓂᖅᑕᒥᑦ ᐸᐅᕿᔪᓂᑦ, ᐊᑦᓱᕐᔪᐊᕌᓗᒃ ᐊᑦᑐᐃᓂᖃᖅᑐᖅ ᐅᑭᐅᖅᑕᖅᑐᒥ. ᐋᖅᑭᑦᓱᐃᓚᖓᔪᒍᑦ ᐊᒻᒪᓗ ᐃᑲᔪᖅᓱᓚᖓᔪᒍᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓄᓇᖃᖅᑳᖅᓯᒪᔪᑦ ᓄᓇᕐᔪᐊᓕᒫᒥ ᖃᓄᐃᓕᐅᕆᐊᕐᓂᖏᓐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐃᓱᒫᓘᑕᐅᔪᓄᑦ ᑖᑦᓱᒪ ᐊᑖᒍᑦ ᔫᓇᐃᑕᑦ ᓇᐃᓴᓐ ᐋᖅᑭᑦᓱᖅᓯᒪᔾᔪᑎ ᐱᓕᕆᔾᔪᓯᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐃᓚᖃᕐᓗᓂ ᓯᕗᒧᐊᖅᑎᑦᓯᓂᕐᒥᑦ ᐊᑐᓕᖅᑎᑦᓯᓂᕐᒥᑦ ᓄᓇᓕᖏᑕ ᐊᒻᒪᓗ ᓄᓇᖃᖅᑳᖅᓯᒪᔪᑦ ᑐᙵᕕᖓᓂ, ᐃᑲᔪᖅᓱᓂᕐᒥᑦ ᓴᖅᑮᓂᕐᒥᑦ ᓄᓇᖃᖅᑳᖅᓯᒪᔪᓄᑦ ᑐᕌᒐᑦᓴᓪᓗᐊᑕᖓᓂ ᐊᒻᒪᓗ ᕿᓂᕐᓂᕐᒥᑦ ᐱᕕᑦᓴᖃᕐᓂᐅᔪᓂᒃ ᓴᙱᓂᖅᓴᐅᓕᖅᑎᑦᓯᓂᕐᒧᑦ ᐊᑑᑎᖃᑦᓯᐊᖅᑐᒃᑯᑦ ᐱᖃᑕᐅᓂᕆᔭᖏᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᖃᖅᑳᖅᓯᒪᔪᑦ ᐃᓅᓱᑦᑐᖁᑎᖏᓐᓂᒃ. ᑭᖑᓪᓕᖅᐹᒥ, ᐊᑦᓱᕈᕈᑎᖃᕐᓂᐊᖅᑐᒍᑦ ᐊᒥᓱᓂᑦ ᓄᓇᕐᔪᐊᑉ ᐅᑭᐅᖅᑕᖅᑐᖓᓂ ᐱᒋᐊᕈᑎᑦᓴᓂᑦ ᐃᑲᔪᖅᓱᖅᑐᓂᑦ ᐱᕙᓪᓕᐊᑎᑦᓯᓂᕐᒥᑦ ᐊᒻᒪᓗ ᓴᖅᑭᑎᑕᐅᓂᖓᓂ ᓴᓗᒪᔪᒥᑦ ᐆᒻᒪᖅᑯᑎᓂ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᓂ, ᐃᓚᒋᔭᐅᓗᑎᒃ ᐱᒋᐊᕈᑎᑦᓴᐅᔪᑦ ᑐᕌᖓᔪᑦ ᑕᐅᖅᓰᖃᑎᖃᕐᓂᕐᒥᑦ ᖃᐅᔨᒪᓂᐅᔪᓂᒃ ᐊᒻᒪᓗ ᖃᐅᔨᒪᔨᑕᕆᔭᐅᔪᓂᒃ ᐊᑐᓕᖅᑕᖅᑐᓂᒃ ᐊᒻᒪᓗ ᐊᓯᐊᒍᖔᖅ ᐆᒻᒪᖅᑯᑎᓕᐅᕐᓂᕐᒥᑦ.

ᑲᓇᑕ ᓯᕗᓪᓕᐅᔾᔨᓂᐊᕐᒥᔪᖅ ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᕐᒥᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᓯᓚᒥ ᐊᓂᒍᐃᔪᓐᓇᖅᓯᓂᕐᒥᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᐃᓄᖁᑎᖏᓐᓄᑦ, ᐃᓱᒪᒋᔭᐅᓯᐅᑎᓗᓂ ᐊᕐᓇᐃᑦ ᐊᒻᒪᓗ ᐊᖑᑏᑦ ᐃᓛᓐᓂᒃᑯᑦ ᐃᑉᐱᒍᓱᖃᑦᑕᖅᑐᑦ ᐊᑦᑐᐃᓂᐅᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᔾᔨᒌᙱᑦᑐᒃᑯᑦ. ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᓕᐅᔪᑦ, ᐃᓚᒋᓪᓗᓂᒋᑦ ᓄᓇᖃᖅᑳᖅᓯᒪᔪᑦ, ᓴᖅᑭᔮᕐᕕᐅᓂᖅᐹᖑᔪᑦ ᐊᑦᑐᐃᓂᐅᔪᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐊᑦᑐᐃᓂᖃᓲᖅ ᓄᓇᓖᑦ ᐊᑐᖃᑦᑕᖅᑕᖏᓐᓂᒃ, ᐱᔾᔪᑎᑦᓴᐅᖃᑦᑕᖅᑐᓂᒃ ᓂᕿᒧᑦ ᐊᒻᒪᓗ ᐃᒥᕐᒧᑦ, ᐊᒻᒪᓗ ᑎᒥᒃᑯᑦ ᐃᓱᒪᒃᑯᓪᓗ ᐋᓐᓂᐊᖃᖅᑕᐃᓕᒪᓂᕐᒥᑦ. ᑲᓇᑕ ᐃᑲᔪᕐᓂᖃᕐᓂᐊᖅᑐᖅ ᐱᕙᓪᓕᐊᑎᑦᓯᓂᕐᒥᑦ ᐃᑲᔪᕈᑎᑦᓴᓂᑦ ᐊᒻᒪᓗ ᖃᐅᔨᓴᖅᑐᓕᕆᓂᕐᒧᑦ ᖃᐅᔨᓴᕐᓂᐅᔪᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑕᐃᑰᓇ ᐅᑭᐅᖅᑕᖅᑐᒥ ᑲᑎᒪᔨᒃᑯᑦ, ᓄᓇᕐᔪᐊᕐᒥ ᓯᓚᓐᓂᐊᖅᑎᒃᑯᑦ ᑲᑐᔾᔨᖃᑎᒌᖑᔪᒃᑯᑦ ᐊᒻᒪᓗ ᒐᕙᒪᐅᖃᑎᒌᙱᑦᑐᓄᑦ ᐅᖃᓕᒪᖅᑎᐅᔪᑦ ᓯᓚᐅᑉ ᐊᓯᔾᔨᖅᐸᓕᐊᓂᖓᓄᑦ, ᐊᖏᖅᓯᒪᔪᒍᑦ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐃᓚᐅᑎᑦᓯᓂᕐᒥᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓂᒃ. ᑕᐅᖅᓰᖃᑎᖃᕐᓂᐊᕐᒥᔪᒍᑦ ᖃᐅᔨᒪᓂᐅᔪᓂᑦ ᐊᒻᒪᓗ ᐱᓕᕆᔾᔪᓯᑦᓯᐊᕙᐅᓛᖑᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᓱᖑᐃᑎᓂᕐᒥᑦ ᑕᐃᑰᓇ ᐅᑭᐅᖅᑕᖅᑐᒥ ᑲᑎᒪᔨᑎᒍᑦ ᐊᒻᒪᓗ ᐊᓯᖏᓐᓄᑦ ᑲᑎᖃᑦᑕᕐᓂᐅᔪᓄᑦ, ᑐᕌᒐᖃᕐᓗᑕ ᐊᒥᓱᕈᖅᐸᓪᓕᐊᓗᑎᒃ ᓄᓇᓕᓐᓂ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐃᓄᖃᕐᓂᖏᓐᓂᒃ ᑐᑭᓯᐅᒪᓂᕐᒧᑦ ᐊᒻᒪᓗ ᐱᓕᕆᐊᖃᕐᓂᕐᒥᑦ ᐊᑦᑐᐃᓂᐅᔪᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᑲᓇᑕᐅᑉ ᕿᓚᒻᒥ ᐱᖁᑎᖏᑦ (ᓲᕐᓗ ᖃᖓᑦᑕᖅᑎᑕᐅᓯᒪᔪᑦ ᐊᒻᒪᓗ ᑐᕌᖓᖃᓯᐅᑎᔪᑦ ᓄᓇᓖᑦ ᐊᑐᖃᑦᑕᖅᑕᖏᓐᓂᒃ) ᐊᒻᒪᓗ ᓄᓇᕐᔪᐊᕐᒥ ᖃᐅᔨᓴᕐᓂᕐᒧᑦ ᑐᖅᑯᖅᓯᒪᔪᑦ ᐃᑲᔪᖅᓱᕐᓂᐊᖅᑐᑦ ᐊᕙᑎᓕᕆᓂᕐᒧᑦ ᐊᒻᒪᓗ ᒪᓕᒐᓕᕆᓂᕐᒧᑦ ᐃᓱᒪᓕᐅᖅᑕᐅᔪᓂᒃ ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᖃᐅᔨᒪᓂᐅᔪᓂᒃ ᐊᓯᔾᔨᖅᐸᓕᐊᔪᓂᒃ ᓄᓇᕐᔪᐊᑉ ᐃᑭᐊᖓᑕ ᖁᐊᖑᐃᓐᓇᕐᓂᖓᓂ, ᓯᑯᒥ, ᐊᐳᑎᒥ, ᓯᕐᒥᓂ ᐊᒻᒪᓗ ᐆᒪᔪᓄᑦ ᓇᔪᒐᕆᔭᐅᔪᓂᒃ.

ᐊᖏᔪᒥᑦ ᓯᔾᔭᖃᕐᓂᑦᑎᓐᓄᑦ, ᑲᓇᑕ ᐊᑦᓱᕈᓚᖓᔪᖅ ᐊᕕᑦᑐᖅᓯᒪᔪᓂ ᐊᒻᒪᓗ ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᕐᒥᑦ ᓴᐳᔾᔨᓂᕐᒧᑦ ᐅᑭᐅᖅᑕᖅᑐᒥ ᐃᒫᓂ ᐊᕙᑎᖓᓂ ᖃᐅᔨᔭᐅᓂᑯᓂᒃ ᑐᙵᕕᖃᖅᑐᖅ ᐊᒻᒪᓗ ᐃᑉᐱᒍᓱᑦᑎᐊᖅᑐᖅ ᐊᕕᑦᑐᖅᓯᒪᔪᓂ ᑲᓇᑕᒥ ᐊᒻᒪᓗ ᓄᓇᖃᖅᑳᖅᓯᒪᔪᑦ ᐱᒍᒪᔭᖏᓐᓂᒃ. ᐅᑭᐅᖅᑕᖅᑑᑉ ᐃᒪᖓᑕ ᐊᕙᑎᖓ ᐊᓯᔾᔨᖅᑐᒻᒪᕆᐅᓕᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ, ᐃᓚᖃᖅᓱᓂᒃ ᐆᑎᕐᓇᖅᑐᓂᒃ ᐊᒻᒪᓗ ᑕᕆᐅᑉ ᓯᑯᖓ ᐊᐅᑉᐸᓪᓕᐊᓂᖓ, ᐊᑦᑐᐃᓂᕐᓗᑦᑐᖅ ᐃᒪᐅᑉ ᐊᔾᔨᒌᙱᓐᓂᕈᓘᔭᕐᓂᖏᓐᓂᒃ ᐊᒻᒪᓗ ᓄᓇᓕᐅᔪᓂ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ ᑖᒃᑯᓂᖓ ᐃᒪᖁᑎᓂ ᐊᑐᖅᐸᑦᑐᓂᒃ ᐃᖏᕐᕋᓂᕐᒧᑦ ᐊᒻᒪᓗ ᓂᕿᑦᓴᖅᓯᐅᕐᓂᕐᒧᑦ ᐊᒻᒪᓗ ᑮᓇᐅᔾᔭᓴᕐᓂᕐᒧᑦ. ᑲᔪᖏᖅᓴᐃᓚᖓᔪᒍᑦ ᑭᖑᕙᖓᖏᑦᑐᒥᑦ ᐱᓕᕆᐊᖑᓂᖓ ᐊᒻᒪᓗ ᐊᑐᓕᖅᑎᑦᓯᓂᕐᒥᑦ ᑖᑦᓱᒥᖓ ᓄᓇᕐᔪᐊᓕᒫᒥ ᐊᖏᕈᑎᒥ ᑕᐃᒪᐃᑎᑦᓯᑦᑕᐃᓕᒪᓂᕐᒧᑦ ᐃᑎᔪᓂ ᑕᕆᐊᕐᓂ ᐃᖃᓗᓕᕆᓂᕐᒧᑦ ᐅᑭᐅᖅᑕᖅᑑᑉ ᑕᕆᐅᕐᔪᐊᖓᑕ ᕿᑎᑉᐸᓯᖓᓂ ᐊᒻᒪᓗ ᐊᖏᖅᓯᒪᔪᑦ ᐃᑲᔪᕐᓂᖃᑦᓯᐊᕐᓂᕐᒥᑦ ᑲᑐᔾᔨᖃᑎᒌᓐᓂᐅᔪᒧᑦ ᐱᓕᕆᐊᑦᓴᒧᑦ ᖃᐅᔨᓴᖅᑐᓕᕆᓂᕐᒧᑦ ᖃᐅᔨᓴᕐᓂᕐᒥᑦ ᐊᒻᒪᓗ ᓇᐅᑦᑎᖅᓱᕐᓂᕐᒥᑦ, ᑖᒃᑯᐊ ᐅᑭᐅᖅᑕᖅᑐᒥ ᐃᖃᓗᓕᕆᓂᕐᒨᖓᔪᑦ ᖃᐅᔨᓴᕐᓂᐅᔪᑦ ᐊᒻᒪᓗ ᓇᐅᑦᑎᖅᓱᕐᓂᐅᔪᑦ ᓂᕆᐅᒋᔭᐅᔪᑦ ᐊᒥᓱᕈᖅᐸᓪᓕᐊᓛᕐᓂᖏᓐᓂᒃ.

ᑲᓇᑕ ᐱᓕᕆᖃᑎᖃᕐᓂᐊᖅᑐᖅ ᖃᓂᒋᔭᖓᓃᑦᑐᓂᒃ ᐊᒻᒪᓗ ᐊᓯᖏᓐᓂᒃ ᓄᓇᖁᑎᒋᔭᐅᔪᓂᒃ ᒪᑭᒪᑎᑕᐅᑦᓯᐊᕐᓂᕐᒧᑦ ᐃᒫᓂ ᐊᖏᓂᖓᓄᑦ ᐊᐅᓚᑦᓯᓂᕐᒧᑦ ᐊᑐᖅᑕᐅᖃᓯᐅᑎᔪᓄᑦ ᑕᕆᐅᕐᔪᐊᑉ ᐃᓂᖏᓐᓂᒃ, ᐃᓚᒋᓗᓂᐅᒃ ᐋᖅᑭᑦᓱᐃᓂᕐᒥᑦ ᖃᐅᔨᔭᐅᓂᑯᓂᒃ ᑐᙵᕕᖃᕐᓂᕐᒥᑦ ᐃᒫᓂ ᓴᐳᔾᔭᐅᓯᒪᔪᓂᑦ ᐃᓂᒋᔭᐅᔪᓂᒃ. ᐱᓕᕆᐊᖃᕐᓂᐊᖅᑐᒍᑦ ᓄᓇᕐᔪᐊᓕᒫᒥ ᐱᐅᖅᓱᐊᕐᓂᕐᒧᑦ ᐊᒻᒪᓗ ᓴᐳᔾᔨᓂᕐᒥᑦ ᐃᒫᓂ ᐃᓂᒋᔭᐅᔪᓂᑦ ᓇᔪᒐᖃᕐᕕᐅᔪᓂᒃ, ᐆᒪᓂᖃᕐᕕᐅᔪᓂᒃ ᐊᒻᒪᓗ ᐃᓕᖅᑯᓯᕐᒧᑦ ᐱᒻᒪᕆᐅᒋᔭᐅᔪᓂᒃ, ᑭᓪᓕᒋᔭᐅᔪᑦ ᓯᓚᑖᓃᑐᐃᓐᓇᕆᐊᓖᑦ ᐅᕝᕙᓘᓐᓃᑦ ᑲᓇᑕᐅᑉ ᐃᒪᖁᑎᖏᑕ ᐅᖓᑖᓅᖓᑐᐃᓐᓇᕆᐊᓖᑦ. ᐱᓗᐊᙳᐊᖅᑐᒥ, ᑲᓇᑕ ᑲᑐᔾᔨᖃᑎᖃᕐᓂᐊᖅᑐᖅ ᐃᓄᐃᑦ ᓄᓇᓕᖏᓐᓂᒃ ᐊᒻᒪᓗ ᑲᑐᔾᔨᖃᑎᒌᖑᔪᓂᑦ, ᒐᕙᒪᒋᔭᐅᔪᓂᑦ ᓄᓇᕗᒻᒥ, ᑲᓛᖦᖡᑦ ᓄᓈᓐᓂ ᐊᒻᒪᓗ ᑎᐊᓐᒫᒃᒥ ᐊᒻᒪᓗ ᐃᓄᐃᑦ ᓄᓇᕐᔪᐊᒥ ᑲᑎᒪᔨᖏᓐᓂ ᐊᑐᓕᖅᑎᑦᓯᓂᕐᒥᑦ ᐆᑦᑐᕋᐅᑎᓂᒃ ᐱᓕᕆᐊᖃᕐᓂᕐᒧᑦ ᐊᑐᓕᖁᔭᐅᓯᒪᔪᓂᒃ ᐱᑭᐊᓚᓱᕐᓱᐊᖅ ᑲᑎᒪᔨᖏᓐᓄᑦ. ᖃᓄᐃᓕᐅᕆᐊᕐᓂᐊᖅᑐᒍᑦ ᐃᑲᔪᖅᓱᓂᕐᒥᑦ ᐱᕙᓪᓕᐊᑎᑦᓯᓂᕐᒥᑦ ᐅᑭᐅᖅᑕᖅᑐᓕᒫᒥᑦ ᑲᓲᒪᓂᐅᔪᒥᑦ ᐃᒫᓂ ᓴᐳᔾᔭᐅᓯᒪᔪᓂ ᐃᓂᒋᔭᐅᔪᓂᒃ ᐅᑭᐅᖅᑕᖅᑐᒥ ᑲᑎᒪᔨᓂᑦ ᐊᒻᒪᓗ ᑲᔪᓯᓚᖓᔪᒍᑦ ᑲᑐᔾᔨᖃᑎᖃᕐᓂᕐᒥᑦ ᓄᓇᖃᖅᑳᖅᓯᒪᔪᓂᑦ ᐃᓕᓴᖅᓯᓂᕐᒧᑦ ᐊᒻᒪᓗ ᐊᐅᓚᑦᓯᓂᕐᒧᑦ ᐃᓕᖅᑯᓯᕐᒧᑦ ᐊᒻᒪᓗ ᐊᕙᑎᓕᕆᓂᕐᒧᑦ ᐱᒻᒪᕆᐅᒋᔭᐅᔪᓂᒃ ᐃᓂᒋᔭᐅᔪᓂᒃ ᐊᒻᒪᓗ ᐱᓇᓱᐊᕐᓗᑕ ᖄᒃᑲᓐᓂᐊᒍᑦ ᐱᐅᖅᓱᐊᕐᓂᕐᒧᑦ ᐊᑐᖅᑕᐅᒍᓐᓇᖅᑐᓂᒃ, ᐃᓚᒋᓗᓂᒋᑦ ᑕᐃᒃᑯᐊ ᓯᕗᒧᐊᕈᑕᐅᓚᐅᖅᑐᑦ ᓄᓇᖃᖅᑳᖅᓯᒪᔪᑦ ᐊᐅᓚᑦᓯᔨᖏᓐᓄᑦ.

ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᖅ ᐅᑭᐅᖅᑕᖅᑑᑉ ᐃᒪᖁᑎᖏᓐᓂᒃ ᓂᕆᐅᒋᔭᐅᔪᖅ ᐊᒥᓱᕈᖅᐸᓪᓕᐊᓛᕐᓂᖏᓐᓂᒃ, ᓴᖅᑮᓪᓗᓂ ᐅᓗᕆᐊᓇᕈᑎᓂᒃ ᐊᑦᑕᕐᓇᖅᑐᒧᑦ ᐅᑭᐅᖅᑕᖅᑑᑉ ᐃᒪᖓᑕ ᐊᕙᑎᖓᓄᑦ ᐊᐅᓚᑎᑕᐅᑦᓯᐊᙱᒃᑯᓂ. ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᖅ ᐱᒻᒪᕆᐅᔪᖅ ᐊᐅᓚᑦᓯᓂᕐᒥᑦ ᑖᒃᑯᓂᖓ ᐅᓗᕆᐊᓇᕈᑎᐅᔪᓂᒃ ᓴᐳᔾᔨᓯᓐᓈᑦ ᓵᓚᖃᕋᓱᐊᕐᓂᐅᔪᒥᑦ, ᓄᓇᕐᔪᐊᕐᒥᑦ ᖃᓄᐃᓕᖓᓂᕆᔭᖓᓄᑦ ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᕐᒥᑦ. ᑖᓐᓇ ᓄᓇᕐᔪᐊᓕᒫᒥ ᒪᓕᒐᖅ ᐅᒥᐊᕐᔪᐊᓄᑦ ᐊᐅᓚᔪᓄᑦ ᐅᑭᐅᖅᑕᖅᑑᑉ ᐃᒪᖏᓐᓂᒃ, ᐊᑐᓕᖅᑎᑕᐅᓚᐅᖅᑐᖅ 2015-ᒥ ᐊᒻᒪᓗ ᖃᐅᔨᒪᔭᐅᓪᓗᓂ ᐅᑭᐅᖅᑕᖅᑐᒥ ᒪᓕᒐᐅᓂᕐᒥᑦ, ᐋᖅᑭᑦᓱᐃᔪᖅ ᓄᓇᕐᔪᐊᓕᒫᒥ ᐊᑦᑕᕐᓇᔾᔭᐃᖅᓯᒪᓂᕐᒧᑦ ᐊᒻᒪᓗ ᓱᕈᐃᑎᑦᓯᑦᑕᐃᓕᒪᓂᕐᒧᑦ ᒪᓕᒋᐊᓕᓐᓂᒃ. ᑲᓇᑕ ᑲᔪᓯᓚᖓᔪᖅ ᖃᐅᔨᓇᓱᐊᕐᓂᕐᒥᑦ ᐱᕕᑦᓴᖃᕐᓂᐅᔪᓂᒃ ᑖᒃᑯᓄᖓ ᓄᓇᕐᔪᐊᓕᒫᒥ ᓄᓇᓕᐅᔪᒧᑦ ᑲᒪᒋᔭᖃᕐᓂᕐᒧᑦ ᐊᑦᑕᕐᓇᔾᔭᐃᖅᓯᒪᓂᕐᒥᑦ ᐊᒻᒪᓗ ᐃᓛᒃᑰᖓᔪᓂᒃ ᐊᕙᑎᓕᕆᓂᕐᒧᑦ ᐃᓱᒫᓘᑕᐅᔪᓄᑦ ᒫᓐᓇᐅᔪᖅ ᑲᒪᒋᔭᐅᙱᑦᑐᓂᑦ ᐅᑭᐅᖅᑕᖅᑐᒥ ᒪᓕᒐᖓᓄᑦ, ᐃᓚᒋᓗᓂᐅᒃ ᐊᑐᓕᖅᑎᑕᐅᑐᐃᓐᓇᕆᐊᖃᕐᓂᖓᓄᑦ ᐊᓯᖏᓐᓄᑦ ᐊᔾᔨᒌᙱᑦᑐᓄᑦ ᐅᒥᐊᕐᔪᐊᓄᑦ, ᐃᓱᒫᓘᑕᐅᔪᓄᓪᓗ ᓲᕐᓗ ᐃᒪᐅᑉ ᐃᖅᑲᖓᓂ ᓂᐱᖃᕐᓂᕐᒧᑦ ᐊᒻᒪᓗ ᓯᐊᕐᓇᕐᒧᑦ ᐃᒪᕐᒧᑦ. ᐃᑲᔪᖅᓱᕐᓂᐊᖅᑐᒍᑦ ᓄᓇᕐᔪᐊᓕᒫᒥ ᐊᑦᓱᕈᕐᓂᕆᔭᐅᔪᓂᒃ ᐱᑕᖃᓗᐊᖅᑕᐃᓕᒪᑎᑦᓯᓂᕐᒥᑦ ᐅᓗᕆᐊᓇᕐᓂᐅᔪᓂᒃ ᓴᖅᑭᑕᐅᔪᓂᑦ ᐅᖁᒪᐃᑦᑐᓄᑦ ᐅᖅᓱᐊᓗᓐᓄᑦ. ᓯᕗᒧᐊᖅᑎᑦᓯᓚᖓᒻᒥᔪᒍᑦ ᐊᑦᓱᕈᕈᑕᐅᔪᓂᒃ ᐅᑭᐅᖅᑕᖅᑐᒥ ᑲᑎᒪᔨᓂᑦ ᐊᒻᒪᓗ ᐊᓯᖏᓐᓂ ᑲᑎᖃᑦᑕᕐᓂᐅᔪᓂᒃ ᐃᑲᔪᖅᓱᓂᕐᒧᑦ ᐊᕙᑎᓕᕆᓂᕐᒧᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᑐᕌᒐᑦᓴᐅᔪᓂᒃ ᐊᑦᑐᐃᓂᖃᓗᐊᙱᑦᑐᓂᒃ ᐅᒥᐊᕐᔪᐊᒃᑯᑦ ᐅᓯᖃᑦᑕᕐᓂᕐᒧᑦ ᐊᖅᑯᑎᐅᔪᓂᒃ, ᐃᓕᓴᖅᓯᓂᕐᒥᑦ ᐊᑦᑕᕐᓇᙱᑦᑐᑦ ᐊᒻᒪᓗ ᐊᑑᑎᖃᑦᓯᐊᖅᑐᑦ ᐃᒪᒃᑯᑦ ᐃᖏᕐᕋᔪᓕᕆᓂᖅ ᐱᓪᓗᐊᑕᐅᔪᖅ ᑮᓇᐅᔾᔭᓴᕐᓂᒃᑯᑦ ᐱᕙᓪᓕᐊᑎᑦᓯᓂᕐᒥᑦ ᐊᒻᒪᓗ ᑮᖏᔾᔮᖅᓯᓂᕐᒥᑦ ᓂᐅᕐᕈᑎᖃᕐᓂᕐᒧᑦ ᐱᕕᑦᓴᖃᕐᓂᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ.

ᑲᓇᑕ ᑲᔪᓯᓚᖓᔪᖅ ᐃᓚᐅᑦᓯᐊᕐᓂᕐᒥᑦ ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᕐᒥᑦ ᐱᑕᖃᓗᐊᖅᑕᐃᓕᒪᑎᑦᓯᓂᕐᒥᑦ ᐊᓂᐊᖃᑦᑕᖅᑐᓂᒃ ᓱᕈᕐᓇᖅᑐᓂᑦ ᐅᓗᕆᐊᓇᕈᑕᐅᑐᐃᓐᓇᕆᐊᓕᓐᓂ ᐃᓅᑉ ᑎᒥᖓᓄᑦ (ᐱᓗᐊᙳᐊᖅᑐᒥ ᓄᓇᖃᖅᑳᖅᓯᒪᔪᓄᑦ ᐊᕐᓇᖏᓐᓄᑦ ᐊᒻᒪᓗ ᓱᕈᓯᖏᓐᓄᑦ), ᐆᒪᔪᓄᑦ ᐊᒻᒪᓗ ᐊᕙᑎᒧᑦ. ᑖᒃᑯᐊ ᓱᕈᕐᓇᖅᑐᑦ ᐊᓯᐊᓂᙶᕐᖓᖃᑦᑕᕋᓗᐊᖅᑎᓪᓗᒋᑦ, ᐅᑭᐅᖅᑕᖅᑐᓕᒫᒥ ᓇᓂᔭᐅᖃᑦᑕᖅᑐᑦ ᐊᒻᒪᓗ ᐃᓚᖃᖅᑐᑦ ᐆᒪᔪᓂᒃ ᓱᕈᕐᓇᖅᑐᓂᒃ (POP), ᒨᑯᕆ, ᐃᓚᐅᕈᑎᑦᓴᑦ ᓴᖅᑭᑉᐸᓪᓕᐊᔪᓂᒃ ᐃᓱᒫᓘᑕᐅᔪᓂᒃ, ᐅᓗᕆᐊᓇᖅᑐᑦ ᐊᑦᑕᑯᒥᓃᑦ ᐊᒻᒪᓗ ᐊᓯᖏᑦ ᐊᔾᔨᒌᙱᑦᑐᑦ ᐊᑦᑕᑯᖅᑕᐅᓂᑯᓂᑦ ᓲᕐᓗ ᐃᒫᓂ ᓴᓂᕐᓂᒃ ᐊᒻᒪᓗ ᐊᐅᑦᑕᔫᕋᓛᓂᒃ. ᑲᓇᑕ ᓴᓇᓂᐊᖅᑐᖅ ᑲᔪᓯᓂᖃᑦᓯᐊᕐᓂᖓᓂ ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᕐᒧᑦ ᑕᐃᑳᓇ ᐅᑭᐅᖅᑕᖅᑐᒥ ᑲᑎᒪᔨᒃᑯᑦ, ᔫᓇᐃᑕᑦ ᓇᐃᓴᓐ ᑲᑐᔾᔨᖃᑎᒌᖑᔪᓂ ᐊᒻᒪᓗ ᐊᓯᖏᓐᓂ ᑲᑎᖃᑦᑕᕐᓂᐅᔪᓂᒃ ᖃᐅᔨᒪᑦᓯᐊᕆᐊᕐᓂᕐᒥᑦ ᓴᖅᑭᔮᖅᑐᑦ ᐊᒥᓲᓕᖅᑲᖓᔪᑦ ᐊᖏᕈᑏᑦ ᐆᒪᔪᓂᒃ ᓱᕈᕐᓇᖅᑐᓂᒃ (POP) ᐊᒻᒪᓗ ᒨᑯᕆᒧᑦ ᐊᑐᓕᖅᑎᑕᐅᓗᑎᒃ, ᓄᑖᓂᒃ ᓱᕈᐃᑦᑕᐃᓕᒪᓗᑎᒃ ᐊᒻᒪᓗ ᐊᑑᑎᖃᕐᓂᖏᑦ ᑖᒃᑯᐊ ᐊᖏᕈᑏᑦ ᓇᐅᑦᑎᖅᓱᖅᑕᐅᓗᑎᒃ. ᐱᓕᕆᐊᖃᕐᓂᐊᕐᒥᔪᒍᑦ ᐅᖓᕙᕆᐊᖅᓯᓂᕐᒥᑦ ᐊᑐᖅᑕᐅᓂᖓ ᑕᕆᐅᕐᔪᐊᕐᒥᑦ ᐊᐅᑦᑕᔫᓄᑦ ᒪᓕᒋᐊᓕᒃ ᐊᓯᖏᓐᓄᑦ ᓄᓇᓕᕐᔪᐊᓄᑦ ᐊᒻᒪᓗ ᑲᔪᖏᖅᓴᐃᓗᑕ ᖃᓄᐃᓕᐅᕆᐊᒃᑲᓐᓂᓂᕐᒧᑦ ᐅᑭᐅᖅᑕᖅᑐᒥ ᓄᓇᖁᑎᒋᔭᐅᔪᓂᑦ ᐃᒫᓂ ᓴᓂᕐᓄᑦ, ᐃᓚᒋᓗᓂᒋᑦ ᐊᐅᑦᑕᔫᑦ ᐊᒻᒪᓗ ᐊᐅᑦᑕᔫᕋᓛᑦ.

ᑲᓇᑕ ᖃᐅᔨᒪᑦᓯᐊᕆᐊᕐᓂᐊᖅᑐᖅ ᓄᓇᕐᔪᐊᓕᒫᒥ ᐃᑲᔪᖅᑎᒌᓐᓂᖅᑕᖃᕐᓗᓂ ᐊᑑᑎᖃᑦᓯᐊᖅᑐᒃᑯᑦ ᐱᐅᖅᓱᐊᕐᓂᕐᒧᑦ ᐅᑭᐅᖅᑕᖅᑑᑉ ᐊᔾᔨᒌᙱᓐᓂᕈᓘᔭᕐᓂᖏᓐᓂᒃ. ᖃᐅᔨᒪᑦᓯᐊᕆᐊᕐᓂᐊᖅᑐᒍᑦ ᓴᖅᑭᔮᖅᑐᑦ ᓄᓇᕐᔪᐊᓕᒫᒥ ᐊᖏᕈᑎᐅᔪᑦ ᐊᑐᓕᖅᑎᑕᐅᓗᑎᒃ, ᒪᓕᑦᑕᐅᑦᑎᐊᒃᓗᑎᒃ ᐊᒻᒪᓗ ᐊᑑᑎᖃᐃᓐᓇᕐᓗᑎᒃ ᐱᐅᖅᓱᐊᕐᓂᕐᒥᑦ ᐅᑭᐅᖅᑕᖅᑑᑉ ᐊᔾᔨᒌᙱᓐᓂᕈᓘᔭᕐᓂᖏᓐᓂᒃ. ᐱᓗᐊᙳᐊᖅᑐᒥ, ᓯᕗᓪᓕᐅᔾᔨᓚᖓᔪᒍᑦ ᐃᑲᔪᖅᑎᒌᓐᓂᕐᒥᑦ ᐊᒥᐊᓕᒐᒥ ᖃᐅᔨᒪᑦᓯᐊᕆᐊᕐᓂᕐᒥᑦ ᓴᐳᔾᔭᐅᓂᖏᑦ ᐊᒻᒪᓗ ᐅᖓᓯᑦᑐᒧᑦ ᐆᒪᒍᓐᓇᕐᓂᖏᑦ ᐳᐊᑭᐸᐃᓐ ᑐᒃᑐᖁᑎᖏᑦ, ᐆᒪᔪᖁᑎᒋᔭᐅᔪᑦ ᐱᒻᒪᕆᐅᔪᑦ ᒍᐃᑦᓯᓐ ᐃᓕᖅᑯᓯᖓᓄᑦ ᐊᒻᒪᓗ ᐃᓅᓯᖏᓐᓄᑦ. ᑲᔪᓯᑎᑦᓯᓂᐊᖅᑐᒍᑦ ᐱᓕᕆᐊᖃᕐᓂᕐᒥᑦ ᐊᒻᒪᓗ ᐊᑑᑎᖃᖅᑐᒥᒃ ᐱᔭᑦᓴᕆᔭᑦᑎᓐᓂᒃ ᑐᕌᖓᔪᓄᑦ ᓄᑖᒧᑦ ᔫᓇᐃᑕᑦ ᓇᐃᓴᓐ ᐊᖏᕈᑎᖓᓄᑦ ᐱᐅᖅᓱᐊᕐᓂᕐᒧᑦ ᐊᒻᒪᓗ ᒪᑭᒪᑎᑕᐅᑦᓯᐊᕐᓂᕐᒧᑦ ᐊᑐᑦᓯᐊᕐᓂᕐᒥᑦ ᐃᒫᓂ ᐊᔾᔨᒌᙱᓐᓂᕈᓘᔭᕐᓂᖏᓐᓂᒃ ᐃᓂᒋᔭᐅᔪᓂᒃ ᑲᓇᑕᐅᑉ ᐊᐅᓚᓂᕆᔭᖓ ᓯᓚᑖᓂ. ᖃᐅᔨᒪᑦᓯᐊᕆᐊᓚᖓᒻᒥᔪᒍᑦ ᑲᔪᓰᓐᓇᖅᑐᒥ ᓄᓇᖃᖅᑳᖅᓯᒪᔪᑦ ᑭᒡᒐᖅᑐᖅᑕᐅᓗᑎᒃ ᒪᕐᕈᐃᓕᖅᑲᖓᔪᓄᑦ ᑲᓇᑕᒥ ᐊᐅᓚᑦᓯᓂᕐᒧᑦ ᑲᑎᒪᔨᐅᔪᓂᒃ, ᓲᕐᓗ ᔫᑳᓐ ᑰᖓᓄᑦ ᐅᖃᓕᒪᖅᑎᐅᔪᑦ ᐊᒻᒪᓗ ᐳᐊᑭᐸᐃᓐ ᑐᒃᑐᓄᑦ ᐊᐅᓚᑦᓯᓂᕐᒧᑦ ᑲᑎᒪᔨᐅᔪᓂᒃ.

ᐊᑕᐅᑦᓯᒃᑯᑦ, ᑲᓇᑕ ᓂᐱᖁᑎᒋᔭᐅᓂᐊᖅᑐᖅ ᓄᓇᕐᔪᐊᓕᒫᒥ ᐊᑦᑐᕈᕈᑕᐅᔪᓄᑦ ᐃᑲᔪᖅᓱᖅᑕᐅᙱᑦᑐᓄᑦ ᖃᐅᔨᓴᖅᑐᓕᕆᓂᕐᒧᑦ ᐅᕝᕙᓘᓐᓃᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᕆᔭᖏᓐᓄᑦ ᓄᖅᑲᖓᓕᖅᑎᑦᓯᒐᓱᐊᖅᑐᓄᑦ ᒪᑭᒪᑎᑕᐅᑦᓯᐊᕐᓂᕐᒧᑦ ᐊᑐᑦᓯᐊᕐᓂᕐᒥᑦ ᐅᑭᐅᖅᑕᖅᑑᑉ ᐆᒪᔪᖁᑎᖏᓐᓂᒃ. ᖃᐅᔨᒪᑦᓯᐊᕆᐊᖏᓐᓇᓚᖓᔪᒍᑦ ᓄᓇᖃᖅᑳᖅᓯᒪᔪᑦ ᐊᒻᒪᓗ ᓂᐅᕕᐊᑦᓴᖃᕐᓂᕐᒧᑦ ᐊᖑᓇᓱᐊᕐᓂᖅ ᐅᑭᐅᖅᑕᖅᑐᒥ ᐆᒪᔪᖁᑎᖏᓐᓂᒃ ᑲᓇᑕᒥ ᒪᑭᒪᑎᑕᐅᑦᓯᐊᕐᓂᕐᒧᑦ ᐊᒻᒪᓗ ᐊᐅᓚᑕᐅᑦᓯᐊᕐᓗᓂ, ᐊᒻᒪᓗ ᑖᒃᑯᐊ ᐃᑲᔫᑎᑦᓴᑦ ᐱᐅᖅᓱᐊᖅᑕᐅᓗᑎᒃ ᓯᕗᓂᑦᓴᒥᑦ ᑭᖑᕚᕆᓛᖅᑕᑦᑎᓐᓄᑦ.

ᑐᕌᒐᑦᓴᖅ: ᓴᐃᒻᒪᖃᑎᒌᓐᓂᕐᒧᑦ ᐃᑲᔪᖅᓱᖅᑐᖅ ᓇᒻᒥᓂᖅ ᐱᓕᕆᐊᖃᕈᒪᓂᕐᒥᑦ ᐊᒻᒪᓗ ᐃᑲᔪᕐᓂᖃᖅᑐᖅ ᑕᒪᐃᓐᓄᑦ ᐃᑉᐱᒍᓱᑦᓯᐊᕐᓂᒃᑯᑦ ᐃᓅᖃᑎᒌᓐᓂᐅᔪᓂᒃ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᓄᓇᖃᖅᑳᖅᓯᒪᙱᑦᑐᓄᑦ

ᑲᓇᑕᐅᑉ ᓄᓇᕐᔪᐊᓕᒫᒥ ᐃᓚᐅᓂᕆᔭᖓ ᐃᑲᔫᑎᖃᕐᓂᐊᖅᑐᖅ ᑖᑦᓱᒧᖓ ᑐᕌᖅᑕᐅᒐᓱᐊᖅᑐᒧᑦ:

  • ᑎᒍᒃᑲᓐᓂᓂᕐᒥᑦ, ᐆᒪᑎᑦᓯᒃᑲᓐᓂᓂᕐᒥᑦ, ᑲᔪᓯᑎᑦᓯᓂᕐᒥᑦ ᐊᒻᒪᓗ ᓴᙱᓂᖅᓴᐅᓕᖅᑎᑦᓯᓂᕐᒥᑦ ᐃᓕᖅᑯᓯᕆᔭᐅᔪᓂᒃ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᖃᖅᑳᖅᓯᒪᔪᓄᑦ, ᐃᓚᒋᓗᓂᒋᑦ ᐅᖃᐅᓯᖏᑦ ᐊᒻᒪᓗ ᖃᐅᔨᒪᔾᔪᓯᖏᑦ

ᑲᓇᑕ ᐊᑐᓚᖓᔪᖅ ᓄᓇᕐᔪᐊᓕᒫᒥ ᐃᓚᐅᓂᕆᔭᖓᓂ ᐱᐅᖅᓱᐊᕐᓂᕐᒧᑦ ᐊᒻᒪᓗ ᓴᖅᑭᔮᖅᑎᑦᓯᓂᕐᒧᑦ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ, ᐊᒥᓱᑦ ᐅᖓᓯᓐᓂᓖᑦ ᑲᓇᑕᐅᑉ ᑭᓪᓕᒋᔭᖏᓐᓂᒃ. ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐱᒻᒪᕆᐅᔪᑦ ᐊᓯᐅᔨᑦᑕᐃᓕᒪᓂᕐᒧᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖓᓂ ᐊᒻᒪᓗ ᖃᓄᐃᙱᑦᓯᐊᕐᓂᖏᓐᓂᒃ ᓄᓇᖃᖅᑳᖅᓯᒪᔪᑦ ᐊᒻᒪᓗ ᓄᓇᓕᖏᓐᓂ. ᐱᔾᔪᑎᒋᓪᓗᒍ ᓄᓇᕐᔪᐊᕐᒥ ᐊᒻᒪᓗ ᑭᖑᓂᑦᑎᓐᓂ ᒐᕙᒪᒋᔭᐅᓚᐅᖅᑐᓂᒃ ᐊᑐᐊᒐᕐᓂᒃ, ᐆᒪᓂᕆᔭᖓ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᓄᓇᕐᔪᐊᑉ ᐅᑭᐅᖅᑕᖅᑐᓕᒫᖓᓂ ᐅᓗᕆᐊᓇᖅᑐᒦᓕᖅᐸᓪᓕᐊᑐᐃᓐᓇᖅᑐᑦ. ᐱᓕᕆᖃᑎᒋᓚᖓᔭᕗᑦ ᐅᑭᐅᖅᑕᖅᑐᒥ ᑲᑐᔾᔨᖃᑎᒋᔭᕗᑦ ᐋᖅᑭᑦᓱᐃᓂᕐᒥᑦ ᖃᐅᔨᒪᓂᐅᔪᓂᒃ ᑐᓂᓯᖃᑦᑕᐅᑎᓂᕐᒧᑦ ᐊᒻᒪᓗ ᐱᓕᕆᔾᔪᓯᑦᓯᐊᕙᐅᓛᖑᔪᓂᒃ ᑐᕌᖓᔪᓂᒃ ᓄᓇᖃᖅᑳᖅᓯᒪᔪᑦ ᐅᖃᐅᓯᓕᕆᓂᕐᒧᑦ ᖃᐅᔨᓴᖅᑕᐅᓂᖏᓐᓄᑦ, ᓇᐅᑦᑎᖅᓱᖅᑕᐅᓂᖏᓐᓄᑦ ᐊᒻᒪᓗ ᐆᒪᑎᑦᓯᒃᑲᓐᓂᓂᕐᒧᑦ.

ᑲᓇᑕ ᑕᑯᑦᓴᐅᑎᑦᓯᓚᖓᔪᖅ ᓄᓇᕐᔪᐊᕐᒥ ᓇᒻᒥᓂᕆᔭᖓᓂ ᐅᑭᐅᖅᑕᖅᑐᒥ ᐊᒻᒪᓗ ᐅᐊᓐᓇᖓᓂ ᓴᓇᙳᐊᒐᓕᕆᓂᕐᒥᑦ ᐊᒻᒪᓗ ᐃᓕᖅᑯᓯᓕᕆᓂᕐᒥᑦ. ᓴᓇᙳᐊᖅᑐᓕᕆᓂᖅ ᐊᒻᒪᓗ ᐃᓕᖅᑯᓯᓕᕆᓂᖅ ᐱᒻᒪᕆᐅᖃᑕᐅᓯᒪᔫᒃ ᓇᒻᒥᓂᖅ ᓴᖅᑭᔮᖅᑎᑦᓯᓂᕐᒥᑦ ᓴᙱᓂᖅᓴᐅᓕᖅᑎᑦᓯᓯᒪᔪᑦ ᐃᓱᒪᒃᑯᑦ ᐊᒻᒪᓗ ᐅᑉᐱᕐᓂᒃᑯᑦ ᖃᓄᐃᙱᑦᓯᐊᕐᓂᕐᒥᑦ ᐊᒻᒪᓗ ᐱᒻᒪᕆᐅᒋᔭᐅᔪᑦ ᑮᓇᐅᔾᔭᓴᕐᓂᕐᒧᑦ ᓄᓇᖃᖅᑳᖅᓯᒪᔪᓄᑦ. ᑲᔪᖏᖅᓴᐃᓚᖓᔪᒍᑦ ᐊᒻᒪᓗ ᐱᒍᓐᓇᖅᑎᑦᓯᓗᑕ ᑲᑐᔾᔨᖃᑎᒌᓗᑎᒃ ᑖᒃᑯᐊ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ ᓄᓇᖃᖅᑳᖅᓯᒪᔪᑦ ᐊᒻᒪᓗ ᓄᓇᖃᖅᑳᖅᓯᒪᙱᑦᑐᑦ ᓴᓇᙳᐊᖅᑏᑦ, ᓴᖅᑭᑎᑦᓯᔩᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᑐᑦᑕᕐᕕᐅᔪᑦ ᓄᓇᕐᔪᐊᑉ ᐅᑭᐅᖅᑕᖅᑐᓕᒫᖓᓂ. ᓴᙱᓂᖅᓴᐅᓕᖅᑎᑦᓯᓚᖓᒻᒥᔪᒍᑦ ᓄᓇᕐᔪᐊᓕᒫᒥ ᓂᐅᕕᐊᑦᓴᖃᕐᓂᕐᒧᑦ ᐊᒻᒪᓗ ᓴᖅᑭᔮᖅᑎᑦᓯᓂᕐᒥᑦ ᓴᓇᙳᐊᖅᑎᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒻᒪᓗ ᐅᐊᓐᓇᖓᓂ.

ᐅᓪᓗᖓᓂ ᐋᖅᑭᒋᐊᖅᑕᐅᔪᖅ:
sasasas