ᐅᖃᖅᑕᖏᑦ ᐃᔾᔪᕐᓇᐃᓐᓂᖓᑕ ᐃᒃᓯᕋᕐᔪᐊᕌᐱᒃ ᕗᕋᓐᓯᔅ, ᓯᐊᑕᓪ ᑯᐸᐃᒃᒥ

ᒪᑕᒻ ᒐᕙᓄ ᔨᐊᓄᕈᓪ,
ᒥᔅᑐ ᐳᕋᐃᒻ ᒥᓂᔅᑕ,
ᐃᓕᓴᕆᔭᐅᓯᒪᔪᑦ ᒐᕙᒪᓄᑦ ᐅᒃᐱᕐᓂᓕᕆᓂᕐᓄᓪᓗ ᐱᔪᓐᓇᕐᓂᓖᑦ,
ᑭᒡᒐᖅᑐᖅᑎᐊᐃᓐᓄᐃᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, 
ᐅᐱᓐᓇᖅᑐᑦ ᐃᓚᒋᔭᐅᔪᑦ ᐊᖏᖃᑎᒌᒃᑎᑦᑎᔩᑦ, 
ᐊᕐᓇᐃᑦ ᐊᖑᑏᓪᓗ!

ᑐᙵᓱᒃᑎᖦᖢᓯ ᐅᐸᒃᐸᔅᓯ ᖁᔭᒋᕙᕋᓗ ᐊᔪᖏᕐᔪᐊᕐᓂᖓ ᐅᐱᓐᓇᑦᑎᐊᖅᑐᖅ ᒥᐊᕆ ᓴᐃᒪᓐ ᐅᐱᓐᓇᑦᑎᐊᖅᑐᕐᓗ ᔭᔅᑎᓐ ᑐᕉᑐ ᐱᑦᑎᐊᖅᑐᓄᑦ ᐅᖃᐅᓯᖏᓐᓄᑦ. ᐊᓕᐊᓇᐃᒍᓱᒃᑐᖓ ᐅᖃᕐᕕᒋᔪᓐᓇᕋᔅᓯ, ᐱᓕᕆᐊᒃᓴᓖᑦ ᐱᔨᑦᑎᕋᕐᓗᑎᒃ ᑖᔅᓱᒧᖓ ᐊᔪᖏᑦᑐᐊᓗᖕᒧᑦ ᒐᕙᒪᖃᑎᒌᓄᑦ, "ᑕᕆᐅᕐᒥᑦ ᑕᕆᐅᕐᒧᑦ", ᓴᖅᑭᔮᖅᑎᑦᑎᒐᔅᓯ ᑲᒪᓇᖅᑐᓪᓛᓗᖕᒥᒃ ᓄᓇᓂ ᖃᓄᐃᓯᒪᔪᓂᒃ. ᐃᓚᒋᓪᓗᓂᐅᒃ ᐅᓄᖅᑐᓄᑦ ᑲᔾᔮᕐᓇᕐᓂᐊᓗᖕᒥᓄᑦ, ᐃᓱᒪᒋᕙᒃᑲ ᐊᖏᔪᕐᔪᐊᑦ ᑕᑯᒥᓇᖅᑐᓪᓛᓗᐃᓪᓗ ᒪᐃᐳᑦ ᓇᐹᖅᑐᐊᓗᐃᑦ ᑲᓇᑕᒥ ᓄᓇᖏᑦ ᐊᔾᔨᖃᕋᑎᒃ ᑕᖅᓴᕆᒃᑑᔾᔪᑎᖏᑦ ᐊᔾᔨᒌᖏᔾᔪᑎᒋᓪᓗᓂᒋᓪᓗ. ᐱᒋᐊᕈᑎᒋᔪᒪᔭᕋ ᓇᓗᓇᐃᒃᑯᑕᖅ ᐱᐅᓛᖅ ᑖᒃᑯᓇᓂ ᓄᓇᓂ, ᒪᐃᐴᑉ ᐃᕕᐊ, ᐱᒋᐊᖅᖢᓂ ᓇᓗᓇᐃᒃᑯᑕᐅᓪᓗᓂ ᑯᐸᐃᒃᒧᑦ, ᐊᑯᓂᐅᖏᑦᑐᖅ ᓇᒧᕈᓘᔮᖅᖢᓂ ᓇᓗᓇᐃᒃᑯᑕᐅᓕᖅᖢᓂ ᒐᕙᒪᑐᖃᒃᑯᓐᓄᑦ.

ᑕᐃᓐᓇ ᓴᓇᓂᖅ ᑕᐃᒪᐃᓚᐅᖅᑐᖅ ᖃᖓᑦᑎᐊᐸᓗᒃ, ᑭᓯᐊᓂ ᒪᐃᐳᑦ ᓇᐹᖅᑐᑦ ᐳᐃᒍᔾᔭᐃᖅᓯᕗᑦ ᐅᓄᖅᑐᓂᒃ ᕿᒪᒃᑕᑦᑎᓐᓂ ᑭᖑᕚᕇᓂᒃ, ᐱᒋᐊᖅᖢᑎᒃ ᑎᒫᓂᓪᓛᓗᒃ ᑕᕆᐅᑉ ᐊᑭᐊᓂᕐᒥᐅᑦ ᑎᑭᕕᙵᓂᑦ ᑲᓇᑕᐅᑉ ᓄᓇᖓᓄᑦ. ᓄᓇᖃᖅᑳᖅᓯᒪᔪᑦ ᐃᓄᐃᑦ ᐱᖃᑦᑕᓚᐅᖅᑐᑦ ᒪᐃᐳᑦ ᐃᔅᓯᖏᓐᓂᒃ, ᑖᒃᑯᐊᓗ ᓴᓇᔾᔪᑎᒋᓪᓗᒋᑦ ᒪᒪᖅᑐᓂᒃ ᑎᒥᓄᓪᓗ ᐱᐅᔪᓂᒃ ᓰᕐᓇᓂᒃ. ᑖᓐᓇ ᐃᓱᒪᔾᔪᑎᒋᕙᕗᑦ ᐱᓕᕆᒃᑲᐅᓂᖏᓐᓂᒃ ᐃᓱᒪᒌᓐᓇᐅᔭᖅᑕᖏᓪᓗ ᓴᐳᑎᓗᒋᑦ ᓄᓇᐃᑦ ᐊᕙᑏᓪᓗ, ᒪᓕᒡᓗᑎᒃ ᐃᓅᖃᑎᒌᑦᑎᐊᖅᑐᓄᑦ ᑕᑯᔭᐅᔪᒧᑦ ᓴᓇᓂᕐᓄᑦ ᒪᑐᐃᖓᔪᑐᑦ ᐅᖃᓕᒫᒐᑐᑦ ᐃᓕᓴᐃᔪᒧᑦ ᐃᓄᖕᓂᒃ ᓇᒡᓕᒍᓱᖕᓂᕐᒥᒃ ᓴᓇᔨᒥᒃ ᐃᓅᖃᑎᒋᓗᒋᓪᓗ ᐊᓰᑦ ᐆᒪᔪᑦ. ᐃᓕᓪᓚᒍᓐᓇᖅᑐᒍᑦ ᑖᔅᓱᒪᙵᑦ ᐱᔪᓐᓇᕐᓂᕐᒥᒃ ᓈᓪᓚᑦᑎᐊᓪᕈᑕ ᒎᑎᒥᒃ, ᐃᓄᖕᓄᑦ ᓯᓚᒥᐅᑕᓄᓪᓗ. ᐱᔭᕆᐊᖃᖅᖢᑎᒍᓪᓗ, ᐱᓗᐊᖅᑐᒥᒃ ᐊᑯᓐᓂᖏᓐᓂ ᐅᐃᒪᓇᖅᑐᑦ ᑐᐊᕕᖅᑐᐊᓗᐃᓪᓗ ᐊᐅᓚᓂᖏᓐᓂ ᐅᓪᓗᒥᐅᑉ ᓄᓇᕐᔪᐊᖓᓂ, ᓇᓗᓇᐃᖅᑕᐅᕙᓪᓕᐊᓪᓗᑎᒃ ᑕᕝᕙᐅᖏᓐᓇᖅᑐᒧᑦ "ᑐᐊᕕᓕᒃᑲᓐᓂᕐᓃᑦ"ᓄᑦ, ᐊᒃᓱᕈᕐᓇᖅᓯᑎᖦᖢᒍ ᐃᓄᓪᓚᑦᑖᓂᑦ, ᑲᔪᓰᓐᓇᕈᓐᓇᖅᑐᒃᑯᑦ ᐃᓚᐅᑎᑦᑎᔪᒃᑯᓪᓗ ᓴᓇᓂᕐᓄᑦ (cf. ᓚᐅᑕᑐ ᓯ', 18), ᓴᓇᓕᖅᖢᓂᓗ "ᐃᓅᓯᖃᑎᒌᓂᒃ ᑕᖃᖓᔪᓂᒃ ᐅᒃᐱᓱᓱᖃᕈᓐᓃᖅᑐᓂᒡᓗ", ᑕᐃᒪᐃᖦᖢᓂ ᐃᓕᖅᑯᓯᕐᒧᑦ ᐅᑎᒐᕐᓂᕈᓐᓃᔭᖦᖢᓂ ᐱᔪᒪᓂᕐᓄᑦ ᐃᓱᒪᒃᓴᕐᓂᐅᕐᓂᕐᓂᒃ, ᐱᓪᓚᑦᑖᖅᑐᓂᒃ ᐃᓅᖃᑎᒌᖕᓂᕐᓄᑦ, ᑲᒪᓇᕐᓂᕐᓄᑦ ᑲᑎᙵᓂᕐᓂᑦ. ᖃᓄᑎᒋ ᓈᓚᖃᑦᑕᐅᑎᔭᕆᐊᖃᕐᓂᕗᑦ ᐅᖃᖃᑎᒌᒡᓗᑕᓗ, ᕿᒪᒋᐊᖁᓪᓗᒍ ᐱᕙᓪᓕᐊᔪᑦ ᐃᓄᑑᓕᕆᓂᓕᕆᔪᑦ, ᑐᐊᕕᖅᑐᓂᑦ ᐃᒪᐃᑦᑐᕐᖑᓈᕐᓃᑦ, ᓇᒧᓕᒫᖅ ᐱᓗᐊᒪᔮᕐᓃᑦ ᐱᔪᒪᓃᓪᓗ ᓄᓇᕐᔪᐊᖅ ᐊᕕᒃᑐᕐᓗᒍ ᐱᐅᔪᓄᑦ ᐱᐅᖏᑦᑐᓄᓪᓗ ᐃᓄᖕᓄᑦ! ᐊᖏᓂᖏᑦ ᒪᐃᐳᑦ ᐃᕕᖏᑕ, ᐃᔅᓴᐅᑎᓲᑦ ᓱᕈᓂᒃ ᓯᓚᓂᒃ ᑐᓂᓯᓕᕆᓪᓗᑎᒃ ᐊᓂᕐᓂᕐᓂᒃ, ᖃᐃᖁᔨᕗᑦ ᐅᕙᑦᑎᓐᓂᒃ ᑲᒪᖁᓪᓗᑕ ᐱᐅᓂᖏᓐᓂᒃ ᓴᓇᓯᒪᓃᑦ ᖁᔭᒋᓗᒋᓪᓗ ᐱᐅᔪᑦ ᑐᙵᕖᑦ ᑕᕝᕙᐅᔪᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᑐᖃᖏᓐᓂ. ᐱᔪᒪᓕᖅᑎᑦᑎᔪᓐᓇᖅᑐᑦ ᐅᕙᑦᑎᓐᓂᓕᒫᖅ, ᐃᑲᔪᕐᓗᑎᒡᓗ ᒪᒥᑎᓪᓗᒋᑦ ᓱᕋᐃᔭᑦᑐᑦ ᑕᐃᒪᐃᓕᕈᓰᑦ ᐊᑐᒐᖃᕋᓱᖕᓃᑦ. ᐊᑐᒐᖃᕐᓂᖅ ᓴᓇᓯᒪᔪᑐᐊᖑᖏᑦᑐᓂᒃ ᑭᓯᐊᓂᑦᑕᐅᖅ ᐱᕕᖃᕐᓂᕐᓂᒃ ᐃᓅᖃᑎᒌᖕᓂᕐᓂᒡᓗ, ᑐᙵᑎᖦᖢᒋᓪᓗ ᐃᓄᐃᑦ ᐱᓕᕆᓂᖏᑦ ᐊᑑᑎᓕᑐᐊᓄᑦ ᑮᓇᐅᔭᓕᐅᕈᓐᓇᖅᑐᑐᐊᓄᓪᓗ.

ᑖᒃᑯᐊ ᐊᑑᑎᖃᑦᑎᐊᖅᑐᑦ ᐃᓕᓴᐃᓃᑦ, ᑭᓯᐊᓂ ᐋᓐᓂᖅᓯᕆᓂᒃᑯᑦ ᐊᑭᕋᖅᑐᖅᑕᐅᓚᐅᖅᑐᑦ ᕿᒪᒃᑕᑦᑎᓐᓂ. ᐃᓱᒪᔪᖓ ᖁᓛᓂ ᐊᑐᐊᒐᓕᒫᑦ ᐃᓚᓕᐅᔾᔨᓂᕐᓄᑦ ᑐᓂᓯᓂᕐᓄᓪᓗ, ᐃᓚᐅᔾᔨᓪᓗᑎᒃᑕᐅᖅ ᐃᓕᓐᓂᐊᕆᐊᖅᑎᑦᑎᓕᕆᓂᕐᓂᒃ, ᐋᓐᓂᖅᓯᓚᐅᖅᑐᑦ ᐅᓄᖅᑐᓂᒃ ᓄᓇᖃᖅᑳᖅᓯᒪᔪᓂᒃ ᐃᓄᖕᓂᒃ ᓱᕋᑦᑎᓪᓗᒋᑦ ᐅᖃᐅᓯᖏᑦ, ᐃᓕᖅᑯᓯᑐᖃᖏᑦ ᓄᓇᕐᔪᐊᕐᒥᐅᓂᒡᓗ ᐃᓱᒪᒋᔭᖏᑦ. ᑕᐃᑲᓂ ᐱᐅᖏᑦᑐᐊᓗᖕᓂ ᐱᓕᕆᔾᔪᓯᕐᓂ, ᐱᐅᓂᕋᖅᑕᐅᔪᖅ ᒐᕙᒪᓕᕆᔨᓂᑦ ᑕᐃᔅᓱᒪᓂ, ᐊᕕᒃᓯᓚᐅᖅᑐᑦ ᐅᓄᖅᑐᓂᒃ ᓱᕈᓯᓂᒃ ᐃᓚᒥᓂᑦ, ᐊᔾᔨᒌᖏᑦᑐᑦ ᓄᓇᓕᖕᒥᐅᑦ ᓴᓐᓂᖓᔪᓕᐅᖅᑏᑦ ᑎᒦᑦ ᐃᓚᐅᖃᑕᐅᓚᐅᖅᑐᑦ. ᑕᔅᓱᒧᖓ ᐱᔾᔪᑎᒧᑦ, ᐅᖃᐅᓯᕆᕙᕋ ᑕᓗᕈᒃᑯᑎᓂᐊᓗᒐ ᓄᒫᓱᖕᓂᕋᓗ, ᐱᖃᑎᒋᓪᓗᒋᓪᓗ ᐊᔪᕆᖅᓱᐃᔩᑦ ᑕᕝᕙᓂ ᒐᕙᒪᖃᑎᒌᓂ, ᓄᑖᕈᕆᐊᖅᐸᕋ ᑐᒃᓯᕋᐅᑎᒐ ᐃᓱᒪᒋᔪᓐᓇᐃᕐᕕᐅᔪᒪᓪᓗᑕ ᑕᒻᒪᖅᑕᐅᔪᓄᑦ ᐅᓄᖅᑐᐊᓗᖕᓄᑦ ᓴᓐᓂᖓᔪᓕᐅᖅᑎᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ. ᐊᐃᑦᑖᕐᔪᐊᖑᕗᖅ ᐃᓚᖏᑦ ᐅᒃᐱᕈᓱᒃᑐᑦ, ᑕᐃᒪᐃᓚᐅᖅᑐᑦ ᑕᐃᔅᓱᒪᓂᐅᑎᓪᓗᒍ, ᒪᓕᖃᑦᑕᕐᒪᑕ ᐃᓱᒪᒋᔭᐅᔪᓄᑦ ᓄᓇᕐᔪᐊᕐᒥ ᓈᓚᙱᖔᖅᖢᑎᒃ ᒎᑎᐅᑉ ᐅᖃᐅᓯᖏᓐᓂᒃ. ᑯᕋᐃᔅᑑᓯᒧᑦ ᐅᒃᐱᕈᓱᖕᓃᑦ ᐊᑑᑎᖃᑦᑎᐊᖅᑐᒃᑯᑦ ᐃᓚᐅᓯᒪᕗᑦ ᐋᖅᑭᒃᑕᐅᓂᖏᓐᓄᑦ ᐱᐅᓛᑦ ᐅᒃᐱᕆᔭᐅᔪᑦ ᑲᓇᑕᒥ, ᓇᓗᓇᐃᖅᑕᐅᓪᓗᑎᒃ ᐱᔪᒪᓂᕐᒧᑦ ᓴᓇᓗᑎᒃ ᐱᐅᓂᖅᓴᒥᒃ ᒐᕙᒪᖃᑎᒌᓂᒃ ᐃᓄᓕᒫᓄᑦ. ᑕᐃᒪᐃᑎᓪᓗᒍ, ᐱᔭᕆᐊᖃᖅᐳᖅ, ᐅᖃᐅᓯᕆᓗᒋᑦ ᐊᔪᕐᓂᕗᑦ, ᐱᓕᕆᖃᑎᒌᒡᓗᑕ ᐱᓕᕆᓇᓱᒡᓗᒍ ᐱᓕᕆᔭᐅᔪᒪᓚᐅᖅᑐᖅ ᖃᐅᔨᒪᓪᓗᖓ ᑕᒪᒃᑮᓕᒫᓯ ᑕᐃᒪᐃᖁᔭᔅᓯᓐᓂᒃ: ᑐᓴᐅᒪᔭᐅᑎᓪᓗᒋᑦ ᐱᔪᓐᓇᕐᓂᓪᓚᑦᑖᖏᑦ ᓄᓇᖃᖅᑳᖅᓯᒪᔪᑦ ᐃᓄᖏᑕ ᐃᑲᔪᕐᓗᒋᓪᓗ ᐱᓕᕆᔾᔪᓰᑦ ᒪᒥᓴᕐᓂᕐᓄᑦ ᐱᑦᑎᐊᖃᑎᒌᓕᕐᓄᓪᓗ ᑖᒃᑯᓄᖓ ᓄᓇᖃᖅᑳᖅᓯᒪᖏᑦᑐᓄᓪᓗ ᐃᓄᖕᓄᑦ ᒐᕙᒪᖃᑎᒌᓂ. ᑖᓐᓇ ᓴᖅᑭᔮᖅᑐᖅ ᐊᖏᖅᓯᒪᓂᕐᒥ ᖃᓄᐃᒋᐊᕐᓂᕐᓄᑦ ᓈᒻᒪᒃᑐᑎᒍᑦ ᐱᔪᒪᔭᖏᓐᓄᑦ ᑲᑎᒪᔩᑦ ᓱᓕᓂᕐᓄᑦ ᐱᑦᑎᐊᖃᑎᒌᓕᕐᓂᕐᓄᓪᓗ , ᐱᖃᓯᐅᓪᓗᒋᑦ ᐃᓱᒫᓘᑕᐅᔪᑦ ᑖᒃᑯᐊᖑᓂᕋᖅᑕᐅᔪᓄᑦ ᐱᐅᔪᓐᓇᕐᓂᖏᓐᓄᑦ ᓄᓇᖃᖅᑳᖅᓯᒪᔪᑦ ᐃᓄᖕᓄᑦ.

ᐃᔾᔪᕐᓇᐃᑦᑐᖅ ᓰ ᓄᓇᓕᖕᓂᓗ ᓴᓐᓂᒐᔪᓕᐅᖅᑎᐅᖃᑎᒌᑦ ᐊᖏᖅᓯᒪᓪᓚᑦᑖᖅᑐᑦ ᑐᓴᐅᒪᔭᐅᑎᓪᓗᒋᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᑐᖃᖏᑦ ᓇᓕᐊᓪᓗᐊᑕᒃᑯᑦ ᓈᒻᒪᒃᑐᒃᑯᓪᓗ ᐱᓕᕆᔾᔪᓯᑎᒍᑦ ᐅᒃᐱᕐᓂᕐᓄᑦ ᐱᖃᓯᐅᔾᔨᔪᓂᒃ ᐃᓱᒪᒋᓗᒋᑦ ᐃᓕᖅᑯᓯᑐᖃᒃᑯᑦ ᐱᓕᕆᔾᔪᓯᑐᖃᖏᑦ, ᐱᓕᕆᔾᔪᓯᖏᑦ, ᐅᖃᐅᓯᖏᑦ ᐃᓕᓴᐃᔾᔪᓯᖏᓪᓗ, ᑕᐃᒪᐃᖁᔭᐅᔪᑐᑦ ᑲᑐᔾᔨᖃᑎᒌᑦ ᒐᕙᒪᖃᑎᒌᖏᑦᑐᓂᑦ ᐅᖃᖅᑕᖓᑦ ᐱᐅᔪᓐᓇᕐᓂᖏᓐᓄᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ. ᐱᔪᒪᕗᒍᑦ ᓄᑖᕈᕆᐊᕐᓗᒍ ᐃᓅᖃᑎᒌᖕᓂᖅ ᑐᒃᓯᐊᕐᕕᖕᒧᑦ ᓄᓇᖃᖅᑳᖅᓯᒪᔪᓄᓪᓗ ᐃᓄᖕᓄᑦ ᑲᓇᑕᒥ, ᐃᓅᖃᑎᒌᖕᓂᖅ ᓇᓗᓇᐃᖅᑕᐅᓗᓂ ᓇᒡᓕᖕᓂᕐᒧᑦ ᐊᑐᖅᓯᒪᔪᕐᒧᑦ ᐱᐅᓪᓚᒃᑐᓂᒃ ᐊᒻᒪᓗ, ᐊᐃᑦᑕᐅᒐᓗᐊᖅ, ᐃᑎᔪᓂᒃ ᐃᑭᓂᒃ ᐊᖏᖅᓯᒪᓪᓗᑕ ᑐᑭᓯᓂᕐᓄᑦ ᒪᒥᓐᓂᕐᓄᓪᓗ. ᖁᔭᓕᓪᓚᕆᒃᑐᖓ ᑕᑯᓯᒪᒐᒃᑭᑦ ᓈᓚᒃᖢᒋᓪᓗ ᐊᔾᔨᒌᖏᑦᑐᑦ ᑭᒡᒐᖅᑐᖅᑏᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᖃᖓᓂ ᑕᖅᑭᓂ ᕉᒻᒥ, ᐊᔪᖏᓪᓗᓂᓗ, ᑕᕝᕙᓂ ᑲᓇᑕᒥ, ᓄᑖᕈᖅᓯᓗᓂ ᐃᓅᖃᑎᒌᑦᑎᐊᕐᓂᕐᓂᒃ ᓴᓇᔭᐅᔪᓂᒃ ᑕᐃᑲᓂ. ᐱᕕᖃᕐᓂᕆᓚᐅᖅᑕᕗᑦ ᑲᑎᙵᓪᓗᑕ ᐃᒃᐱᒋᓚᐅᕋᒃᑭᑦ ᐱᔪᒪᑦᑎᐊᕈᑎᒋᓪᓗᒋᓪᓗ ᖃᓄᐃᒋᐊᕐᓂᕐᓄᑦ ᓂᙵᖕᓂᕐᔪᐊᕐᒧᑦ ᑕᓗᕈᒃᑯᑎᓂᕐᓄᓪᓗ ᐊᒃᓱᕈᕐᓇᕐᔪᐊᓄᑦ ᐊᑐᖅᑕᐅᔪᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᓯᕗᒧᐊᕐᓗᓂᓗ ᖃᑕᙳᑎᒌᖕᓂᒃᑯᑦ ᕿᓄᐃᓵᕐᓂᒃᑯᓪᓗ ᓯᕗᒧᐊᕐᓂᕐᓄᑦ ᑲᓇᑕᒥᐅᓕᒫᑦ ᐃᓚᐅᓗᑎᒃ, ᒪᓕᒡᓗᒋᑦ ᓱᓕᓃᑦ ᐱᑦᑎᐊᕐᓃᓪᓗ, ᐱᓕᕆᓗᑎᒃ ᒪᒥᓴᕐᓂᕐᓄᑦ ᐱᑦᑎᐊᖃᑎᒌᓕᕐᓂᕐᓄᓪᓗ, ᐱᔪᒪᑎᑕᐅᖏᓐᓇᐅᔭᕐᓗᑎᒃ ᐱᔪᒪᓂᕐᒧᑦ.

ᑖᓐᓇ "ᕿᒪᒃᑕᑦᑎᓂ ᐊᑐᖅᓯᒪᔪᑦ ᐊᒃᓱᕈᔪᐊᕐᓂᕐᓂᒃ ᑭᓲᒋᔭᐅᖏᓐᓂᕐᓂᒡᓗ", ᐱᕈᖅᑐᖅ ᓄᓇᐃᖅᓯᔪᑦ ᐃᓱᒪᒋᔭᖏᓐᓂᑦ, "ᒪᒥᓴᕋᐃᖏᒻᒪᑦ". ᓲᖃᐃᒻᒪ, ᐅᔾᔨᕈᓱᒍᑎᒋᔭᕆᐊᖃᖅᑕᕗᑦ "ᓄᓇᐃᖅᓯᓂᖅ ᐃᓱᓕᓯᒪᖏᒻᒪᑦ; ᐅᓄᖅᑐᓂ ᓄᓇᓂ ᐊᓯᔾᔨᖅᓯᒪᔪᖅ, ᐃᓕᓴᕐᓇᕈᓐᓃᖅᑎᓯᒪᔪᖅ ᓴᖅᑭᔮᖅᑎᑕᐅᓇᓂᓗ" (ᑭᕆᑕ ᐊᒪᔪᓂᐊ, 16). ᑕᐃᒪᐃᑦᑑᕗᖅ ᐱᓕᕆᔾᔪᓯᐅᑦ ᐅᒃᐱᕈᓱᖕᓂᒃᑯᑦ ᓄᓇᐃᖅᓯᓂᕐᓂ. ᕿᒪᑕᑦᑎᓐᓂ, ᓄᓇᐃᖅᓯᔪᑦ ᐃᓱᒪᒋᔭᖏᑦ ᐃᓱᒪᒋᔭᖃᓚᐅᖏᑦᑐᑦ ᐃᓅᓯᓪᓚᑦᑖᖏᓐᓂᒃ ᐃᓄᐃᑦ ᐊᑐᓕᖅᑎᑦᑎᓪᓗᑎᒡᓗ ᓇᓕᐊᓪᓗᐊᑕᓂᒃ ᐋᖅᑭᒃᓯᒪᕙᒌᖅᑐᓂᒃ ᐃᓕᖅᑯᓯᑐᖃᐅᓂᐊᖅᑐᓂᒃ; ᑭᓯᐊᓂ ᐅᓪᓗᒥᑦᑕᐅᖅ, ᖃᔅᓯᓂᐅᕗᑦ ᐱᓕᕆᔾᔪᓰᑦ ᐅᒃᐱᕈᓱᖕᓂᒃᑯᑦ ᓄᓇᐃᖅᓯᓂᕐᓂᒃ ᐊᑭᕋᖅᑐᖅᑐᓂᒃ ᖃᓄᐃᓪᓚᑦᑖᖅᑐᓄᑦ ᐃᓅᓯᕐᒥ, ᐊᑐᖅᑎᓐᓇᒍ ᐊᑕᓂᑐᖃᖏᑦ ᐃᓄᐃᑦ ᐅᒃᐱᕆᔭᕐᒥᓄᑦ, ᐊᑐᕈᓐᓃᖅᑎᑦᑎᓇᓱᒃᖢᑎᒡᓗ ᐱᓕᕆᔾᔪᓯᑐᖃᖏᓐᓂᒃ, ᕿᒪᒃᑕᑦᑎᓐᓂ ᐊᑐᖅᓯᒪᔭᖏᓐᓂᒃ ᐅᒃᐱᕐᓂᒃᑯᓪᓗ ᐊᒃᑐᐊᔭᒥᓂᒃ. ᑖᓐᓇ ᐃᓱᒪᓂᖅ, ᐃᓱᒪᔪᓐᓇᕋᓱᒋᓪᓗᓂ ᐱᐅᖏᑦᑐᑦ ᐊᑐᓚᐅᖅᑐᑦ ᕿᒪᒃᑕᑦᑎᓐᓂ ᕿᒪᒃᑕᐅᓯᒪᓇᓱᒋᓪᓗᒋᑦ, ᐊᑐᐃᓐᓇᐅᓕᓲᖑᕗᖅ "ᖁᔭᓈᕐᓗᒍ ᐃᓕᖅᑯᓯᖃᕐᓂᖅ"ᒧᑦ ᖃᓄᐃᓕᖓᓂᕋᐃᒐᔭᖅᑐᑦ ᕿᒪᒃᑕᑦᑎᓐᓂᒃ ᑐᙵᑐᐃᓐᓇᕐᓗᑎᒃ ᒫᓐᓇᐅᔪᓄᑦ ᖃᓄᐃᓕᖓᓂᕐᓄᑦ. ᑕᐃᒪᐃᑎᑕᖓ ᐃᓕᖅᑯᓯᑐᖃᒃᑯᑦ ᐱᖅᑯᓯᖃᕐᓂᖅ ᑭᓱᓕᒫᓂᒃ ᖃᐃᕋᓕᖅᑎᑦᑎᔪᑦ, ᑭᓱᓕᒫᓂᒃ ᓇᓕᒧᓕᖅᑎᑦᑎᓪᓗᓂ, ᐱᑕᖃᖁᔨᙱᓚᖅ ᐊᔾᔨᒌᖏᑦᑐᓂᒃ ᐃᓱᒪᑐᐃᓐᓇᖅᖢᓂᓗ ᒫᓐᓇᒥᒃ, ᐱᔭᕆᐊᓕᖏᓐᓂᒃ ᐱᔪᓐᓇᕐᓂᖏᓐᓂᒡᓗ ᐊᑐᓂ ᐃᓄᐃᑦ, ᐃᓱᒪᒋᒐᔪᖕᓇᒋᑦ ᐱᓪᕆᐊᒃᓴᓂ ᑐᕌᖅᑐᓄᑦ ᓴᙲᓛᓄᑦ ᐅᓗᕆᐊᓇᖅᑐᒦᓛᓄᓪᓗ ᖃᑕᙳᑎᑦᑎᓐᓄᑦ ᓇᔭᑦᑎᓐᓄᓪᓗ, ᐊᔪᖅᓴᖅᑐᑦ, ᐊᓯᓂᑦ ᓄᓇᓂᙶᖅᑐᑦ, ᐃᓐᓇᐃᑦ, ᖃᓂᒪᔪᑦ, ᐃᓅᖏᑦᑐᑦ… ᑕᐃᒃᑯᐊ ᐳᐃᒍᖅᑕᐅᓯᒪᕗᑦ "ᐊᔪᖅᓴᖏᑦᑐᓂ ᐃᓅᓯᖃᑎᒌᓂ"; ᑕᐃᒃᑯᐊᖑᕗᑦ, ᑭᒃᑯᓕᒫᑦ ᓱᖁᑎᒃᓴᖅᑎᓐᓇᒋᑦ, ᓴᓂᕐᕙᒃᑕᐅᓲᖑᕗᑦ ᐸᓂᖅᑐᑐᑦ ᐃᕕᒃᑎᑐᑦ ᐃᑭᑕᒃᓴᑐᑦ.

ᑭᓯᐊᓂᖔᖅ, ᑕᖅᓴᖃᕈᓘᔭᖅᑐᑦ ᐃᕕᖏᑦ ᒪᐃᐳ ᓇᐹᖅᑑᑉ ᐃᖅᑲᐃᓯᕚᑎᒍᑦ ᐱᕐᔪᐊᖑᓂᖓᓂᒃ ᐃᓗᐃᑦᑑᑉ, ᐱᕐᔪᐊᖑᓂᖓᓂᒃ ᓴᓇᓗᓂ ᐃᓄᖕᓄᑦ ᓄᓇᖅᑲᑎᒌᓂᒃ ᐊᔾᔨᒌᒃᑐᐃᓐᓈᓘᖏᑦᑐᓂᒃ, ᑭᓯᐊᓂ ᒪᑐᐃᖓᓪᓚᑦᑖᕐᓗᑎᒃ ᐃᓚᐅᑎᑦᑎᓗᑎᒡᓗ. ᐊᒻᒪᑦᑕᐅᖅ ᐊᑐᓂ ᐃᕕᒃ ᐊᑑᑎᖃᑦᑎᐊᕐᒪᑦ ᐱᕈᑦᑎᐊᖅᑐᓄᑦ ᐃᕕᖕᓄᑦ ᑕᓕᖏᓐᓂ, ᑕᐃᒪᓐᓇᑦᑕᐅᖅ ᐊᑐᓂ ᐃᓚᒌᑦ, ᐊᑑᑎᖃᑦᑎᐊᖅᖢᑎᒃ ᐃᓂᒋᔭᐅᓪᓗᑎᒃ ᐃᓅᖃᑎᒌᓄᑦ, ᑐᓂᔭᐅᔭᕆᐊᖃᖅᐳᖅ ᐱᔭᕆᐊᖃᖅᑕᒥᓂᒃ, ᓲᖃᐃᒻᒪ "ᓯᕗᓂᒃᓴᖓᑦ ᐃᓄᐃᑦ ᐃᓗᐊᒎᕐᒪᑦ ᐃᓚᒌᑦ" (ᐃᔾᔪᕐᓇᐃᑦᑐᖅ ᔭᓐ ᐸᓪ II, ᕙᒥᓕᐊᕆᔅ ᑲᓐᓱᐊᕐᑎᐅ, 86). ᐃᓚᒌᑦ ᓯᕗᓪᓕᖅᐹᖑᕗᑦ ᑕᕝᕙᓪᓚᑦᑖᖑᓪᓗᓂ ᐃᓅᖃᑎᒌᓄᑦ ᖃᓄᐃᑦᑐᓄᑦ, ᑭᓯᐊᓂ ᐅᓗᕆᐊᓇᖅᑐᒦᑎᑕᐅᓪᓗᓂ ᐅᓄᖅᑐᓄᑦ ᖃᓄᐃᓕᖓᓂᕐᓄᑦ: ᐃᓚᒌᓂ ᐋᓐᓂᖅᓯᕆᓃᑦ, ᑐᐊᕕᕐᓇᕐᓂᖏᑕ ᑭᓱᓕᕆᓃᑦ, ᐃᒻᒥᓂᑐᐊᒧᑦ ᐃᓱᒪᓃᑦ, ᐊᒃᓱᕈᓗᐊᖅᑐᑦ ᐃᖅᑲᓇᐃᔮᒥᓄᑦ ᓯᕗᒧᐊᕋᓱᒃᑐᓄᑦ, ᐃᖅᑲᓇᐃᔭᖏᑦᑐᓄᑦ, ᐃᓄᑑᙳᖅᑐᓄᑦ ᐃᓄᑑᑎᑕᐅᓂᖏᓐᓄᓪᓗ ᒪᒃᑯᒃᑐᑦ, ᕿᒪᒃᑕᐅᓂᒋᓐᓄᑦ ᐃᓐᓇᑦ ᖃᓂᒪᔪᓪᓗ… ᓄᓇᖃᖅᑳᖅᓯᒪᔪᑦ ᐃᓄᖏᑦ ᐃᓕᓴᐃᔭᒃᓴᖃᓪᓚᒃᑐᑦ ᐅᕙᑦᑎᓐᓂᒃ ᐸᖅᑭᓂᕐᓄᑦ ᓴᐳᔾᔨᓂᕐᓄᓪᓗ ᐃᓚᒌᓂᒃ; ᐃᓚᒋᓪᓗᓂᒋᑦ, ᐃᓅᕋᑖᖑᓂᕐᒥᑦ, ᓱᕈᓰᑦ ᐃᓕᑉᐳᑦ ᐃᓕᓴᖅᓯᔭᕆᐊᒃᓴᖅ ᐱᐅᔪᕐᒥᒃ ᐱᐅᖏᑦᑐᕐᒥᑦ, ᓱᓕᖃᑦᑕᕐᓗᑎᒃ, ᐊᓯᒥᓄᑦ ᖃᐃᑦᑎᕙᒡᓗᑎᒃ, ᑕᒻᒪᖅᑐᓂᒃ ᐅᖃᐅᔾᔨᕙᒡᓗᑎᒃ, ᐱᒋᐊᕐᓗᑎᒃ ᓄᑖᒥᑦ ᐱᒋᐊᕐᓂᕐᒥᑦ, ᓴᐃᒻᒪᖅᓴᖃᑦᑕᐅᑎᓗᑎᒃ ᐱᑦᑎᐊᓕᕐᓗᑎᒡᓗ. ᑕᕝᕙᑐᖅ ᑕᒻᒪᕐᓃᑦ ᐊᑐᖅᑕᐅᓚᐅᖅᑐᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐊᑐᕐᓂᐊᖅᐳᑦ ᐅᓗᕆᐊᓱᖁᔭᐅᔾᔪᑎᒋᓗᑎᒍᑦ ᐅᓪᓗᒥ, ᐃᓱᒫᓗᖕᓂᖅ ᐃᓚᒌᓄᑦ ᐱᔪᓐᓇᕐᓂᖏᓐᓄᓪᓗ ᖁᔭᓈᖅᑕᐅᒍᑎᒃ ᑭᓱᓕᐅᒃᑲᓐᓂᕐᓂᕐᓄᑦ ᐊᑐᓃᓪᓗ ᐱᔪᒪᔭᖏᓐᓄᑦ.

ᐅᑎᓚᐅᖅᑕ ᒪᐃᐳ ᐃᕕᖏᓐᓄᑦ. ᐅᓇᑕᕕᒡᔪᐊᕐᓇᕐᒥ, ᐅᓇᑕᖅᑐᒃᓴᑦ ᐊᑐᖃᑦᑕᓚᐅᖅᑐᑦ ᑕᐃᒃᑯᓂᖓ ᐃᕕᖕᓂᒃ ᒪᑦᑐᑎᓄᑦ ᐃᑭᓂᓄᓪᓗ ᐋᓐᓂᐊᕈᓐᓃᕈᑎᒋᓪᓗᒋᑦ. ᐅᓪᓗᒥ, ᑐᑭᖃᖏᑦᑑᑉ ᓯᓚᐃᓐᓂᓂᖏᓐᓄᑦ ᐅᓇᑕᕕᒡᔪᐊᑉ ᑎᒫᓂ, ᓱᓕᒃᑲᓐᓂᖅ ᒪᒥᑎᑦᑎᔭᕆᐊᖃᖅᐳᒍᑦ ᐱᑦᑎᐊᖏᓐᓂᕐᓂᑦ ᐱᓗᐊᒪᔮᕐᓂᕐᓂᓪᓗ ᒪᒥᖁᓪᓗᒋᑦ ᐃᑮᑦ ᖀᒥᒍᓱᖕᓂᕐᒥᑦ. ᑕᐅᑐᒃᑐᖅ ᓄᒫᓇᕐᔪᐊᖅᑐᓄᑦ ᐋᓐᓂᖅᓯᕆᔪᓂᑦ ᖃᖓᑦᑎᐊᕐᒥᑦ ᐅᖃᓚᐅᖅᑐᑦ "ᐱᑦᑎᐊᕐᓂᖅ ᓇᖕᒥᓂᖅ ᑲᙳᓇᖅᑐᓕᒃ: ᖀᒥᒍᓱᓚᐅᖅᓯᒪᖏᓪᓗᓂ ᑭᓇᑐᐃᓐᓇᕐᒥᒃ. ᐃᓅᔪᒪᒍᑦᑕ ᖀᒥᒍᓱᓚᐅᖅᓯᒪᔭᕆᐊᖃᖏᑦᑐᒍᑦ" (ᐊᐱᖅᓱᕐᓂᖅ ᐃᑎᑦ ᑉᕈᒃ, ᐊᕕᓂᕐ, 8 ᒫᔾᔨ 2022). ᐊᑑᑎᒃᓴᖃᖏᑦᑐᒍᑦ ᐊᕕᒃᑐᕐᓗᒍ ᓄᓇᕐᔭᖅ ᐱᖃᓐᓇᕆᔭᓄᑦ ᐊᑭᕋᓄᓪᓗ, ᐅᖓᓯᒌᓕᕐᓂᓕᐅᕐᓗᑕ ᓱᓕᒃᑲᓐᓂᕐᓗ ᓱᒋᐅᑎᓕᕐᕕᒡᔪᐊᕐᓗᑕ: ᓱᒋᐅᑎᖃᕐᓂᖅᓴᐅᓇᓱᖕᓃᑦ ᖃᓄᖅᑑᕐᓃᓪᓗ ᐱᔪᒪᔪᓐᓃᖅᑎᑦᑎᓇᓱᖕᓂᕐᓄᑦ ᐱᑦᑎᐊᓕᕈᑕᐅᔾᔮᖏᑦᑐᑦ ᑲᑉᐱᐊᓇᖏᑦᑐᒦᓕᕈᑎᒋᓗᒋᑦ. ᐊᐱᕆᔭᕆᐊᖃᖅᐳᒍᑦ ᖃᓅᖏᑦᑐᖅ ᐅᓇᑕᕕᒡᔪᐊᕋᓱᖕᓂᐊᕐᒪᖔᑕ, ᑭᓯᐊᓂ ᖃᓄᖅ ᓄᖅᑲᖅᑎᑦᑐᓐᓇᕐᒪᖔᑦᑎᒍᑦ. ᓄᖅᑲᖅᑎᓪᓗᒋᓪᓗ ᐃᓗᐃᑦᑐᐊᓗᐃᑦ ᐃᓄᐃᑦ ᑎᒍᔭᐅᓯᒪᔪᑦ ᐱᐅᖏᑦᑐᐊᓗᖕᓃᑦᑐᓪᓗ ᐊᑯᓂᒧᓪᓗ ᐅᓇᑕᕕᒡᔪᐊᖅᑕᐃᓕᒪᔪᓂ. ᐱᖃᕆᐊᖃᖅᐳᒍᑦ ᐃᓱᒪᒃᓴᖅᓯᐅᑦᑎᐊᖅᓯᒪᔪᓂᒃ ᐊᑯᓂᒧᓪᓗ ᐸᕐᓇᒃᓯᒪᔪᓂᒃ ᐊᑐᐊᒐᓂᒃ ᐊᔪᖏᑦᑐᓂᒃ ᐅᖓᑖᓄᐊᕆᐊᒃᓴᖅ ᐊᑭᕋᖅᑐᐃᓃᑦ ᑭᐅᔪᓐᓇᖁᓪᓗᒋᑦ ᓄᐊᕐᔪᐊᕐᒥ ᐊᒃᓱᕈᕐᓇᖅᑐᓄᑦ.

ᑕᐃᒪᐃᑉᐳᖅ, ᐊᒃᓱᕈᓇᓛᑦ ᐊᑲᐅᙱᓕᐅᕈᑏᑦ ᐅᓪᓗᑦᑎᓐᓂ, ᓲᕐᓗᑐᑦ ᐱᑦᑎᐊᕐᓃᑦ, ᓯᓚᐃᑦ ᐊᓯᔾᔨᕐᓂᖏᑦ, ᓄᕙᖕᓇᕐᔪᐊᑉ ᐊᒃᑐᐃᓂᖏᑦ ᓄᓇᕐᔪᐊᒥᓗ ᐊᓯᓄᑦ ᓅᒃᑕᕐᓃᑦ, ᑕᒪᒃᑮᑦ ᐊᑕᐅᓯᕐᒥᒃ ᐊᔾᔨᒌᒃᑐᓖᑦ: ᓄᓇᕐᔪᐊᕐᒥᐅᓄᑦ ᐊᑐᖅᑕᐅᔪᑦ; ᑭᒃᑯᓕᒫᓄᑦ ᐊᑐᖅᑐᑦ. ᑕᒪᒃᑮᓪᓗ ᐱᔭᕆᐊᖃᕐᓂᕐᒥᒃ ᐅᖃᐅᓯᖃᕐᒪᑕ ᐃᓱᒪᒋᓗᒋᑦ ᐃᓗᐃᑦᑐᑦ, ᓂᕈᐊᒐᐅᓃᑦ ᑎᒍᔭᐅᓯᒪᔪᓐᓇᙱᓚᑦ ᐃᓚᑐᐊᒥᓄᑦ ᐱᔪᒪᔪᓄᑦ. ᑕᑯᓇᒍᓐᓇᕆᐊᖃᖅᑐᒍᑦ, ᓄᓇᖃᖅᑳᖅᓯᒪᔪᑦ ᐃᓄᖏᑕ ᓯᓚᑐᓂᖏᑦ ᐃᓕᓴᐃᖕᒪᑕ, ᓴᐃᐸᓄᑦ ᑭᖑᕚᓄᑦ ᓯᕗᒧᒃᓯᒪᓪᓗᑎᒃ, ᑕᕝᕗᖓᑲᐅᑎᒋᒧᑦ ᓈᒻᒪᒍᑎᒃᓴᕆᙱᑕᑦᑎᓐᓄᑦ, ᑭᖑᓪᓕᕐᓄᑦ ᓂᕈᐊᕐᓂᕐᓄᑦ, ᐃᑲᔪᕐᓗᓂᓘᓐᓃᑦ ᐆᒥᖓ ᐆᒥᖓᓘᓐᓃᑦ ᐃᑲᔪᖅᑕᐅᔪᒥᒃ. ᑭᓯᐊᓂᑦᑕᐅᖅ ᐊᓕᐊᓇᐃᒋᔭᕆᐊᖃᕐᒥᔭᕗᑦ ᒪᒃᑯᒃᑐᑦ ᐱᔪᒪᓂᖏᑦ ᐱᖃᓐᓇᕆᔭᖃᕐᓂᕐᓄᑦ, ᐱᑦᑎᐊᕐᓂᕐᓄᑦ ᓴᐃᓕᓂᕐᓄᓪᓗ. ᓱᕋᔾᔭᐃᖁᓪᓗᒋᑦ ᐃᖅᑲᐅᒪᓃᑦ ᓯᓚᑐᓃᓪᓗ, ᓈᓚᒋᐊᖃᖅᑐᒍᑦ ᐃᓐᓇᕐᓂᒃ, ᑭᓯᐊᓂ ᓯᕗᒧᐊᕋᓱᒡᓗᑕ ᐃᕿᑦᑕᕆᐊᖃᕐᒥᔭᕗᑦ ᒪᒃᑯᒃᑐᑦ ᐃᓄᐃᑦ ᐃᓅᓯᕐᒥᓂ ᖃᓄᐃᓛᖁᔭᖏᑦ. ᓯᕗᓂᒃᓴᑦᑎᐊᕙᐅᓂᖅᓴᒥᒃ ᐱᖃᕆᐊᓖᑦ ᐸᕐᓇᐅᑎᔭᑦᑎᓐᓂᑦ, ᐃᓚᐅᖃᑕᐅᔭᕆᐊᓖᑦ ᖃᓄᖅᑑᖅᑐᓂ ᓴᓇᔭᐅᓂᖓᓄᑦ ᓄᓇᕐᔪᐊᖅ ᐅᓪᓗᒥᒧᑦ ᖃᐅᒃᐸᒧᓪᓗ, ᐱᓗᐊᖅᑐᒥᒡᓗ ᓴᐳᔾᔭᐅᓂᖓᓄᑦ ᐃᓗᐃᑦᑑᓗᑕ ᐊᖏᕐᕋᕗᑦ; ᑕᐃᒪᓐᓇ, ᐅᒃᐱᕆᔭᐅᔪᑦ ᐃᓕᓴᐃᔾᔪᑕᐅᔪᓪᓗ ᓄᓇᖃᖅᑳᖅᓯᒪᔪᑦ ᐃᓄᖕᓂᑦ ᐊᓐᓂᕐᓇᑦᑎᐊᖅᐳᑦ. ᑕᕝᕙᓂ ᖁᔭᓕᔪᒪᕗᖓ ᐅᐱᓐᓇᖅᑐᓄᑦ ᐊᖏᖅᓯᒪᓂᕐᓄᑦ ᓄᓇᓕᖕᓂ ᖃᓄᖅᑑᖅᑕᐅᔪᓄᑦ ᓴᐳᑎᓂᐊᕐᒪᑕ ᐊᕙᑏᑦ. ᐅᖃᖅᑕᐅᔪᓐᓇᖅᑐᕐᓘᓐᓃᑦ ᓇᓗᓇᐃᒃᑯᑕᑦ ᐱᔭᐅᔪᑦ ᓯᓚᒥᐅᑕᓂᑦ, ᓲᕐᓗ ᐱᕈᖅᓯᐊᖅ ᓴᐃᒻᒪᑎᖓᓂ ᐊᕕᒃᓯᒪᔫᑉ ᑯᐸᐃᒃ, ᒪᐃᐳ ᐃᕕᒡᓗ ᑲᓇᑕᒧᑦ,  ᓇᓗᓇᐃᖅᓯᕗᑦ ᑲᓇᑕᐅᑉ ᐆᒪᔫᖃᑎᒌᓄᑦ ᑎᓕᔭᐅᓯᒪᓂᕐᒥᓄᑦ.

ᑲᑎᒪᔩᑦ ᓴᓇᔭᐅᓂᖓᓄᑦ ᑲᓇᑕᐅᑉ ᓴᐃᒻᒪᑎᖓᓄᑦ ᕿᒥᕐᕈᓕᕐᒪᑕ ᐅᓄᖅᑐᐊᓗᖕᓂᒃ ᑎᑎᕋᐅᔭᓂᒃ ᑐᓂᔭᐅᔪᓄᑦ ᑖᔅᓱᒧᖓ ᐊᑐᒐᒃᓴᒧᑦ, ᐅᓄᖅᑐᑦ ᐃᓄᑐᐃᓐᓇᓂᑦ, ᑲᒪᓇᓚᐅᖅᑐᖅ ᐊᑕᖏᑲᓴᒃᖢᑎᒃ ᐊᔾᔨᙳᐊᖃᓚᐅᕐᒪᑕ ᒪᐃᐴᑉ ᐃᕕᐊᓂᒃ. ᑲᑎᓐᓃᑦ ᑕᕝᕗᖓ ᓇᓗᓇᐃᒃᑯᑕᒧᑦ ᐅᖃᕈᑎᒋᕙᕋ ᐊᑑᑎᖃᑦᑎᐊᖅᑐᒥᒃ ᑕᐃᒎᓯᕐᒥᒃ ᑲᓇᑕᒥᐅᓕᒫᓄᑦ: ᓄᓇᖅᑲᑎᒌᖏᑦᑐᓂᑦ ᓄᓇᖅᑲᑎᒌᑦ. ᓄᓇᖅᑲᑎᒌᖏᑦᑐᓂᑦ ᓄᓇᖅᑲᑎᒌᑦ ᑐᙵᕕᐅᑦᑎᐊᖅᑐᑦ ᑲᑎᙵᓂᕐᓄᑦ ᐃᓅᖃᑎᒌᓄᑦ ᐊᔾᔨᒌᖏᑎᒋᔪᓄᑦ ᑕᖅᓴᕈᓘᔭᓕᖕᓂᑦ ᐃᕕᓂᑦ ᒪᐃᐴᑉ ᓇᐸᓂᑦ. ᐅᓄᖅᑐᓂᒃ ᓄᕗᖃᖅᖢᓂ ᓴᓂᖃᖅᖢᓂᓗ, ᒪᐃᐴᑉ ᐃᕕᐊ ᐃᖅᑲᐃᓯᕗᑦ ᐸᓕᕼᐃᑐᕋᓐᒥᒃ; ᐅᖃᐅᔾᔨᕗᖅ ᐅᕙᑦᑎᓐᓂᒃ ᐃᓅᔪᓯ ᐊᓯᓂᒃ ᐃᓚᐅᑎᑦᑎᔪᓐᓇᖅᑐᓯ, ᑕᐃᒪᐃᒻᒪᑦ ᓄᑖᑦ ᑎᑭᓕᓵᖅᑐᑦ ᐃᓂᓯᐊᕈᓐᓇᖅᐳᑦ ᐅᓄᖅᑐᓄᑦ ᑲᑎᙵᔪᓂ ᓇᖕᒥᓂᕐᓗ ᑐᓂᓯᓗᑎᒃ ᑕᕝᕗᖓ (cf. ᐃᕙᓐᔨᐊᓕ ᒐᐅᑎᐊᒻ, 236). ᓄᓇᖃᖅᑲᑎᒌᖏᑦᑐᓂᑦ ᓄᓇᖅᑲᑎᒌᑦ ᑕᐅᕗᖓᓕᒫᖅ ᐊᒃᓱᕈᕐᓇᖅᑐᖅ: ᐱᖃᓯᐅᔾᔨᕗᖅ ᓈᒻᒪᒋᓗᒋᑦ ᐃᕿᓪᓗᒋᓪᓗ ᐊᔾᔨᒌᖏᓐᓂᖏᑦ ᖃᓄᐃᓕᖓᔪᑦ ᑕᕝᕙᐅᔪᑦ, ᑕᐃᒪᐃᑎᓪᓗᒍ ᐃᒃᐱᒋᓗᒋᑦ ᐊᔾᔨᒌᖏᑦᑐᑦ ᐱᓕᕆᔾᔪᓯᑐᖃᖏᑦ ᐃᓕᖅᑯᓯᑐᖃᖏᓪᓗ, ᐃᓱᒪᓚᐅᖅᓯᒪᖏᓪᓗᓂᓗ ᐱᓕᕆᔾᔪᓯᖅ ᐱᔭᕇᖅᑐᖅ. ᑕᐃᒪᓐᓇᐅᑎᓪᓗᒍ, ᖁᔭᓕᕗᖓ ᒥᖕᓂᖏᑦᑐᓪᓛᓗᖕᓄᑦ ᐃᓯᖅᑎᑦᑎᓪᓗᑎᒃ ᔪᒃᕋᐃᓂᐊᓐᒥᐅᓂᒃ ᐊᕝᒐᓐᒥᐅᓂᒡᓗ ᓅᑦᑐᓂᒃ. ᑭᓯᐊᓂ ᐊᓂᒍᕆᐊᖃᕐᒥᕗᑦ ᐅᖅᑲᓪᓚᐅᓯᓕᖕᓄᑦ ᑲᑉᐱᐊᓇᖅᑐᓂᒃ ᑐᕌᖅᑐᓄᑦ ᑎᑭᑦᑐᓄᑦ ᑐᓂᓗᒋᓪᓗ, ᒪᓕᒡᓗᒋᑦ ᐱᔪᓐᓇᑐᐃᓐᓇᕆᐊᓕᖏᑦ ᒐᕙᒪᖃᑎᒌᓂᑦ, ᐱᕕᖃᓪᓚᑦᑖᕐᓂᕐᓂᒃ ᐃᓚᐅᖃᑕᐅᓗᑎᒃ ᐱᓕᕆᐊᒃᓴᑎᒍᑦ ᐃᓅᖃᑎᒌᓂ. ᑕᐃᒪᐃᖁᓪᓗᒍ, ᐱᔪᓐᓇᐅᑏᑦ ᐃᑲᔪᕐᓃᓪᓗ ᐊᑑᑎᖃᑦᑎᐊᖅᑐᑦ. ᑭᓯᐊᓂᑦᑕᐅᖅ ᓵᑦᑕᕆᐊᖃᕐᒥᔪᑦ ᐃᒻᒥᓄᑐᐊᖅ ᐃᓱᒪᖃᕐᓃᑦ ᐃᖅᑲᐅᒪᓗᓂᓗ ᐃᓅᓯᖅ ᑐᙵᕗᖅ ᐃᓱᒪᓂᕐᒧᑦ ᓂᕈᐊᕈᓰᑦ ᐊᐅᓚᔪᓐᓇᙱᓚᑦ ᐃᒻᒥᓂᑐᐊᖅ. ᑕᕝᕙᓂᑦᑕᐅᖅ, ᓄᓇᖃᖅᑳᖅᓯᒪᔪᑦ ᐃᓕᖅᑯᓯᑐᖃᖏᑦ ᐃᑲᔪᕐᓂᖃᓪᓚᒃᐳᑦ ᐃᖅᑲᐃᔾᔪᑎᒋᓗᒋᑦ ᐱᕐᔪᐊᖑᓂᖏᓐᓄᑦ ᐃᓅᖃᑎᒌᓄᑦ ᐅᒃᐱᕆᔭᐅᔪᑦ. ᓴᓐᓂᖓᔪᓕᐅᖅᑏᑦ ᑐᒃᓯᐊᕐᕕᖓ, ᑭᒃᑯᓕᒫᓄᑦ ᐋᖅᑭᒃᓯᒪᓪᓗᓂ, ᐃᓱᒫᓘᑎᖏᑦ ᐅᓗᕆᐊᓇᖅᑐᒦᓛᓄᑦ, ᐱᓕᕆᔭᕆᐊᖃᖅᑕᒥᓄᑦ ᐃᓄᐃᑦ ᐃᓅᓯᖏᓐᓄᑦ ᐃᓅᓕᓚᐅᕐᓂᕐᒥᓂᑦ, ᐃᓄᕈᕐᓂᖓᓂᑦ ᑐᖁᒧᑦ, ᐊᓕᐊᓇᐃᒍᓱᒃᑐᑦ ᐃᑲᔪᕈᓐᓇᕋᒥᒃ ᑭᓱᓪᓗᐊᑕᒧᑦ.  

ᑖᒃᑯᓇᓂ ᐅᓪᓗᓂ, ᑐᓴᖅᓯᒪᒐᒪ ᐅᓄᖅᑐᓂᒃ ᐱᖃᕆᐊᓕᖕᓂᒃ ᐃᓄᖕᓂᒃ ᑲᓱᒃᑐᕆᐊᓲᓄᑦ ᐹᖏᓐᓄᑦ ᑐᒃᓯᐊᕐᕖᑦ. ᒐᕙᒪᖃᑎᒌᓂᓘᓐᓃᑦ ᓴᓇᓯᒪᑎᒋᔪᑐᑦ ᐊᔪᖅᓴᙱᑎᒋᔪᑐᓪᓗ ᑲᓇᑕᑐᑦ, ᐃᓱᒪᒋᔭᖃᑎᐊᓲᖅ ᐃᓅᓯᒃᑯᑦ ᐃᑲᔪᕐᓂᕐᓂᒃ, ᐅᓄᖅᐳᑦ ᐊᖏᕐᕋᖃᖏᑦᑐᑦ ᐃᓄᐃᑦ ᑐᒃᓯᐊᕐᕕᖕᓄᑦ ᓵᓲᑦ ᓂᕿᖃᖅᑎᑦᑎᔨᓄᓪᓗ ᐊᑑᑎᖃᑦᑎᐊᖅᑐᓂᒃ ᐃᑲᔫᑎᑖᕆᐊᖅᑐᖅᖢᑎᒃ ᓈᒻᒪᒋᔭᒥᓂᒃ, ᐳᐃᖦᖤᕐᓂᐊᕋᑦᑕ, ᑎᒥᓯᐅᑎᑐᐊᖑᖏᑦᑐᓄᑦ. ᑖᒃᑯᐊ ᖃᑕᙳᑎᕗᑦ ᓇᔭᕗᓪᓗ ᐊᐅᓚᔾᔭᐃᕗᑦ ᐅᕙᑦᑎᓐᓂᒃ ᐃᓱᒪᒋᓗᒋᑦ ᑐᐊᕕᕐᓇᖅᑐᒃᑯᑦ ᐱᔭᕆᐊᓖᑦ ᖃᓄᐃᒋᐊᕐᓂᕐᓄᑦ ᐋᖅᑭᒍᑕᐅᓗᑎᒃ ᐱᑦᑎᐊᖏᓐᓂᕐᔪᐊᕌᓗᒃ ᓱᕉᑎᑦᑎᔪᖅ ᓄᓇᕐᔪᐊᑦᑎᓐᓂ, ᐅᓄᕐᓂᖏᑦ ᑐᓐᓂᖅᑯᓯᐊᑦ ᓴᓇᔭᐅᓂᕐᓂᑦ ᓇᓕᒧᖏᑦᑐᒃᑯᑦ ᑐᓂᔭᐅᕙᒃᖢᑎᒃ. ᑕᓗᕈᒃᑯᓐᓇᖅᐳᖅ ᖃᓄᐃᖏᓐᓃᑦ ᓴᖅᑭᑕᐅᔪᑦ ᑮᓇᐅᔭᓕᐅᕐᓂᒃᑯᑦ ᐱᕚᓪᓕᕈᑕᐅᖏᒻᒪᑕ ᑭᒃᑯᓕᒫᓄᑦ ᐃᓅᖃᑎᒌᓂ. ᓄᒫᓇᓪᓚᒃᑭᕗᖅ ᓄᓇᖃᖅᑳᖅᓯᒪᔪᓪᓗᐊᑕᓂ ᐃᓄᖕᓂ ᑕᑯᒐᔪᒃᑲᑦᑕ ᐊᔪᖅᓴᕐᔪᐊᕐᓂᕐᓂᒃ, ᐱᖃᓯᐅᖦᖢᒋᑦ ᐊᓰᑦ ᐱᐅᖏᑦᑐᓄᑦ ᓇᓗᓇᐃᒃᑯᑕᑦ, ᓲᕐᓗ ᐃᓕᓐᓂᐊᕆᐊᖅᑐᑦ ᐅᓄᖏᓐᓂᖏᑦ, ᐊᔪᕐᓇᕐᓃᓪᓗ ᓇᖕᒥᓂᖅ ᐊᖏᕐᕋᖃᕐᓂᕐᓄᑦ ᖃᓄᐃᖏᓐᓂᕐᓄᓪᓗ ᐸᖅᑭᔭᐅᓂᕐᓄᑦ. ᑕᕝᕙᑐᖅ ᓇᓗᓇᐃᒃᑯᑕᖓ ᒪᐃᐴᑉ ᐃᕕᐊᑕ, ᓴᖅᑭᔮᒐᔭᐅᒃᑐᖅ ᓇᓗᓇᐃᒃᑯᑕᖏᓐᓂ ᑲᓇᑕᒥ ᐱᖁᑎᓂ, ᐊᑐᕐᓂᐊᖅᐳᖅ ᐱᔪᒪᓕᕈᑕᐅᓗᓂ ᑭᒃᑯᓕᒫᓄᑦ ᑮᓇᐅᔭᑎᒍᑦ ᐃᓅᓯᑎᒍᓪᓗ ᖃᓄᖅᑑᓕᕈᑕᐅᓗᓂ ᐱᕈᖅᓴᐃᔪᓄᑦ ᐃᓚᐅᓂᕐᓂᒃ ᐸᖅᑭᓂᕐᓂᒡᓗ ᐸᖅᑭᔭᕆᐊᓕᖕᓂᒃ.

ᐱᓕᕆᖃᑎᒌᖕᓂᒃᑯᑦ ᑕᒪᒃᑮᓄᑦ ᐱᔭᐅᔪᒪᔪᓂᒃ, ᑲᑐᔾᔨᓗᓂ, ᐅᓪᓗᒥᐅᔫᑉ ᑐᐊᕕᕐᓇᖅᑐᑦ  ᐊᒃᓱᕈᕐᓇᖏᑦ ᓵᑕᐅᔭᕆᐊᖃᖅᐳᑦ. ᖁᔭᒋᕙᔅᓯ ᑐᙵᓇᕐᓂᔅᓯᓐᓄᑦ, ᐃᓱᒪᒋᒐᔅᓯᙵ, ᐃᒃᐱᒍᓱᖕᓂᔅᓯᓐᓄᓪᓗ, ᐅᖓᕐᔪᐊᖅᖢᓯᓗ ᐅᖃᐅᑎᑦᑎᐊᖅᐸᒋᑦ ᑲᓇᑕ ᐃᓄᖏᓪᓗ ᖃᓂᑦᑐᑦ ᐆᒻᒪᑎᓐᓄᑦ.