ᐅᖃᖅᑕᖏᑦ ᐃᔾᔪᕐᓇᐃᓐᓂᖓᑕ ᐃᒃᓯᕋᕐᔪᐊᕌᐱᒃ ᕗᕋᓐᓯᔅ, ᐃᖃᓗᐃᑦ

ᐊᓲᔪᓯ ᖃᑦᑕᙳᑎᒃᑲ ᓇᔭᒃᑲᓗ, ᐅᓐᓄᑦᑎᐊᕙᒃᑯᑦ!

ᑐᙵᓱᒃᑎᑉᐸᒃᑲ ᒐᕙᓄ ᒋᐊᓄᕈᓪ, ᐃᓕᔅᓯᓕᒫᓪᓗ, ᐊᓕᐊᓇᐃᒍᓱᑦᑎᐊᖅᖢᓇ. ᐊᓕᐊᓇᐃᒍᓱᒃᑐᖓ ᑕᕝᕙᓃᖃᑎᒋᔪᓐᓇᕋᔅᓯ. ᖁᔭᒋᕙᔅᓯ ᐅᖃᖅᑕᔅᓯᓐᓄᑦ ᑐᙵᓰᓪᓗᓯ, ᐃᙱᖅᑕᓯᔅᓯᓐᓄᑦ ᑎᑕᒃᑕᓯᓐᓄᓪᓗ, ᐊᓕᐊᓇᐃᒋᓪᓚᖅᑲᐅᔭᒃᑲ!

ᖃᖓᑦᑎᐊᖑᓚᐅᖅᑐᖅ, ᓈᓚᓚᐅᕋᒪ ᖃᔅᓯᑲᓪᓚᓄᑦ ᐃᓕᔅᓯᓐᓂᑦ, ᐃᓕᓐᓂᐊᓚᐅᖅᓯᒪᔪᓄᑦ ᐃᓕᓐᓂᐊᕆᐊᖅᑎᑕᐅᕝᕕᖕᓄᑦ. ᖁᔭᒋᕙᔅᓯ ᓴᐱᖏᓐᓇᔅᓯ ᐅᖃᐅᓯᕆᔭᕆᐊᒃᓴᖅ ᐅᓂᒃᑳᓯ ᐊᒃᓱᕈᕐᔪᐊᕐᓂᓯᓗ. ᑖᒃᑯᐊ ᓄᑖᕈᕆᐊᖅᓯᓯᒪᕗᑦ ᐃᓗᓐᓃᑦᑐᓂᒃ ᓂᙵᐅᒪᕐᔪᐊᕐᓂᕐᓂᒃ ᑕᓗᕈᒃᑯᑎᓂᕐᓂᒡᓗ ᐃᒃᐱᒋᓯᒪᔭᓐᓂᒃ ᑕᖅᑭᓄᑦ. ᐅᓪᓗᒥᑦᑕᐅᖅ, ᑕᕝᕙᓂ, ᐅᖃᐅᑎᔪᒪᕙᔅᓯ ᖃᓄᑎᒋ ᒪᒥᐊᑦᑐᓪᓛᓘᓂᓐᓂᒃ ᐃᓱᒪᒋᔪᓐᓇᐃᖅᑕᐅᔪᒪᓪᓗᖓᓗ ᐱᐅᖏᑦᑐᐊᓗᖕᓄᑦ ᐱᓕᕆᔭᐅᔪᓄᑦ ᐅᓄᖏᑦᑑᖏᑦᑐᓄᑦ ᓴᓐᓂᖓᔪᓕᐅᖅᑐᓄᑦ ᐃᑲᔪᓚᐅᖅᑐᓄᑦ ᐊᑐᐊᒐᓄᑦ ᐃᓕᖅᑯᓯᑐᖃᕆᙱᑕᒃᑯᑦ ᐃᓚᓕᐅᔾᔨᓂᕐᓄᑦ ᑐᓂᓯᓂᕐᓄᓪᓗ ᑖᒃᑯᓇᓂ ᐃᓕᓐᓂᐊᕐᕕᖕᓂ. ᐃᖅᑲᐃᑎᑕᐅᓚᐅᖅᑐᖓ ᐅᖃᖅᑕᐅᔪᓂᒃ ᐃᓐᓇᒧᑦ ᐱᐅᔪᐊᓗᖕᒧᑦ ᐱᔪᒪᓂᐅᓚᐅᖅᑐᒥᒃ ᓄᓇᖃᖅᑳᖅᓯᒪᔪᓂ ᐃᓚᒌᖕᓂ ᓴᖅᑭᓚᐅᙱᑎᓪᓗᒋᑦ ᐃᓕᓐᓂᐊᕐᓂᓕᕆᓃᑦ. ᓴᓂᓕᕇᒃᑎᖦᖢᒋᑦ ᐃᖅᑲᐅᒪᓚᐅᖅᑕᖏᑦ ᑕᐃᔅᓱᒪᓂ ᐅᓪᓗᐃᑦ, ᐃᑦᑐᑦ, ᐊᖓᔪᖅᑳᑦ ᓱᕈᓰᓪᓗ ᖁᕕᐊᓱᒃᖢᑎᒃ ᑲᑎᙵᑎᓪᓗᒋᑦ, ᐅᐱᕐᖔᒧᑦ, ᑎᖕᒥᐊᕋᓛᑦ ᓂᐹᕿᔭᒃᑎᓪᓗᒋᑦ ᖁᕕᐊᓱᒃᖢᑎᒃ ᐊᓈᓇᒥᓂ. ᑭᓯᐊᓂ ᑕᕝᕙᙵᑦᑕᐃᓐᓇᖅ -ᐅᖃᖅᑐᖅ- ᐃᙱᕈᓐᓃᖅᐳᑦ: ᐃᓚᒌᑦ ᐊᕕᒃᑐᖅᑕᐅᓚᐅᖅᑐᑦ, ᐱᐊᕋᐃᓪᓗ ᐊᐅᓪᓚᐅᔾᔭᐅᓪᓗᑎᒃ ᐅᖓᓯᒃᑐᐊᓗᖕᓄᑦ ᐊᖏᕐᕋᒥᓂᑦ. ᐅᑭᐅᕈᓚᐅᖅᑐᑦ ᑭᓱᓕᒫᑦ.

ᐅᓂᒃᑳᑦ ᑕᐃᒪᐃᑦᑐᑦ ᐋᓐᓂᕐᓇᑐᐃᓐᓇᖏᒻᒪᑕ, ᑕᓗᕈᒃᑯᓐᓇᖅᑐᓕᐅᕐᒥᖕᒪᑕ. ᑕᐃᒪᐃᑦᑕᕆᐊᒃᑲᓐᓂᕆᐊᖃᓗᐊᖅᐳᖅ, ᑕᑯᒍᑦᑎᒍᑦ ᓴᓂᐊᓂ ᐅᖃᐅᓯᐊᑕ ᒎᑎᐅᑉ ᑎᓕᐅᕈᑎᖓᓗ:" ᓈᓚᒍᒃ ᐊᑖᑕᐃᑦ ᐊᓈᓇᐃᓪᓗ, ᐅᓪᓗᑎᑦ ᐊᑯᓂᐅᓂᐊᕐᒪᑕ ᓄᓇᓂ ᐊᑕᓃᑦ ᒎᑏᑦ ᑐᓂᓯᒪᔭᖏᓐᓄᑦ ᐃᓕᖕᓄᑦ" (2 ᒨᓯᓯ 20:12). ᑕᐃᒪᐃᕝᕕᒃᓴᖃᓚᐅᖏᑦᑐᑦ ᐅᓄᖅᑐᓄᑦ ᐃᓚᒌᔅᓯᓐᓄᑦ; ᐊᓯᐅᓚᕐᒪᑦ ᕿᑐᕐᖓᐃᑦ ᕿᒪᒃᑎᑕᐅᒐᒥᒃ ᐊᖓᔪᖅᑳᒥᓂᒃ ᓇᖕᒥᓂᕐᓗ ᒐᕙᒪᖃᕈᓯᖏᑦ ᑕᐅᑐᒃᑕᐅᓪᓗᑎᒃ ᑲᑉᐱᐊᓇᖅᑐᑐᑦ ᐋᓪᓚᑐᓪᓗ. ᑕᐃᒃᑯᐊ ᐱᔪᒪᖏᑦᑐᓂᒃ ᐊᔾᔨᖃᓕᖅᑎᑕᐅᓇᓱᒃᑐᑦ ᐃᖅᑲᐃᓐᓇᕈᑕᐅᒋᕗᑦ ᓱᓕᒃᑲᓐᓂᕐᒥᒃ ᐸᐃᑉᐹᖁᑎᓂᑦ ᐅᓂᒃᑳᒥᒃ, ᐃᓄᑦᑎᐊᕙᖕᒧᑦ ᓇᐸᑦ (cf. 1 ᐊᑕᓃᑦ 21), ᑐᓂᓯᔪᒪᓚᐅᖏᑦᑐᖅ ᕙᐃᓂᓄᑦ ᐱᕈᖅᓰᕕᖕᒥᒃ ᐱᑖᕆᓯᒪᔭᒥᓂᒃ ᓯᕗᕚᒥᓂᑦ ᓲᖑᔪᓄᑦ; ᖃᓄᓕᒫᖅ ᐊᖅᓵᖅᓯᔪᒪᓚᐅᖅᑐᑦ ᐱᕈᖅᓰᕕᖕᒥᒃ ᐃᒻᒥᓂᑦ. ᐅᕙᒍᑦᑕᐅᖅ ᐃᖅᑲᐃᕗᒍᑦ ᓲᖑᔪᓂᒃ ᐅᖃᖅᑕᓂᒃ ᔩᓱᓯᐅᑉ ᑕᓗᕈᒃᑯᓐᓇᖅᓯᑎᑦᑎᓲᓂᒃ ᖀᒥᒍᓱᓲᓂᒡᓘᓐᓃᑦ ᐱᐊᕋᑯᓗᖕᓂᒃ (cf. ᒪᑎᐅᓯ 18:6, 10). ᐱᐅᖏᓐᓂᕐᔪᐊᖑᕗᖅ ᓱᕋᒡᓗᒍ ᐊᒃᑐᐊᓂᖅ ᐊᖓᔪᖅᑳᓄᑦ ᕿᑐᕐᖓᒥᓄᓪᓗ, ᓱᕋᒡᓗᒋᑦ ᐃᓅᖃᑎᒌᖃᕐᓂᓕᒫᕗᑦ, ᐋᓐᓂᕐᓗᒋᑦ ᑕᓗᕈᒃᑯᓐᓇᖅᓯᑎᓪᓗᒋᓪᓗ ᐱᐊᕋᑯᓗᐃᑦ!

ᐱᖃᓐᓇᕆᔭᐃᓐᓄᒃᑲ, ᑕᕝᕙᓃᑉᐳᒍᑦ ᐱᔪᒪᓪᓗᑕ ᓯᕗᒧᐊᖃᑎᖃᕈᒪᓪᓗᑕ ᐱᔪᓐᓃᕐᓂᒃᑯᑦ ᐱᑦᑎᐊᖃᑎᒌᓕᕐᓂᒃᑯᓪᓗ, ᐃᑲᔪᖅᑕᐅᓗᑕ ᓴᓇᔨᑦᑎᓐᓄᑦ, ᑐᑭᓯᓇᖅᓯᑎᓪᓗᒋᑦ ᖃᓄᐃᓚᐅᖅᑐᑦ ᐊᓂᒍᕐᓗᒋᓪᓗ ᑕᐃᒃᑯᐊ ᐱᐅᖏᑦᑐᑦ ᖃᓄᐃᓚᐅᖅᑐᑦ. ᑖᖅᑐᒥ ᖃᐅᒻᒪᒍᑕᐅᓇᓱᒃᖢᓂ, ᐃᑭᓯᒪᕙᓯᐅᒃ ᖁᓪᓕᖅ. ᖁᓪᓕᖅ ᖃᐅᒪᖃᖅᑎᑦᑎᑐᐃᓐᓇᖃᑦᑕᓚᐅᖏᑦᑐᖅ ᐊᑯᓂᓂ ᐅᑭᐅᓂ ᐅᓄᖕᓂ, ᐅᖅᑰᓯᑎᑦᑎᖃᑦᑕᓚᐅᕐᒥᔪᖅ ᓂᒡᓚᓱᒡᔪᐊᕐᓇᕐᒥᒃ ᐆᓇᕐᓂᖅ ᓇᒧᙵᖅᑎᖦᖢᒍ. ᑕᐃᒪᓐᓇ, ᐊᑑᑎᖃᑦᑎᐊᖅᐳᖅ ᐃᓅᓂᕐᒧᑦ. ᐅᓪᓗᒥᓘᓐᓃᑦ, ᑖᓐᓇ ᖁᓪᓕᖅ ᐱᐅᔪᐊᓘᓪᓗᓂ ᓇᓗᓇᐃᒃᑯᑕᐅᖏᓐᓇᖅᐳᖅ ᐃᓅᓯᕐᒧᑦ, ᖃᐅᔨᒪᔪᒃᑯᑦ ᐃᓅᓯᖃᕐᓗᓂ ᓵᓚᐅᖏᓪᓗᓂ ᑖᕐᓂᐊᓄᑦ ᐅᓐᓄᐊᑉ. ᑕᐃᒪᐃᑦᑑᕗᓯ, ᑕᐅᕗᖓᓕᒫᖅ ᐅᖃᕈᑕᐅᔪᑦ ᐃᓅᓯᕐᒧᑦ ᐃᓱᓕᑦᑐᓐᓇᖏᑦᑐᒧᑦ, ᖃᐅᒪᔪᒧᑦ ᑭᓇᑐᐃᓐᓇᕐᒧᑦ ᖃᒥᑕᐅᔪᓐᓇᖏᑦᑐᒧᑦ.

ᖁᔭᓕᕗᖓ ᓄᓇᕘᒦᑦᑐᓐᓇᕐᓂᕐᓄᑦ, ᐃᓗᐊᓂ ᐃᓄᐃᑦ ᓄᓇᖓᑦ. ᐃᓱᒪᓇᓱᓚᐅᕋᒪ, ᑲᑎᓚᐅᖅᑎᓪᓗᑕ ᕉᒻᒥ, ᑖᒃᑯᐊ ᓄᓇᒐᓴᒡᔪᐊᑦ ᐃᓂᒋᓯᒪᔭᓯ ᐃᑦᑕᕐᓂᑦ ᐊᓯᓂᑦ ᓄᓇᒋᔭᐅᔪᒃᓴᐅᓇᓱᒋᔭᐅᖏᑦᑐᓂ. ᓇᒡᓕᒋᓕᖅᓯᒪᔭᓯ ᑖᒃᑯᐊ ᓄᓇᐃᑦ, ᐃᒃᐱᒋᓪᓗᒋᑦ, ᐊᓐᓂᕆᓪᓗᒋᑦ ᐱᐅᓯᒋᐊᖅᖢᒋᑦ ᑐᓂᕙᒃᖢᒋᑦ, ᑭᖑᕚᓂᑦ ᑭᖑᕚᓄᑦ, ᑐᙵᕕᓪᓗᐊᑕᑦ ᓲᕐᓗᑐᑦ ᐃᒃᐱᒍᓱᖕᓂᕐᓄᑦ ᐃᓐᓇᕐᓂᒃ, ᐃᓅᖃᑎᒌᓪᓚᑦᑖᕐᓃᑦ ᐸᖅᑭᓃᓪᓗ ᐊᕙᑎᓂᒃ. ᐱᐅᔪᐊᓗᒃᑕᓕᒃ ᐃᓅᖃᑎᒌᖕᓂᕐᒥᒃ ᐃᓕᔅᓯᓐᓄᑦ ᑖᔅᓱᒧᖓᓗ ᓄᓇᒧᑦ ᐊᖏᕐᕋᕆᔭᔅᓯᓐᓄᑦ, ᓲᖃᐃᑦᑕᐅᖅ ᓴᙱᖕᒪᑦᑕᐅᖅ ᓂᙳᓪᓗᓂ, ᖃᓄᐃᒋᐊᓲᖑᓪᓗᓂᓗ ᖃᐅᒪᑦᑎᐊᕚᓗᖕᓄᑦ ᑖᕐᓂᕐᒧᑦ ᐊᕙᓗᒋᔭᒥᓄᑦ ᐅᓄᖅᑐᓂ ᑕᖅᑭᓂ ᐊᕐᕌᒍᒥ. ᑭᓯᐊᓂ ᑖᓐᓇ ᓄᓇ, ᓲᕐᓗᑐᑦ ᐊᑐᓂ ᐃᓄᓕᒫᓄᑦ ᐃᓅᖃᑎᒌᓕᒫᓄᓪᓗ, ᓂᑲᓇᕐᒥᔪᖅᑕᐅᖅ, ᐸᖅᑭᔭᐅᔭᕆᐊᖃᕆᓪᓗᓂᑦᑕᐅᖅ. ᐸᖅᑭᓂᖅ, ᐃᓕᓴᐃᓂᖅ ᐃᓕᓐᓂᕐᓗ ᐸᖅᑭᓂᕐᓂᒃ: ᑖᒃᑯᓄᖓ ᐱᓕᕆᐊᒃᓴᓄᑦ ᒪᒃᑯᒃᑐᑦ ᐱᓗᐊᖅᑐᒥᒃ, ᐃᑲᔪᖅᑕᐅᓗᑎᒃ ᐱᓕᕆᓯᒪᔭᖏᓐᓄᑦ ᐃᓐᓇᖏᑕ, ᖃᐃᖁᔭᐅᓯᒪᕗᑦ! ᐸᖅᑭᒍᒃ ᓄᓇᕐᔪᐊᖅ, ᐸᖅᑭᒃᑭᑦ ᐃᓅᖃᑎᑎᑦ, ᐸᖅᑭᒃᑭᑦ ᐊᑐᖅᓯᒪᔭᓯ ᕿᒪᒃᑕᑦᑎᓐᓂ.

ᒫᓐᓇᐅᔪᖅ ᐅᖃᐅᑎᔪᒪᕙᔅᓯ, ᐃᓄᐃᑦ ᒪᒃᑯᒃᑐᑦ, ᓯᕗᓂᒃᓴᖏᑦ ᑖᔅᓱᒪ ᓄᓇᐅᑉ ᒫᓐᓇᖓᓗ ᕿᒪᒃᑕᑦᑎᓐᓂ ᐊᑐᖅᓯᒪᔪᑦ. ᐅᖃᕈᒪᕗᖓ ᐃᓕᔅᓯᓐᓄᑦ, ᐅᖃᐅᓯᖏᑎᒍᑦ ᐱᓯᓕᐅᒃᑲᕐᔪᐊᑉ: "ᑕᐃᒃᑯᐊ ᐱᑖᕆᓚᐅᖅᑕᑎᑦ ᐊᑖᑕᔅᓯᓐᓂᑦ, ᐱᑖᕆᔪᓐᓇᖅᓯᔭᕆᐊᖃᖅᑕᓯ ᓇᖕᒥᓐᖅᑖᕆᖏᓐᓂᕐᓂ" (ᒍᐃᑦ, ᖤᕙᐅᔅᑦ ᐃ, ᓇᒃᑦ). ᒥᑭᓗᐊᕐᒪᑦ ᐃᓅᓗᓂ ᕿᒪᒃᑕᑦᑎᓐᓂ ᖃᓄᐃᓚᐅᖅᑐᓄᑦ, ᐊᑐᕆᐊᖃᕐᒪᑦ ᐱᑖᕆᔪᓐᓇᖅᓯᓗᒍ ᑐᓐᓂᖅᑯᑕᐅᓚᐅᖅᑐᒥᒃ ᐃᓕᖕᓄᑦ. ᑲᑉᐱᐊᓱᖏᓪᓗᑎᑦ, ᓈᓚᒋᐊᒃᓴᖅ ᑎᓕᐅᕈᑕᐅᔪᓄᑦ ᐃᓐᓇᓂᑦ, ᐃᕿᓪᓗᒋᑦ ᕿᒪᒃᑕᑦᑎᓐᓂ ᐊᑐᓚᐅᖅᑕᑎᑦ ᓄᑖᓂᒃ ᑎᑎᕋᕐᓂᐊᕋᕕᑦ ᕿᒪᒃᑕᑦᑎᓐᓂ ᐊᑐᓚᐅᖅᑐᓂᒃ, ᐊᒃᓱᕈᕐᓗᑎᑦ ᐱᔪᒪᔭᕐᓄᑦ, ᐃᑲᔪᖅᑐᐃᓗᑎᑦ ᐃᓱᒪᒋᓇᒋᑦ ᑕᐃᒪᐃᑦᑐᑦ ᐃᓄᐃᓪᓗ, ᐃᓚᐅᖃᑕᐅᒋᑦ! ᐃᑲᔫᑕᐅᓗᓂ ᖁᓪᓕᖓ ᐃᓅᓯᔅᓯ ᖃᐅᒪᒃᑲᓐᓂᕈᑎᒋᓗᓂᐅᒃ, ᐅᕙᖓᑦᑕᐅᖅ ᐊᖓᔪᒋᔭᐅᓪᓗᖓ ᐃᓐᓇᐅᓪᓗᖓ, ᐱᖓᓱᓂᒃ ᑎᓕᐅᕈᑎᓂᒃ ᐅᖃᐅᑎᔪᒪᕙᔅᓯ.

ᓯᕗᓪᓕᖅᐹᖅ: ᐱᓱᐃᓐᓇᕆᑦ ᖁᒻᒧᑦ: ᓄᓇᖃᖅᑐᑎᑦ ᓄᓇᒐᓴᒡᔪᐊᓂ ᐅᑭᐅᖅᑕᖅᑐᒥ. ᐃᖅᑲᐅᒪᔾᔪᑎᒋᓂᐊᖅᐸᑎᑦᑐᖅ ᑕᕝᕙ ᑎᓕᔭᐅᓯᒪᓂᕐᓄᑦ ᐊᒃᓱᕈᒃᑲᓐᓂᖁᓪᓗᑎᑦ, ᑲᑕᒃᑎᑕᐅᖏᓪᓗᑎᑦ ᐅᒃᐱᕈᓱᖁᔨᔪᓂᒃ ᐃᓕᖕᓂᑐᐊᖅ ᐱᕕᒃᓴᕐᓂᒡᓗ ᐊᑐᖁᔨᔪᓄᑦ ᓴᐃᓕᓂᕐᓄᑦ ᐱᓕᕆᔪᒪᔭᕐᓄᓪᓗ. ᐱᖃᓐᓇᕆᔭᒃᑳ, ᓴᓇᔭᐅᓚᐅᖏᑦᑐᑎᑦ "ᐆᒪᑐᐃᓐᓇᕐᓗᑎᑦ", ᐅᓪᓗᑎᑦ ᐊᑐᕐᓗᒋᑦ ᓇᓕᒧᑎᓪᓗᒋᑦ ᐱᓕᕆᐊᒃᓴᑎᑦ ᐊᓕᐊᓇᐃᒋᔭᑎᓪᓗ, ᑭᓯᐊᓂ ᖃᖓᑕᓗᑎᑦ ᖁᒻᒧᑦ, ᑐᕌᕐᓗᑎᑦ ᐱᓪᓚᑦᑖᓛᓄᑦ ᓱᓕᔪᓄᑦ ᐱᐅᔪᐊᓗᖕᓄᓪᓗ ᐱᔪᒪᓂᕐᓄᑦ ᐊᓐᓂᕆᑦᑎᐊᖅᑕᕐᓄᑦ ᐆᒪᑎᔅᓯᓐᓂ, ᓇᒡᓕᒋᓗᒍ ᒎᑎ ᐱᔨᑦᑎᕋᕐᓗᒋᓪᓗ ᓯᓚᖅᑲᑎᑎᑦ. ᐃᓱᒪᖏᓪᓗᑎᑦ ᐃᓅᓯᕐᒥ ᐱᔪᒪᔭᑎᑦ ᑎᑭᑕᒃᓴᐅᙱᑎᒋᔪᑦ ᖁᓕᑦᑎᓐᓃᑦᑐᑎᑐᑦ ᓯᓚᑐᑦ. ᓴᓇᔭᐅᓚᐅᖅᑐᑎᑦ ᖃᖓᑕᓂᐊᕋᕕᑦ, ᐃᕿᓪᓗᒍ ᑲᑉᐱᐊᓱᖏᓐᓂᖓ ᓱᓕᓂᐅᑉ ᐱᐅᕐᔪᐊᕐᓂᖓᑕᓗ ᐱᑦᑎᐊᕐᓂᐅᑉ, "ᐳᖅᑐᓯ ᑎᓪᓗᒍ "ᐳᖅᑐᓯᑎᓪᓗᒍ ᐱᑦᑎᐊᕐᓂᒃᑯᑦ ᓂᙵᒃᓴᕋᐃᓐᓃᑦ, ᐊᓯᓂᒃ ᐃᒃᐱᒍᓱᒃᐸᒡᓗᑎᑦ, ᐱᔨᑦᑎᕋᕐᖢᒋᑦ ᐊᓯᑎᑦ ᐱᕈᖅᓴᐃᓗᑎᓪᓗ ᐃᓅᖃᑎᒌᖕᓂᕐᓂᒃ". (cf. ᐃᓄᙳᐃᓂᖅ  ᐃᓄᐃᑦ ᖃᐅᔨᒪᔭᑐᖃᖏᑎᒍᑦ ᐅᒃᐱᕆᔭᐅᔪᑦ 3-4). ᐱᕈᖅᓯᐊᒃᓴᓂᒃ ᐱᕈᖅᓴᐃᓗᓂ ᐱᑦᑎᐊᕐᓂᕐᓄᑦ ᓇᒡᓕᒍᓱᒃᑐᒃᑯᓪᓗ ᐸᖅᑭᓂᕐᓄᑦ ᓇᓂᑐᐃᓐᓈᕋᓗᐊᕈᕕᑦ; ᐊᐅᓚᔾᔭᒃᑎᓪᓗᒋᑦ ᐱᓕᕆᔪᒪᑦᑎᐊᕐᓂᖏᑦ ᐅᐸᒃᓯᒪᔭᓕᒫᑎᑦ; ᓯᕗᒧᐊᖏᓐᓇᕐᓗᑎᑦ ᑭᓱᓕᒫᓪᓗ ᓵᒡᓕᑎᖏᓪᓗᒋᑦ.

ᑭᓯᐊᓂ – ᐅᖃᕈᓐᓇᖅᐳᑎᑦ – ᑕᐃᒪᓐᓇ ᐃᓅᓗᓂ ᐊᒃᓱᕈᕐᓇᕐᓂᖅᓴᐅᖕᒪᑦ ᖃᖓᑕᓂᕐᒥᑦ! ᓲᖃᐃᒻᒪ, ᐊᔪᕐᓇᖅᑑᒐᓗᐊᖅ, ᓲᖃᐃᒻᒪ ᐱᑕᖃᕐᒪᑦ ᐃᔨᖅᓯᒪᔪᕐᒥᒃ "ᐊᐅᓚᑦᑎᓂᖅ ᐅᒃᐱᕐᓂᒃᑯᑦ ᓄᓱᒃᓯᓂᕐ"ᒥᒃ ᓄᓱᒃᓯᓇᓱᒃᑐᖅ ᐅᕙᑦᑎᓐᓂᒃ, ᑐᖁᓪᓗᒋᑦ ᐱᔪᒪᔭᕗᑦ, ᒥᑭᒡᓕᒋᐊᖅᑎᓪᓗᒋᓪᓗ ᖁᕕᐊᓱᖕᓂᕗᑦ. ᐃᓱᒪᒌᓐᓇᕈᖅ ᐅᑭᐅᖅᑕᖅᑐᒥᐅᑕᖅ ᖁᐸᓄᐊᖅ ᔅᐹᓂᔅᑎᑐᑦ ᑕᐃᔭᕗᑦ "ᓴᕋᓐ"ᒥᒃ. ᓄᖅᑲᕈᑎᒋᖃᑦᑕᙱᑕᖏᑦ ᐊᒡᒍᕋᕐᓃᑦ ᐊᓯᔾᔨᑳᓪᓚᒃᑐᓪᓘᓐᓃᑦ ᐅᖅᑰᓂᒃᑯᑦ ᖃᖓᑕᓪᓗᓂ ᓄᓇᕐᔪᐊᑉ ᐃᓱᐊᓂᑦ ᐃᓱᐊᓄᑦ. ᐃᓛᓐᓂᒃᑯᑦ, ᐊᓯᐊᒍᑦ ᐊᖅᑯᑎᖃᓲᖅ, ᓂᒍᕆᐊᖃᓲᖅ, ᓱᖏᐅᑎᓗᓂ ᓇᓕᐊᓪᓗᐊᓄᑦ ᐊᓄᕆᓄᑦ... ᑭᓯᐊᓂ ᑐᑭᓯᐅᒪᑦᑎᐊᓲᖅ ᖃᓄᐃᑦᑐᒪᔭᕐᒥᓂᒃ ᑎᑮᓐᓇᐅᔭᖅᖢᓂᓗ ᐅᐸᒐᓱᒃᑕᒥᓄᑦ. ᖃᐅᔨᖃᑦᑕᕐᓂᐊᖅᑐᑎᑦ ᐃᓄᖕᓂᒃ ᐱᐅᖏᓐᓂᕋᐃᔪᓂᒃ ᐃᓅᓯᕐᓂ ᐊᑐᕈᒪᔭᕐᓂᒃ, ᑎᒫᓃᑦᑐᓄᑦ ᐱᖁᔨᔪᓂᒃ, ᐊᒃᓱᕉᑎᒋᔭᑐᐊᕆᓗᒋᑦ ᐱᔪᒪᔭᑎᑦ. ᑕᕝᕙ ᐃᓕᖕᓂᒃ ᐊᐱᕆᔭᕆᐊᖃᓕᕋᔭᖅᐳᑎᑦ; ᖃᓄᐃᒻᒪᑦ ᐊᒃᓱᕈᕆᐊᖃᖅᐳᖓ ᐊᓯᓂᑦ ᐃᓄᖕᓂᑦ ᐅᒃᐱᕆᔭᐅᖏᑦᑐᒧᑦ? ᐅᕝᕙᓘᓐᓃᒃᑲᓐᓂᖅ: ᖃᓄᖅ "ᐳᖅᑐᔪᒃᑰᕈᓐᓇᖅᐳᖓ" ᓄᓇᕐᔪᐊᕐᒥ ᑲᑕᒃᑎᑕᐅᖏᓐᓇᐅᔭᖅᑰᔨᔪᒧᑦ ᑕᓗᕈᒃᑯᓐᓇᖅᑐᓄᑦ, ᐅᓇᑕᕕᒡᔪᐊᖅᑐᓄᑦ, ᓯᓚᐃᕐᕆᓂᕐᓄᑦ, ᐱᑦᑎᐊᖅᑕᐅᖏᑦᑐᓄᑦ, ᐊᕙᑎᓂᒃ ᓱᕋᑦᑎᓂᕐᓄᑦ, ᐃᒃᐱᒍᓱᖏᑦᑐᓄᑦ ᐱᖃᖏᑦᑐᓂᒃ, ᐅᒃᐱᕈᓱᒍᓐᓃᕐᓂᕐᓂᒃ ᐊᔾᔪᒥᒋᔭᐅᔭᕆᐊᓕᖕᓂᒃ? ᓵᑕᐅᓯᒪᓗᓂ ᑖᒃᑯᓄᖓ ᐊᐱᖅᑯᑎᓄᑦ, ᑭᓲᕙ ᑭᐅᔾᔪᓯᖅ?

ᐃᒪᓐᓇ ᐅᖃᐅᑎᓂᐊᖅᐸᒋᑦ: ᑭᐅᔾᔪᑎᐅᔪᑎᑦ! ᐃᕝᕕᑦ, ᖃᑕᙳᑎᒐ, ᐃᕝᕕᓪᓗ ᓇᔭᒐ. ᓴᐱᓕᕈᕕᑦ ᓵᓚᐅᓯᒪᕙᒌᕐᓂᑐᐊᖑᖏᑦᑐᖅ, ᑭᓯᐊᓂ ᓯᕗᓂᒃᓴᖅ ᒫᓐᓇ ᓱᓕ ᑎᒍᒥᐊᕋᕕᐅᒃ. ᓄᓇᓖᑦ ᐃᓅᕝᕕᒋᓚᐅᖅᑕᐃᑦ, ᐊᕙᑏᑦ ᐃᓅᕝᕕᒋᔭᑎᑦ, ᐱᖁᒐᔭᖅᑕᖏᑦ ᓇᓕᒧᑎᑦ, ᑕᐃᒃᑯᓇᙵᑦ, ᐊᐱᕆᓇᑎᒡᓘᓐᓃᑦ ᓂᕆᐅᒃᑐᑦ ᐃᓕᖕᓂᑦ ᐊᓯᔾᔨᒐᒃᓴᐅᖏᑦᑐᓂᒃ ᐱᐅᕐᔪᐊᖅᑐᓂᒃ ᑐᓂᔪᓐᓇᖅᑕᕐᓂᒃ ᐊᑐᖅᑕᐅᓯᒪᔪᕐᓄᑦ; ᑕᒃᑯᐊᓕᒫᖅ ᑎᒍᒥᐊᖅᑕᑎᑦ, ᓲᖃᐃᒻᒪ "ᐊᑐᓂᐅᔪᑎᒍᑦ ᐊᔾᔨᐅᖏᓐᓇᑦᑕ" (cf. ᐅᒃᐱᕆᔭᐅᔪᖅ 5). ᓄᐊᕐᔪᐊᖅ ᐃᓅᕝᕕᒋᔭᐃᑦ ᐱᐅᔪᕐᔪᐊᖑᕗᖅ ᑐᓐᓂᖅᑯᓯᐊᑦ; ᓇᒡᓕᒋᒍᖅ, ᒎᑎᑐᓪᓘᓐᓃᑦ, ᐃᓅᓯᖅᑖᖅᑎᑦᑎᓚᐅᖅᑐᖅ ᐃᓕᖕᓂᒃ ᖁᕕᐊᓇᕐᓂᕐᔪᐊᖏᓐᓂᒡᓗ, ᓇᒡᓕᒋᓪᓗᓂᑎᑦ ᓴᓇᓪᓗᓂᒋᓪᓗ ᑖᒃᑯᐊ ᐱᐅᔪᕐᔪᐊᑦ ᐃᓕᖕᓄᑦ. ᒎᑎ ᐃᓕᖕᓂᒃ ᐅᒃᐱᕈᓱᒍᓐᓃᓚᐅᖅᓯᒪᖏᑦᑐᖅ, ᕿᓚᒥᑯᓘᒐᓗᐊᖅ. ᐅᒃᐱᕈᓱᒃᑐᖅ ᐊᔪᖏᓐᓂᕐᓂᒃ. ᕿᓂᕈᕕᐅᒃ, ᑐᑭᓯᓂᐊᖅᑐᑎᑦ ᐊᖅᑯᑎᒋᖁᔭᖓ ᑐᕌᖏᓐᓇᐅᔭᕐᒪᑦ ᖁᒻᒧᑦ. ᑖᓐᓇ ᑐᑭᓯᓂᐊᖅᑕᐃᑦ ᕿᓚᖕᒧᑦ ᕿᕕᐊᕈᕕᑦ ᑐᒃᓯᐊᕐᓗᑎᑦ, ᐱᓗᐊᖅᑐᒥᒡᓗ ᐃᓱᒪᒋᒍᕕᐅᒃ ᓴᓐᓂᖓᔪᓕᖕᒦᑎᓪᓗᒍ. ᑐᑭᓯᓂᐊᖅᑐᑎᑦ, ᔩᓱᓯ, ᓴᓐᓂᖓᔪᕐᒥᑦ ᐃᓕᖕᓂᒃ ᑎᒃᑯᐊᓚᐅᖅᓯᒪᖏᒻᒪᑦ, ᐃᕿᒃᑳᑎᑦ ᑎᓕᐅᖅᖢᓂᑎᓪᓗ, ᐅᒃᐱᕆᒐᒥᑎᑦ ᐃᓕᖕᓂᒃ ᐅᒃᐱᕆᔪᓐᓃᕌᖓᕕᓪᓘᓐᓃᑦ. ᑕᐃᒪᐃᒻᒪᑦ ᓴᐱᓕᓚᐅᖅᓯᒪᑦᑕᐃᓕᒋᑦ, ᐊᒃᓱᕈᕆᑦ, ᐱᕕᓕᒫᓅᕆᑦ, ᐊᐃᑦᑖᕈᓱᔾᔮᖏᑦᑐᑎᑦ. ᓯᕗᒧᐊᕆᑦ ᓇᒧᙵᐅᔭᕐᓄᑦ, "ᑐᑎᒥᑦ ᑐᑎᒧᑦ ᐱᐅᓛᒧᑦ" (cf. ᐅᒃᐱᕆᔭᐅᔪᖅ 6). ᐊᖅᑯᑎᓯ ᐃᓅᓯᔅᓯᓐᓄᑦ ᑐᕌᒐᑦᑎᐊᕚᓗᖕᒧᑦ: ᖁᒻᒧᑦ!

ᐊᐃᑉᐸᖓ ᑎᓕᐅᕈᑎᒐ ᐅᕝᕙᐅᕗᖅ: ᐃᓯᕆᑦ ᖃᐅᒪᒧᑦ. ᓄᒫᓱᒃᑳᖓᕕᑦ ᑲᑕᖓᓗᑎᓪᓘᓐᓃᑦ, ᐃᓱᒪᒋᒍᖅ ᖁᓪᓕᖅ. ᐃᓕᖕᓄᑦ ᐅᖃᐅᓯᒃᓴᓕᒃ. ᖃᓄᖅ ᐅᖃᐅᓯᒃᓴᓕᒃ? ᖃᐅᒪᒧᐊᖃᑦᑕᕆᐊᖃᕋᕕᑦ ᖃᐅᑕᒫᑦ. ᖃᐅᑕᒫᑦ ᑎᓕᐅᖅᑕᐅᕗᑎᑦ ᖃᐅᒪᒡᒋᖁᓪᓗᑎᑦ ᓄᑖᒥᒃ ᓄᓇᕐᔪᐊᕐᒧᑦ, ᖃᐅᒪ ᐃᔨᖕᓂᑦ, ᖁᖓᑕᕕᑦ ᖃᐅᒪᖓ, ᖃᐅᒪᖓ ᐱᐅᓂᐅᓂᐅᑉ ᐃᕝᕕᐅᔪᖅ ᐃᕝᕕᑐᐊᕐᓗ ᓇᒃᓴᕈᓐᓇᖅᑕᐃᑦ. ᑭᓯᐊᓂ, ᖃᐅᒪᒧᐊᕋᓱᒡᓗᓂ, ᐃᓅᒃᑲᓐᓂᕐᓗᓂ, ᐊᒃᓱᕈᕆᐊᖃᖅᑐᑎᑦ ᖃᐅᑕᒫᑦ ᑖᖅᑐᖅ ᓵᓚᒋᓇᓱᒡᓗᒍ. ᖃᐅᑕᒫᑦ ᐅᓇᑕᕐᒪᑎᒃ ᖃᐅᒪᔪᖅ ᑖᖅᑐᕐᓗ, ᑕᐃᒪᐃᓲᖑᓇᓂ ᓇᓂᑭᐊᖅ ᑕᐅᕙᓂ, ᑭᓯᐊᓂ ᐃᓗᑦᑎᓐᓂ. ᒪᓕᒐᓱᒡᓗᒍ ᐱᖅᑯᓯᖓ ᖃᐅᒪᐅᑉ ᐊᑐᕆᐊᖃᖅᑐᖅ ᓴᐱᖏᓪᓗᓂ ᐃᒃᐱᒋᑦᑎᐊᕐᓗᒋᓪᓗ ᖃᓄᖅᑑᕐᓂᕐᓂᒃ ᒪᓂᖁᓇᒋᑦ ᓴᒡᓗᓃᑦ ᑖᕐᓂᖏᑦ. ᑐᑭᖃᖅᑐᖅ "ᐃᓕᖅᑯᓯᑦᑎᓕᐅᕐᓗᓂ ᐃᓅᑦᑎᐊᕐᓂᐊᕐᒪᑦ" (cf. ᐅᒃᐱᕆᔭᐅᔪᖅ1), ᒪᓕᖏᓪᓗᓂ ᖃᐅᒪᐅᓚᐅᑲᐅᓲᓂᒃ ᐊᓯᐅᑲᐅᖅᑐᓲᓂᒃ, ᖁᒻᒧᐊᒐᐃᑦ ᐳᔫᑐᐃᓐᓇᓲᓂᒃ ᕿᒪᒃᑕᒥᓂᒃ. ᑖᒃᑯᐊ "ᑕᐃᒪᐃᖏᑦᑐᑦ, ᖁᕕᐊᓱᙳᐊᕐᓃᑦ", ᐃᔾᔪᕐᓇᐃᑦᑐᖅ ᔪᐊᓇᓯ ᐸᐅᓗᓯ II ᐅᖃᓚᐅᖅᑎᓪᓗᒍ ᑕᕝᕙᓂ ᑲᓇᑕᒥ: "ᐃᒻᒪᖄᖃᐃ ᑖᕐᓂᖅᓴᖅᑕᖃᙱᓚᖅ ᑖᕐᓂᕐᒥᑦ ᐃᓯᓲᒧᑦ ᒪᒃᑯᒃᑐᑦ ᑕᕐᓂᖏᓐᓄᑦ ᓱᓕᖏᑦᑐᑦ ᐊᔪᕆᖅᓱᐃᔩᑦ ᖃᑎᑦᑎᔭᕌᖓᑕ ᐃᓗᖏᓐᓂ ᖃᐅᒪᓂᒃ ᐅᒃᐱᕈᓱᖕᓂᕐᓄᑦ ᓂᕆᐅᖕᓂᕐᓄᑦ ᓇᒡᓕᖕᓂᕐᓄᓪᓗ" (ᐅᖃᐅᓯᐅᔪᑦ ᓄᓇᕐᔪᐊᕐᒥ ᒪᒃᑯᒃᑐᓄᑦ ᐅᓪᓗᐊᓂ, ᑐᕌᓐᑐ, 28 ᔪᓚᐃ 2002). ᖃᑕᙳᑎᐊᐃᓐᓅᒃ, ᓇᔭᐃᓐᓅᒃ, ᔩᓱᓯ ᖃᓂᑦᑐᖅ ᐃᓕᖕᓄᑦ ᐆᒻᒪᑏᓪᓗ ᖃᐅᒻᒪᒃᑎᑦᑐᒪᔭᖓ, ᖃᐃᑎᓪᓗᓂᑎᑦ ᖃᐅᒪᒧᑦ. ᐃᒻᒥᓂᒃ ᐅᖃᐅᓯᖃᓚᐅᖅᑐᖅ: "ᖃᐅᒪᐅᔪᖓ ᓄᓇᕐᒧᐊᕐᒧᑦ" (ᔪᐊᓇᓯ 8:12), ᐃᕝᕕᑦᑕᐅᖅ ᑕᐃᒪ ᖃᐅᒪᐅᕗᑎᑦ ᓄᓇᕐᔪᐊᕐᒧᑦ ᖃᐅᒪᓂᐊᖅᑐᑎᓪᓗ ᖃᐅᒪᒃᑲᓐᓂᕐᓗᑎᑦ ᐊᒃᓱᕈᕈᕕᑦ ᐊᓂᓐᓇᓱᒡᓗᒋᑦ ᑖᖅᑐᑦ ᑕᕐᕋᑦ ᐱᑦᑎᐊᖏᕐᔪᐊᕐᓂᕐᒥᑦ ᐆᒻᒪᑎᖕᓂᑦ.

ᑕᐃᒪᐃᓐᓇᓱᒡᓗᓂ, ᐊᔪᖏᓐᓂᖅᑕᓕᒃ ᐊᔪᕈᓐᓃᕆᐊᖃᖅᑕᑦᑎᓐᓂᒃ, ᐊᑐᕆᐊᖃᖅᑕᓕᒃ "ᐊᓂᒍᕐᓗᒋᑦ ᐊᒃᓱᕈᕐᓇᕐᓃᑦ ᐃᒡᓗᐊᓄᐊᖅᑐᓪᓗ ᕿᓃᓐᓇᕐᓂᒃᑯᑦ ᖃᓄᖅᑑᕈᑎᓂᒃ" (ᑕᑯᒍᒃ ᐅᒃᐱᕆᔭᐅᔪᖅ 2). ᐱᓕᕆᔾᔪᓯᐅᔪᖅ ᖃᐅᑕᒫᑦ ᐊᕕᒃᓯᓂᕐᒥᒃ ᖃᐅᒪᒥᒃ ᑖᖅᑐᒥᑦ. ᓴᓇᓇᓱᒡᓗᓂ ᓄᓇᕐᔪᐊᑦᑎᐊᕙᖕᒥᒃ, ᐸᐃᑉᐹᖁᑏᑦ ᐅᖃᐅᑎᕚᑎᒍᑦ, ᒎᑎ ᑕᐃᒪᓐᓇᑦᑎᐊᖅ ᐱᒋᐊᓚᐅᖅᑐᖅ, ᐊᕕᒃᖢᒋᑦ ᖃᐅᒪ ᑖᖅᑐᒥᑦ (cf. 1 ᒨᓯᓯ 1:4). ᐅᕙᒍᑦᑕᐅᖅ, ᐱᐅᓂᖅᓴᐅᓕᕈᒪᒍᑦᑕ, ᑐᑭᓯᔭᕆᐊᖃᖅᑐᒍᑦ ᖃᐅᒪᒥᒃ ᑖᖅᑐᒥᑦ. ᓇᑭᑦ ᐱᒋᐊᕐᓗᑕ? ᐱᒋᐊᕈᓐᓇᖅᐳᒍᑦ ᐃᒻᒥᓂᒃ ᐊᐱᕆᓗᑕ: ᑭᓲᕙᑦ ᓯᕗᓪᓕᖅᐹᒥᒃ ᑐᑭᓯᔭᒃᑲ ᕿᓪᓕᖅᑐᑐᑦ ᐱᔪᒥᓇᖅᑐᑐᓪᓗ, ᑭᓯᐊᓂ ᐃᓗᒃᑯᑦ ᐃᓗᓕᖃᖏᕐᔪᐊᖅᑰᔨᓇᖅᖢᑎᒃ? ᑖᓐᓇ ᑖᕐᓂᐅᔪᖅ! ᑭᓱᓕ, ᐊᐃᑉᐸᖓᓂ, ᐱᐅᕙ ᐅᕙᓐᓂ ᓴᐃᓕᓕᕐᓇᕐᓗᓂ ᐆᒻᒪᑎᓐᓂ, ᓯᕗᓪᓕᖅᐹᒥᒃ ᐊᑲᐅᔾᔪᑎᓂᒃ ᖁᔭᓈᖅᓯᖁᒐᓗᐊᕈᓂᖓ ᓵᓚᒋᓗᒋᓪᓗ ᓇᓕᐊᓪᓗᐊᑦ ᑎᒥᐅᑉ ᐊᔪᖏᑉᐸᒌᖅᑕᖏᑦ? ᑖᓐᓇ ᖃᐅᒪᐅᕗᖅ! ᓱᓕ – ᐊᐱᕆᒃᑲᓐᓂᖅᐳᖓ – ᑭᓲᕙ ᓄᑭᒃ ᐊᕕᒍᑎᒋᔪᓐᓇᐅᑎᒋᔭᕗᑦ ᖃᐅᒪᒥᒃ ᑖᖅᑐᒥᑦ ᐃᓗᑦᑎᓐᓂ, ᑭᓲᑉ ᐊᔪᙱᑎᑉᐹᑎᒍᑦ ᐅᖃᕈᓐᓇᕐᓗᑕ "ᐋᒃᑲ" ᐱᔪᒪᓐᓇᕐᓂᕐᓄᑦ ᐱᐅᖏᕐᔪᐊᖅᑐᓄᑦ ᐅᖃᕈᓐᓇᕐᓗᑕᓗ "ᐄ" ᐱᐅᔪᓕᒫᓄᑦ? ᐃᓱᒪᖅᓱᕐᓂᐅᔪᖅ. ᐃᓱᒪᖅᓱᕐᓂᖅ ᑐᑭᖃᖏᑦᑐᖅ ᑭᓱᓕᒫᑦ ᐱᓕᕆᔪᒪᔭᒃᑲ ᐱᓕᕆᓗᒋᑦ ᖃᓄᐃᓕᐅᕈᒪᔭᒃᑲᓗ ᐊᑐᕐᓗᒋᑦ. ᐃᓱᒪᖅᓱᕐᓂᖅ ᐱᔪᓐᓇᕐᓂᐅᖏᒻᒪᑦ ᐅᕙᓐᓄᑦ ᐊᓯᐅᒐᓗᐊᖅᑎᓪᓗᒋᑦ, ᑭᓯᐊᓂ ᖃᓄᐃᓕᐅᕈᓐᓇᖅᐳᖓ ᐊᓯᓄᑦ. ᐃᓱᒪᖅᓱᕐᓂᖅ ᐃᓗᐃᑦᑐᒃᑯᑦ ᐊᓯᔾᔨᑳᓪᓚᖕᓂᐅᖏᑦᑐᖅ, ᑭᓯᐊᓂ ᐱᓕᕆᐊᒃᓴᖃᕐᓂᐅᔪᖅ. ᐃᓱᒪᖅᓱᕐᓂᖅ, ᐱᖃᓯᐅᖦᖢᒍ ᐃᓅᓯᖅ, ᑐᓐᓂᖅᑯᑎᕐᔪᐊᖑᓛᖑᕗᑦ ᕿᓚᖕᒥ ᐊᑖᑕᑦᑕ ᑐᓂᓯᒪᔭᖏᓐᓂᑦ. ᐱᓯᓕᐅᖅᑎ, ᐃᓱᒪᓪᓗᓂ ᖃᓄᑭᐊᖅ ᐊᓕᐊᓇᐃᒍᓱᓛᖑᑎᑦᑎᔪᓐᓇᕐᒪᖔᑦ ᐃᕐᓂᖅ ᐊᑖᑕᒥᓄᑦ, ᑎᑎᕋᓚᐅᖅᑐᖅ ᑐᓴᕐᓂᖅᑐᐊᓗᖕᓂᒃ ᐅᖃᐅᓯᓂᒃ ᐃᓕᖕᓄᑦ ᐅᖃᓕᒫᕈᒪᔭᓐᓂᒃ:

"ᐊᐱᕆᒍᒃ ᑖᓐᓇ ᐊᑖᑕ ᐱᕕᖃᕐᓂᖅ ᐱᐅᓛᖑᖕᒪᖔᑦ
ᕿᑐᕐᖓᖏᓐᓂᑦ ᓇᒡᓕᒋᔭᐅᓕᖅᑎᓪᓗᒎᖏᑦᑐᖅ ᐊᖑᑎᑐᑦ ᓇᒡᓕᒋᔭᐅᓂᖅᑎᑐᑦ, ᐃᒻᒥᑐᓪᓗ ᐊᖑᑎᑐᑦ, ᐃᓱᒪᖅᓱᕐᓗᑎᒃ […].
ᒫᓐᓇ, ᐊᑖᑕᒋᔭᐅᔪᖓ, ᐅᖃᖅᑐᖅ ᒎᑎ, ᖃᐅᔨᒪᓪᓗᒋᓪᓗ ᐃᓄᐃᑦ ᖃᓄᐃᓕᖓᓂᖏᑦ. [...]
ᖃᓄᐃᓕᐅᕐᓂᓕᒫᑦ ᓵᓚᐅᓂᕐᓄᑦ ᓄᓇᕐᔪᐊᕐᒥ ᐅᕙᓐᓂ ᐊᔭᒃᓯᔪᑦ,
ᑭᓱᓕᒫᓂᒡᓗ ᑐᓂᓯᒐᔭᖅᑐᖓ ᑕᑯᒥᓇᖅᑐᒥᒃ ᑕᑯᓗᖓ ᐃᓱᒪᖅᓱᖅᑐᒥᒃ ᐊᖑᑎᒥᒃ [...].
ᑖᔅᓱᒧᖓ ᐃᓱᒪᖅᓱᕐᓂᕐᒧᑦ, ᑖᔅᓱᒧᖓ ᐱᕕᖃᕈᓐᓇᕐᓂᕐᒧᑦ, ᓴᒃᑯᓯᒪᕙᒃᑲ ᑭᓱᓕᒫᑦ, ᐅᖃᖅᐳᖅ ᒎᑎ...
ᓴᓇᓇᓱᒃᖢᒍ ᑖᓐᓇ ᐃᓱᒪᖅᓱᕐᓂᖓ, ᑖᓐᓇ ᐱᕕᖃᕈᓐᓇᕐᓂᖅ,
ᐊᐅᓚᔾᔭᖁᓪᓗᒍ ᑖᓐᓇ ᐃᓱᒪᖅᓱᕐᓂᖅ, ᑖᓐᓇ ᐱᕕᖃᕈᓐᓇᕐᓂᖅ"
(C. ᐱᒍᐃ, ᓇᓗᔭᐅᓂᖏᑦ ᐃᔾᔪᕐᓴᐃᑦᑐᑦ ᐸᓯᔭᒃᓴᐅᖏᑦᑐᑦ).

ᐅᕝᕙ ᒎᑎᐅᑉ ᖁᕕᐊᓱᓕᕈᑎᒋᓲᖏᑦ: ᐃᒻᒥᓄᑦ ᑐᓐᓂᖅᑯᑎᒋᔭᕌᖓᐅᖏᑦᑐᖅ, ᑭᓯᐊᓂ ᐃᓅᓯᖃᕌᖓᑦᑕ ᓱᕈᓯᑎᑐᑦ ᓇᒡᓕᒍᓱᒍᒪᔪᓂᒃ ᐃᒻᒥᓂᒃ, ᓴᒃᑯᖦᖢᒍ ᓇᖕᒥᓂᖅ ᐃᓱᒪᖅᓱᕐᓂᓐᓂ ᑖᔅᓱᒧᖓ ᓂᕈᐊᕐᓂᕐᒧᑦ. ᒎᑎ ᖁᕕᐊᓱᓕᖅᑎᑦᑐᒪᒍᕕᐅᒃ, ᑕᐃᒪᓐᓇᐅᔪᖅ: ᓂᕈᐊᕆᑦ ᐱᐅᓂᕐᒥᒃ! ᓴᙱᒋᑦᑎ, ᖃᑕᙳᑎᒃᑲ ᓇᔭᒃᑲᓗ! ᑎᒍᒥᐊᖅᓯᐅᒃ ᐃᓱᒪᖅᓱᕐᓂᓯ! ᑲᑉᐱᐊᓱᖏᓪᓗᓯ ᐊᒃᓱᕈᕐᓇᖅᑐᓄᑦ ᖃᓄᖅᑑᕆᐊᒃᓴᖅ! ᐅᐸᒋᑦ ᖃᐅᒪᒧᑦ ᖃᐅᑕᒫᑦ!  

ᑭᖑᓪᓕᖅᐹᒧᑦ, ᐱᖓᓱᖓᑦ ᑎᓕᐅᕈᑎ: ᐃᓚᒋᔭᐅᖃᑕᐅᒋᑦ ᑲᑐᔾᔨᔪᓄᑦ. ᒪᒃᑯᒃᑐᑦ ᐃᓄᐃᑦ ᐱᓕᕆᕐᔪᐊᓲᑦ ᑲᑎᙵᓪᓗᑎᒃ, ᐃᓄᑑᖏᖦᖢᑎᒃ. ᐃᓕᔅᓯ ᒪᒃᑯᒃᑑᔪᓯ ᐅᓪᓗᕆᐊᑎᑑᖅᑐᓯ ᕿᓚᖕᓂ, ᓴᖅᑭᔮᑦᑎᐊᓲᕌᓘᓪᓗᑎᒃ ᑕᒫᓂ ᓄᓇᒥ. ᐱᐅᕐᔪᐊᕐᓂᖏᑦ ᐃᓗᐃᑦᑐᒥᙶᖅᑐᖅ, ᓯᕿᓂᖃᖅᑐᓕᒫᓂᑦ ᓴᓇᓯᒪᔭᕐᒥᓂᑦ, ᖃᐅᒪᖃᖅᑎᑦᑎᓪᓗᑎᒃ ᑐᕌᖅᑎᑦᑎᓪᓗᑎᒡᓗ ᐅᓐᓄᐊᓂ ᑕᕝᕙᓂ ᓄᓇᕐᔪᐊᕐᒥ. ᐃᓕᔅᓯᑦᑕᐅᖅ, ᖃᐃᖁᔭᐅᓯᒪᔪᓯ ᐳᖅᑐᓂᖏᓐᓄᑦ ᕿᓚᐅᑉ ᖃᐅᒪᓗᓯᓗ ᓄᓇᕐᔪᐊᕐᒥ ᑕᕝᕙᓂ, ᓴᓇᓯᒪᕗᓯ ᖃᐅᒪᓗᓯ ᑲᑎᙵᓗᓯ, ᐊᑕᐅᑦᑎᒃᑯᑦ. ᒪᒃᑯᒃᑐᑦ ᐃᓄᐃᑦ ᑲᑎᑦᑐᓐᓇᕆᐊᖃᕐᒪᑕ, ᓇᒧᙵᐅᓗᑎᒃ, ᐅᓪᓗᓂ ᐃᓄᑑᖃᑦᑕᕆᐊᖃᙱᑕᖏᑦ, ᓵᓚᐅᓯᒪᓗᑎᒃ ᑕᓚᕘᕋᓛᒧᑦ! ᓯᕐᒥᕐᔪᐊᑦ ᑕᒫᓂ ᓄᓇᓂ ᐃᓱᒪᑎᑉᐹᖓ ᑲᓇᑕᐅᑉ ᐊᓕᐊᓇᐃᒋᓛᖓᓂᒃ ᐱᙳᐊᕐᓂᕐᒥᒃ, ᓯᑯᒥ ᕼᐋᑭᕐᓂᕐᒥᒃ. ᖃᓄᖅ ᑲᓇᑕ ᓵᓚᒃᓴᖃᑦᑕᖅᐸ ᑕᐃᒃᑯᓂᖓ ᐃᓕᓴᕆᔭᐅᔾᔪᑎᒐᓚᖕᓂᒃ ᐅᓕᒻᐱᒃᔅᓂᑦ? ᖃᓄᖅ ᓯᐊᕋ ᓄᔅ ᒪᕆ ᐱᓕᑉ ᐳᓕᓐ ᐃᓯᖅᑎᑦᑎᔪᓐᓇᓚᐅᖅᐸᑦ ᐅᓄᖅᑐᐃᖅᓱᐊᓗᒃᖢᑎᒃ? ᕼᐋᑭ ᑲᑎᑦᑎᖕᒪᑦ ᐱᓕᕆᑦᑎᐊᕋᓱᖕᓂᕐᒥᒃ ᐃᓱᒪᕈᓘᔭᕈᓐᓇᕐᓂᕐᒥᒡᓗ, ᖃᓄᖅᑑᕐᓂᕐᓂᒃ ᑎᒥᒃᑯᓪᓗ ᓴᙱᓂᕐᓂᒃ; ᑭᓯᐊᓂ ᑲᑐᔾᔨᖃᑎᒌᑦ ᓴᐱᖏᓐᓂᖏᑦ ᐃᑲᔫᑕᐅᖏᓐᓇᐅᔭᖅᑐᖅ; ᐊᑑᑎᖃᑦᑎᐊᖅᑐᖅ ᖃᓄᐃᒋᐊᕈᑎᒋᓪᓗᒍ ᓇᓚᐅᑦᑖᒐᒃᓴᐅᖏᓐᓂᖓᓄᑦ ᐊᑐᓂ ᐱᙳᐊᓕᕌᖓᑕ. ᑲᑐᔾᔨᖃᑎᒌᖕᓃᑦ ᑐᑭᓕᒃ ᐅᒃᐱᕈᓱᒡᓗᓂ, ᖃᓄᐃᕐᔪᐊᖅᑐᓂᒃ ᐱᓕᕆᓇᓱᒡᓗᓂ, ᐃᓄᑑᔪᓐᓇᖏᑦᑐᑎᑦ; ᐊᐅᓚᔭᕆᐊᖃᖅᑐᓯ ᐊᑕᐅᑦᑎᒃᑯᑦ, ᐅᑕᖅᑭᔪᓐᓇᕐᓗᓯ ᐊᔪᕈᓐᓃᖅᓴᓗᓯ ᐱᓕᕆᓗᓯᓗ ᐋᖅᑭᕈᓘᔭᖅᓯᒪᔪᓂᒃ ᖃᓄᐃᒋᐊᕐᓂᕐᓂᒃ. ᑲᑐᔾᔨᖃᑎᒌᖕᓂᖅᑕᐅᖅ ᐱᖃᓯᐅᔾᔨᒋᕗᖅ ᐱᕕᓕᐅᕐᓂᕐᓂᒃ ᐊᓯᓄᑦ, ᑐᐊᕕᑲᐅᖅᑐᖅᐸᒡᓗᓂ ᐱᙳᐊᕐᓂᐊᓕᕌᖓᕕᑦ ᐃᑲᔪᖅᑐᕐᓗᒋᓪᓗ ᑲᑐᔾᔨᖃᑎᒌᑎᑦ. ᑕᐃᒪᓐᓇ ᑲᑐᔾᔨᔪᑦ ᐱᖅᑯᓯᓖᑦ!

ᐱᖃᓐᓇᕆᔭᒃᑳ, ᐱᓱᐃᓐᓇᕆᑦᑎ ᖁᒻᒧᑦ, ᐅᐸᒋᑦ ᖃᐅᒪᒧᑦ ᖃᐅᑕᒫᑦ, ᐃᓚᐅᓗᑎᓪᓗ ᑲᑐᔾᔨᔪᓄᑦ! ᑖᒃᑯᐊᓕᒫᖅ ᐱᓕᕆᓗᒋᑦ ᐃᓕᖅᑯᓯᑐᖃᔅᓯᓐᓂ ᑐᓴᕐᓂᖅᑐᑎᒍᓪᓗ ᐃᓄᐃᑦ ᐅᖃᐅᓯᖏᑎᒍᑦ. ᑕᕝᕙᑐᖅ ᑐᒃᓯᐊᕈᑎᒋᓗᒍᓗ, ᓈᓚᒡᓗᓯ ᐃᓐᓇᔅᓯᓐᓂᒃ ᐊᑐᕐᓗᒋᓪᓗ ᑭᓱᕈᓘᔭᖃᕐᓂᖏᑦ ᐱᓕᕆᔾᔪᓯᑐᖃᓯ ᓇᖕᒥᓂᕐᓗ ᐃᓱᒪᖅᓱᕐᓂᓯ, ᐃᕿᓐᓂᐊᖅᐸᓯᐅᒃ ᒎᑎᐅᑉ ᐅᖃᐅᓯᖏᑦ ᓄᖑᔾᔭᐃᖅᓯᒪᔪᑦ ᑐᓂᔭᐅᓯᒪᔪᓪᓗ ᓯᕗᕚᔅᓯᓐᓂᑦ, ᑕᐃᒪᐃᒻᒪᓪᓗ ᑕᑯᓗᒍ ᐃᓄᒃ ᑮᓇᖓ ᔩᓱᓯ ᑲᕋᐃᔅᑑᓯᐅᑉ. ᐱᐅᔪᓂᒃ ᐱᖃᖅᑎᑉᐸᔅᓯ ᐆᒻᒪᑎᓐᓂᑦ, ᐃᓕᔅᓯᓐᓄᓕᒫᕐᓗ ᐅᖃᖅᐳᖓ: ᖁᔭᓐᓇᒦᒃ!